Mosuub er a Tekingel a Dios

A Rechanghel Ngera Te Meruul el Mei er Kid?

Tia el suobel a mesaod a ker el locha mla ta el moker er ngii e ocholt a nger er ngii er a chelsel a Biblia. A Resioning er a Jehovah a semeriar el mo mesaod aika el nger el obengkem.

1. Te rua techang a rechanghel?

A rechanghel a kiei er a eanged. Ngkuk ngarbab a blekerdelel a klengar er tir er a redi chad. Ngike el mera el Dios a ulemeob er a rechanghel er a uchei er a lomeob er a beluulechad. (Job 38:4, 7; Mateus 18:10) Te betok el miliol el blak a rengrir el anghel a iliuekl er a Jehovah.​—Monguiu er a Psalm 103:20, 21; Ocholt 5:11.

2. A rechanghel te olengeseu er a rechad?

A rechanghel a ullengeseu er a melemalt el chad el Lot. Ngkiliei er a mats el kmal mle mekngit a rechad er ngii me a Dios a tilbir el mo melemall er ngii. A reteru el anghel a dilu er a Lot me lechiis ngii me a telungalek er ngii. A rebebil er a rechad a ulemdasu el kmo tia el tekoi a di ngellakel me ngdimlak lorrenges er ngii. Engdi a Lot me a rengelekel el redil a silobel e le tir el ullengesenges er a tekingel a Dios el ulekiu a rechanghel el mei.​—Monguiu er a Genesis 19:1, 13-​17, 26.

A Biblia a ochotii el kmo a rechanghel a olengeseu er a rechad er chelechang el omekrael er a urerir tirke el omerk er a ungil el chais er a Rengedel a Dios. (Mateus 24:14) E a ungil el chais a uldimukl er ngii a uleklatk el mla er a Dios el mei el okiu a rechanghel. Me ngdi ua tekingel a Dios el mo er a Lot el dimlak el ngellakel.​—Monguiu er a Ocholt 1:1; 14:6, 7.

A Dios a sebechel el ousbech er a rechanghel el melisiich er kid er sel taem el bo dechelebangel a ringel. Ngulderechii a anghel el mo melisiich er a Jesus.​—Monguiu er a Lukas 22:41-​43.

Ngdi kmedung e a Dios a kuk mo oldurech er a rechanghel el mo omekoad er a remekngit el chad el tir a uchul a ringel me a chelebuul. E tiang a mo uchul a deurreng me a ulengull el mo er a klechad.​—Monguiu er a 2 Thesalonika 1:6-8.

 3. A remekngit el anghel ngera te meruul el mei er kid?

A rebetok el chad el ngar tia el chutem a diak lolengesenges er a Dios. Me ngdi osisiu a rebetok el anghel el ngar er a eanged a mlo diak lolengesenges er a Dios. (2 Petrus 2:4) A Satan el Diabelong a ngike el mengeteklir tirke el rokui el mekngit el anghel. Me ngii el Satan me a rechanghel er ngii a mengeuid er a rechad.​—Monguiu er a Ocholt 12:9.

A Satan a ousbech a mekngit el rolel a siobai, kabelment er a rechad, me a klsuul el klechelid el mengesuseu er a rechad el mo cheroid er a Dios. Me ngii el Satan a uchul a chelebirukel, klakoad, ringel me a chelebuul el omekcharm er a rechad.​—Monguiu er a 1 Johanes 5:19.

4. Te mekerang a remekngit el anghel e mengeuid er a rechad?

A Satan a mla mengeblad er a rebetok el okiu a osisechakl el kmo a rulekoad a sebechir el mengedecheduch er a rechad. Engdi a Biblia a kmo a rulekoad a diak el sebechir el mekerang. (Olisechakl 9:5) A remekngit el anghel a mengeblad er a rechad el okiu sel losuub er a rolel a longedecheduch a remla mad el betik er a rengrir. (Isaia 8:19) Te dirrek el ousbech er a oltuubladek, remengelil, rumlaoch me a tirke el omes a btuch el mengeuid er a rechad. A Tekingel a Dios a mengelechel er kid el mo mengeroid er kid er chouaika el tekoi. Me ngkmal kired el chemoit a rokui el klokled el ngii a chelsechusem er a ngii di el rolel a tekoi er a olai.​—Monguiu er a Duteronomi 18:10, 11; Rellir 19:19.

A lsekum e ngbetik a rengud er a Jehovah, e ngdiak el kired el mo medakt er a remekngit el anghel. Kede mo omtok er a Diabelong e bai mo kmeed er a Dios sel dosuub er a Tekingel el Biblia e dolengesenges er ngii. A Jehovah a lmuut el mesisiich er a remekngit el anghel. Me a reblak a rengrir el anghel er Ngii a sebechir el melisiich er kid er sel taem el dousbech a ngeso.​—Monguiu er a Psalm 34:7; Jakobus 4:7, 8.

A lsoam a lmuut el omesodel e momes er a 10 el bliongel er tia el babier, Ngerang Mera el Lolisechakl a Biblia?, el mirruul er a Resioning er a Jehovah.