Ngtecha Ngike el Orrenges a Nglunguuch?

NGDI ta el ngike el Ulemeob a orrenges a nglunguuch. Ngdi Ngii el tang a sebechel el medengei a ngar er a rengud me a uldesued, e le ngmilebid. Me ngdi ngike el Ulemeob a sebechel el onger a nglunguched e olengeseu er a rechad er aike el lousbech. Engdi ke locha mo omdasu el kmo, ‘Ngmera el ngar er ngii a Ulemeob?’

A rebetok el chad a omdasu el kmo a bo doumerang er a Ulemeob, e ngkired el oltngakl a tekoi er a science. Engdi sel uldasu el kmo a doumerang er a Dios a omtok a tekoi er a science a klsuul. Ka molatk aika el tekoi.

◼ A ta el survey er a 1,646 el professor er a science el ngar er a 21 er aike el kot el ungil el university er a beluu er a Merikel a miltik el kmo ngdi mle bekord el 550 er tir a ngileltii tia el tekoi er a survey el kmo “Ngdiak kuumerang er a Dios.”

A mera er ngii a rebetok el scientist a oumerang el kmo ngar er ngii a Dios.

A Ocholt el kirel a Ulemeob

Ngkired el di oumerang el kmo ngar er ngii a orrenges a nglunguuch el diak a ungil el olechotel? Ngkmal diak leuaisei. A klaumerang a diak el belkul a kmo a chad a kirel el oumerang er a tekoi el diak a meues el olechotel. A Biblia a bai mesaod er a klaumerang el kmo a chad a “ultebechel a uldesuel el kirel a ikel diak le moues.” (Hebru 11:1) El ua tiang, ngdiak el sebechem el omes a eolt engdi ngsebechem el omes a llel a kerrekar el melmesim, me ke medengei el kmo ngar er ngii a eolt. Me ngdi osisiu, alta e ngdiak el sebeched el mesa Ngike el Orrenges a nglunguuch, engdi a bleketakl el olechotel a meketeklii el kmo ngmera el ngar er ngii.

Kede metik er ker a olechotel el kmo ngmera el ngar er ngii a Dios? Ngkired el di omes el meliuekl er kid. A Biblia a mesaod el kmo: “A bek el blai a ngar ngii a chad el meruul, e ngdi Dios a ngii a meruul  a rokui el tekoi.” (Hebru 3:4) Kau ke kongei er a omesodel tia el bades? Sel momes a ungil el blechebechel a btuch el ngar er a eanged, me a uchelel a klengar, me a teletelel sel kmal ileakl el bleob el ngar er tia el chutem, el ngii a brain er a chad, e ke locha mo melebedebek el kmo ngar er ngii a Dios el lmuut el ngarbab er a rechad. *

Engdi ngar er ngii a telkelel a tekoi el desuub el okiu a blebelel a Dios. Sel domtab a olechotel a blebelel a Dios e ngdi ua omorrenges er a chad el merema er a tuangel er a blim. Ke medengei el kmo ngmerema a chad, engdi ngdiak modengei el kmo ngtechang. Me ngkirem el nguu a chesimer e mesang. Me ngbelkul a kmo ngar er ngii a tekoi el kired el meruul me bo dodengelii ngike el Ulemeob.

A Biblia a di ua chesimer el mo er a klemedengei el kirel a Dios. Me sel mosuub er a bleketakl el ulaoch er a chelsel me a otutel, e ngsmisichii a klaumerang er kau el kmo ngmera el ngar er ngii a Dios. * Me a lmuut el tang, a omesodel a Biblia el kirel a omerellel a Dios el mo er a rechad a meketeklii a blekerdelel ngike el Orrenges a nglunguuch.

Ngua Ngerang a Blekerdelel Ngike el Orrenges a Nglunguuch?

A Biblia a ochotii el kmo ngkmal sebeched el mo medengelii ngike el Orrenges a nglunguuch, el ngii a sebechel el rongesid e mo medengelii a uldesued. Me a Biblia a melisiich er kid sel losaod er a Dios el kmo: “Ele konger a nglunguuch. A rokui el chad a mer kau el kirel a kngterir.” (Psalm 65:2)  Ngorrenges er tirke el meluluuch el mo er ngii el oba klaumerang. Ngdirrek el ngar er ngii a ngklel, e le Biblia a kmo: “A RUBAK * a cheroid er a dengerenger, e ngdi ng orrenges a nglunguchel a melemalt el chad.”​—Osisechakl 15:29.

A Biblia a mesaod er a Jehovah el kmo: Ng “Dios er a Bltikerreng ” e “ungil a rengul,” me ngsebechel el omelechesiu a tekoi. (2 Korinth 13:11; Psalm 104:31) Ngdirrek el mesaod er a uldesuel a Dios er a taem el mera el mle klou a mekngit el omeruul er a Beluulechad el kmo: “Ng mekngte rengul.” (Genesis 6:5, 6) A uldasu el kmo a Dios a omekcharm er a rechad el melasem er a klaumerang er tir a klsuul el tekoi, e le Biblia a kmo: A “Dios a diak loruul a mekngit.” (Job 34:12) Engdi ke locha mo omdasu el kmo, ‘A lsekum a Dios a Ulemeob e kot el mesisiich, e ngera uchul me ngomechei a ringel me a chelebuul me ngmelemolem?’

A Jehovah a milsterir a rechad a ilmeklir el di tir el melilt a tekoi, el ochotii el kmo ngii ngua ngera el Dios. E tia el ilmekled el melilt er a rolel a klengar er kid a kmal mekreos. Engdi ngklengiterreng e le rebetok el chad a ousbech a ilmeklir el meruul a mekngit el uchul a ringel me a chelebuul el mo er tir me a rebebil. Me a klou a ultutelel el ker el kired el melebedebek er ngii a kmo, ngmekerang a Dios e sebechel el torebengii a ringel me a chelebuul e diak lenguu a ilmeklir a rechad el oridii? Kede mo mesaod er tia el ker er a ongingil el suobel.

[Aike el Footnote]

[Baks el ngar er a 5 el llel]

A Klechelid Ngrullau el mo Oumededenger er a Dios?

Ngklengiterreng e le klechelid a uchul me a rebetok a mla mo diak loumerang el kmo ngar er ngii a Orrenges a Nglunguuch. A klechelid el teloi er a mekemad, me a tekoi er a terrorist, me a omelemall er a rengalek a uchul me a rechad el meluluuch a mla mo melekoi el kmo, “Ngdiak kuumerang er a Dios.”

Ngera uchul me a klechelid a mla mo meruul a mekngit el tekoi? E le remekngit el chad a ousbech a klechelid er tir el meruul a mekngit el tekoi. A Biblia a ulemlaoch el kmo a rechad el melekoi el kmo te Kristiano a mo meruul a tekoi el diak loltirakl a soal a Dios. A apostol el Paulus a dilu er a remechuodel el Kristiano el kmo: “A re bebil er a re chad el cho mtal cheldebechel a mo omulak e mengetikaik er a ruumerang el mo oltirakl er tir.”​—Rellir 20:29, 30.

A Dios a kmal chetil a klsuul el klechelid. A Tekingel el Biblia a mesaod er a klsuul el Klechelid el kmo ngchelsechusem er a “rsechir tirkel rokui el mlad er a beluulchad.” (Ocholt 18:24) Me ngar er a osengel a Dios e a klsuul el klechelid a uchul a kodellir a rebetok el chad e le ngdiak lolisechakl er tir el kirel a mera el Dios.​—1 Johanes 4:8.

Ngike el Orrenges a nglunguuch a kmal mekngit a rengul el omes er a rechad el chuarm er a omerellel a klsuul el klechelid. A Dios el betik a rengul er a klechad a di kmedung el mo ousbech er a Jesus el oukerrekeriil er tirke el chedal a klechelid el meruul a mekngit. A Jesus a dilu el kmo: “Te betok a mo dmu er ngak el kmo, ‘Rubak, Rubak! Aki uleba ngklem el mengedecheduch a tekingel a Dios.’ . . . Isei e ak mo dmu er tir el kmo, ‘Ng kmal dimlak kudengelkemiu. Bo mcheroid er ngak, kemiu el mekngit el chad!’”​—Mateus 7:22, 23.