Ngera Uchul me Ngike el Onger a Nglunguuch a Omechei a Ringel?

ALTA e a rebebil er a rechad a meluluuch, engdi ngdiak lulterekokl a uldesuir el kmo ngmera el ngar er ngii a Dios. E ngera uchul? Nglocha uaisei a uldesuir e le te omes a meklou a ringel me a chelebuul er a beluulechad. Ke mla ta el momdasu el kmo, ngera uchul me a Dios a omechei a ringel?

Omomdasu a Dios ngulemeob er a rechad el diak lecherrungel e kirir el chuarm? Ngmo meringel er kid el mengull er a Dios, a lsekum ngsoal a rechad a bo lecharm. Engdi ka molatk: Omko ke merael el meliuekl er a ta el beches el mlai e mo metik er a telemall er a bita er ngii, ke mo omdasu el kmo a kombalii ngmirruul er tia el mlai el mo uaisei? Ngkmal diak! Ke ulterekokl el mo omdasu el kmo a kombalii a rirellii el “cherrungel” engdi nglocha a chad me a lechub e ngkmung ngerang a tilemellii.

Me ngdi osisiu, sel domes aike el betok el klebokel el bleob el meliuekl er a beluulechad e dirrek el omes a betok el uldikel me a tellemall el omekringel er a rechad, e ngmo uangerang a uldesued? A Biblia a olisechakl el kmo a Dios a milebeterir a rekot el obekel el cherrungel, engdi uriul e ngdi mle tir el mo uchul a telemellir. (Olisechakl 7:29; Rom 5:12) Engdi a ungil el chais a kmo a Dios a mla tibir el mo mesmechokl er tia el tellemall, el mo olutii a bekongesenges el klechad el lmuut el mo cherrungel. Engdi ngera uchul me ngmilengiil el kmal kemanget el taem?

Ngera Uchul me Ngkmal Kemanget el Taem?

A Jehovah a ulemechei a ringel el kemanget el taem me bo lobeketakl el kmo ngtecha ngike el ngar er ngii a llemeltel el mengedereder er a rechad. Ngdimlak el moktek er Ngii el mechititerir me di el tir el mengedereder er tir. Ngii el Dios a rredemelel a mengedereder er tir. A Biblia a kmo: Ng “diak a chad el sebechel el chodereder a blekeklel.” (Jeremia 10:23) Me ngklengiterreng e le tirke el kot  el obekel a millilt el mo omtok er a omengederederel a Dios. Me a mekngit el omerellir a mlo uchul e te rirebet er a klengit. (1 Johanes 3:4) Me ngmlo diak el cherrungel e dirrek el mlo uchul a tellemall el mo er tir me a rengelekir.

Ngmla mo betok el telael el rak el Jehovah a ulemechei er a rechad me ngdi tir el mengedereder er tir, engdi a reksi a ochotii el kmo ngdiak el sebechir el di tir el mengedereder er tir. A rokui el kabelment er a rechad a mo uchul a ringel me a chelebuul, me ngdiak a ta er ngii el mla sebechel el okngemed a mekemad, delengerenger, chelebirukel el omeruul, me a secher.

Ngmekerang a Dios e Sumechokl a Tellemall?

A Biblia a tibir el kmo ngdi kmedung e a Dios a mo toketekii a melemalt e beches el beluulechad. (2 Petrus 3:13) Me ngdi tirke el melilt el mo olecholt er a bltikerreng er tir el mo er a Dios me a rechad, a sebechir el mo kiei er ngii el beluulechad.​—Duteronomi 30:15, 16, 19, 20.

A Biblia a ochotii el kmo ngdi kmedung el ngar er “sel sils el bo le mukerrekeriil” a beluulechad, e a Dios a mo olekngemed a ringel me a chelebuul me tirke el uchul ngii el tekoi. (2 Petrus 3:7) E a uriul er tiang e a Jesus Kristus el Ngellitel er a Dios a mo mengedereder er a rebekongesenges el chad. (Daniel 7:13, 14) Ngera ngmo kutmokl a omengederederel a Jesus? A Biblia a kmo: “Tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.”​—Psalm 37:11.

A Jesus el King el ngar er a eanged a mo okngemed a tellemall el ua secher, cheluodel, me a kodall el mlo er ngii e le rechad el mlo omtok er a Jehovah el ngii a “uchelel a rokui el klengar.” (Psalm 36:9) Me ngii el Jesus a mo omekungil er tirke el kongei er a omengederederel. Me seikid el taem e ngmo tmaut aika el telbiil el medung er a Biblia el kmo:

◼ “Ng mo diak a tal chad el kiei er a beluad el lmuut el mo mengeremrum el kmo ng smecher, e a rokui el klengit a mo musubes.”​—Isaia 33:24.

 ◼ “Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.”​—Ocholt 21:4.

Ngmo mechelaod a rengud sel dodengei el kmo ngdi kmedung e a Dios a mo otaut a telbilel el mo okngemed a rokui el ringel me a chelebuul. Me ngulterekokl a rengud el kmo ngii a orrenges a nglunguched alta e ngdirk omechei a ringel me a chelebuul me ngmelemolem el telkib el taem.

Ngmera el ngar er ngii a Dios, e ngii a sebechel el orrenges er kau sel mouchais aike el meringel el tekoi el mchelebangel. Ngkmal semeriar el mo mesekau el dmeu a rengum el kiei er sel taem el dikea moumededenger a tekoi e diak mcharm er a ringel me a chelebuul.