Bo Mkeed er Ngike el Orrenges a Nglunguuch

A REBETOK el melekoi el kmo te oumerang er a Dios a diak el sebechir el smodii a uchul a klaumerang er tir, me sel uchul me a klechelid a blechoel el meruul a mekngit me a dirrek el sel uchul me a Dios a omechei a ringel me a chelebuul. Te di meluluuch el mo er a Dios el diak lodengelii.

Engdi ngkmal sebechem el olekeed er kau er a Dios. Ngsebechem el toketekii a klaumerang er kau er a Dios me ngmo blak a rengum el bedulngii, e dirrek el mo betik a rengum er ngii. A klaumerang a mo er ngii el okiu a ochotel a tekoi. (Hebru 11:1) Sel msubii a klemerang el kirel a Dios, e ke mo ungil el medengelii me ke mengedecheduch er ngii el ua sechelim. Me bo donguiu a tekingir a rebebil el millemolem el meluluuch alta e te uluumededenger er a Dios.

◼ A Patricia el dulsaod er ngii er sel kot el suobel a kmo: “A ta er a klebesei e ngak me a reteruich el sechelik a milsaod a tekoi er a klechelid. Ak uluuchais er tir el kmo ak tilobed el merael me lak kurrenges er a demak el ngii a diak loumerang er a Dios el chadecheduch ngii me a ta er a Sioning er a Jehovah el mle oldingel er kemam. Me a ta er a sechelik a dilu el kmo, ‘Tirka el Sioning er a Jehovah a locha melekoi a klemerang.’

“E a tang a dilu el kmo: ‘Bai debo er a ta er aika el miting er tir me bo desang,’ me aki mlong. Alta ngdirk mle rrau a rengmam engdi a rebebil er kemam a millemolem el mo er aike el miting, e le ngkmal mle ungil a blekerdelir a Resioning.

“A ta er a Sandei e ak rirengesii a tekoi el ngildechii a uldesuek. Ngike el milengedecheduch a milsaod er a uchul me a rechad a chuarm. Ngdimlak kudengei el kmo a chad a ulebeob el cherrungel, e a klengit me a kodall a mlo er a rokui el ulekiu a di ta el chad. Ngdirrek el silodii a uchul me a kodellel a Jesus a mle kirel el meketmokl me lolutii a cherrungel el klechad el lurridii a kot el chad el Adam. * (Rom 5:12, 18, 19) Ngmlo bleketakl er a renguk aika el tekoi, me a kumdesua el kmo: ‘Ngmera el ngar er ngii a Dios el omekerreu er kid.’ Ak millemolem el mesuub er a Biblia, e mlo sebechek el meluluuch el oumerang el kmo ngar er ngii a Dios.”

◼ A Allan el dulsaod er ngii er a uchei a kmo: “A ta el taem e a Resioning er a Jehovah a mlei er a blimam me a bechik a uleker er tir el me tmuu e le ngmle soal a omesodir el kirel a diak a ulebengelel el klengar er tia el chutem. Me a kulekerir el mo er a uum e oumondai er ngii el kmo ‘lak di mongesengsang, ngdiak el kirem el oumerang aike el lolekoi!’

 “Me ngdilu el kmo: ‘Mada bong e mochotii el kmo te cheleuid.’

“Engdi ngdimlak el sebechek el ochotii el kmo te cheleuid. Te bai mle ungil a omerellir e milskak a babier el mesaod el kmo a Dios ngulemeob er a klengar me a lechub e kede mla er a mongkii el mei. Ngkmal mle bleketakl a omesodel e mla er ngii a ungil el olechotel me nguchul e ngmlo soak el mesuub a lmuut el betok el kirel a Dios. Ak ulemuchel el mesuub a Biblia el obengterir a Resioning, e mlo medengei el kmo a tekoi el losaod a kmal ngodech er aike el rokui el tekoi el ble kudengei el kirel a klechelid. Me a cherengel a taem el kusuub el kirel a Jehovah e ngmlo sebechek el mera el meluluuch el mo er ngii. Ngmla er ngii a bebil el diak lungil el blekerdelek me ngmle kirek el meluluuch el olengit a ngeso er ngii. Me a kuumerang el kmo a Jehovah a ulenger a nglunguchek.”

◼ A Andrew el kiei er a England a kmo: “Ngkmal mle soak a tekoi er a science, e dirrek el mla er ngii a uldesuek me a omesodek el kirel a betok el tekoi. Ak uluumerang er a uldasu el kmo kede mla er a mongkii el mei e le rebetok a melekoi el kmo ngmera el tekoi. A betok el mekngit el tekoi el kumes a uchul me ngdimlak kuumerang er a Dios.

 “Engdi a lebebil e ak mo melatk el kmo: ‘A lsekum e ngmera el ngar er ngii a Dios, e ngsoak el mo medengei el kmo ngera uchul me ngkmal betok a delengerenger me a mekemad?’ Me sel lebo er ngii a mondai er ngak e a lebebil er a taem e ak meluluuch el olengit a ngeso, engdi ngdiak kudengei el kmo ak meluluuch el mo er techang.

“E a ta el chad a ngiluu a tract el Tia el Beluulechad Ngmo Mosobel? el mirruul er a Resioning er a Jehovah el msa bechik. E tiang a ta er a ker el di kblechoel el melatk er ngii. Me tia el tract a rirellak el mo telkib el semeriar er a Biblia. Uriul e a ta er a chad a milskak a babier el The Bible​—God’s Word or Man’s? Me sera bo kudengei el kmo a Biblia a di osisiu a tekoi el losaod el di ua omesodel a science, e ngmlo soak el mesuub er a Biblia. Me sera lemei a ta er a Resioning er a Jehovah el mesaod er a omesubel a Biblia e ak kilengei el mo mesuub. Me ak mlo medengei a moktek er a Jehovah, e mlo ungil el medengelii el kmo ngii a Dios el sebechek el meluluuch el mo er ngii el ouchais aike el tekoi el ngar er a renguk.”

◼ A Jan el mlukeroul el Protestant er a beluu er a London a kmo: “A cheleblad er a chelsel a ikelesia me a betok el ringel er a klechad a uchul me ngmlo chetik el chedal a klechelid. Ak dirrek el mlo diak ngar er a college, e mlo oureor el chad er a chelitakl e ousekool a kita. Tiaikid el taem e ak mlo medengelii a Pat el ngii a mlukeroul el Katolik, e uai ngak el mla mo diak loumerang er a Dios.

“Aki dilak el kiei er a mechut el blai lobengterir a rebebil el mla chemoit a skulir, e mle semeriar er aike el klechelid er a beluu er a Asia. Aki di mekar el mo osoi el betok el klebesei el mesaod er a belkul a klengar. Alta e ngak me a Pat a dimlak ki moumerang er a Dios, engdi aki uluumerang el kmo ngar er ngii a ‘kmung ngerang’ el omekerreu a klengar er a rechad.

“A uriul er a ki molukl el mo kiei er a diluches er a beluu er a England el ulsiik a techall el mo oureor el mengitakl, e ngmlo er ngii a ngelekam el sechal. A ta er a klebesei e ngmlo smecher me ak milluluuch el mo er a Dios el diak kuumerang er ngii. Telkib el taem er a uriul e ngmlo mekngit a delongelek ngak me a Pat me ak ngiluu a ngelekam e remiid. Ak liluut el meluluuch el millatk el kmo ngar er ngii a rongesii a nglunguchek. Ngdimlak kudengei el kmo a Pat a dirrek el milluluuch.

“Uriul e a reteru el Sioning er a Jehovah a millengod er a chesmerel a Pat e ullecholt a ulekrael er a Biblia. Me ngulemekedong er ngak el olengit me ki mdak el mesuub a Biblia el obengterir tirka el Sioning. Aki silubii el kmo a lsekum e ngsomam el oldeu er a rengul a Dios, e ngkiram el mekur a chebechiielam el oltirakl a llach. E tiang a telkib el mle meringel er kemam el meruul er ngii.

“Ngmle somam el mo medengei a lmuut el betok el kirel a otutel a ulochel a Biblia, me sel uchul a ringel me a chelebuul, me a belkul a Rengedel a Dios. Cherengel a taem e aki mlo medengei el kmo a Dios a mera el omekerreu. Ngmlo somam el meruul a soal, me aki milekur a chebechiielam. Me a llomeserreng el mlo er ngii el okiu a Tekingel a Dios a ngilsukemam el omekeroul er a retedei el ngelekam. Me aki ungil el medengei el kmo a Jehovah a rirenges a nglungucham.”

Di Lekau el Merriter

A rebetok el miliol el chad a di uai tirkang el ulemes a cheleblad er a chelsel a klsuul el klechelid, e mlo medengelii sel uchul me a Dios a omechei a ringel me a chelebuul. Me ngsebechem el mesang el kmo a uriul er a lesubii a klemerang er a Biblia, e te mlo oumerang el kmo a Jehovah a mera el orrenges a nglunguuch.

Ngsoam el mo medengei el kmo ngmera el ngar er ngii a Dios? A Resioning er a Jehovah a kmal kltmokl el ngosukau el suubii a klemerang el kirel a Jehovah me sel rolel e ngsebechem el mo kmeed er Ngike el “orrenges a nglunguuch.”​—Psalm 65:2, NW.

[Footnote]

[Blurb el ngar er a 10 el llel]

“Sera bo kudengei a moktek er a Jehovah e ak mlo oumerang el kmo ngorrenges er ngak sel kululuuch el mo er ngii”

[Siasing el ngar er a 9 el llel]

A klaumerang a mo er ngii el okiu a ocholt me a urungulel a chad el soal el mo medengei a klemerang el kirel a Dios