Oba Blekeu er a Taem er a Chelebuul

“A Dios omderungel er kid e klisiched, el di blechoel el kldmokl el olengeseu er a belsechel a chelebuul.”​—PSALM 46:1.

NGERANG A NGER ER KAU?

Kede mekerang e outekangel sel bo dechelebangel a meringel el mondai?

Ngera bebil el uchul me kede oba blekeu?

Ngerang mla meskid a Jehovah el ngosukid el outekangel a ringel?

1, 2. Ngera el tekoi a mla duubech el mo er a rebetok el chad? E kede rokui el soad a ngera el tekoi?

 KEDE kiei er a taem el kmal klou a chelebuul. A beluulechad a kmal di metemellang er a betok el desiu, tsunami, seseb, ieleb, volcano, iechadedaob, me a typhoon. A mondai er a derta el chad me a chelsel a delengchokl a dirrek el uchul a klengiterreng me a klou el dakt, el di ua losaod a Biblia el kmo ngsebechel el duubech a meringel el tekoi er a ngii di el taem.​—Olisechakl 9:11.

² A rechedal a Dios a melemolem el dmeu a rengrir el mesiou er ngii er a chelsel tia el meringel el taem. Kid el rokui a soad el blechoel el kltmokl el mo outekangel a ngii di el meringel el tekoi er chelecha el lolekedang a ulebongel. Ngmekerang e mo sebeched el melemolem el mesiou er a Dios el dmeu a rengud er sel taem el lebo er ngii a mondai er kid? E ngera sebechel el ngosukid el mo bekeu?

MOUKEREBAI ER TIRKE EL ULEBA BLEKEU

3. Kede mekerang e metik a ongelaod el ua losaod a Rom 15:4?

³ Alta e a rechad a chelebangel a betok el mondai er chelechang, engdi kede medengei el kmo tiang a diak el beches el tekoi. Me bo dosuub el kirel a kerebai er a remesiungel a Dios er a irechar el tir a mle bekeu el outekangel a mondai er tir.​—Rom 15:4.

4. Ngera bebil el tekoi el mle kirel a David el outekangel? E ngera ngilsuir el mo outekangel?

⁴ Ka di molatk a bebil el tekoi el mle kirel a David el mo outekangel er ngii. A king el Saul a mle soal el omekoad er ngii, me a recherrouel a uluumekemad er ngii e dirrek el ngilititerir a rebechil el mo cheroid er ngii. A rebebil el soldau er ngii me a rechad er blil me a resechelil a mlo omtok er ngii, el mlo uchul a kngtil a rengul. (1 Samuel 18:8, 9; 30:1-5; 2 Samuel 17:1-3; 24:15, 17; Psalm 38:4-8) A Biblia a  ochotii el kmo a David a kmal chilarm er aika el mondai. Engdi ngdimlak lebechei me longitechut er a klaumerang er ngii er a Jehovah. Ngbai dilu el kmo: “A RUBAK a mesebechakl er ngak er a rokui el kdekudel; me ng diak bo kmedakt.”​—Psalm 27:1; monguiu er a Psalm 27:5, 10.

5. Ngmilekerang a Abraham me a Sara e melemolem el dmeu a rengrir alta e ngmle meringel a klengar er tir?

⁵ A Abraham me a Sara a kiliei er a tento el kemanget el taem. Te kiliei er a basio el diak lodengelii, e dirrek el dimlak el beot a rolel a klengar er tir. Te chilarm er a bosech er a kall me a kdekudel el omerellir a rechad el kiliei er bita er tir. Engdi te mle bekeu el outekangel aika el mondai. (Genesis 12:10; 14:14-​16) Te milekerang e outekangel? A Tekingel a Dios a kmo a Abraham “a milengiil er sel beluu el luldesuii a Dios e toketekii el mesisiich omekedecheraol er ngii.” (Hebru 11:8-​10) Me ngdimlak lebechei a meringel el klengar me longitechut a rengrir, te bai mle blechoel el melatk er a telbilel a Dios el mo er tir.

6. Ngmekerang a doukerebai er a Job?

⁶ A Job a chilarm er a kmal betok el ringel. Ka molatk er sel taem el rokui el tekoi er a klengar er ngii a di mlo mekngit. (Job 3:3, 11) Ngdirrek el dimlak lungil el medengei el kmo ngera uchul me aika el tekoi a dubechang, engdi ngdimlak lebechei me longitechut er a rengul. Ngbai millemolem el blak a rengul e uluumerang er a Dios. (Monguiu er a Job 27:5.) Me ngkmal ungil el kerebai el kired!

7. Ngera bebil el meringel el tekoi el blo lechelebangel a Paulus? E ngera el tekoi a silsichii?

⁷ Ka di molatk er a Paulus. Ngmilluches el ouchais el kirel a kdekudel blekeradel el blo lechelebangel er a chelsel a beluu, chereomel me a daob. Ngdirrek el mlo ‘diak a kelel e mekerasem e diak a bilel.’ Ngdirrek el mla er ngii a taem el lengar er a diall e ngmeteruud me ngmle ta el kesus me a ta el llomes el ombibechakl er a daob. (2 Korinth 11:23-​27) Ngmillemolem el outekangel a ringel el mesiou er a Dios el mo lmuut er a taem el kilo ngmad, me ngdilu el kmo: “Ngdi tia mlo ua isei me ng mo uchul e ng diak di kim ultuil er kemam, e bai mo ultuil er a Dios, el olekiis er a re mla mad el me ngar. Ng ulsebelemam er a kilo kim mad er ngii, e mo osebelemam.” (2 Korinth 1:8-​10) Ngdiak el betok el chad a mla chelebangel a ringel el ua Paulus, engdi rebetok er kid a locha mla ta el bo domelechesiu a ringel el uai ngii. Me a ducherreng er ngii a kmal melisiich er kid.

LAK BECHEI A MONDAI ME LONGITECHUT ER KAU

8. Ngera ngrullii el mei er kid a mondai er chelechang? Mosaod er a tekoi el dilubech.

⁸ Ngkmal betok a meringel el tekoi me a tellemall er chelechang el uchul me a rechad a omdasu el kmo ngdikea el sebechir el outekangel. A rebebil el tir a mesiou er a Dios a dirrek el sebechir el omdasu el uaisei. A Lani * a mle dmeu a rengul el mesiou el mui el taem el obengkel a bechil el ngar er a Australia. E sera bo lodengei el kmo ngsmecher el kasinoma a tul e ngkmal kilebetiekl. Ngmelekoi el kmo a kar el lullai a rirellii el kmal mo mechitechut a bedengel me ngmlo omdasu el kmo ngdikea belkul el chad. Osisiu el taem e ngmle kirel el omekerreu er a bechil el dirk mlo merek el ngar er a botk er a ulkel. Me kede mo mekerang a lsekum kede mo chelebangel er a choua itia el blekeradel?

9, 10. (a) Ngdiak el soad el mecherei a Satan me loruul a ngera el tekoi? (b) Kede mekerang e outekangel a ringel el medung er a Rellir 14:22?

⁹ Lak dobes el kmo a Satan a kmal soal el ousbech a ringel el melasem a klaumerang er kid. Engdi ngkmal diak el soad el mecherei me longitechut er kid. A Osisechakl 24:10 a kmo: “A lsekum ke mo mechitechut sel bo le chetituokel a tekoi, e kau a mechitechut.” Me sel dolatk a kerebai el ngar er a Biblia el uaike el dulsaod er a uchei e ngsebechel el melisiich er kid er a taem er a ringel.

¹⁰ Kede medengei el kmo ngdiak el sebeched el sumechokl a rokui el mondai. Kede bai medengei  el kmo kede mo chelebangel a mondai. (2 Timothy 3:12) A Rellir 14:22 a kmo: “Kid a kired el mo chuarm er a betok el ringel e mochu soiseb er a Rengedel a Dios.” Me lak bechei a mondai me longitechut er kau e bai momes er ngii el ua techall el mo ochotii a klaumerang er kau el kmo a Dios a mo ngosukau.

11. Ngkired el mekerang me lak bo lemechitechut a rengud er a ringel el dechelebangel?

¹¹ Ngkired el blechoel el melatk aike el ungil el tekoi er a klengar er kid. A Tekingel a Dios a kmo: “A ungilreng a mekebekii a mad, e a klengiterreng a mengam a reng.” (Osisechakl 15:13) A retoktang a medengei el kmo a chad el smecher a sebechel el mo ungil a lsekum e ngomdasu el kmo ngmo ungil er a rektel. Betok el taem e a chad el melim er a diak el mera el kar e oumerang el kmo ngsebechel ngii el kar el ngosuir, a mo mesisiich. Engdi a lsekum a smecher el chad a omdasu el kmo a kar el lolim a lmuut el olsecher er ngii e ngbai lmuut el mo smecher. Me tiang a ochotii el kmo a lsekum kede di blechoel el melatk a tekoi el diak el sebeched el melodech e ngmo mechitechut a rengud. Kede oba omereng el saul e le Jehovah a mera el sebechel el ngosukid. Ngmelisiich er kid er a taem er a ringel el okiu a Tekingel, omelisiich er a rudam me a rudos er kid, me sel oureor el klisichel. Ngkired el blechoel el melatk aika el tekoi me lolemolem el dmeu a rengud. Me lak di momdasu a mondai er a klengar er kau e bai bo leblak a rengum el outekangel e bo blechoel el melatk aike el ungil el tekoi el ngar er ngii er kau.​—Osisechakl 17:22.

12, 13. (a) Ngera el tekoi a mla ngosuterir a remesiungel a Dios el mo outekangel a chelebuul? Ka mosaod. (b) Ngmekerang a meklou el tellemall e meketakl a meklou a ultutelel el tekoi er a klengar?

¹² Ngar er ngii a meklou el tellemall el dirk dilubech er a bebil el beluu. Ngsebeched el mesuub a blekerdelir a rudam er kid el uluutekangel a meringel el blekeradel, alta e ngkmal mle meringel el tekoi. Sera uchelel a rak er a 2010, e a mesisiich el desiu me a tsunami a tilemall a betok el blirir me a kloklir a rudam er kid er a beluu er a Chile. A rebebil er tir a mlo diak a urerir. Engdi ngar er a chelsel tiaikid el chelebuul e a rudam a millemolem el meruul er a omesiungir el mo er a Jehovah. A Samuel el miltemall a blil a kmo: “Ngar er a chelsel aika el meringel el taem e ngak me a bechik a millemolem el ngar er a miting e oldingel a obliil. A kuumerang el kmo a blakerreng er kemam a uchul me ngdimlak bo lemechitechut a rengmam.” Tir me a relmuut el bebil er a rudam me a rudos a dimlak lebechei a meringel el tekoi me longitechut er tir, e bai millemolem el mesiou er a Jehovah er seikid el taem.

¹³ Sera September 2009, e a klou el chull a mlo ielebii a Manila el ngar er a beluu er a Huriping. A ta el merau el chad el urriid a betok el kloklel er tia el ieleb a melekoi el kmo: “A klou el chelebuul a mlo er a remerau me a remechebuul.” Tia el tekoi a mekltkid er a tekingel a Jesus el kmo: “Lak mongudel a mekreos el klalo el kiriu er tial beluulchad. . . . Bai mongudel er a eanged el sel le ngar ngii e ng diak le meka er a metmut ma diak le chert, el ka re merechorech el mo soiseb el ruchorech.” (Mateus 6:20) A udoud me a klalo a sebechel el di mereched el mo diak me tirke el ultuil a uldesuir er ngii a blechoel el mo chebuul a rengrir. Me nguchul a llomeserreng a denguu a Jehovah el mo kot er a klengar er kid e dolemolem el sechelil er a chelsel a ngii di el blekeradel!​—Monguiu er a Hebru 13:5, 6.

A UCHUL ME NGSEBECHED EL OBA BLEKEU

14. Ngera uchul me ngsebeched el oba blekeu?

¹⁴ A Jesus a uluuchais er a redisaiplo er ngii el kmo ngmo er ngii a mondai er sel taem er a ulebongel, engdi ngdilu el kmo: “Lak bo medakt.” (Lukas 21:9) Kid a kmal sebeched el mo oba blekeu e le King er kid el Jesus Kristus me a Jehovah el Ulemeob er a eanged me a chutem a olengeseu er kid. A Paulus a millisiich er a Timothy el kmo: “A Dios a diak le rellid el mo  medakt, ng bai meruul er kid el mo mesisiich e oubltikerreng, e ulserechakl a rengud.”​—2 Timothy 1:7.

15. Ngera te dmung a rebebil el mesiungel a Dios el kirel a klaumerang er tir? E kede mekerang e mo uai tir?

¹⁵ A Biblia a ouchais a tekingir a rebebil el mesiungel a Dios el kirel a klaumerang er tir el mo er ngii. A David a dilu el kmo: “A RUBAK a klisichek e omekreakl er ngak; a renguk oumeral ulsirs er ngii; ak mla nguu a ngesou, mak kmal oldanges.” (Psalm 28:7) Me a Paulus a dilu el kmo: “Ngikel betik a rengul er kid a uchul me kede kmal di mo mesisiich er a ikal rokui!” (Rom 8:37) Sera bo lodengei a Jesus el kmo ngdi kmedu el mo mudechem e mo okodall e ngulechotii el kmo ngkmal mesisiich a deleuill er ngii me a Dios. Ngdilu er a redisaiplo er ngii el kmo: “Ngdi diak di bo le ngak el tang, e le Chedam a obengkek.” (Johanes 16:32) Ngerang a mocholt el okiu a tekingir tirka el mesiungel a Dios? Ngolechotel a kmo te mle mui el oumerang er a Jehovah. Me a lsekum kede mo mui el oumerang er a Dios el uai tir, e ngsebeched el mo mesisiich er a chelsel a ngii di el blekeradel.​—Monguiu er a Psalm 46:1-3.

A KLUNGIAOL EL OKIU A NGELSUIL A DIOS

16. Ngera uchul me ngklou a ultutelel el dosuub er a Biblia?

¹⁶ A blekeu a mo er ngii el okiu a klaumerang er kid el mo er a Dios el diak lokiu a di klisiched. Ngar er ngii a betok el rolel e a Jehovah a olengeseu er kid el mo oba blekeu. A kot e ngmla meskid a Tekingel el Biblia, me sel deblechoel el mesuub er ngii e kede mekurulii a klemedengei me a klaumerang er kid er Ngii. A odos el smecher el meringel a uldesuel a dmu el kmo sel leblechoel el menguiu a bades er a Biblia e ngmo mechelaod a rengul. Kid kede oltirakl er a ulekrael er a blak a rengul el mesiou el meruul er a temel a omengull el ongalek er a bek el sandei? Me a omesubed er a Tekingel a Dios a ngosukid el mo omdasu a tekoi el ua ta er a milluches er a Psalm el kmo: “Ng meral betik a renguk er a llechum! Ak melebedebek er ngii er a tutau el mo klebesei.”​—Psalm 119:97.

17. (a) Ngera ta er a rolel e a Jehovah a ngosukid el mo oba blekeu? (b) Ka mosaod er a ta er a chisel a klengar el ngar er a babilenged el mla ngosukau.

¹⁷ Ngdirrek el ngar er ngii a babilenged el mengai a uchetemel er a Bades el melisiich er a klaumerang er kid er a Jehovah. El ua tiang, a chisel a klengar er a rechad el ngar aika el babilenged a mla ngosuterir a rebetok. A ta el odos er a beluu er a Asia el ngar er ngii a rektel a uldesuel el bipolar mood disorder a mlo mesisiich a rengul er a lechiuii a ta er aika el chais. Ngmilsaod el kirel a odam el mle missionari e dirrek el mle smecher el di ua rektel, engdi ngmillemolem el blak a rengul el mesiou er a Dios. Me ngika el odos a milluches el kmo: “Ngkmal ngilsukak el mo ungil el medengelii a rektek e mlo er ngii a omeltkek.”

18. Ngera uchul me ngkired el blechoel el meluluuch?

¹⁸ A nglunguuch a sebechel el ngosukid er a  chelsel a ngii di el blekeradel. A apostol el Paulus a millisiich er a belkul a nglunguuch er a ledu el kmo: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel. E a budech er a Dios, el diak el sebechel a chad el mo cherrungel el medengelii, a momtebechel a rengmiu ma uldesuiu el oltirakl er a Kristus Jesus.” (Filipi 4:6, 7) Kid kede blechoel el meluluuch el olengit a ngeso er a taem er a ringel? A odam el Alex er a beluu er a Britain el smecher el meringel a uldesuel a dmu el kmo: “Ngkmal melisiich er ngak sel kblechoel el mengedecheduch er a Jehovah e kurrenges er ngii el okiu sel kunguiu a Tekingel.”

19. Ngua ngerang a klungel a ultutelel a debo er a bek el miting?

¹⁹ A ta er a rolel a ngeso a mo er ngii el okiu a miting er kid. A ta er a milluches er a Psalm a mle blechoel el oureng el mo er a templo er a Jehovah. (Psalm 84:2) Kid kede oba osisiu el uldasu? A Lani el dulsaod er ngii er a uchei a mesaod el kmo ngkmal klou a ultutelel el kirel el mo er a miting e teloi er a rudam me a rudos er ngii, me ngdmu el kmo: “A lsekum e ngsoak a Jehovah a lolengeseu er ngak e ngkmal kirek el mo er a miting.”

20. Ngmekerang e ngosukid sel demechesang el omerk er a klumech?

²⁰ Kede dirrek el mo mesisiich sel demechesang el omerk er a klumech. (1 Timothy 4:16) A odos el ngar er a Australia el kmal betok a mondai er a klengar er ngii a kmo: “Ngkmal dimlak el soak el mo oldingel, engdi a ta er a remechuodel a ullengit er ngak el mo oldingel el obengkel me ak mlong. Ngulterekokl a Jehovah el mle blechoel el olengeseu, e le bek el taem el bo kuldingel e ngkmal mo dmeu a renguk.” (Osisechakl 16:20) A rebetok a mla mo medengei el kmo sel lolengeseu er a rebebil el mo oumerang er a Jehovah e ngdirrek el melisiich a klaumerang er tir. Sel taem el lolengeseu e te mo mechesang el omdasu el kirir a rebebil me ngmo diak di lolatk a mondai er tir e bai mo melatk “a ikel kot el ungil” el tekoi.​—Filipi 1:10, 11.

21. Ngulterekokl a rengud el kirel a ngerang, alta e kede chelebangel a betok el mondai?

²¹ A Jehovah a mla meskid a betok el ngeso el melisiich er kid el mo outekangel a mondai er a klengar. Me a lsekum kede mecherei me ngolengeseu er kid e ngmo dmeu a rengud alta e ngdirk ngar er ngii a mondai er kid. Me sel dolatk e doltirakl a kerebai er a remesiungel a Dios e ngsebeched el mo oba blekeu. Me alta e ngkmal betok a mondai er kid er chelecha el lolekedang a ulebongel, engdi ngsebeched el mo omdasu el ua Paulus el dilu el kmo: Kede ‘mo meringel el metemall e ngdi diak de mad’ e “diak bo le moalech a rengud.” (2 Korinth 4:9, 16) Ngmo sebeched el oba blekeu e outekangel a mondai er kid el okiu a ngelsuil a Jehovah.​—Monguiu er a 2 Korinth 4:17, 18.

[Footnote]

[Aike el Ker er a Suobel]

[Siasing el ngar er a 14 el llel]

Sel bo mchelebangel a ringel e moltirakl a ulekrael er a Jehovah