Mosuub er a Tekingel a Dios

Ngera Uchul Me Ngkired el Ousbech er a Ngklel a Dios?

Tia el suobel a mesaod a ker el locha mla ta el moker e dirrek el ocholt a nger er ngii er a chelsel a Biblia. A Resioning er a Jehovah a kmal dmeu a rengrir el mo mesaod aika el nger el obengkem.

1. Ngera uchul me a Dios a ngar er ngii a ngklel?

Ngulterekokl el soam a rechad a lomekedong er a ngklem er a bai loleker er kau el kmo “sechal” me a lechub e ng “redil.” A rebek el chad a ngar er ngii a ngklir, me kede omekedong er tir el ousbech a ngklir. A Dios a betok a dial el ua “RUBAK el Dios,” “Dios el Olab a Bek el Klisiich,” me a ‘Omebeled.’ (Genesis 15:2; 17:1; Olisechakl 12:1) Engdi ngii a mla ochotii a ngklel, me ngsebeched el ousbech er ngii el omak a deleuill er kid el obengkel. E ngii el ngakl a Jehovah.​—Monguiu er a Exodus 3:14, 15 me a footnote.

Me alta betok el oidel a Biblia a mla mtechir a ngklel a Dios el olab a ngakl el ua “Dios” me a “RUBAK,” engdi tia el ngakl el Jehovah a debetik er ngii el bekord el 7,000 el taem er a chelsel aike el Biblia er a irechar el tekoi er a Hebru. Me ngbleketakl el kmo a Dios a soal a bo dodengelii a ngklel.​—Monguiu er a Isaia 12:4.

2. Ngera uchul me ngklou a ultutelel a bo dodengelii a ngklel a Dios?

Ngklou a belkul el bo dodengelii a ngklel a Dios, el belkul a kmo ngar er ngii a kmes el deleuill er kid el obengkel. Me a ngakl el Jehovah a belkul a kmo “Ngii a Otaut a Telbilel.” Me a Dios a sebechel el mo ngii di el ngerang me lotaut a moktek er ngii. Me a lsekum kede mera el medengelii a ngklel a Dios e ngbelkul el kmo kede oumerang el kmo ngmo otaut a telbilel. (Psalm 9:10) A klaumerang er a rechad el tir a medengelii e ousbech er a ngklel a Dios a rulleterir el mo oumerang er a ngii e nguu el mo kot er a chelsel a klengar er tir. Me a Jehovah el Dios a omekerreu er a choua itirka el chad.​—Monguiu er a Psalm 91:14.

 3. Ngera uchul me a Dios a soal a rechad a bo lodengelii a ngklel?

A Dios a soal a rechad a bo lodengelii a ngklel e le ngmo uchul a klungiolir. Ngmo uchul e ngsebechir el mo sechelil a Dios e oba omelatk el mo kiei el diak a ulebengelel. Tiaikid a uchul me ngsoal a douchais er a ngklel el mo er a rechad!​—Monguiu er a Johanes 17:3; Rom 10:13, 14.

A Jesus a ulechotii a ngklel a Dios er sera lolisechakl er a rechad el kirel a omerellel a Dios me a llechul me a telbilel. Me tirke el oltirakl er a Jesus er chelechang a dirrek el ouchais er a ngklel el mo er a rokui el chad. Te meruul er tiang el oba kltarreng el ‘chedal a Dios’ el kirel a ngklel.​—Monguiu er a Rellir 15:14; Johanes 17:26.

4. Ngmekerang a Dios e kobkellii a ngklel?

A Jehovah el Dios a soal el mengebkall er a ngklel e le ngmla motuub. El ua tiang, a rebebil a melekoi el kmo ngdimlak lomeob er a rechad e diak a belkul a dolengesenges er ngii. A rekuk bebil a melekoi el kmo ngdiak lomekerreu er kid e ngii a uchul a ringel el dechelebangel. A choua itirka el chad a oltuub er a ngklel, engdi a omerellir a diak lolemolem e le Dios a mo okngemedeterir tirke el rokui el oltuub er a ngklel.​—Monguiu er a Psalm 83:17, 18.

A Jehovah a mo kobkellii a ngklel er sel taem el Rengedel a okngemed a rokui el dereder er a beluulechad e lmuut el toketekii a budech me a ulekerreu el kirir a rechad. (Daniel 2:44) Ngdi kmedung e a rechad el rokui a mo medengei el kmo a Jehovah a di ta el mera el Dios.​—Monguiu er a Esekiel 36:23; Matteus 6:9.

Me ngkirem el mekerang? Molekeed er a kau er a Dios el mesuub er a Tekingel e bo mteloi er a rechad el betik a rengrir er ngii. Me sel taem el Jehovah a mo kobkellii a ngklel e ngmo melatk er a reblak a rengrir el mesiungel.​—Malakai 3:16.

A lsoam a lmuut el omesodel e momes er a 1 el bliongel er tia el babier, Ngerang Mera el Lolisechakl a Biblia?, el mirruul er a Resioning er a Jehovah.

[Siasing el ngar er a 10 el llel]

A ngklel a Dios el tekoi er a Hebru