Mondai el Lechelebangel a Redil

“Sel kumes a omeruul el mo er a remeklou el redil e ngkmal diak el soak el mo uai tir.”​—Tekingel a ZAHRA, el 15 a rekil el mengai er a magazine GEO, French edition.

AIKA el tekingel ngika el ngeasek el redil el ngar tiang a olecholt er a mekngit el blekeradel el ngar er ngii er chelechang. Meliuekl er a beluulechad el rokir, e a remeklou me a remekekerei el redil a chelebangel a kdekudel el omeruul me a omengetukel er a chelsel a klengar er tir. Ka molatk aika el tekoi.

● Omengetukel el mo er ngii e le kau el redil. Ngar er aike el beluu er a Asia, e a ruumesingd el chedam me a rechedil a di sorir el oungalek er a resechal. A report er a UN er a 2011 a melekoi el kmo te bekord el 134 el miliol el redil er aike el beluu a mo dibus e le ngomelecheb me a okodellir a retolechoi me a omengeterochel er a rengalek a uchul.

● Skuul. Meliuekl er a beluulechad el rokir, e ngbekord el 65 el basent er a remeklou me a remekekerei el redil a diak a skulir me a lechub e te mla er a skuul el di kesai er a eua el rak.

● Mekngit el omeruul. A kuk betok er a 2.6 el biliol el redil a kiei er aike el beluu el rebechiil el chad el lolterebek er a rebecherir a diak bo lobals.

● Klisichel a bedengir. Ngar er aike el chebuul el beluu, e a ngelsengesel a ukeruul a uchul me a bekord el 30 el redil a mad er a bek el sikang e le ngmo er ngii a chetituokel er a kldiull me a cheroll.

● Llemeltir el ouklalo a chutem. Me alta redil a melalem e omekeroul a betok er a 50 el basent er a dellomel er a beluulechad, engdi ngngar er a betok el beluu e ngdiak a llemeltir el mo ouklalo a chutem.

Ngera uchul me a redil a diak a llemeltir er a chouaika el tekoi? A bebil el siukang a oltirakl a klaumerang er a klechelid el melisiich a mekngit el omeruul el mo er a redil. A ta el simbung er a France a millekoi a tekingel a ta el chad er a llach el Chandra Rami Chopra el kmo: “A rokui el llach er a klechelid a ngar er ngii a ta el tekoi el losisiu er ngii: Te melisiich a omengetukel el mo er a redil.”

Kau ke oba osisiu el uldasu? A omomdasu e a Biblia nguai a bebil er a babier er a klechelid el mesaod er a redil el kmo ngdiak a ultutelir? A rebebil a omdasu el kmo a Biblia a melisiich er a chouaisei el tekoi. Engdi a Dios ngua ngera osengel el kirir a redil? Alta rebetok el chad a ngar er ngii a mesisiich el uldesuir el kirel tia el tekoi, engdi a dekerekikl el merriter a lolekoi a Biblia e ngmo ngosukid el metik er a nger er tia el ker.

[Credit Line]

© G.M.B. Akash/Panos Pictures