Ngmle Uangerang a Osengel a Jesus el Kirel a Tekoi er a Balatiks?

A REMILLUCHES a Evangkelio a mesaod el kirel a bebil er a taem el Jesus a mlo chelebangel a orimel el kirel a tekoi er a balatiks. El ua tiang, telkib er a uriul er a lemetecholb a Jesus er a le bocha el 30 a rekil, e a Diabelong a millasem el mengesuseu er ngii el mo merreder er a beluulechad. E a uriul, e a seked a mlo sorir el meruul er ngii el mo king er tir. E liluut el mo er ngii a rebebil el mle sorir el meruul er ngii el mo ta er a chad el melodech a tekoi el okiu a balatiks. Me ngmilekerang a Jesus? Me bo dorriter aika el tekoi.

Merreder er a beluulechad. A Evangkelio a kmo a Diabelong a ulemsang a Jesus a omengedereder er a ‘rokui el renged er tia el beluulechad.’ Me ka di molatk aike el ungil tekoi el duubech el mo er a klechad omko a Jesus a kilengei el mo mengedereder er a beluulechad! Engdi a Jesus a dilu er a Diabelong el kmo ngdiak. A chad el omdasu el kmo a kabelment a sebechel el ngosuir a klechad a ulterekokl el diak el sebechel el oltngakl er tia el tekoi el ua Jesus.​—Matteus 4:8-​11.

King. Betok er tirke el mle ua klungel a Jesus er sel taem a kmal uluureng er a merreder el sebechel el sumechokl a mondai er a tekoi er a kerruul me a balatiks. Te mlo mechas a rengrir er a omerellel a Jesus me ngmle sorir a bo leteloi er a tekoi er a balatiks er a beluu. Me ngmilekerang a Jesus? A ta er a milluches er a Evangkelio el Johanes a kmo: “Ma Jesus ra bocha lodengei el kmo te merekung lomdechem er ngii e meruul er ngii el mo king, e ngulibngii el lmuut el mora rois el di ngiil tang.” (Johanes 6:10-​15) Me ngbleketakl el kmo a Jesus a dimlak el soal el mo chelsechusem er a ngii di el tekoi er a balatiks.

Chad el melodech a tekoi el okiu a balatiks. Ka di molatk a tekoi el dilubech er a uchei er a lemad a Jesus. A rebebil el Farisee el mle sorir el mo ileakl er a Renged er a Rom, a mlo dmak tir me a rechedal a Herodes el tir a mle chedal sel chelechad el lullab el mo er a Rom, e mlo mengedecheduch er a Jesus. Ngmle sorir el orrimel er ngii el mo melai a deruchall er a tekoi er a balatiks. Me te uleker el kmo ngkirir a rechad er a Judea el melecha tax el mora beluu er a Rom.

A Markus a milluches a tekingel a Jesus el kmo: “ ‘Ngera me ko mengarm er ngak? Mnguu a tara udoud el mei, me kisang.’ Me te ngoura el mei. Me ngdilu er tir el kmo, ‘Tia ngkldmel ma cholengchelel techang?’ Me te dilu er ngii el kmo, ‘A Kaiser.’  Ma Jesus a dilu er tir el kmo, ‘A kloklel a kaiser le bora kaiser, ma kloklel a Dios le bora Dios.’ ” (Markus 12:13-​17) A babier el Church and State​—The Story of Two Kingdoms a mesaod el kirel sel uchul me a Jesus a ulenger el uaisei e le ngdimlak el soal el mo mesisiich el chad er a kabelment. Me a Jesus a ulechotii el kmo ngar er ngii a llach er a kabelment el kired el oltirakl e dirrek el ngar er ngii a llechul a Dios el kired el oltirakl.

A mondai el ua chelebuul, tellemall, me a chelebirukel a kmal millemall er a rengul a Jesus, e le Biblia a ochotii el kmo ngmlo mekngit a rengul sel lomes er a rechad el meliuekl er ngii el kmal chebuul. (Markus 6:33, 34) Me alta e a rebebil a millasem el mengesuseu er ngii el mo teloi a omesodel aike el mondai er sel taem, engdi a Jesus a dimlak lomuchel el mengeroid a chelebirukel er tia el beluulechad.

Me ngkmal bleketakl a kerebil a Jesus el ochotii el kmo ngdimlak lekengei el mo teloi er a tekoi er a balatiks. Engdi te mekerang a Rekristiano er chelechang? Ngera kirir el meruul?