Becherei a Jehovah Me Lerellau el mo Mimokl
Becherei a Jehovah Me Lerellau el mo Mimokl
“[Bo] belsechakl ra cherrungel llach, el llach ra ilmokl.”—JAKOBUS 1:25.
NGSEBECHEM EL MESAOD?
Ngera el llach a omekrael er kid el mo er a mera el ilmokl, e rua techang a mo ngmai a klungiolir er ngii?
Kede mekerang e mera el mo mimokl?
Ngera el ilmokl a bo lenguu tirke el melemolem el olengesenges er a Jehovah?
1, 2. (a) Ngerang a meketmeklang el kirel a ilmeklir a rechad, e ngera uchul? (b) Ngera el ilmokl a dirk merael el mei el kirir a remesiungel a Jehovah?
KID a kiei er a chelsel a taem el di loleketek a ngibeserreng, koad el chad me a lmuut el bebil el mekngit el omeruul. (2 Timoteus 3:1-5) Misei a uchul me a kabelment a meruul a lmuut el betok el llach, e melisiich a urerir a rebulis, e dirrek el mengetiut a security camera er a betok el basio. Ngar er a bebil el beluu, e a rechad a mengetiut a betok el lok me a alarm system, e merers a blirir el omekerreu er tir. E a rebetok a mla mo diak lomais a le klebesei me a lechub e le bechititerir a rengelekir me loilil el di tir el tang er a mellomes me a klebesei. Me ngbleketakl el kmo ngkmal dikeang a ilmeklir a rechad.
2 Ngar er a sers er a Eden e a Satan a ulterekeklii el kmo a rael el mo er a mera el ilmokl a sel dekiei el ileakl er a Jehovah. Engdi ngmla obeketakl el kmo ngkmal blulak a tekingel! E le sel lolemolem el diak lolengesenges a rechad e lak loltirakl a ulekrael er a Dios, e a beluu me a rechad a melemolem el di chuarm. E tia el mekngit el blekeradel a dirrek el omekcharm er kid el mesiungel a Jehovah. Me nguaisei, engdi ngngar er ngii a omeltked el mo mesa klechad el mo mengubet er a blekeradel er a klsibai er a ngemed e “mo nguu a ilmokl ra klebkall rar ngelekel a Dios.” (Rom 8:21) Me a Jehovah a mla omuchel el mengetmokl er a remesiungel el kirel tia el ilmokl. El okiu a ngera el rolel?
3. A Jehovah ngmla mesterir a rubengkel a Kristus a ngera el llach, e ngera el ker a bo dosaod?
3 Kede metik a nger el ngar er a tekingel a Jakobus el kirel a “cherrungel llach, el llach ra ilmokl.” (Monguiu er a Jakobus 1:25.) A Chedaol Biblia a oleiuid er tia el tekoi el kmo “diak a telemellel el llach el meruul er a re chad el mo mimokl.” A rechad a blechoel el omes a llach el ua lolekebai er tir, me ngdiak el sebechir el mo mimokl. Me a leuaisei, e ngngerang a “cherrungel llach, el llach ra ilmokl”? E mekerang e ngii el llach a rullid el mo mimokl?
A LLACH EL MESKID A ILMOKL
4. Ngerang a “cherrungel llach, el llach ra ilmokl,” e rua techang a mo ngmai a klungiolir er ngii?
4 A “cherrungel llach, el llach ra ilmokl” a diak el Llach er a Moses, e le Kristus a mla otutii sel Llach el mileketakl el kmo ngerang a mekngit. (Matteus 5:17; Galatia 3:19) Me a Jakobus, ngmilsaod el kirel a ngera el llach? Ngmilsaod el kirel a “llach ra Kristus,” el ngii a “llach ra kloumerang.” (Galatia 6:2; Rom 3:27) Me a leuaisei, e a “cherrungel llach,” a smaod a rokui el tekoi el soal a Jehovah a bo doruul. Me a rengellitel me tirke el ‘ngodech el sib’ a dul ngmai a klungiolir er ngii.—Johanes 10:16.
5. Ngera uchul me a llach er a ilmokl a diak lomekberaod?
5 A “cherrungel llach” a beot a llechul e bleketakl a omellach el ngar er a chelsel el diak el ua llechul a betok el beluu el kmal chetituokel. (1 Johanes 5:3) A Jesus a dilu el kmo: “Chongelungel er ngak a mechelechol, ma telechellek a kebekakl.” (Matteus 11:29, 30) Me a lmuut el tang, a “cherrungel llach” a diak lousbech a mekemanget el omesaod me a blals, e le a uchetemel a okiu a bltikerreng e dirrek el diak el llechukl er a bad e ngbai sebechel el medalem er a rengul a chad.—Monguiu er a Hebru 8:6, 10.
A ROLEL E A “CHERRUNGEL LLACH” A MESKID A ILMOKL
6, 7. Ngera sebeched el dmung el kirel a llechul a Jehovah, e ngera uchul me ngii el llach a meskid a ilmokl?
6 A Jehovah a mla oterekokl a llechul el kirir a reblebelel el mo uchul a ulekerreu me a klungiolir. Ka molatk er aike el llach el omtebechel a klekedall el ngar er a eanged me a chutem el ua gravity, a chouaika el rolel a llach a diak lomekringel er a rechad. Te bai mereng a saul el kirel, e le te medengei el kmo aikang a meklou a ultutelel el kirel a klengar er tir. Me ngdi osisiu, aike el llechul a Jehovah el kirel a tekoi er a kldung me a ulekrael er ngii el meketmokl el okiu a “cherrungel llach” er a Kristus a mo uchul a klungiolel a klechad.
7 Me a lmuut el tang, a llach er a ilmokl a meskid a techall el mo otaut a rokui el melemalt el urunguled e diak demetemall me a lechub e dolemall a llemeltir me a ilmeklir a rebebil. Me a mera el rolel a ilmokl a ultuil er a domekeroul a ungil el urunguled, el ike el tekoi el oltirakl a blekerdelel a Jehovah me a llechul, e a bo le uaisei, e ngmo sebeched el meruul aike el tekoi el soad. Me tia belkul a kmo ngkired el mesuub el mo betik a rengud er aike el tekoi el Jehovah a betik a rengul er ngii e dirrek el mo ouketui aike el tekoi el Ngii a ouketui. Me a llach er a ilmokl a sebechel el ngosukid el mo meruul er tiang.—Amos 5:15.
8, 9. Ngera el klungiaol a mo er tirke el oltirakl er a llach er a ilmokl? Momekesiu.
8 Kid a diak demecherrungel a uchul me ngmeringel er kid el oltngakl a mekngit el urunguled. Me nguaisei, engdi a blakerreng er kid el melasem el oltirakl er a llach er a ilmokl a ngosukid el mo meruul a llemalt. El ua tiang, a Jay el dirk mlo mesuub er a Biblia a kmal mle mesisiich el melamech a dekool. Me sera lesubii el kmo a omerellel a diak el loldeu er a rengul a Dios, e ngmlo kirel el meruul er a omelilt er ngii. Me nguleak a llomeserreng e ngmillilt el mo mesiou er a Dios, alta e ngdirk mle soal el melamech a dekool. Me ngmlo uangerang a uldesuel er a bo lemesisiich er tia el blekerdelel? Ngdmu el kmo: “Ngkmal ungil a renguk e le ak mla mo mimokl.”
9 A ilmokl er tia el beluulechad a rulleterir a rechad me te di melisiich a ngelbesel a rengrir. Me a Jay a mlo medengei el kmo tia el rolel a ilmokl a di rulleterir a rechad el mo sibil a klengit. Engdi tirke el oltirakl a llechul a Dios a kongei el mo mukrael er a oureor el klisichel a Dios me te mo mimokl e metik a “klengar ma budech.” (Rom 8:5, 6) Me ngmilekerang e mlo sebechel a Jay el mo diak lolamech a dekool? Ngdimlak el sebechel el di ngii, e ngbai ulekiu a ngelsuil a Dios. Ngdmu el kmo, “Ak mle blechoel el mesuub er a Biblia, e meluluuch el olengit er a oureor el klisichel a Dios, e dirrek el ullengit a ngeso er a rechad er a ongdibel er a Rekristiano.” Me aikaikid el osisiu el tekoi a dirrek el sebechel el ngosukid a lsekum e ngsoad el mo mimokl. Me bo dosaod.
MORRITER ER A TEKINGEL A DIOS
10. Ngera belkul a bo de “belsechakl” er a llach er a Dios?
10 A Jakobus 1:25 a ochotii el kmo: “Ngikel belsechakl ra cherrungel llach, el llach ra ilmokl, el diak di lrenges e lobes, . . . a mo ngeltengat el kirel chomerellel.” A tekoi er a Grik el mloiuid el “belsechakl” a belkul a kmo “mo kerekikl el omes” a tekoi. Me a lsekum e ngsoad el mo melodech a uldesued me a rengud el okiu a llach er a ilmokl, e ngkirel el mo blak a rengud el mesuub er a Biblia e kerekikl el melebedebek aike el tekoi el dosuub.—1 Timoteus 4:15.
11, 12. (a) Ngerang dilu a Jesus el meketeklii el kmo ngkired el oltaut a Tekingel a Dios er a klengar er kid? (b) Ngera el kdekudel el tekoi a kirir a rengeasek el oleiub er tir er ngii?
11 A osisiu el taem e ngungil a ‘lak di derenges e dobes,’ e ngbai kired el melemolem el oltaut a Tekingel a Dios er a klengar er kid. A Jesus a dirrek el milsaod er tiang er a ledu el kmo: “A kmo kom diblechoel ngara tikingek, e ko meral Obengkek, me ko mo medengei a klemerang, ma klemerang a meskemiu a ilmokl.” (Johanes 8:31, 32) A ta er a babier a mesaod er a belkul a tekoi el “medengei” el kmo a chad a oba omereng el saul el kirel “a klemedengei er ngii er a tekoi e le ngklou a ultutelel er a osengel.” Me kede mo ungil el “medengei” a klemerang sel doltaut er ngii er a klengar er kid. Me sel doruul el uaisei e a “tikingel a Dios” a mo “oureor” er a chelsed, el melodech a blekerdeled el mo ua blekerdelel a Demad el ngar er a eanged.—1 Thesalonika 2:13.
12 Di lekau el oker el kmo, ‘Ngak ak mera el medengelii a klemerang? Ak mla oterekeklii a renguk el mo oltirakl er ngii? Me a lechub ak dirk oureng a bebil el “ilmokl” er tia el beluulechad?’ A ta el odos er kid el mlukeroul el Kristiano a melatk el kmo sera dirk lekekerei e nguluumerang er a Jehovah engdi ngdimlak el sal ungil medengelii. Me ngdmu el kmo: “Ngdimlak kusuub el mo ouketui aike el chetil el tekoi. Ngdimlak kuumerang el kmo a tekoi el kuruul a ngar er ngii a letemellii er a rengul. E dirrek el dimlak bo kulengit a ngeso er ngii sel lebo er ngii a mondai er ngak. Ak di mle blechoel el ultuil er a di uldesuek, me chelecha el taem e ak medengei el kmo ngdi mle klebelung a omerellek e le ngdimlak a ngera el kudengei.” Engdi chelechang e ngungil a rengul e le ngmlo melechesuar el kmo a uldesuel a kmal mle cheleuid, me ngmillodech a betok el blekerdelel. E chelechang e ngmla omuchel el mesiou el mui el taem.
OUREOR EL KLISICHEL A DIOS A NGOSUKAU EL MO MIMOKL
13. Ngmekerang a oureor el klisichel a Dios e ngosukid el mo mimokl?
13 A 2 Korinth 3:17 a kmo: “Sel le ngarngii a [oureor el klisichel a] Rubak a ngarngii a ilmokl.” Me ngmekera oureor el klisichel a Dios e ngosukid el mo mimokl? Ngngosukid el mo omekeroul a blekeradel el ua “bltikerreng, ma deourreng, ma budech, ma kllourreng, ma blekokuii, ma ungilreng, ma blakerreng, ma delemedemek, ma chomengerem.” (Galatia 5:22, 23) A blekeradel er a beluulechad er chelechang a ochotii el kmo sel lak lolecholt aika el blekeradel a rechad, el ileakl a bltikerreng, ngdiak el sebechir el mo mimokl. A uriul er a losaod er a rodech er a oureor el klisiich e a Paulus a milluches el kmo: “Ngdiak a llach el merrob iaikang.” Ngera belkul a tekingel? Ngdiak a ngii di el llach el sebechel el merrob a okurulel aika el blekeradel. (Galatia 5:18) A Jehovah a soal a dolemolem el omekeroul e olecholt aika el blekerdelel a Kristus el mo cherechar.
14. Ngoeak a ngera el rolel e a rechad a mo sibil a blekeradel er tia el beluulechad?
14 Tirke el rokui el cheltikaik er a blekeradel er tia el beluulechad e di melemolem a ngelbesel a rengrir a locha omdasu el kmo te mimokl. (Monguiu er a 2 Petrus 2:18, 19.) Engdi a mera er ngii te diak el mimokl. A Kabelment a meruul a betok el llach el omtebechel a blekerdelir a reuaisei el chad. A Paulus a millekoi el kmo: “A llach a dimlak le meruul el kirir ar melemalt, ngbai merruul el kirir ar diak lolab a llach mar diak lolengesenges.” (1 Timoteus 1:9, 10) Te dirrek el sibil a klengit e le te “meruul a soal a tech,” el ngii a mocha mengedereder er tir. (Efesus 2:1-3) Me te di ua melekesako el charm el mo soiseb er a belatong el ngar er ngii a ilaot er a chelsel. El okiu a ngelbesel a rengrir, e te di mereched el obedikl.—Jakobus 1:14, 15.
METIK A ILMOKL ER A CHELSEL A ONGDIBEL ER A REKRISTIANO
15, 16. Ngera el klungiaol a dengai e le kid el chedal a ongdibel er a Rekristiano? E ngera el ilmokl a denguu er a chelsel a ongdibel?
15 Sel bo mteloi er a ongdibel er a Rekristiano, e ngdiak el belkul a kmo ke mla soiseb er a ta er a bedengel a cheldebechel er a beluu. Ngbai Jehovah a mla mekedongau el osisebau er a chelsel a ongdibel er ngii. (Johanes 6:44) Me ngera uchul me ngngileltau? Ngmle sebechel el mesang a melemalt a rengul el chad el oba dakt el bedul a Dios? Ke locha mo melekoi el kmo: “Ngkmal diak el uaisei!” Me ngera ngmilsang a Dios? Ngmilsang a chad el soal el melasem el mo oltirakl a llechul, el rengul a kongei el mo oltaut aika el llechul er a klengar er ngii. Me ngngar er a chelsel a ongdibel, e a Jehovah a omekerreu er kau e osisecheklau a Tekingel. E ngdirrek el mla rullau el mo mimokl er a klsuul el osisechakl me a klaumerang, e ngosukau el mo omekeroul a blekerdelel a Kristus. (Monguiu er a Efesus 4:22-24.) Me chelechang e ngmla mo er ngii a techellem el mo teloi er a rechad el tir a mla mo mimokl.—Jakobus 2:12.
16 Ka di molatk er tiang: Ke mo medakt sel bo mteloi er a rechad el betik a rengrir er a Jehovah? Sel mongedecheduch er a rudam me a rudos er kau er a Kingdom Hall, e ke di bekikl el kmo a rechad a ruchorech a kloklem? Ngdiak el uaisei! E ngbai chelellakl a uldesuem. Me ke oba osisiu el uldasu sel bo mteloi er a rechad er a beluulechad? Ngkmal diak! Me a lmuut el tang, a ilmokl el bo molechesuar sel mteloi er a rechedal a Dios er chelechang a di olechotel a cherrungel el ilmokl el mo er ngii er a ngar er a medad.
“A ILMOKL RA KLEBKALL RAR NGELEKEL A DIOS”
17. Ngmekerang a “demiir ar ngelekel a Dios” e mo uchul a ilmeklir a rechad?
17 Sel taem er a losaod er a ilmokl el Jehovah a mla kutmeklii el kirir a rechedal er tia el chutem e a Paulus a dilu el kmo: “Le bleob a kmal oureng el mengiil ra demiir ar ngelekel a Dios.” Ngliluut el dochelii el kmo: “Ngmo lmuut ra bleob el mengubet ra blekeradel ra klsibai ra ngemed e mo nguu a ilmokl ra klebkall rar ngelekel a Dios.” (Rom 8:19-21) Me a “bleob” a melutk el kirir tirke el oba omelatk el mo kiei er tia el chutem, el tir a mo ngmai a klungiolir er a “demiir” a rengellitel el ngelekel a Dios. Me sel taem er a demiir tirka el “ngelekel,” me bo lebekiis er a kodall el mo nguu a klengar er a eanged, e te mo obengkel a Kristus el mengikiid er tia el chutem er a rokui el klengit e omekrael er a “kloul seked” el mo soiseb er a beches el blekeradel er a beluulechad.—Chocholt 7:9, 14.
18. Te mekerang e lmuut el mo mimokl a rebekongesenges el chad? E ua ngera el ilmokl a bo lenguu?
18 A klechad a di kmedu el mo mimokl er a omengesuseu er a Satan me a remekngit el anghel er ngii. (Chocholt 20:1-3) Tiaikid el taem a mera el mo taem er a ulengull! E a uriul er tiang, e tirke el 144,000 el kldemel a Kristus el king me a prist a mo melemolem el ousbech er a olubet el tenget el melubet a kngtil a klechad el mo lmuut er a bo lemecherrungel. (Chocholt 5:9, 10) Me a uriul er a lemeasem a klaumerang er tir, e a rebekongesenges el chad a mo nguu a cherrungel el ilmokl el Jehovah a mla oterekeklii er tir, el ngii a “ilmokl ra klebkall rar ngelekel a Dios.” Me ka di molatk! Ngkmal mo beot er kid el meruul a melemalt er a osengel a Dios, e le bedenged a mla mecherrungel me a blekerdeled a mo cherrungel el oltirakl er a blekerdelel a Dios.
19. Ngera kired el meruul er ngii a lsoad el mo nguu a “ilmokl ra klebkall rar ngelekel a Dios”?
19 Kau, ke kmal oureng el mengiil er a “ilmokl ra klebkall rar ngelekel a Dios”? A lsekum e nguaisei, e becherei a uldesuem me a rengum me lolemolem el oltirakl er a “cherrungel llach ra ilmokl.” Bo leblak a rengum el mesuub er a Biblia, e mrellii a klengar er kau el mo oltirakl er a klemerang. Moluluuch el olengit er a oureor el klisichel a Dios me lomekrael er kau. E mngai a klungiolem er a ongdibel er a Rekristiano me osisecheklel a Jehovah. Lak becherei a Satan me longetikaik er kau el mo omdasu el kmo ngkmal meringel a llechul a Dios, el ua omerellel el mo er a Eva. Me alta e a diabelong a mellomes a rengul, engdi ngsebeched el mo mesisiich er ngii, e le “ngdiak lak dodengei a ulekbetil.” Kede mo mesaod er tiang er a ongingil el suobel.—2 Korinth 2:11.
[Aike el Ker er a Suobel]
[Aike el siasing el ngar er a 14 el llel]
Ngak, ak dirk oureng a bebil el “ilmokl” er tia el beluulechad?
[Aike el siasing el ngar er a 14 el llel]
Ak mla oterekeklii a renguk el mo oltirakl er a klemerang?
