A Jehovah a Ocholt Aike el “Ulterekokl Mereched el Morngii el Tekoi”

“Tia chochotel a Jesus Kristus, el Dios a milsang el kirel loleisech rar mesiungel a ikel ulterekokl mereched el morngii el tekoi.”​—CHOCHOLT 1:1.

NGMEKERANG A OMONGER?

Ngera el klekedellel ngika el bleob a omtechei er a Renged er a Britain me a Merikel?

Ngmilekerang a Johanes er a losaod er a deleuill er a Renged er a Britain me a Merikel me a United Nations?

Ngmekerang a Daniel me a Johanes a losaod er sel mo ulebongel er a omengederederel a klechad?

1, 2. (a) Aike el ulaoch er a Daniel me a Johanes ngngosukid el mo mekerang? (b) Ngomtechei er a ngerang aike el kot el elolem el bdelul a tebelik el charm?

 AIKE el ulaoch er a Daniel me a Johanes a kutmeklii a rolel me ngsebeched el mo medengei a belkul a betok el tekoi el meketmokl er chelechang me a dirk merael el mei el tekoi. Me ngera kede suubii sel domekesiu a ues er a Johanes el kirel a tebelik el charm, me a ues el lilsang a Daniel el kirel a kdekudel el charm el teruich a orsul me sel omesodel el kirel a bleob el chaus? Me kede mo mekerang sel bo dodengei a belkul aika el ulaoch?

² Me bo dosaod a ues er a Johanes el kirel a tebelik el charm. (Chocholt 13 el bliongel) Aike el kot el elolem el bdelul a tebelik el charm a omtechei a renged er a Ekipten, Asiria, Babilon, Media me a Persia, Gris me a Rom el ua dulsaod er sel mlo merek el suobel. Aika el rokui a uluuketui er a uldidellel a rsechel a redil. (Genesis 3:15) Sel ongelolem el bdelul el omtechei er a Rom a millemolem el mengedereder el betok el dart el rak er a uriul er a loluches er a ues el lilsang a Johanes. Me a cherengel a taem, e ngmlo diak a renged er a Rom e a uriul e ngmle duum a ongeuid el bdelul a charm. Me a leuaisei, e ngera sel klou el renged e ua ngerang a omerellel el mo er a uldidellel a rsechel a redil?

BRITAIN ME A MERIKEL A MO NGUU A KLISIICH

3. Ngomtechei er a ngerang a kdekudel el charm me aike el teruich el orsul?

³ Ngsebeched el dongchii a ongeuid el bdelul a tebelik el charm er a 13 el bliongel er a Chocholt sel domekesiu a ues er a Johanes me sel ues er a Daniel el kirel a kdekudel el charm el teruich a orsul. * (Monguiu er a Daniel 7:7, 8,  23, 24.) A charm el lilsang a Daniel a omtechei er a Renged er a Rom. (Momes er a 14-​15 el llel.) Ngar er a bekord el 400 el rak er a uriul er a Kristus, e a Renged er a Rom a ulemuchel el obii el mo kakerous el renged. Me aike el teruich el orsul el dilubech er a bdelul a kdekudel el charm a omtechei aike el ulebii el renged.

4, 5. (a) Ngera ngrirellii sel kekerei el orus? (b) Ngerang ngomtechei er ngii a ongeuid el bdelul a tebelik el charm?

⁴ Ngar er ngii a lmuut el omesodel a eua el orus me a lechub e ngrenged, el dilum er a bdelul ngika el kdekudel el charm. Sel “kekerel orus” a dilubech e mlo mesisiich er aike el edei el renged. Me tiang a tilaut er sel taem el Britain, el ngii a mle chederedall er a Renged er a Rom, a mirrael el mo mesisiich el renged. Ngar er a bekord el 1600 el rak er a uriul er a Kristus, e a Britain a dirkak bo lemesisiich el renged. Aike el edei el renged er a Rom, el Sebangiol, Netherland me a France a bai mle mesisiich el renged. E a Britain a uluuderta aike el beluu el mo mesisiich er ngii. Ngar a bekord el rak er a 1763 e a Britain a mirrael el mo mesisiich el beluu er a beluulechad. Engdi ngdirkak lebo lemoterekokl el kmo ngii a ongeuid el bdelul a tebelik el charm.

⁵ Me alta e a Britain a mlo mesisiich el beluu, engdi aike el beluu er a Merikel el mle chederedall er ngii a mlo ileakl. Engdi a klsoldau er a daob er a beluu er a Britain a millemolem el omekerreu er a Merikel me ngmirrael el mo mesisiich. Me sel sils er a Rubak el ulemuchel er a 1914, e a Britain a mla toketekii a mesisiich el renged, e a Merikel a mla mo kot el mesisiich a rolel a kerruul er ngii. * Me sel taem er a Kot el Mekemedil a Beluulechad, e a Britain me a Merikel a mlo dmak el oureor el milekedbechii sel ongeuid el bdelul ngike el charm. Ngmle ua ngerang a omerellel el mo er a uldidellel a rsechel a redil?

6. Ngmle ua ngerang a blekerdelel a ongeuid el bdelul a charm el bedul a rechedal a Dios?

⁶ Me ngdi mle telkib er a uriul er a lomuchel a sils er a Rubak, e a ongeuid el bdelul a charm a mlo oldechelakl er a rechedal a Dios, el tirke el medechel el odam er a Kristus el ngar er tia el chutem. (Matteus 25:40) A Jesus a uluuchais el kmo sel taem er a demiel, e tirke el medechel el chedal a uldidellel a rasech a mesiou el ngar er tia el chutem. (Matteus 24:45-​47; Galatia 3:26-​29) Me a Renged er a Britain me a Merikel a mlo oldechelakl er tirka el chedal a Dios. (Chocholt 13:3, 7) Me sel taem er a Kot el Mekemedil a Beluulechad, e ngulemtok er a rechedal a Dios, e mlerrob er a omerusel a babilengir, e mengelebus er a rechedal a blak a rengul el mesiou. Me sel ongeuid el bdelul ngika el tebelik el charm a ua lulekodir tia el ureor er a berkel a klumech el kirel a telkib el taem. A Jehovah a mle medengelii tia el tekoi me ngulechotii er a Johanes. Ngdirrek el uluuchais er a Johanes el kmo tirke el chedal a uldidellel a rsechel a redil a lmuut el mo toketekii a ureor er a berkel a klumech. (Chocholt 11:3, 7-​11) Me a reksi er a rechedal a Jehovah er chelechang a oterekeklii el kmo ngmera el mileketmokl aika el tekoi.

A RENGED ER A BRITAIN ME A MERIKEL ME A UACH EL RRUUL ER A DEEL ME A CHUTEM

7. Ngera el klekedellel a bleob el chaus a osisiu a belkul ngii me a ongeuid el bdelul a charm?

⁷ A ochil a bleob el chaus a di osisiu a belkul ngii me a ongeuid el bdelul a charm, el ngii a Renged er a Britain me a Merikel. Me a Britain a mlei el okiu a Renged er a Rom. E a Merikel a ulekiu a Britain e mo er ngii, me ngsebeched el melekoi el kmo a Merikel a dirrek el mlei el okiu a Rom. A Bades a mesaod er a ochil a bleob el kmo ngurrechomel el deel me a  chutem. (Monguiu er a Daniel 2:41-​42.) Tia el omesodel a ochil a bleob a dilubech er sel taem el ongeuid el bdelul a charm, el ngii a Renged er a Britain me a Merikel, a mirrael el mo mesisiich. Me tia el ochil el urrechomel er a deel me a chutem a kuk mechitechut er a di deel, me ngdi osisiu, a Renged er a Britain me a Merikel a kuk mechitechut er sel Renged er a Rom. El oeak a ngera el rolel?

8, 9. (a) Ngmilekerang a ongeuid el renged e ochotii el kmo ngua klisichel a deel? (b) Ngomtechei er a ngerang a chutem el ngar er a ochil a bleob?

⁸ A lebebil er a taem e a Renged er a Britain me a Merikel a ulebeketakl a klisichel el ua deel. El ua tiang, ngmlo mesisiich er a Kot me a Ongeru el Mekemedil a Beluulechad e dirk olecholt er a klisichel el me lmuut er chelechang. * Engdi sera lekot el me duum a ongeuid el bdelul, e a deel a mla murachem er a chutem.

⁹ A remesiungel a Jehovah a meketeketang er a lolasem el mo medengelii a belkul a ochil a bleob el chaus. A Daniel 2:41 a mesaod er a urrechomel el deel me a chutem el ua chimo el “renged.” E a bades a dirrek el mesaod er a chutem el kmo “re di chad.” (Daniel 2:43, NW) Me a leuaisei e a chutem a omtechei er a rechad, el omerellir me a blekerdelir a rullii a Renged er a Britain me a Merikel me ngmechitechut er a Renged er a Rom. A rechad el chederedall er tia el renged a mla choitechetur sel klisichel el ua deel el oeak sel lolisiich a uldesuir me a llemeltir, e a lebebil e te melasem el meleakl er tir me bo lak el chederedall er ngii el renged. Me a rechad er a balatiks a dirrek el kakerous a uldesuir, me sel lebo el kats a ta er tir er a sengkio e ngmo meringel er ngii el melisiich a uldesuel me aike el tekoi el letilbir el mo meruul. A Daniel ulemlaoch el kmo: “A renged a mo mesisiich, e ngdi di beot el metemall.”​—Daniel 2:42; 2 Timoteus 3:1-3.

10, 11. (a) Ngera mo duubech er a ochil a bleob? (b) Ngar er ngii a ileakl el belkul a ildisel a cheldngelel a ochil a bleob?

¹⁰ Chelecha el taem, e a Britain me a Merikel a dirk melemolem el dmak el oureor. A ulaoch el kirel a bleob me a charm a meketeklii el kmo ngdikea lmuut el ngodech el renged el mei el mo mesisiich er a Renged er a Britain me a Merikel. Me alta e tia el ulebongel el renged a diak el mesisiich el ua Rom, engdi ngdiak el sebechel el di ngii el mo nguemed.

¹¹ Me ngngar er ngii a ileakl el belkul a ildisel a cheldngelel a ochil a bleob? Ka di molatk, ngar er a bebil er a ues e a Daniel a ulemasech a ildisel a orus el ngar er a bdelul a kakerous el charm, e aika el ildisel a orus a ngar er ngii a belkul. Engdi a Daniel a dimlak losaod a ildisel a cheldngelel a ochil a bleob. Me a leuaisei, e aika el ildois a diak a ileakl el belkul, el ua eru el ochil me a ildisel a cheldngelel a chimal a bleob el diak a ileakl el belkul. Ngbai mle ileakl el mesaod el kmo a cheldngelel ochil a urrechomel el deel me a chutem. Me ngoeak tia el omesodel, e kede mo medengei el kmo a Renged er a Britain me a Merikel a dirk mengedereder er sel taem, el “bad” el omtechei er a Rengedel a Dios a mo subechii er a ochil a bleob.​—Daniel 2:45.

BRITAIN ME A MERIKEL ME A ERUO ORSUL EL CHARM

12, 13. Ngomtechei er a ngerang a eruo orsul el tebelik el charm, e ngera ngmo meruul er ngii?

¹² Me alta e a Renged er a Britain me a Merikel a ua urrechomel el deel me a chutem, engdi a ues el Jesus a milsang a Johanes a ochotii el kmo tia el renged a ngar er ngii a ileakl el tekoi el bo lerellii er a uriul el sils. El mo mekerang? A Johanes a milsang a ues el kirel a eruo orsul el charm el melekoi el ua drakon. Ngomtechei er a ngerang ngika el charm? Ngar er ngii a eru el orsul, el belkul a kmo ngrengedel a eru el beluu. Me ngika el charm a dirrek el omtechei er a Renged er a Britain me a Merikel el meruul er a ileakl el tekoi.​—Monguiu er a Chocholt 13:11-​15.

 ¹³ Me ngika el eruo orsul el charm a rulleterir a rechad el mo meruul er a okesiu el tebelik el charm el ngar er ngii a kleuid el bdelul. A Johanes a milluches el kirel ngika el okesiu el tebelik el charm el kmo ngme duum, e mo dibus, e lmuut el me duum. Me tia el tekoi a kmal dilubech er sel taem el Britain me a Merikel a millasem el oldak a beluu el meleketek er a cheldebechel el mo meruul a tekoi el omtechei a rokui el renged er a beluulechad. * Me tia el cheldebechel a milteketek er a uriul er a Kot el Mekemedil a Beluulechad el okedongall el League of Nations. Ngmlo dibus er a taem er a Ongeru el Mekemedil a Beluulechad. Sel taem er a mekemad, e a rechedal a Dios a uluuchais el kirel a ulaoch er a Chocholt el kmo a okesiu el tebelik el charm a lmuut el me duum. Me ngliluut el me duum, el mlo okedongall el United Nations.​—Chocholt 17:8.

14. Ngera uchul me a Johanes a melekoi er a okesiu el kmo ngii a “ongeai el king”?

¹⁴ A Johanes a mesaod er a okesiu el tebelik el charm el kmo ngii a “ongeai el king.” E ngera uchul? Ngdiak losaod er ngii el kmo ng ongeai el bdelul ngike el tebelik el charm, ngbai di okesiul ngika el charm. Me a klisichel ngika el okesiul a charm a mei el okiu a Renged er a Britain me a Merikel me aike el beluu el chedal tia el cheldebechel er a United Nations. (Chocholt 17:10, 11) Me a Johanes a mesaod er ngii el kmo ng “king,” e le ngmla mukngerachel el mo kutmeklii a klou el tekoi el ngar er ngii a bo lerellii er a beluulechad el rokir.

A OKESIUL A CHARM A OKNGEMEDII A OTERUUL DIL

15, 16. Ngomtechei er a ngerang a oteruul dil el ngar er a ues er a Johanes? E ngera duubechang el mo er aika el klechelid er chelechang?

¹⁵ A Johanes a mesaod er a oteruul dil el kmo ngdengchokl er bebul a bekerekard el charm. E ngika el charm a di osisiu er ngike el okesiul a tebelik el charm el kleuid a bdelul. E ngii el oteruul dil a okedongall el “Kloul Babilon.” (Chocholt 17:1-6) Me ngika el oteruul dil a omtechei a rokui el klsuul el klechelid, el ileakl el omtechei aike el klechelid er a Klsuul el Klekristiano. Me tia el ulaoch el kirel a oteruul dil el dengchokl er a okesiul a tebelik el charm a mla tmaut, e le klsuul el klechelid a omekngeltengat er a League of Nations me a United Nations e melasem el mengedereder e omekrael er tir.

¹⁶ Me sel sils er a Rubak, e a klou el ildois er a rechad el ua ralm el tir a chedal a Kloul Babilon a mo chetirir el olengeseu er ngii. (Chocholt 16:12; 17:15) El ua tiang, sera lomuchel el me duum a okesiul a charm, e a klechelid er a Klsuul el Klekristiano a mesisiich el mengedereder a oumesingd er aike el beluu er a Ngebard. Engdi chelechang, e a rebetok el chad a mla mo diak loba omengull el mo er aika el klechelid me a remengeteklel. Me a rebetok el chad  a oumerang el kmo aika el klechelid a bai uchul a mondai er a beluulechad. E a rebebil a bekeu el melekoi el kmo ngmla mo kired el okngemed a rokui el klechelid.

17. Ngerang a kmedu el mo duubech el mo er a klsuul el klechelid e ngera uchul?

¹⁷ A klisichel a klsuul el klechelid a diak di lokekokil el merael el mo mechitechut e lengemed. A oteruul dil a mo melemolem el oba klisiich el melasem el mengesuseu er a reking el mo meruul a soal. Engdi ngdi kmedung e a Dios a mo omekrael er a reking el mo oltaut a tekingel. (Monguiu er a Chocholt 17:16, 17.) A Jehovah a mo remuul a kabelment er a klechad el mo oldechelakl er a klsuul el klechelid. E ngike el oteruul dil a mo diak a klisichel el omekrael aika el kabelment e dirrek el mo oriid a kerruul er ngii. Sesei el rak er a mla me mong, e a rebetok el chad a milengull aika el klechelid e ulemdasu el kmo ngdi melemolem el mesisiich, engdi chelechang e ng mengedechang a blekeradel. Me nguaisei, engdi a klisichel a oteruul dil a diak di lokekokil el mo mechitechut, e ngbai di mereched el mokngemed.​—Chocholt 18:7, 8, 15-​19.

AIKA EL CHARM A MO NGUEMED

18. (a) Ngmo mekerang a tebelik el charm, e ngera mo duubech? (b) A Daniel 2:44 ngmelekoi el kmo a Rengedel a Dios a mo olekngemed a ngera el renged? (Momes er a baks er a 19 el llel.)

¹⁸ Me a uriul er a okngemedel a klsuul el klechelid, e a tebelik el charm el omtechei a balatiks er a beluulechad a mo oumekemad er a Rengedel a Dios. Engdi a reking a diak el sebechir el mo er a eanged a uchul me te mo oleiit er a ngesechel a rengrir er tirke el olengeseu er a Rengedel a Dios el ngar er a chutem. E seikid e a reking a mocha oumekemad er a Dios. (Chocholt 16:13-​16; 17:12-​14) A Daniel a meskid a telkib el omesodel tia el ulebongel el mekemad. (Monguiu er a Daniel 2:44.) Me a Rengedel a Dios a mo okngemedii ngike el tebelik el charm el ngar er a Chocholt 13:1, me sel okesiul, me ngike el eruo orsul el charm.

19. Ngulterekokl a rengud el kirel a ngerang, e ngera kired el meruul er chelechang?

¹⁹ Ngike el ongeuid el bdelul a tebelik el charm a mengedereder er chelechang, e diak a lmuut el ta er a bdelul el me duum er a uchei er a bo lengemed ngika el charm. A Renged er a Britain me a Merikel a melemolem el oba klisiich el mo lmuut er sel taem el bo lemokngemed a klsuul el klechelid. A ulaoch er a Daniel me a Johanes a mla mutaut el mo lmuut er aike el kot el mekekerei el ulaoch. Me kede medengei el kmo a telemellel a klsuul el klechelid me a mekemad er a Armageddon a kmal di kmedang. Me a Dios a mla meketakl aike el tekoi el mo duubech. Me kid kede mo kerekikl el orrenges aika el ulaoch? (2 Petrus 1:19) Chelechang e ngmla mo taem el kired el melilt el mo obengkel a Jehovah e mo oureor el olengeseu er a Rengedel.​—Chocholt 14:6, 7.

[Aike el Footnote]

[Aike el Ker er a Suobel]

[Baks el ngar er a 19 el llel]

NGERANG A ULDIMUKL ER “A IKEL BEBIL ER A RENGED”?

A ulaoch er a Daniel 2:44 a melekoi el kmo a Rengedel a Dios a “mo okngemed a ikel bebil er a renged el rokui.” Me tia el ulaoch a di melekoi el kirel aike el renged el mocholt er sel bleob el chaus.

E kuk mekerang el kirel aike el bebil er a kabelment er a klechad? A ulaoch er a Chocholt a meskid a lmuut el omesodel tia el tekoi. Ngochotii el kmo a re “king ra belulechad el rokir” a mechudel el mo omtok er a Jehovah er “sel klaumekemad er sel kloul sils ra Dios, el Cherrengelel a klisiich.” (Chocholt 16:14; 19:19-21) Misei e a rokui el kabelment er a klechad a mo nguemed er a Armageddon, el uldimukl er aike el renged el ngar er sel bleob el chaus.