“Ng Diak a Bo Kmedakt er Ngii”!

“A lsekum toldechelakl er ngak a re cherrouek, me ngak a di mo oumeral ulsirs er a Dios.”​—PSALM 27:3.

NGMEKERANG AIKA EL BADES E NGOSUKAU EL MO OBA BLEKEU?

Psalm 27:1

Psalm 27:4

Psalm 27:11

1. Ngera el ker a bo longer aike el bades el ngar er a Psalm 27?

 NGERA uchul me a beluulechad a di merael el mo mekngit e kid a kmal blak a rengud el oldingel a obliil? Ngera uchul me ngkmal dmeu a rengud el ousbech a temed me a klisiched el omerk er a klumech alta e ngkmal kosekodel a rolel a keizai er a beluu? Kede mekerang e melemolem el oba omelatk alta e a rechad a di medakt el kirel a ngar medad el klebesei? A cheliteklel a King el David el ngar er a Psalm 27 a onger er aika el ker.

2. A dakt ngera ngrullii er a chad? Engdi ngulterekokl a rengud er a ngerang?

² A David a omuchel er a cheliteklel el kmo: “A RUBAK a llemesek e osebelek; ng diak a bo kmedatk er ngii. A RUBAK a mesebechakl er ngak er a rokui el kdekudel; me ng diak bo kmedakt.” (Psalm 27:1) A dakt a sebechel el rullii a chad el kmal mo mechitechut me ngmo diak el sebechel el meruul a ngii di lengerang. Engdi a chad el oumerang er a Jehovah a ngar er ngii a omeltkel me ngdiak lemedakt. (1 Petrus 3:14) Me a lsekum a Jehovah a klisiched me kid a oumerang er ngii, e ngulterekokl a rengud el kmo ngmo ‘ungilbesud e mo selebechakl, ele ng diak a ngeral uchul me bo de medakt.’ (Osisechakl 1:33; 3:25) E ngera uchul?

A JEHOVAH “A LLEMESEK E OSEBELEK”

3. Ngmekerang a Jehovah e mo llemesed? E ngera kired el meruul?

³ A Biblia sel ledu el kmo a Jehovah “a llemesek” e ngbelkul a kmo Ngii a olisechakl er kid er a klemerang. (Psalm 27:1) A llomes a sebechel el meluich er a kmung ngerang el ngar er a roled, engdi ngii el llomes a diak lenguu el oridii. Me ngkired el oleiub er kid er ngii. Me ngdi osisiu, a Jehovah a meketakl a belkul a tekoi el dubechang er a beluulechad er chelechang, me ngomeklatk er kid er  aike el tekoi el sebechel el tomellid. Ngdirrek el betok a ungil el ulekrael er ngii el ngar er a Biblia el sebechel el ngosukid. Engdi kid a kired el mo oltirakl aike el dosuub. A doruul el uaisei, e kede kuk mo mellomes a rengud er a recherroued me a lechub a resensei er kid.​—Psalm 119:98, 99, 130.

4. (a) Ngera uchul me a David a dilu el kmo a Jehovah a osobelel? (b) Ngoingerang e a Jehovah a mo olsobel er a remesiungel?

⁴ A tekingel a David el ngar er a Psalm 27:1 a ochotii el kmo ngdirk melatk er sel rolel er a lolsobel er ngii a Jehovah er a uchei. El ua tiang, a Jehovah a ulsebelii er a laion me a kuma, e dirrek el ngilsuir el mo mesisiich er a Goliath. E a uriul, e ngngilsuir a David er aike el bek el taem el lolasem a King el Saul el omurech er ngii. (1 Samuel 17:37, 49, 50; 18:11, 12; 19:10) Seikid a uchul me a David a dilu el kmo a Jehovah a osobelel. Me a Jehovah a mo olsobel er a remesiungel el ua omerellel el mo er a David. Ngmo meruul er tia el tekoi er oingerang? Sel lemei a “kloul ringel.”​—Chocholt 7:14; 2 Petrus 2:9.

MOLATK AIKE EL TAEM EL LENGILSUKAU A JEHOVAH

5, 6. (a) Ngmekerang a tekoi el dolatk e ngosukid el mo bekeu? (b) Ngera uchul me ngungil sel dolatk aike el rolel e a Jehovah a ngilsuterir a rechedal er a irechar?

⁵ Kede menguiu er a klou a ultutelel el tekoi el ngar er a Psalm 27:2, 3 el ngii a sebechel el ngosukid el mo oba blekeu. (Monguiu.) A David a dirk millatk aike el taem el Jehovah a ngilsuir. (1 Samuel 17:34-​37) Aike el tekoi el lullatk a rirellii el mo bekeu me ngmle sebechel el outekangel a ngii di el meringel el blekeradel. Me kau ke dirk melatk aike el taem el lengilsukau a Jehovah? Me sel molatk aikang e ngmeskau a blekeu? El ua tiang, ngmla ta el moluluuch el kirel a tekoi el omekringel er a uldesuem? E a uriul e ke mlo melechesuar el kmo a Jehovah a milskau a llomeserreng me a klisichem el mo outekangel er ngii? Ke dirk melatk er a taem el Jehovah a ngilsukau el sumechokl a mondai el ngii a uchul me ngdimlak el deu a rengum el mesiou er ngii? Me a lechub ke melatk er sel rolel e ngmilskau a beches el techall er a omesiou? (1 Korinth 16:9) Ngmo uangerang a uldesuem sel molatk aika el tekoi? Ngkirel aika el tekoi el mo oterekeklii a rengum el kmo a Jehovah a sebechel el ngosukau el sumechokl e outekangel a ngii di el meringel el blekeradel er a klengar.​—Rom 5:3-5.

 ⁶ Kede mo mekerang a lsekum a mesisiich el kabelment a melasem el lolekngemed er a cheldebechel er a Resioning er a Jehovah? A rebebil er a rechad a millasem el meruul er tia el tekoi e dimlak el sebechir. Me sel dolatk er a rolel e a Jehovah a ngilsuterir a rechedal er a irechar, e ngmeskid a blekeu me ngsebeched el outekangel a ngii di el tekoi el mo duubech er a ngar medad.​—Daniel 3:28.

BLTIKERRENG EL KIREL A MERA EL OMENGULL

7, 8. (a) Ngera ngullengit a David er a Jehovah el ngar er a Psalm 27:4? (b) Ngerang a klou el templo er a Jehovah? E uangerang a rolel a omengull er a chelsel er chelecha el taem?

⁷ A bltkil a rengud el kirel a mera el omengull a smisichid. (Monguiu er a Psalm 27:4.) A “blil a RUBAK” er sel temel a David a mle chedaol el Tento. Me a David a kiltmokl a tekoi me bo el sebechel a ngelekel er a Salomon el toketekii a klebokel el templo er a Jehovah. A betok el rak er a uriul e a Jesus a milsaod er a taem el mo sebechir a rechad el mengull er a Jehovah el diak lebo er a templo. (Johanes 4:21-​23) A Jehovah a mla kutmeklii a rolel e ngmo sebeched el mengull er ngii er sel rolel el lekengei er ngii. Ngkongei er a omengull er kid a lsekum kede oba klaumerang el kirel a olubet el tengetengel a Jesus. Ngar er a 8-​10 el bliongel er a Hebru, e a apostol el Paulus a mesaod er tia el rolel a omengull el kmo ngklou el templo el “diak le rruul ra chim.” Ngdirrek el milsaod el kmo tia el templo a ulemuchel er sera lemetecholb a Jesus e letengetengii a klengar er ngii el mo meruul a soal a Jehovah. E tiang a dilubech er a rak er a 29. (Hebru 10:10) Kede mekerang a dongull er a Dios el ngar er tia el templo? El okiu sel doluluuch el mo er a Jehovah el oeak a “cherrungel kloumerang,” e dolisechakl er a rebebil el oba blekeu. Kede dirrek el mengull el ngar er tia el templo sel debo er a miting me sel temel a omengull el ongalek. (Hebru 10:22-​25) A bltkil a rengud el mo er a mera el omengull a ngosukid el melemolem el meruul aika el tekoi er chelecha el taem er a ulebongel.

⁸ Meliuekl er a beluulechad e a remesiungel a Jehovah a mengoit er a klou el temir el meruul er a omesiungir, e mesuub a beches el omelekoi, e dirrek el melukl el mo er aike el basio el ousbech a ngeso el kirel a berkel a klumech er a Renged. Te oukerebai er ngike el milluches er a Psalm el ullengit er a Jehovah el kirel a di ta el tekoi el kmo: “Bo kkiei er a blil a RUBAK er a klemengetel a klengar er ngak, e bo le mechas a renguk er a klungiolel.” A remesiungel a Jehovah er chelechang a sorir a lomekngeltengat er tir, e dirrek el sorir el mengull er ngii er a chelsel a ngii di el blekeradel.​—Monguiu er a Psalm 27:6.

MOUMERANG ER A NGELSUIL A DIOS

9, 10. Ngerang a telbiil el medung er a Psalm 27:10?

⁹ A tekingel a David a ochotii el kmo ngmera el uluumerang er a ngelsuil a Jehovah. Ngdilu el kmo: “A demak ma delak a bo le chitak, e a RUBAK a mo omekerreu er ngak.” (Psalm 27:10) Ngokiu a 22 el bliongel er a 1 el Samuel e kede medengei el kmo a demal me a delal a David a dimlak lechitii. Engdi chelechang e te betok el chad a mla choititerir a rengelekir. Me tirka el ngelekir el milechoit a mla mongeseu el okiu a bltikerreng er a chelsel a ongdibel er a Rekristiano, e dirrek el mla mo melechesuar a klou el ulekerreu.

¹⁰ A Jehovah a kltmokl el omekerreu er a remesiungel el mo lmuut er a taem el rechad er a blirir a choititerir. Me kede medengei el kmo ngdirrek el mo omekerreu er tir er a chelsel a ngii di el blekeradel. El ua tiang, ngkirel el mo ulterekokl a rengud el kmo a Jehovah a mo ngosukid el kirel aike el olengesonges el tekoi el dousbech kid me a telungalek er kid. (Hebru 13:5, 6) Ngungil el medengei aike el dousbech me a blekerdelel a klengar er kid.

11. Ngmo uangera uldesuir a rechad sel dochotii el kmo kede oumerang er a Jehovah? Mosaod.

¹¹ Ka molatk er a tekoi el dilubech el mo er a Victoria el milsuub a Biblia e kiliei er a Liberia.  A chad el ledilak el kiei a chilitii ngii me a retedei el ngelekel. Me alta e ngdimlak a blil me a urerel engdi ngdimlak el meterob el mesuub a Biblia, e a uriul e ngmiltecholb. A ngelekel el redil el 13 a rekil a miltik er a tet el mui er a udoud. Ngdimlak lomechur aike el udoud e le ngmle chetirir el mekesuseu el mo ousbech a udoud el diak el ududir. Me te di mle mereched el osiik er ngike el chad el urriid a ududel. Me sera lebetik er ngii, e ngii el chad a dilu el kmo ulekum a rechad el rokui a mo honest el ua Resioning er a Jehovah, e nglmuut el mo klou a budech er a beluulechad. Me a Victoria a ulechotii er ngika el chad a telbilel a Jehovah el ngar er a Biblia el kirel a beches el beluulechad. Ngmlo mechas a rengul er a klaumerang me omerellel a Victoria el mle honest me ngmilsang a betok el udoud el omeksulel. Me a rebetok el chad a medengei el kmo a Resioning er a Jehovah a kmal honest el chad. Te honest e le te oumerang el kmo a Jehovah a mo mesterir aike el lousbech.

12. Ngera uchul me kede melemolem el mesiou er a Jehovah alta e kede mo oriid a urered me a ududed? Mosaod.

¹² Ka molatk er a uldesuel a Thomas el ngii a dirkak el metecholb el omerk er a klumech er a beluu er a Sierra Leone. Ngulemuchel el oureor el sensei e dimlak el uduudel el ta el rak. Ngmle kirel el mo mengedecheduch er a merreder er a skuul me bo el sebechel el ngmai a ududel. Ngika el merreder a dirrek el prist me ngdilu er a Thomas el kmo a klaumerang er a Resioning er a Jehovah a diak lekengei er ngii tia el skuul me ngkirel el mo diak el Sioning a lsekum e ngsoal el melemolem el oureor. Me ngchilitii tia el ureor e dimlak lengai aike el kirel el ududel. E a uriul e ngmiltik er a urerel el mengituuk a razio me a cell phone. Ngbetok a tekoi el mla duubech el ochotii el kmo a lsekum kede oumerang er a Jehovah, e ngdiak el sebek a rengud er aike el tekoi el dousbech. E le Jehovah el ulemeob a rokui el tekoi, e blechoel el omekerreu er a rechedal a uchul me kede medengei el kmo ngmo omekerreu er kid.

13. Ngera uchul me a rudam me a rudos er aike el mechebuul el beluu a kmal mechesang el omerk er a klumech?

¹³ A rudam me a rudos er kid er a betok el mechebuul el beluu a kmal mechesang el omerk er a klumech. E ngera uchul? A ta el obis er a branch a melekoi el kmo a rebetok el chad el kongei el mesuub a Biblia a klou a temir el mesuub e le ngdiak loureor. Me a rudam me a rudos a dirrek el klou a temir el omerk er a klumech. A rechad a kongei el kmo kede kiei er a uriul el sils e le ngsebechir el mes a mekngit el blekeradel el iliuekl er tir. Ngar er a ta er a beluu e a rebetok el Sioning a kesengil e ngta el chad a mesuub a Biblia el obengterir a retedei el chad. A ta el missionari el mla mesiou el betok er a 12 el rak er sel beluu a milluches el kmo a rudam me a rudos a klou a temir el oldingel a obliil e mesuub a Biblia el obengterir a rechad e le ngdiak el mechesang er a betok el tekoi.

14. Ngokiu a ngera el rolel e a Jehovah a mo omekerreu er a klou el seked?

¹⁴ A Jehovah a mla tibir el mo olengeseu e  omekerreu e dirrek el olsobel er a rechedal, me kede oumerang el kmo ngmo otutii tia el telbilel. (Psalm 37:28; 91:1-3) Ngmo er ngii a klou el ildois er a rechad el tir a mo suobel er sel taem er a “kloul ringel.” (Chocholt 7:9, 14) Me a Dios a mo omekerreu er tia el klou el seked el diak el becherei a ngii di el chad me lokngemedeterir a rechedal er chelechang el mo lmuut er sel taem. A ta er a rolel e ngmo omekerreu er tir a sel lomesterir aike el rokui el lousbech me bo el sebechir el outekangel e lolemolem er a ungil el deleuill er tir el obengkel. Me sel taem er a Armageddon e a Jehovah a mo olsobel a klengar er a rechedal.

“MOSISECHEKLAK E RUBAK, ER A SOAM”

15, 16. Ngmo uchul a ngera el klungioled sel doltaut a osisecheklel a Dios? Ka mosaod.

¹⁵ A lsekum e ngsoad el melemolem el oba blekeu e ngkired el mo mosisechakl er a Dios. A David a dilu el kmo: “Mosisecheklak e RUBAK er a soam a kuruul er ngii, e mchetikikak er a mededaes el rael.” (Psalm 27:11) A lsoad el mosisechakl er a Dios e ngkired el kerekikl el orrenges a ulekrael er a Biblia me aike el ulekrael el mei el okiu a cheldebechellel a Jehovah. Ngdirrek el kired el oltaut aike el tekoi el desuub. El ua tiang, a rebetok a mla otireklii a ulekrael el mo omekbeot a klengar er tir. Te mla kokad a belsir e oterau aike el klalo el diak lousbech. Me sera bo el mekngit a keizai er a beluu e ngdimlak lerelleterir el mo suebek a rengrir. Me chelechang e ngdiak lemeringel el oureor el mo mengkad a belsir er a klalo el diak lousbech, me ngsebechir el mengoit er a klou el taem el meruul er a omesiungir. Ngkired el di kid el oker el kmo, ‘Ngak ak mereched el oltaut a omellach er a Biblia me aike el babier el loltobed a blak a rengul e mellomes a rengul el mesiou, alta ngmeringel er ngak el otireklii?’​—Matteus 24:45.

¹⁶ Sel dekengei er a Jehovah me lolisechakl er kid e lomekrael er a klengar er kid, e ngkmal diak a bo demedakt er ngii. A ta el odam el chad er a Merikel a ulsiik er a techall er a ureor el mo ngosuir ngii me a telungalek er ngii el melemolem el mesiou el mui el taem. Engdi a merrederel a dilu el kmo ngkmal diak el sebechel el mo er tia el ureor e le ngdiak a ngarbab el skulel. A lsekum ke mo chelebangel a osisiu el tekoi e ke mo ouuchel er a rengum e lekau el millilt el mo mesiou el mui el taem e dimlak bo er a ngarbab el skuul? Eru el sandei er a uriul, e ngike el merrederel a mlo diak loureor e a kuk ta er a merreder a uleker er ngika el odam el kirel a turrekong er ngii. Me ngii el odam a dilu el kmo ngii me a bechil a mesiou er a Jehovah el mui el taem e sorir el melemolem el meruul er tia el ureor. Me a uchei er a lerekir a cheldechedechal e ngika el merreder a dilu el kmo: “Ak kulemes er kau el kuk ngodech er a rebebil! Sera bo lemechitechut a demak, e a reteru el odam er kau a mle bek el sils el lemei e milenguiu er a Biblia el mo er ngii. Me ak tilbir el kmo sel lebo er ngii a techellek el olengeseu er a ta er a Sioning er a Jehovah, e ak mo ngosuir.” Me a bo lekukuk e ngika el odam a ngiluu sel techall er a ureor el ngike el kot el merreder a mle chetil el lomsang. Me sel denguu a Renged el mo kot er a chelsel a klengar er kid e a Jehovah a ulterekokl el mo otutii a telbilel el meskid aike el rokui el dousbech.​—Matteus 6:33.

A KLAUMERANG ME A OMELATK A KLOU A ULTUTELEL

17. Ngera ngosukid el mo diak demedakt er a ngar medad el klebesei?

¹⁷ A tekingel a David a ngosukid el mo medengelii a klungel a ultutelel a klaumerang me a omelatk, er a ledu el kmo: “Ng ulterekokl el di kngar el mo mesa klungiolel a RUBAK el mor a re chedal.” (Psalm 27:13) Ngmo uangerang a blekerdelel a klengar er kid oleko Dios a dimlak lebeskid a omelatk me a lechub e ngdimlak ledung aike el tekoi el ngar er a Psalm 27? Me chelechang el uriul el sils e ngkmal kired el melemolem el meluluuch el mo er a Jehovah me lolisiich er kid e losebelid er a taem er a Armageddon.​—Monguiu er a Psalm 27:14.

[Aike el Ker er a Suobel]

[Siasing el ngar er a 23 el llel]

A David a mlo mesisiich sel lolatk aike el taem el Jehovah a ulsebelii

[Siasing el ngar er a 25 el llel]

Kid kede omes er a meringel blekerdelel a klengar el ua techall el mo menglou er a omesiunged?