A Biblia a Ngosukid er Chelechang

“A tekingem a olbidel el omekrael er ngak, e llemesel a rolek.”​—PSALM 119:105.

NGERA ME A BIBLIA A NGODECH ER A ROKUI EL BABIER? A bebil el babier er a irechar a sebeched el omes el kmal ungil el babier engdi ngdiak el beskid a ungil el ulekrael el kirel a klengar. E a rechad el meluches a babier el kirel a ungil el klengar er chelechang a blechoel el kirir el omekbeches a tekoi er a chelsel a babilengir er a uriul er a sesei el rak. Engdi a Biblia a ouchais el kmo, “A ikel ngar a Chedaol Llechukl a melluches el olisechakl er kid.”​—Rom 15:4.

EL UA TIANG: Alta e a Biblia a diak el babier er a ukeruul, engdi ngmeskid a ungil el ulekrael el kirel a klisichel a uldesued me a bedenged. A ta el bades a kmo: “A chelellakl el uldasu a diak losecherii a bedenged.” (Osisechakl 14:30) A Biblia a mengelechel el kmo: “Ngikel diak le ungil el obengterir a rechad a melatk er a di ngii; a ikel lodengei a re bek el chad el kmo ng ungil a di mekngit er ngii.” (Osisechakl 18:1) Me a lmuut el tang, ngmesaod el kmo, “Ng bai klou el deurreng a dorous er a dolai.”​—Rellir 20:35.

A TEKOI EL MLA METERITER: A budech, me a ungil el klausechelei me a blekururau a smisiich a bedenged. A babier el The Journal of the American Medical Association a mesaod el kmo: “A resechal el di mereched el ngmasech a rengrir e melekoi a mekngit a eru el chachisois a techellir el meloched er a resechal el sebechir el kilmekl a rengrir.” A teruich el rak el omesuub er a beluu er a Australia a mla metik er ngii el kmo a remechuodel el ousechelei er a rungil el chad me ngsebechir el ouchais aike el ngar er a rengrir” a blechoel el kemanget a klengar er tir. Me a ngar er a rak er a 2008, e a remerriter a tekoi er a beluu er a Canada me a Merikel a mla suubii el kmo “a chad el mengoit a udoud el lolengeseu er a rebebil a kuk dmeu a rengul er ngike el di mengoit a udoud el di kirel.”

NGERA ULDESUEM? Ngar er ngii a babier el mileketmokl er a bekord el 2,000 el rak er a mla me mong el sebechem el oumerang a ulekrael er ngii el kirel a klisichel a bedengem? Me a lechub e ngdi ta el Biblia a uaisei?

[Blurb el ngar er a 8 el llel]

“Ngkmal soak a Biblia . . . e le a ulekrael er a chelsel a di ua ungil el ukeruul.”​—HOWARD KELLY, M.D., TA ER TIRKE EL ULEMUCHEL ER A JOHNS HOPKINS UNIVERSITY SCHOOL OF MEDICINE