Ngkirir a Rekristiano el Mekerang er Chelechang?

A REMERA el Kristiano er chelechang a diak el teloi er a tekoi er a balatiks. E ngera uchul? E le ngkirir el oltirakl er a kerebil a Jesus, el ngii a dilu el kmo: ‘Ngak a diak kklalo ra belulechad.’ E millekoi el kirir a rulebengkel el kmo: “Kemiu a diak kom chedal a belulechad.” (Johanes 15:19; 17:14) Momtab a bebil el uchul me a Rekristiano a diak el kirir el mo teloi er a ngii di el tekoi er a balatiks.

1. Ngtelkael a kldachelbil a chad. A Biblia a melekoi el kmo a rechad a diak a duch er tir me a llemeltir el di tir el mengedereder er tir. A profet el Jeremia a milluches el kmo: “Ng diak a chad el medengelii a le bor ngii er a ngar medal, e diak a chad el sebechel el chodereder a blekeklel.”​—Jeremia 10:23.

A rechad a ulebeob el diak el kirir el di tir el mengedereder er tir el ua tiang, ngdiak el sebechir el suebek e le ngdimlak lobeob el kirir el suebek. A David Fromkin a milsaod el kirel a telkelel a klisichel a kabelment me a reksi er a klechad el kmo: “A kabelment a meteketek er a rechad; me tir el diak el mecherrungel a uchul me a telbiil me a moktek el loruul a diak lulterekokl. Me ngar er ngii a klisichir engdi ngdi telkael el klisiich.” (The Question of Government) Sei a uchul me a Biblia a mengelechel er kid el kmo ngdiak el kired el mo ultuil a klaumerang er kid er a rechad!​—Psalm 146:3.

2. A remekngit el anghel a mengedereder er chelechang. Sel taem el Satan a ulemsang a Jesus a rokui el dereder er a beluulechad, e a Jesus a dimlak lomtok el kmo a Satan a sebechel el omsang a rokui el renged er a beluulechad. Nguaisei, a telkib el taem er a uriul e ngulemekedong er a Satan el kmo ng “merreder er tial belulechad.” Sesei el rak  er a uriul, e a apostol el Paulus a milsaod er a Satan el kmo ngii a “chelid er tial belulechad.” (Johanes 14:30; 2 Korinth 4:4) A Paulus a milluches el mo er a Rekristiano el kmo: Kid a “oumekemad er chomengedereder, ma klisiich, mar merreder ra ilkolk er tial belulechad, ma ikel ngara ikel beluu ra eanged el mekngit el reng.” (Efesus 6:12) A rechad a diak lodengei el kmo a remekngit el anghel a mera el mengedereder er tia el beluulechad. Ngmo uangerang a uldesuem el kirel a tekoi er a balatiks sel bo modengei aika el klemerang el tekoi?

Ka molatk er tia el okesiu: A tekoi er a balatiks a mekususeu er a remesisiich e mekngit el anghel, el di ua mekekerei el bilas el obeberius er a mesisiich el berius. Me a rechad er a balatiks a kmal diak el sebechir el ngodechii sel mesisiich el omengesuseu er a remekngit el anghel, el di ua rechad el ngar er a bilas el diak el sebechir el ngodechii a mesisiich el berius el omerius er a bilsengir. Tirka el mekngit el anghel a blak a rengrir el melemall er a klechad, me te uchul a ‘chelebuul er tia el chutem.’ (Chocholt 12:12) Me a leuaisei, e ngdi ta el Jehovah el Dios a sebechel el ngodechii a blekeradel e le Ngii a lmuut el mesisiich er a Satan me a rechanghel er ngii.​—Psalm 83:18; Jeremia 10:7, 10.

3. A remera el Kristiano a blak a rengrir el kirel a Rengedel a Dios. A Jesus me a rulebengkel a mle medengei el kmo a Dios a mla oterekeklii a taem el bo loleketek er a kabelment el ngar er a eanged e mo mengedereder er a chutem el rokir. A Biblia a omekedong er tia el kabelment el Rengedel a Dios e dirrek el ouchais el kmo a Jesus Kristus a mla mengilt el mo King er ngii. (Chocholt 11:15) A Rengedel a Dios a ngar er ngii a bo le rellii er a rokui el chad a uchul me a Jesus a ngiluu a berkel a “ungil klumech ra rengedel a Dios” el mo kot el klou a ultutelel er a osisecheklel. (Lukas 4:43) Ngdirrek el ullisechakl er a rulebengkel el meluluuch el kmo: “A rengedem le mei.” E ngera uchul? E le ngar er a cheungel tia el Renged, e a Dios a mo otaut a rokui el soal er a eanged me a chutem.​—Matteus 6:9, 10.

E ngera mo duubech el mo er aika el kabelment er a klechad? A Biblia a onger el kmo aika el kabelment er a “belulechad el rokir” a mo nguemed el mo diak. (Chocholt 16:14; 19:19-​21) A lsekum a chad a oumerang el kmo a Rengedel a Dios a di kmedu el mo olekngemed a rokui el kabelment er a klechad me a tekoi er a balatiks, e ngulterekokl el diak el soal el melemolem el teloi e lolengeseu aika el tekoi. E le ngmedengei el kmo a lsekum e ngmo olengeseu me a lechub e ngmelisiich aika el kabelment er a klechad e ngmocha omtok er a Dios.

[Blurb el ngar er a 6 el llel]

A Resioning er a Jehovah a blak a rengrir el omerk er a Rengedel a Dios, e diak el teloi er a tekoi er a balatiks