Kede Mekerang e mo Oumerang e Bekongerachel el Chad er a Beluu

NGERANG a mle eru el blekerdelel a Jesus er a omesiungel? A kot e a Jesus a mle soal el melodech a rengrir a rechad, el diak lolodech a tekoi er a balatiks. Ka di molatk er sel tekoi el lullisiich er ngii a Jesus el ngar er a Cheldechedechal el ngar er a Rois. A uchei er a losaod el kirel a sar me a llomes, e ngdilu er a rullerenges er ngii el kmo a mera el deurreng a mo er tirke el “medengei el kmo te chebuul a lak lousbech er a Dios.” Ngdilechelii el kmo: “Te ngeltengat ar medemedemek, . . . ar klikiid a rengrir, . . . ar meruul a budech.” (Matteus 5:1-​11) Me a Jesus a ngilsuterir a rulebengkel el mo medengelii a klungel a ultutelel a lolodech a uldesuir me a rengrir el mo oltirakl a llechul a Dios el kirel a ungil me a mekngit, me a dirrek el klungel a ultutelel a dosiou er a Dios el loba rengud el rokir.

Ongerung, a Jesus a ulemes er a klechad el kmal chuarm me ngmlo chubteterir e mlo soal el mo ngosuterir er a chelebulir. Me nguaisei, engdi ngdimlak el moktek er ngii el mo olekngemed a rokui el ringel me a chelebuul. (Matteus 20:30-​34) Ngulemekungil er a resmecher, engdi a secher a millemolem el ngar er ngii. (Lukas 6:17-​19) Ngmilengelaod er a remekngit a rengrir, engdi a chelebirukel a millemolem el omekringel er a rechad. Ngulemekang er a resongerenger, engdi a bosech er a kall me a klengerenger a dirk melemolem el omekcharm er a klechad.​—Markus 6:41-​44.

Ngmodech a Rengrir e Kodebengii a Ringel

Ngera uchul me a Jesus a millemolem el soal el melodech a rengrir a rechad e lekedebengii a chelebuul engdi dimlak el lolodech a ngii di el tekoi er a balatiks me a lechub e lokngemedii a ringel? Ngmle medengei el kmo a Dios a ngar er ngii a moktek er ngii er a ngar medad el mo ousbech er a Rengedel el mo olekngemed a rokui el kabelment er a klechad me aike el rokui el tekoi el uchul a ringelel a klechad. (Lukas 4:43; 8:1) Me sel taem er a lolengit er a Jesus a rulebengkel el lmuut el kiei el telkib me bo el sebechel el omekungil er a resmecher e ngdilu el kmo: “Mei me de bora ikel ngar bita er kid el mats, me dilerrek el kulisechakl er iaikei, ele tiai a uchul e ak mlei.” (Markus 1:32-​38) Me a Jesus a ngilsuterir a rebetok el chilarm, engdi a omesiungel el ullisechakl e omerk a Tekingel a Dios a mle kot el klou a ultutelel el tekoi er a klengar er ngii.

A Resioning er a Jehovah a omerk er a klumech er chelecha el taem el melasem el oukerebai a omerellel a Jesus. Te kmal blak a rengrir el melasem el mengelaod er a rechad el chuarm el okiu sel lolengeseu er a rechad. Engdi tir el Sioning a diak el lolasem el olekngemed a chelebirukel er tia el beluulechad. Te oumerang el kmo a Rengedel a Dios a mo okngemed a rokui el tekoi el ngii a uchul a ringelel a klechad. (Matteus 6:10) Te di ua Jesus el melasem el melodech a rengrir a rechad el diak lolasem el melodech a tekoi er a balatiks. E tiang a klemerang el tekoi, e le mondai er a rechad a diak el tekoi er a balatiks, e ngbai tekoi er a kldung.

Bekongerachel el Chad er a Beluu

Osisiu el taem e a Resioning er a Jehovah a oumerang el kmo ngngerechelir el Kristiano el mo bekongerachel e ungil el chad er a beluu. Te mengull e olengesenges a omengedereder er a kabelment. Me ngokiu a babilengir me a urerir el omerk er a klumech, e te melisiich er a rechad el mo oltirakl e olengesenges a llach. Me nguaisei, engdi a lsekum a kabelment a melisiich a tekoi el ngii a omtok a llechul Dios e a Resioning a kmal diak lekengei el mo meruul. Te bai kongei “loltirakl ra Dios ra bai loltirakl rar chad.”​—Rellir 5:29; Rom 13:1-7.

 A Resioning er a Jehovah a oldingel er tirke el ngar er a belurir el kongei el mesuub er a Biblia el diak locheraol. Me ngoeak tiaikid el rolel a omesuub, e a rebetok el miliol el chad a mla ngmodech a rengrir. Bek el rak e a rebetok el dart el telael el chad a mongeseu el mo diak loruul a mekngit el tekoi el ua omelamech el dekool, cheltelaol er a rrom, usbechel a mekngit el kar, bakutsi, me a deleboes el omeruul. Te mla mo bekongerachel e ungil el chad er a beluu, e le tir el milsuub er a Biblia e mlo oltaut a omellach er ngii er a chelsel a klengar er tir.

Me a lmuut el tang, a omesubel a Biblia a dirrek el ngosuterir a rechedal a bek el telungalek el mo meduch el kakull e mo ungil a rolel a cheldecheduch er a delongelir a rebechiil, me a ruungalek me a rengelekir me a dirrek el delongelir a rengalek. Me aikang a klemerang el tekoi el sebechel el melisiich a deleuill er a telungalek, e a mesisiich el telungalek a rullii a beluu el mo mesisiich.

Me chelecha el bla desaod aika el tekoi el ngar er aika el suobel, e ngera uldesuem? A Biblia ngkongei el kmo ngsebechel a klechelid el dmak ngii me a tekoi er a balatiks? A nger a kmal bleketakl el kmo ngdiak el sebechel. Engdi a remera el Kristiano ngsebechir el mo bekongerachel el chad er a beluu? Ngsebechir e kmal kirir. Engdi te mekerang e mo meruul el uaisei? Sel loltirakl a omellach er a Jesus el mo ua sar me a llomes er tia el beluulechad.

Tirke el rokui el melasem el oltirakl a ulekrael er a Kristus a mo ngmai a betok el klungiaol el kirir me a rechad er a blirir el uldimukl er a beluu el lekiei er ngii. A Resioning er a Jehovah er a beluam a kmal semeriar el ouchais er kau a lmuut el betok el tekoi el kirel a omesubel a Biblia el ngii a meketmokl er a chelsel a beluam. *

[Footnote]

[Blurb el ngar er a 7 el llel]

A Jesus a millasem el melodech a rengrir a rechad, el diak el lolodech a tekoi er a balatiks

[Blurb el ngar er a 8 el llel]

A Resioning er a Jehovah a oumerang el kmo ngkirir el mo bekongerachel e ungil el chad er a beluu