Moumerang er a Jehovah​—El Dios el “Merreder a Taem”

“Ng merreder a taem ma belsechel a kelekolt ma kleald; ng melalem er a re king e orrebet er tir er a kingellir.”​—DANIEL 2:21.

NGMEKERANG A OMONGER?

Ngmekerang a bleob me a ulaoch e ochotii el kmo a Jehovah a otaut a uldesuel er sel taem el bla loterekeklii?

Kede mekerang sel bo dodengei el kmo a Jehovah a Ngike el Dios el “merreder a taem”?

Ngera uchul me a temel a Jehovah el meruul a tekoi a diak lultuil er a tekoi el duubech er a beluulechad me aike el loruul a rechad?

1, 2. Ngera ochotii el kmo a Jehovah a ungil medengelii a belkul a taem?

 UCHEI er a lomeob er a rechad, e a Jehovah el Dios a kiltmokl a olangch el mo sebechir a rechad el omes e mo medengei a taem. Ngar er a ongeua el sils er a omebelel, e ngdilu el kmo: “Le bor ngii a llomes er a eanged el meleakl er a llomes er a klebesei, el olecholt a uchelel a sils, ma uchelel a rak, ma belsechel a kelekolt ma belsechel a kleald.” (Genesis 1:14, 19, 26) Ngkiltmokl a tekoi el oltirakl a soal, me ngmlo uaisei.

² Me lmuut er chelechang e a rescientist a dirkak bo el sebechir el ungil smodii a belkul a taem. A ta el encyclopedia a kmo: “Ngdiak a medengei el kmo ngera belkul a taem.” Engdi a Jehovah a ungil medengelii a belkul, e le ngii “a milebii a eanged” e “mirruul er a beluulchad e omekord er ngii.” Me ngdmu el kmo: “Ngar sel kmal uchelel e ak uluuchais er a mo rsel; ak di mla ouchais er a mo duubech.” (Isaia 45:18; 46:10) Mada me bo dosuub er a rolel a lomeob me a otutel a ulaoch el meketeklii el kmo a Jehovah a olterekokl a taem. Me aikang a mo smisiich a klaumerang er kid er a Jehovah me a Tekingel.

A BLEBELEL A JEHOVAH A SMISIICH A KLAUMERANG

3. Ngera bebil er a tekoi el kmal ulterekokl a temel?

³ A betok el blebelel a Jehovah el meklou me a mekekerei a kmal oltirakl a taem. El ua klekedall el atom el oureor el kmal ulterekokl a temel. Me aike el klok el rruul el ousbech er a atom a kmal diak lemengodech a temel e melemolem el uaisei el sebechel el betok el miliol el rak. A omerollel a planet me a btuch a dirrek el oltirakl er a mla moterekokl el temel, me a rechad a sebechir el lomes e mo medengei a blsechel a kleald me  a kelekolt. Te dirrek el omes e mo sebechir el omtab e mo medengei a rolir. A Jehovah el “klisichel a imis el klou,” a mileob aika el rokui, me ngrredemelel a odanges.​—Monguiu er a Isaia 40:26.

4. Ngera me a blebelel a Jehovah el kmal oltirakl a taem a ochotii a llemesel a rengul?

⁴ Kid a kiei er a beluulechad el merael el oltirakl a taem. A betok el dellomel me a charm a kmal ulterekokl a temel me a okurulel. El ua suebek el charm el medengelii a taem el mo kirir el melukl el mo er a ta er a basio. (Jeremia 8:7) A bedengir a rechad a dirrek el ulebeob el oltirakl a taem. Me a lsekum e kede ngar er a skoki el mo er a bebil er a beluu el ngodech a temel, e a bedenged a ousbech a sese el klebesei el omeksau er ngii el mo oltirakl a temel sel beluu. Me nguaisei, a bleob a ochotii el kmo a Jehovah a kot el mesisiich e mellomes a rengul el Dios el “merreder a taem.” (Monguiu er a Psalm 104:24.) Me ngbleketakl el kmo, a klisichel me a llemesel a rengul a diak a telkelel, me kede oumerang el kmo ngmo otaut a telbilel!

ULAOCH EL MUTAUT A SMISIICH A KLAUMERANG

5. (a) Ngera di ta el rolel e ngsebeched el mo medengei a tekoi er a ngar medad? (b) Ngera uchul me a Jehovah a sebechel el ouchais a tekoi el mo duubech me a ulterekokl el temel?

⁵ A blebelel a Jehovah a osisecheklid el kirel a “diak le meues el blekerdelel,” engdi ngdiak el sebechel el onger a meklou a ultutelel el ker el ua: Ngmo ua ngerang a klengar er a rechad er a ngar medad? (Rom 1:20) A di ta el rolel e ngsebeched el metik a nger er ngii a oeak sel dosuub er a Biblia, e le betok el ulaoch er a chelsel a mlutaut er a ulterekokl el temel! A Jehovah a omlaoch aike el mo duubech e le ngsebechel el mo medengelii a ngar medad. Me a lmuut el tang a ulaoch er a Biblia a blechoel el mo tmaut er a ulterekokl el blsechel, e le Jehovah el Dios a sebechel kutmokl a tekoi el mo oltirakl a moktek er ngii me a temel.

6. Ngera ochotii el kmo a Jehovah a soal a bo dodengei a otutel a ulaoch er a Biblia?

⁶ Alta e a Dios a diak lomes a taem el uai kid, engdi sel louchais aike el mo duubech er a ulterekokl el temel e ngousbech a tekoi el beot er kid el mo medengei. (Monguiu er a Psalm 90:4.) El ua tiang, a babier er a Chocholt a mesaod er “tirikal teual anghel el mlekedmokl el kirel sel sikang, er sel sils, er sel buil, er sel rak,” el uluusbech a tekoi el dodengei a belkul. (Chocholt 9:14, 15) Me sel domes aike el ulaoch el mlutaut er a ulterekokl el temel, e ngsmisiich a klaumerang er kid er Ngika el Dios el “merreder a taem” me a Tekingel el Biblia. Me bo dosaod a bebil er aika el ulaoch.

7. Ngmekerang a ulochel a Jeremia el kirel a Jerusalem me a Juda e ochotii el kmo a Jehovah a otaut a moktek er ngii er a ulterekokl el temel?

⁷ A kot e bo dosaod er a tekoi el dilubech er a bekord el 700 el rak er a uchei er a Kristus. Me sel “ongeua er a rak el le king er a Juda a Jehoiakim el ngelekel a Josia, e a tekingel a [Jehovah] a mlor a Jeremia el kirir a re chad er a Juda.” (Jeremia 25:1) A Jehovah a ulemlaoch er a telemellel a Jerusalem me a rechad er a Juda el mengai el mo sibai er a Babilon, me te mo “mesiou er a king er a Babilon el 70 el rak.” A resoldau er a Babilon a tilemellii a Jerusalem er a 607 el rak er a uchei er a Kristus me a Rechijudea a mlengai el mo er a Babilon. Me ngera dilubech er a ulebengelel a 70 el rak? A Jeremia a ulemlaoch a tekingel a Jehovah el kmo: “Sel le merekui a 70 el rak er a Babilon, e ak mo oldingel er kemiu e mo kudmokl a ikel telbilek el ekor kemiu. Ak mo olutemiu el mer tial beluu.” (Jeremia 25:11, 12; 29:10) Me tia el ulaoch a tilaut er sel ulterekokl el blsechel el mle 537 el rak er a uchei er a Kristus, er sera lotebedeterir a Rechijudea er a Babilon a rechad er a Media me a Persia.

8, 9. Ngmekera ulochel a Daniel e ochotii el kmo a Jehovah a Dios el “merreder a taem”?

 ⁸ Bekord el eru el rak er a uchei er a letobed er a Babilon a Rechijudea, e a Dios a ulemlaoch el okiu a profet el Daniel el kmo a Messias a me duum er a 483 el rak er a uriul er a letobed a tekoi el mo meleketek er a Jerusalem. Me tia el tekoi a lultebedii a King er a Media me a Persia er a 455 el rak er a uchei er a Kristus. Me sel rak er a 29, e ngmla mo chuib a 483 el rak er a letobed tia el tekoi, e a Jesus er a Nazareth a mlo metecholb e mlucheluch el Messias el okiu a oureor el klisichel a Dios. *​—Nehemia 2:1, 5-8; Daniel 9:24, 25; Lukas 3:1, 2, 21, 22.

⁹ Ka momtab er a ulaoch er a Biblia el kirel a Renged. Ngulechotii el kmo a Rengedel a Messias a mo meteketek er a eanged er a rak er a 1914. El ua tiang, a Biblia a milsaod er a “olangch” el kirel a demiel a Jesus e dirrek el smodii el kmo sel taem e a Satan a mo modik er a eanged el me er tia el chutem el mo uchul a klou el chelebuul. (Matteus 24:3-​14; Chocholt 12:9, 12) Me a lmuut el tang a ulaoch er a Biblia a dirrek el melutk er sel ulterekokl el taem el 1914 el “bo le mecherrungel a taem rar Chisentail,” me a Jesus bo lomuchel el mengedereder el ngar er a eanged.​—Lukas 21:24; Daniel 4:10-​17. *

10. Ngera el tekoi a mo mutaut er sel ulterekokl el temel?

¹⁰ A Jesus a ulemlaoch el kirel a “kloul ringel” el kmedu el mo er ngii. E a uriul e ngmo mengedereder el ta el telael rak. Me kede medengei el kmo aika el tekoi a mo mutaut er sel ulterekokl el temel, e le sel taem er a dirk lengar tia el chutem a Jesus, e a Jehovah a mla oterekeklii a ‘sils ma sikang’ el bo lemotaut aika el tekoi.​—Matteus 24:21, 36; Chocholt 20:6.

BO MUNGIL EL OUSBECH A TEMEM

11. Ngerang ngrullii el kired sel dodengei el kmo ngkmedang a ulebongel?

¹¹ Ngerang rullii el kired sel bo dodengei el kmo a Kristus a mla omuchel el mengedereder me kid a kiei er a “taem er a ulebongel”? (Daniel 12:4) A rebetok a omes er a blekeradel er a beluulechad el merael el mo mekngit, engdi ngdiak lodengei el kmo aika el tekoi a lulemlaoch a Biblia el kirel a uriul el sils. A rebebil a oumerang el kmo tia el blekeradel a kmal di merael el mo mekngit, e a rekuk bebil a oumerang el kmo a rechad a sebechir el kutmeklii a ‘budech, ma rokui el tekoi a di mo ungilbesul.’ (1 Thesalonika 5:3) E kid a kuk mekerang? A lsekum kede oumerang el kmo kede kiei er a ulebengelel tia el beluulechad er a Satan, e kede mo ungil el ousbech a temed el mesiou er a Jehovah e ngosuterir a rebebil el mo medengelii. (2 Timoteus 3:1) Me ngkired el mo ungil el melilt a tekoi el doruul el  ousbech a bek el techelled.​—Monguiu er a Efesus 5:15-​17.

12. Ngera kede suubii er a tekingel a Jesus el kirel a taem er a Noah?

¹² Ngkmal betok a tekoi er tia el beluulechad el sebechel el chosengkid me ngmo diak dungil el ousbech a temed. A Jesus a dilu el kmo, “Le be ldum a Ngelekel a chad e ngua sel taem ra Noah.” Ngmle ua ngerang a taem er a Noah? A Dios a dilu er a Noah el kmo, ngmo okngemedii a beluulechad me a remekngit el chad a mo nguemed er a ieleb. A Noah el “ngikel omerk ra llemalt” a mle blak a rengul el ouchais er a klemechel a Dios er sel taem er ngii. (Matteus 24:37; 2 Petrus 2:5) Engdi a rechad a “mlenga e melim, e mo bechiil e melibuk a chebechiil, . . . e dimlak lolechesiu el mo lmuut er sera le me eeleb el okngemedeterir el rokui.” Me a Jesus a milengelechel er a rulebengkel el kmo: “Misei e ngkiriu el di kldmokl; le Ngelekel a chad a mei ra diak dolechesuar el sikang.” (Matteus 24:38, 39, 44) Me ngkired el mo ua Noah, e lak deua rechad er sel taem. Ngera mo ngosukid el di kltmokl?

13, 14. Ngera el tekoi el kirel a Jehovah a kired el melatk er ngii me bo el sebeched el ungil mesiou er ngii er chelecha el dongiil er a demiel a Ngelekel a chad?

¹³ Alta e a Ngelekel a chad a mei er a diak dodengelii el taem, engdi ngdiak dobes el kmo a Jehovah a otaut a moktek er ngii er sel bla loterekeklii el taem. Me a temel el meruul a tekoi a diak lultuil er a tekoi el duubech er a beluulechad me a moktek er a rechad, e le Ngii a odereder e oterekokl a tekoi me a temel me bo leketmokl a soal. (Monguiu er a Daniel 2:21.) El ua lolekoi a Osisechakl 21:1 el kmo: “A rengul a king a omoachel el longedereder er ngii a [Jehovah], ng orrael er ngii el mor sel soal.”

¹⁴ A Jehovah a sebechel el omtebechel a tekoi me bo lemotaut a moktek er ngii er sel bla loterekeklii el taem. Me a betok el meklou el omeldechel a blekeradel er a beluulechad a otaut a ulaoch er a Biblia el kirel a berkel a ungil el chais er a Rengedel a Dios er a beluulechad el rokir. Ka molatk a tekoi el dilubech er a uriul er a bo lak longedereder a Soviet Union. A rebetok a dimlak lomdasu el kmo ngdi mereched el mengodech a blekeradel er a kabelment. Engdi ngoeak aika el omeldechel a tekoi e a berkel a ungil el chais a mla oberk el mo er a betok el beluu el ngii a ulemtok er tia el ureor er a uchei. Me bo dousbech a bek el techall el blak a rengud el mesiou er Ngika el Dios el “merreder a taem.”

MOUMERANG ER A ULTEREKOKL EL TEMEL A JEHOVAH

15. Kede mekerang e ochotii a klaumerang sel lebo er ngii a omeldechel a tekoi er a cheldebechelel a Dios?

¹⁵ Kede oumerang el kmo a Jehovah a mo otaut a moktek er ngii a uchul, me kede melemolem el omerk er a klumech er chelecha el uriul el sils. Me a omeldechel a blekeradel er a beluulechad a uchul e a lebebil er a taem e a cheldebechelel a Jehovah a mo ngmodech a tekoi el ngosukid el merkii a klumech el ngar er a ungil el rolel. Kede ochotii a klaumerang er kid er Ngike el Dios el “merreder a taem” sel dekengei el mo oltirakl a omeldechel a tekoi, e dolemolem el mesiou el ngar er cheungel a Ngelekel el ngii a ‘bdelul a ongdibel.’​—Efesus 5:23.

16. Ngera uchul me kede oumerang el kmo a Jehovah a ngosukid er sel ungil blsechel?

¹⁶ A Jehovah a soal a doluluuch el mo er ngii el ulterekokl a rengud el kmo ngmo “ngosukid sel dousbech er ngii.” (Hebru 4:16) Tiang a ochotii el kmo ngkmal betik a rengul e omekerreu er a derta er kid. (Matteus 6:8; 10:29-​31) Kede ochotii a klaumerang el mo er a Jehovah sel doluluuch el olengit a ngeso e dekengei el oltirakl a ulekrael er ngii. Ngdirrek el ungil a doluluuch el kirir a rudam me a rudos er kid.

17, 18. (a) A Jehovah ngdi kmedung el mo mekerang er a recherrouel? (b) Ngkired el oltngakl a ngera el uldasu?

 ¹⁷ Chelechang e ngdiak el taem el ‘doumededenger ra telbilel a Dios,’ e ngbai taem el kirel el mo mesisiich a klaumerang er kid. (Rom 4:20) A cherrouel a Dios el Satan me a rechedal, a melasem el merrob er a ureor el Jesus a ulterekeklii er a rulebengkel, el uldimukl er kid. (Matteus 28:19, 20) Me alta e a Diabelong a oldechelakl er kid engdi kede medengei el kmo a Jehovah a “dingar el Dios, el Osobel ra rokuil chad, el kmal Osobelir tirikel oumerang.” Ngdirrek el “lolsobel er tir ra chelsel chomengarm.”​—1 Timoteus 4:10; 2 Petrus 2:9.

¹⁸ Ngdi kmedung e a Jehovah a mo okngemedii tia el mekngit el blekeradel. Me alta ngdiak dodengei a komakai el omesodel me sel ulterekokl el temel a Jehovah, engdi kede medengei el kmo a Kristus a mo okngemedeterir a recherrouel a Dios, e dirrek el mo kobkellii a omengederederel a Jehovah. Sei a uchul me ngkired el omtab er a belkul a taem el dekiei er a chelsel! Me lak bo el cheleuid a uldesued el omdasu el kmo a rokui el tekoi a “direkak le mengodech er sera uchelel er a lobeob a belulechad el mei.”​—1 Thesalonika 5:1; 2 Petrus 3:3, 4.

‘MONGIIL ER A DIOS’

19, 20. Ngera uchul me ngkired el mengiil er a temel a Jehovah?

¹⁹ A Jehovah a milebeterir a rechad el kirir el kiei el mo cherechar e lolemolem el mesuub el kirel me aike el rokui el klebokel el blebelel. A Biblia a kmo: “Ngmilenglebokel a rokui el tekoi el ngar er a ulterekokl el temel. Ngmo lmuut er a urungulir el kiei el diak a ulebengelel me nglilia er a chelsel a rengrir, e le rechad a diak el sebechir el mo ungil el medengei a urerel a mera el Dios er a uchelel el mo lmuut er a ulebengelel.”​—Olisechakl 3:11, NW.

²⁰ Ngkmal ungil a rengud e le Jehovah a dirkak lemengodech a moktek er ngii el kirel a klechad! (Malakai 3:6) A Biblia a ochotii el kmo a Dios a “diak le mengodech malechub e le ngarngii a mengedengodech el chuu er ngii.” (Jakobus 1:17) A chuu a blechoel el mengedengodech el oltirakl er a omerollel a beluulechad, engdi a Jehovah a meruul a tekoi el oltirakl er a ungil el temel, e le Ngii a “King ra ikel bek el taem.” (1 Timoteus 1:17) Me a leuaisei, e bo leblak a rengud el “mengiil er a Dios el mo olsobel er [kid].” (Mika 7:7) Me “bo mesisiich, mukduch a rengmiu, kemiu el rokui el omeltkiu a ngar a [Jehovah].”​—Psalm 31:24.

[Aike el Footnote]

[Aike el Ker er a Suobel]

[Siasing el ngar er a 25 el llel]

A Daniel a uluumerang er a otutel a ulochel a Dios

[Siasing el ngar er a 27 el llel]

Kau ke ousbech a bek el techall el meruul a soal a Jehovah?