Mosuub Er A Kllourreng Er A Jehovah Me A Jesus

“Momes er a kllourreng er a Rubak el kmo ng omeskemiu a techall el mo suobel.”​—2 PETRUS 3:15.

NGERANG A NGER ER KAU?

Ngmilekerang a Jehovah e ulechotii a kllourreng?

Ngera uchul me a Jesus a mle kirel el mo klou a rengul?

Kede mekerang e oukerebai er a kllourreng er a Dios?

1. Ngera uldesuir a rebebil el blak a rengrir el mesiungel a Dios?

 A TA el odos el blak a rengul el mesiou er a Jehovah el mla mo betok el rak, e dirrek el mla outekangel a betok el meringel el blekeradel a kmo, “Ngmo sebechek el mesang a ulebongel er a uchei er a kmad?” A rebebil el mla mesiou er a Jehovah el betok el rak a dirrek el uaisei a uldesuir. Kede kmal oureng er sel taem el Dios a mo remuul a rokui el tekoi el mo beches e choroid a mondai el dechelebangel er chelechang. (Ocholt 21:5) Me alta e ngbetok a ungil el uchul me kede oumerang el kmo a ulebongel er tia el beluulechad er a Satan a kmal kmedang, engdi ngsebechel el mo meringel er kid el oba kllourreng el mengiil er sel sils.

2. Ngera el ker el kirel a kllourreng a bo donger?

² A Biblia a ochotii el kmo ngkired el mo oba kllourreng. Me kid a di ua remesiungel a Dios er a irechar, el mo ngmai a tekoi el bla letib a Dios el kired, a lsekum kede oba kllourreng me a klaumerang el mengiil er sel taem el bo lotaut a telbilel. (Monguiu er a Hebru 6:11, 12.) A Jehovah a kmal klou a rengul. Ngsebechel el okngemedii a chelebirukel er a ngii di el taem, engdi ngmengiil el mo er sel ungil el temel. (Rom 9:20-​24) Ngera uchul me ngkmal klou a rengul? Ngmilekerang a Jesus e mo ua Demal el kiltmeklii a kerebai el kirel a kllourreng? Ngera mo klungioled a dosuub er a kllourreng er a Jehovah? A nger er aika el ker a ngosukid el mo klou a rengud, e mo oumerang er a Jehovah el mo lmuut er sel taem el domdasu el kmo ngmeoud el oltaut a telbilel.

NGERA UCHUL ME A JEHOVAH A MENGLOU ER A RENGUL?

3, 4. (a) Ngera uchul me a Jehovah a olecholt er a kllourreng? (b) Ngmilekerang a Jehovah er sera bo lak lolengesenges a Adam me a Eva?

³ A Jehovah a kot el ngarbab el merreder er a eanged me  a chutem me ngsebechel el mereched el okngemed a rokui el mondai. Engdi ngar er ngii a uchul me ngmenglou er a rengul er chelechang. A ultok el mlo er ngii er a Eden a uchul me a bebil el meklou a ultutelel el ker a kirel el mo monger el mo uchul a klungiolir tirke el rokui el kiei er a eanged me a chutem. A Jehovah a klou a rengul e le ngmedengei el kmo ngusbechall a klou el taem el mo ungil el onger aike el ker. Ngkmal ungil el medengelterir a rokui el ngar er tia el chutem me a eanged me ngulterekokl el medengei aike el mo ungil er tir.​—Hebru 4:13.

⁴ Ngmle moktek er a Jehovah el soal el omekeek er tia el chutem er a rengelekel a Adam me a Eva. A Satan er sera longeblad er a Eva, me a Adam bo lomtok, e a Dios a dimlak di lemereched el mesmechokl er tia el tekoi el di diak lomdasu er ngii, e dirrek el dimlak bo lemekurt a rengul er a rechad. Ngbai di mla tibir sel rolel e ngmo otutii a moktek er ngii el kirel tia el chutem me a rechad. (Isaia 55:11) A Jehovah a olecholt er a kllourreng a uchul me ngsebechel el otaut a moktek er ngii, e meketeklii el kmo a omengederederel a kot el ungil. E mla mo betok el rak el longiil me bo el sebechel el ungil el otaut a moktek er ngii.

5. Ngera el klengeltengat a mo er ngii el okiu a kllourreng er a Jehovah?

⁵ A ta er a uchul me a Jehovah a oba kllourreng el kirir a rechad a soal a bo el sebechir el mo kiei el mo cherechar. Me ngmeruul a tekoi er chelechang el olsobel er a “kloul seked.” (Ocholt 7:9, 14; 14:6) Ngokiu a berkel a klumech e ngomekedong er a rechad el mo mesuub el kirel a Rengedel me a melemalt el llechul. E tia el klumech er a Renged a “ebangkelio,” el belkul a kmo ngungil el chais el kirir a rechad! (Mateus 24:14) A derta el chad el lomekedong er ngii a mo chedal a cheldebechelel el mui er a remera el sechelei el tir a betik a rengrir er a llemalt. (Johanes 6:44-​47) Ngika el betik a rengul el Dios a meruul aika el tekoi el olengeseu er a rechad el mo nguu a kengei er ngii. Ngdirrek el melilt er a rebebil el mo chedal sel kabelment er ngii el ngar er a eanged. Me sel lebo er a eanged, e te mo olengeseu er a rebekongesenges el chad er tia el chutem el mo cherrungel, e dirrek el mo kiei el mo cherechar. Me a Jehovah a klou a rengul el mengiil e oureor el mo oltaut a moktek er ngii el mo uchul a klungioled.

6. (a) Ngmilekerang a Jehovah e oba kllourreng er a taem er a Noah? (b) E mekerang a lolecholt er a kllourreng er chelechang?

⁶ A Jehovah a klou a rengul el mo lmuut er a taem el rechad a oltuub er ngii. Molatk er a omerellel el kirel a chelebirukel er a uchei er a Ieleb. Ngmlo ‘mekngit a rengul’ e le rechad a mle blechoel el meruul a deleboes el omeruul me a koadelchad. (Genesis 6:2-8) Engdi ngdimlak el omechei a chelebirukel me lolemolem. Ngbai tilbir el mo olekngemed er a remekngit el chad el okiu a Ieleb. Me sera longiil er a temel a Ieleb e ngullengeseu er a Noah me a telungalek er ngii me bo el sebechir el mo suobel. (1 Petrus 3:20) Me sera bo lungil el temel er a rengul a Jehovah e ngsilbedii a Noah el kirel a Ieleb, e dilu er ngii me loleketek er a arhe. (Genesis 6:14-​22) Ngdirrek el dilu er ngii me lomeklatk er a rechad el kirel a tellemall el mochu er ngii. A Biblia a kmo a Noah a “ngikel omerk ra llemalt.” (2 Petrus 2:5, BT) A Jesus a milsaod er a taem er kid el di ua sel taem er a Noah. Me a Jehovah a mla oterekeklii sel taem el bo lokngemedii tia el mekngit el blekeradel, engdi ngdiak a chad el medengelii “sel sils ma lechub e ng sel sikang” el lemei. (Mateus 24:36) A Dios a mla meskid a urered el mo omeklatk er a rechad er a rolel e ngsebechir el mo suobel.

7. A Jehovah ngmeoud el oltaut a telbilel? Mosaod.

⁷ A kllourreng er a Jehovah a diak lebelkul a kmo ngdi mengiil el diak a ungil el uchul. Me  ngdiak el kired el mo omdasu el kmo ngdiak lomekerreu er kid! Engdi ngsebeched el mo omdasu el uaisei e le ngcheluodel me a lechub e ngmekngit el tekoi el dechelebangel a uchul. Ngdirrek el sebechel el mo mechitechut a rengud e mo omdasu el kmo a Dios a meoud el oltaut a telbilel. (Hebru 10:36) Me lak dobes el kmo ngar er ngii a uchul e ngoba kllourreng, e dirrek el ousbech er tia el taem el meruul a tekoi el di mo uchul a klungiolir a remesiungel. (2 Petrus 2:3; 3:9) Me bo dosaod er a rolel a Jesus a loukerebai er a kllourreng er a Demal.

A JESUS A UNGIL EL KEREBAI ER A KLLOURRENG

8. Ngoeak a ngera el rolel e a Jesus a ulechotii a kllourreng?

⁸ Ngmla mo betok el rak el ledeu a rengul a Jesus el meruul a soal a Dios. Sera bo lomtok a Satan, e a Jehovah a tilbir el mo oderchii a Ngelekel el mei er tia el chutem el mo olsobel er a klechad. Ka di molatk er sel kllourreng er a Jesus el mle kirel el mengiil el betok el telael el rak el mo otutii sel ngerechelel. (Monguiu er a Galatia 4:4.) Sel taem er a longiil, e a Jesus a mle mechesang el meruul er a ureor el lebilsang a Demal. Me sera lemei er a chutem e ngmle medengei el kmo a Satan a mo mekodir el oltirakl er a ulaoch. (Genesis 3:15; Mateus 16:21) Ngmle klou a rengul el meruul a soal a Demal alta e ngkmal chilarm. Me alta e a Jesus a Ngelekel a Dios engdi ngdimlak di lolatk er a di ngii, e bai mle ngariou a rengul e kilengei el mo chuarm. Ngmeskid a cherrungel el kerebai el kirel a blakerreng el mo er a Dios.​—Hebru 5:8, 9.

9, 10. (a) Ngmilekerang a Jesus er a longiil er a Jehovah el mo oltaut a moktek er ngii? (b) Ngmekerang a doukerebai er a kllourreng er ngii?

⁹ A uriul er a lebekiis er a kodall a Jesus e ngilai a klisiich er omerreder er a eanged me a chutem. (Mateus 28:18) Ngousbech er ngii el klisiich el mo oltaut a moktek er a Dios el oltirakl er sel temel. Me ngmle klou a rengul el ngar er bita er a Demal el mengiil el mo lmuut er a rak er a 1914, el ngii a sel taem el Demal a milsang a klisichel el mo oumekemad er a recherrouel. (Psalm 110:1, 2; Hebru 10:12, 13) Me ngdi kmedung a Jesus el mo tomellii tia el beluulechad er a Satan. Me chelecha el longiil e ngolengeseu er a rechad el mo nguu a kengei er a Dios, e dirrek el omekrael er tir el mo er a “ralm er a klengar.”​—Ocholt 7:17.

¹⁰ Ngsebechem el mo oukerebai er a Jesus? Ngkmal mle semeriar el meruul a soal a Demal, e dirrek el mle klou a rengul el mengiil er sel ulterekokl el temel a Demal el mo oltaut a uldesuel. Me ngkirel el mo klou a rengud el mengiil er a ulebongel er a beluulechad er a Satan. Ngdirrek el kired el oltirakl a ulekrael er a Dios e diak bo lemechitechut a rengud. Kede mekerang e mo uaisei?

NGMEKERANG A KUMEKEROUL ER A KLLOURRENG?

11. (a) Ngmekerang a kllourreng a loureor el obengkel a klaumerang? (b) Ngera uchul me ngmo mesisiich a klaumerang er kid?

¹¹ A uchei er a lemei er a chutem a Jesus, e a reprofet me a remesiungel a Dios a ulechotii el kmo a rediak lemecherrungel el chad a sebechir el oba kllourreng. E a kllourreng er tir a uluureor el obengkel a klaumerang. (Monguiu er a Jakobus 5:10, 11.) Oleko ngdimlak loumerang aike el telbilel a Dios el kirir, e ngmlo diak el sebechir el outekangel el mengiil a otutel aike el telbiil. Engdi te uluutekangel a meringel el blekeradel e le te uluumerang el kmo a Dios a mo otaut a telbilel. (Hebru 11:13, 35-​40) A Biblia a ouchais a betok el uchul me nglmuut el mo mesisiich a klaumerang er kid, e le Jesus a uleltaut a betok el ulaoch e ngilsukid el mo ungil el medengei a moktek er a Dios.​—Hebru 12:2.

12. Ngmekerang a dolisiich a klaumerang er kid?

¹² Kede mekerang a dolisiich a klaumerang  er kid me lluut el mo klou a rengud? Ngkmal kired el mo oltirakl a ulekrael er a Dios. Ka di molatk er sel uchul me ngkirem el nguu a Renged el mo kot er a klengar er kau. Ngsebechem el lmuut el mo blak a rengum el oltaut er a omellach el ngar er a Mateus 6:33? Nglocha sebechem el mengoit er a lmuut el klou el taem el oldingel a obliil e omekbeot er a klengar er kau. A Jehovah a mla omekngeltengat er a blakerreng er kau el olengesenges a llechul. Nglocha mla mekrolau el mo mesuub a Biblia el obengkel a chad me a lechub e ngmla meskau ‘a budech er a Dios, el omtebechel a rengmiu.’ (Monguiu er a Filipi 4:7.) Me sel molatk aika el klengeltengat, e ke mo medengei el kmo a kllourreng a mo uchul a klungiolem.​—Psalm 34:8.

13. Momekesiu er a rolel a klaumerang el sebechel el mo uchul a kllourreng.

¹³ Ka molatk er a okesiu el ngosukid el mo medengei el kmo a klaumerang a mo uchul a kllourreng. A chad er a sers a melalem e mengoias e dirrek el meridm. E a bek el taem el ungil a omeridm, e ngmengal mo soal el lmuut el melalem a betok el dellemelel. Me ngmo melalem a dellemelel alta e ngmedengei el kmo ngkirel el mengiil er a temel a omeridm, e oumerang el kmo ngmo meridm. Me ngdi osisiu, sel dosuub e doltirakl a ulekrael er a Jehovah e bo luchul a klungioled, e a klaumerang er kid er ngii a mukeroul. Me ngmo beot er kid el oba kllourreng e mengiil aike el klengeltengat el mochu er ngii.​—Monguiu er a Jakobus 5:7, 8.

14, 15. Ngkirel mo uangerang a osenged el kirel a ringelel a klechad?

¹⁴ A ta er a rolel e ngsebechel el mo klou rengud a sel doba osengel a Jehovah el kirel a beluulechad me a blekerdelel a klengar er kid. Ka molatk er a osengel el kirel a ringel er a klechad. Ngmla mo kemanget el taem el lomes er a rechad el chuarm me ngkmal mekngit  a rengul. Engdi ngdiak lebechei aika el tekoi me leterebengii me lak loruul a ungil. Ngulderechii a Ngelekel el mei el “mo melemall a urerel a Diabelong” el ngii a uchul a ringelel a klechad. (1 Johanes 3:8) Me ngdi kmedung e a Dios a mo okngemed a rokui el ringel el mo cherechar. Misei e lak debechei a chelebirukel er tia el beluulechad me longitechut a klaumerang er kid. Me lak bo leseselk a rengud el mengiil er a temel a Jehovah el mo oltaut a telbilel e bai doba klaumerang, e le ngmla tibir a ulterekokl el taem el bo lolekngemed a rokui el chelebirukel.​—Isaia 46:13; Nahum 1:9.

¹⁵ Ngkired el outekangel a meringel el blekeradel el melasem a klaumerang er kid er chelecha el taem er a ulebongel. Lak bo lekesib a rengud a lsekum kid me a rebetik er a rengud a mo chuarm a mekngit el omeruul me a lechub e ngkuk bebil er a tekoi, ngbai kired el mo mui el ultuil er a Jehovah. Ngdiak demecherrungel me ngdiak el beot er kid el meruul er tia el tekoi, engdi ngkired el melatk a omerellel a Jesus el medung er a Mateus 26:39.​—Monguiu.

16. Ngera kired el meruul er ngii er chelecha el dongiil er a ulebongel?

¹⁶ A chad el omdasu el kmo a ulebongel a dirk cheroid a sebechel el mo cheleuid a uldesuel. Me ngmo mengetmokl a tekoi el omech er ngii a lsekum a Jehovah a mo diak lotaut a telbilel. Nglocha mo omdasu el kmo, ‘Ak di mengiil er sel taem el Jehovah a mo oltaut a telbilel.’ Me tia el cheleuid el uldesuel a sebechel el rullii me ngmo seselk a rengul el mengiil. Me ngsebechel el melasem el mo ngarbab el chad er tia el beluulechad me a lechub e ngmo ultuil a uldesuel er a udoud e mo diak lenguu a Rengedel a Dios el mo kot er a klengar er ngii. Me a lechub e ngsoal el mo er a ngarbab el skuul me bo el ungilbesul a klengar er ngii er chelechang. Me a omerellel a ochotii el kmo ngmechitechut a klaumerang er ngii. A Paulus a millisiich er kid el mo oukerebai er tirke el “uluumerang e uleba kllourreng” me te mlukngeltengat el ua letilbir a Jehovah. (Hebru 6:12) A Jehovah a mla oterekeklii sel taem el bo lolekngemed er tia el mekngit el beluulechad e diak bo lemeoud. (Habakuk 2:3) Me chelecha el dongiil e lak bo el ouralmesils a rengud er a omesiunged el mo er a Jehovah, e bo leblak a rengud e le kede kiei er a taem er a ulebongel. Me tia el omesiunged a uchul a deurreng er kid er chelechang.​—Lukas 21:36.

A KLLOURRENG A MO UCHUL A KLENGELTENGAT

17, 18. (a) Ngera el techall a dobang er chelecha el taem el dongiil? (b) A kllourreng er kid ngmo uchul a ngera el klengeltengat?

¹⁷ Ngsoad el mesiou er a Dios el mo cherechar, alta e kede dirk mlo mesiou er ngii me a lechub e ngmla mo betok el rak el dosiou er ngii. A kllourreng a ngosukid el outekangel el mo lmuut er a ulebongel. A Jehovah a meskid a techelled el mo ochotii el kmo ngblak a rengud el mo er ngii, el mo lmuut er a taem el decharm el klaumerang er kid a uchul. (1 Petrus 4:13, 14) Ngdirrek el olisechakl er kid el mo klou a rengud el outekangel me bo desobel.​—1 Petrus 5:10.

¹⁸ A Jesus a olab a rokui el klisiich er a omerreder er a eanged me a chutem me ngmo omekerreu er kau a lsekum ke melemolem el blak a rengum. (Johanes 10:28, 29) Ngdiak el kired el medakt er a ngarmedad el klebesei me a lechub e ngkodall, e le tirke el klou a rengrir el outekangel el mo lmuut er a ulebongel a mo suobel. Me lak debechei a uldasu er tia el beluulechad me lerellid el mo diak doumerang er a Jehovah. Me chelecha el dirk loba kllourreng a Jehovah, e bo leblak a rengud el melisiich a klaumerang er kid e dungil el ousbech a temed el mesiou er ngii.​—Mateus 24:13; monguiu er a 2 Petrus 3:17, 18.

[Aike el Ker er a Suobel]

[Aike el siasing el ngar er a 21 el llel]

A kllourreng a ngosukau el nguu a Rengedel a Dios el mo kot me ke mo mukngeltengat!