A Jesus a Kiltmeklii a Kerebai el Kirel a Klengariourreng

“Ak mla rullii a kerbai el kiriu, me ng kiriu el mo meruul er sel bla krellii el ekor kemiu.”​—JOHANES 13:15.

NGMEKERANG A OMONGER?

Ngmilekerang a Jesus e ochotii a klengariourreng er a lengar er a eanged?

Ngmilekerang a Jesus e ochotii a klengariourreng er a lengar er a chutem?

A klengariourreng er a Jesus ngmlo uchul a ngera el klungiaol?

1, 2. A Jesus ngullisechakl er a rechapostol er ngii er a ngera el suobel er sel ulebongel el kesus er ngii?

 NGAR sel ulebongel el kesus er a Jesus er tia el chutem, e ngulebengterir a rechapostol er ngii el ngar er a Jerusalem. Sera lomesoil, e a Jesus a milekiis e ngiluu a ikrel a bilel el mecherei e lochetii a taor er a chelechedal. E sola e uleitel a ralm er a kanadarai e mocha meriso ocherir a rubengkel e mesuld el oba taor, e sola e liluut el otungii a ikrel a bilel. Ngera uchul me a Jesus a mirruul er tia el tekoi?​—Johanes 13:3-5.

² Ngmilsaod er sel omerellel el kmo: “Kom mlo medengelii a kurruul er ngii el ekor kemiu? . . . Mak Rubak er kemiu e ksensei er kemiu, el bla krisu ochemiu e ng kiriu el mo kerisu uach. Ak mla rullii a kerbai el kiriu, me ng kiriu el mo meruul er sel bla krellii el ekor kemiu.” (Johanes 13:12-​15) Me sera loruul er tia el ngariou el ureor, e a Jesus a ulsisechakl er a rechapostol er ngii el mo ngariou a rengrir. Me te ulterekokl el dimlak lobes er tia el suobel.

3. (a) Ngmilekerang a Jesus er a lolisechakl el kirel a klengariourreng? (b) Ngera kede mo mesaod er tia el suobel?

³ Sera loriso ocherir a rechapostol er ngii, e ngdimlak el ketengel el omeketakl er a klungel a ultutelel a klengariourreng. A ta el taem er a lekaititekangel a rebebil el apostol er ngii e a Jesus a ngiluu a ngalek el mekedengcheklii er bita er ngii e kmo: “Ngikel nguu ngikal ngalek el oba ngklek a ngoikak; me ngikel ngoikak, a dirrek el nguu ngikel ulderchak. Ele ngikel kot el ngariou er a delongeliu el rokui, ingikei ia kot el ngarbab.” (Lukas 9:46-​48) A Jesus a dirrek el mle medengelterir a Refarisi el sorir a ngarbab el deruchall a uchul me ngdilu el kmo: “Ngikel di ngii el olengesechekl er ngii a mo monganget, me ngikel di ngii el olenganget er ngii a mo  mongesechekl.” (Lukas 14:11) Me ngbleketakl el kmo, a Jesus a soal a rubengkel a bo loba klengariourreng, e lak el blkuuk e lemekedidai a rengrir. Me bo dosuub e bo doukerebai er sel rolel e ngullecholt er a klengariourreng. Kede mo mesang el kmo tia el blekeradel a mo uchul a klungiaol el mo er ngike el olecholt er ngii me a rebebil.

‘NG DIMLAK KUBULT EL MO CHEROID ER NGII’

4. Ngmilekerang a Jesus e ochotii a klengariourreng er a lengar er a eanged?

⁴ A Jesus el di ta el Ngelekel a Dios a ulechotii a klengariourreng er a uchei er a lemei er a chutem. Sera lengar er a eanged, e ngulebengkel a Demal el kmal betok el rak. A babier er a Isaia a mesaod er sel kmes el deleuill er a Ngalek me a Demal el kmo: “A Rubak el DIOS a mla osisecheklak er a bo kulekoi, misei e ng sebechek el melisiich er a re mechitechut. A bek el tutau e ng rullak el mo semeriar el orrenges er sel bo lolisechakl er ngii er ngak. A Rubak el DIOS a mla meskak a sekutaberreng, me ng dimlak kumtok ma lechub e kubult el mo cheroid er ngii.” (Isaia 50:4, 5) Me a Jesus a ulechotii a klengariourreng e dirrek el mle semeriar el mesuub a osisecheklel a Demal. Ngulterekokl el ulemtab er a klengariourreng er a Jehovah er a lolecholt a klechubechub el mo er a klechad!

5. Ngmilekerang a Jesus e ochotii a klengariourreng er a lekaititekangel ngii me a Diabelong?

⁵ Ngdiak el rokui el anghel a uleba osisiu el uldasu el ua Jesus. Ngike el anghel el mlo Satan el Diabelong a dimlak el soal el mesuub er a Jehovah e bai mlo kedidai a rengul, me ngmlo omtok er Ngii. Engdi a Jesus a milengreos er sel deruchellel el ngar er a eanged me ngdimlak lousbech er ngii el di meruul a soal. El ua tiang, a Jesus el ngii a Mikael el Ngarbab el anghel a dimlak lousbech er sel deruchellel er a lekaititekangel ngii me a Diabelong el kirel a cheklechel a Moses, ngbai ulechotii a klengariourreng. E le ngmle medengei el kmo a Jehovah el Ngike el Kot el Ngarbab el chad er a kerrekeriil a mo mesmechokl a tekoi el ngar er sel rolel me a temel.​—Monguiu er a Jude 9.

6. Ngmilekerang a Jesus e ochotii a klengariourreng er a lekengei el mo mesiou el Messias?

⁶ Aike el tekoi el lesiluub a Jesus er a eanged a mle uldimukl er ngii a ulaoch el mesaod a dmolech el omesodel a klengar er ngii er tia el chutem el Messias. Me nglocha mle medengei el kmo ngmo chelebangel a meringel el blekeradel. Me nguaisei, engdi ngkilengei el me kiei er tia el chutem e mo mad el Messias. E ngera uchul? A apostol el Paulus a milsaod er a klengariourreng er a Ngelekel a Dios el kmo: “Ng dimlak le kakerous ngii ma Dios e ngdi dimlak lomdasu a orribech el mo mengaisisiu er a Dios. Ng bai di mle ngii el ongengetii er a deruchellel, e ngiluu a teletelel a mesiou el chad. Ng mlo chad el di ua ikid.”​—Filipi 2:6, 7.

A JESUS A MLE “NGARIOU A RENGUL”

7, 8. Ngokiu a ngera el rolel e a Jesus a ulechotii a klengariourreng er sel taem er a lengalek me a ngar er a omesiungel er tia el chutem?

⁷ “A Paulus a milluches el kmo: A Jesus a “mle ngariou a rengul e mlo olengesenges el mo lmuut er a kodall.” (Filipi 2:8) Sera lekekerei el mo klou el chad, e ngulechotii a kerebai er a klengariourreng. Me alta e ngmle ngelekir a rediak lemecherrungel el chad​—el Josef me a Maria​—engdi ngmillemolem el “ulerrenges a tekingir.” (Lukas 2:51) Tiang a kmal ungil el kerebai el kirir a rengeasek, el tir a mo mukngeltengat er a Dios a lsekum te olengesenges er a redemerir me a rederrir!

⁸ Sera leklunga el chad a Jesus e ngulechotii a klengariourreng er a lenguu a soal a Jehovah el mo kot el tekoi er a klengar er ngii. (Johanes 4:34) Ngar er a omesiungel e  a Jesus Kristus a uluusbech er a ngklel a Dios el olengeseu er a remelemalt a rengrir el chad el mo medengei a blekerdelel a Jehovah me a moktek er Ngii el kirel a klechad. Ngdirrek el uleltaut aike el tekoi el lullisechakl el kirel a Jehovah. Me ngar sel nglunguchel, e a kot el tekoi el ledillii a kmo: “Demmam el ngar a eanged: Bo le modanges a chedaol ngklem.” (Mateus 6:9) Me a Jesus a ullisechakl er a rulebengkel el mo uai ngii el nguu a Jehovah el mo kot el tekoi er a klengar er tir. Me ngngar er a ulebengelel a omesiungel er tia el chutem, e ngmilulluuch el mo er a Jehovah el kmo: “Ak mla ochotau er tir [a rechapostol] e mo melemolem el olecholt er kau.” (Johanes 17:26) Me a klteketel a omesiungel e ngmilengebkall er a Jehovah el kirel aike el tekoi el lurruul er tia el chutem.​—Johanes 5:19.

9. Ngera el tekoi a lulemlaoch a Sekaria el kirel a Messias, e milekerang a Jesus e otutii tia el ulaoch?

⁹ A Sekaria a milluches el kirel a Messias el kmo: “Bo ledeu a rengmiu, bo ledeu a rengmiu a re chad er a Sion! Moldiu er a deurreng kemiu el chad er a Jerusalem! Mesang, a king er kemiu a merma er kemiu! Ng merael el mei el bleketakl, el mla mo mesisiich er a mekemad, ngdi ng medemedemek e mermang el ngar a donkey, el ngelekel a donkey.” (Sekaria 9:9) E tiang a tilaut er sel taem el Jesus a mlo soiseb er a Jerusalem er a uchei er a Pentekost er a rak er a 33. A rechad a silumech a ikrel a bilir me a rechelel a kerrekar er a rael. Ngmlo klou a deurreng er a sera be lesiseb er a chelsel tia el mats. Ngmo lmuut er sera loldiu a seked el kmo ngii a King, e a Jesus a dirk ullecholt er a klengariourreng.​—Mateus 21:4-​11.

10. A blekongesenges er a Jesus el mo lmuut er a kodellel ngmileketeklii a ngerang?

¹⁰ A blekongesenges me a klengariourreng er a Jesus Kristus er a lengar tia el chutem a millemolem el mo lmuut er a kodellel. Me ngmileketeklii el kmo a rechad a sebechir el melemolem el blak a rengrir el mo er a Jehovah el mo lmuut er a bo lechelebangel a kmal meringel el blekeradel. Ngdirrek el ulechotii  el kmo a Satan a cheleuid sel lolekoi el kmo a rechad a mesiou er a Jehovah el di kirel a klungiolir. (Job 1:9-​11; 2:4) Me a cherrungel el blakerreng er a Kristus a mileketeklii a llemeltel a Jehovah el mengedereder er a eanged me a chutem. A Jehovah a ulterekokl el kmal mlo dmeu a rengul er sera lomes er a blakerreng er ngika el ngariou a rengul el Ngelekel.​—Monguiu er a Osisechakl 27:11.

11. Ngera el omelatk a mlo er ngii el okiu a olubet el tengetengel a Jesus Kristus?

¹¹ Ngokiu a kodellel a Jesus e ngkiltmeklii a olubet el tenget el kirel a klechad. (Mateus 20:28) Tiang a mesterir a techellir a rechad el mo mengubet er a kngterir e mo oba omelatk el mo kiei el mo cherechar. A Paulus a milluches el kmo: Ng “di mle tal melemalt el omeruul a ngubeteterir a rokui el chad e mesterir a klengar.” (Rom 5:18) Me a kodellel a Jesus a mlo uchul a omelatk er a diak lengemed el klengar el ngar er a eanged el kirir a rengellitel el Kristiano, me a diak a ulebengelel el klengar el ngar er a chutem el kirir tirke el ‘kuk bebil el sib.’​—Johanes 10:16; Rom 8:16, 17.

“NGAK A MEDEMEDEMEK E NGARIOU A RENGUK”

12. Ngmilekerang a Jesus er a lolecholt er a delemedemek me a klengariourreng el mo er a rechad?

¹² A Jesus a ulemekedong er tirke el “rokui el chorma er oberaod el chelungel.” Ngdilu el kmo: “Mnguu ongelungel er ngak el cholngii, e mosuub er ngak, ele ngak a medemedemek e ngariou a renguk; me kom mo metik er a ulengelliu.” (Mateus 11:28, 29) A klengariourreng me a delemedemek a uchul me a Jesus a mle ungil a blekerdelel e dimlak longetukel er a rediak lemecherrungel el chad. Ngmle tabesul a osengel me a uldesuel el kirir a redisaiplo er ngii, e dirrek el chilat er tir e melisiich er tir. Ngdimlak lerelleterir el mo omdasu el kmo te metitur e diak a belkrir el chad, e dirrek el dimlak el meringel a tekingel el mo er tir. Ngbai millisiich er tir el kmo a lsekum te mo kmeed er ngii e mo oltaut a osisecheklel, e te mo metik er a ulengull. Me a rokui el chad a mle beot er tir el mo kmeed er ngii.​—Mateus 11:30.

13. Ngmle uangerang a omerellel a Jesus el mo er a remechebuul?

¹³ A Jesus a mle chubteterir a remechebuul el chad er a Israel me ngullecholt er a bltikerreng me a ungil el omeruul el mo er tir. Me sera lengar er a Jeriko e ngmilseterir a reteru el meiko el chebuul el chad, el ta er tir a Bartimeus. Te ullengit a ngeso er a Jesus engdi a seked a uluungeroel er tir. Ngmle sebechel a Jesus el diak lorrenges er tir, engdi ngbai mle chubteterir me ngdilung me lengititerir el mo er ngii me lomekungil er tir. Nguaisei, a Jesus a mera el uluukerebai er a Demal el Jehovah, el mle ngariou a rengul e ullecholt er a klechubechub  el mo er a remechebuul.​—Mateus 20:29-​34; Markus 10:46-​52.

“NGIKEL DI NGII EL OLENGANGET ER NGII, A MO MONGESECHEKL”

14. A klengariourreng er a Jesus ngmlo uchul a ngera el klungiaol?

¹⁴ A klengariourreng er a Jesus a mlo uchul a deurreng me a klungiolir a rechad. A Jehovah a mle dmeu a rengul el lomes er a betik er a rengul el Ngelekel el uleba klengariourreng el meruul a soal. A delemedemek me a klengariourreng er a Jesus a dirrek el millisiich er a rechapostol me a redisaiplo er ngii. A kerebil, osisecheklel me a ungil el cheldechedechal a millisiich er tir el mo olengeriakl er a omesiungir. A klengariourreng er a Jesus a dirrek el mlo uchul a klungiolir a redi chad e le te mlongeseu, e mlosisechakl e ngiluu a omelisiich er ngii. Me a rokui el melemalt el chad a mo ngmai a klungiolir er a olubet el tengetengel a Jesus.

15. A klengariourreng ngmlo uchul a ngera el klungiolel a Jesus?

¹⁵ E kuk mekerang el kirel a Jesus, a klengariourreng er ngii ngmlo uchul a klungiolel? Nguaisei, e le ngdilu el kmo: “Ngikel di ngii el olenganget er ngii, a mo mongesechekl.” (Mateus 23:12) E a Paulus a milsaod er ngii el kmo: “Ma Dios a ulengesecheklii el mor sel kot el ngarbab el deruchall e milsa ngakl el kuk ngarbab er a rokui el ngakl. Me tirkel rokui el ngar a eanged ma beluulchad ma datk, a mo outubuach el mengull er a ngklel a Jesus, e di mo chemolt el melekoi el kmo a Jesus Kristus a Rubak, el mo uchul ma rokui el chad a mo kobkellii a Dios el Chedam.” A blakerreng me a klengariourreng er a Jesus er tia el chutem a uchul me a Jehovah el Dios a milengididai er ngii e milsa a klisichel el mengedereder er a rengar er a eanged me a chutem.​—Filipi 2:9-​11.

A JESUS A OUMEKEMAD “EL KIREL A KLEMERANG MA KLENGARIOURRENG”

16. Ngera ochotii el kmo a Ngelekel a Dios a melemolem el olecholt er a klengariourreng?

¹⁶ A Jesus a melemolem el olecholt er a klengariourreng. A ta er a milluches er a Psalm a ulemlaoch el kirel a King el Jesus el ngar er a eanged e mo oumekemad er a recherrouel el kmo: “Me mchetengakl el mong el mo mesisiich er a mekemad el kirel a klemerang ma klengariourreng ma llemalt.” (Psalm 45:4, NW) Sel taem er a Armakedon e a Jesus a mo mesebechakl er tirke el melemalt e ngariou a rengrir el chad el sorir a klemerang. E ngera mo duubech er a ulebengelel a Ta el Telael el Rak el Omengederederel a Jesus? Alta e ngika el king a “mo torob a bek el bedengel omerreder, ma klisichel omerreder, ma klisiich,” engdi ngoba klengariourreng el “nguu a renged el oiuelii el mor a Dios el Chedam.”​—Monguiu er a 1 Korinth 15:24-​28.

17, 18. (a) Ngera uchul me a remesiungel a Jehovah a kmal kirir el oukerebai er a klengariourreng er a Jesus? (b) Ngera kede mo mesaod er a ongingil el suobel?

¹⁷ E kid a kuk mekerang? Kede oukerebai er a Kristus el olecholt er a klengariourreng? Sel taem er a Armakedon e a King el Jesus Kristus a mo olsobel er tirke el melemalt me a rengariou a rengrir el chad, me ngkmal kired el omekeroul er a klengariourreng. Me a lmuut el tang, a klengariourreng el lulechotii a Jesus a mlo uchul a klungiaol el kirel ngii me a rebebil, me a lsekum kede olecholt er tia el blekeradel e ngdirrek el mo uchul a betok el klungiaol el kired.

¹⁸ Ngerang a ngosukid el oukerebai er a klengariourreng er a Jesus? Kede mekerang e olecholt er a klengariourreng er a chelsel a taem er a omelsemai? Kede mo onger aika el ker er a ongingil el suobel.

[Aike el Ker er a Suobel]

[Siasing el ngar er a 15 el llel]

Ngmekerang a kerebil a Jesus el kirel a klengariourreng e mo uchul a klungioled?

[Siasing el ngar er a 16 el llel]

A klechubechub er a Jesus a ungil el kerebai el kired