“Mosisecheklak el Mo Meruul a Soam”
“Mosisecheklak el Mo Meruul a Soam”
“Mosisecheklak el mo meruul a soam, kau a Dios er ngak.”—PSALM 143:10.
MOLATK AIKA EL TEKOI
Ngerang a ochotii el kmo a David a uleba osengel a Jehovah?
Ngmilekerang a David e mlo omtab er a uldesuel a Jehovah?
Kede mekerang e melemolem el oba kengei er a Dios?
1, 2. Ngmo uchul a ngera el klungiaol a bo dodengei a soal a Dios? E ngera kede suubii er a omerellel a King el David?
OLEKO ke merael er bebul a rois e mocha er a metengal a eru el rael. Ngera el rael a obo mokiu ngii? A lsekum ke melemiakl a kerrekar e ngmo sebechem el ungil mes aika el rael. Me ngdi osisiu, a bo doba osengel a Dios el kirel a tekoi e ngmo ngosukid el mo meruul a soal er a taem el kired el meruul a omelilt er kid.—Isaia 30:21.
2 A King el David a mle blechoel el meruul a tekoi el oba osengel a Dios e kmal mle blak a rengul el mo er Ngii. Me bo dosuub el kirel a omerellel a David er sera bo lechelebangel a meringel el blekeradel.—1 King 11:4.
A DAVID A MILENGEBKALL ER A NGKLEL A JEHOVAH
3, 4. (a) Ngera rirellii a David el mo okeuad er a Goliath? (b) Ngmle ua ngerang a osengel a David el kirel a ngklel a Dios?
3 Sera lengeasek a David e ngmlo oumekemad er a Goliath el chad er a Filistia. Ngera rirellii a David el mo okeuad er ngika el mekoar el chad el ullab a betok el klekedall er a mekemad e kuk mle metongakl er a 7 el fit? (1 Samuel 17:4) Ngsel blekengel me a klaumerang er ngii er a Dios a uchul? Nguaisei, engdi sel kot el klou a ultutelel a sel omengull er a David el kirel a Jehovah me a chedaol Ngklel a uchul me ngilasech a rengul er a Goliath el uleltuub er a rechedal a Dios. Ngdilu el kmo: “Ngika ng techal diak loumera er a Dios el chad er a Filistia el oltuub er a re soldau er a di ngar el Dios?”—1 Samuel 17:26.
4 A David a dilu er a Goliath el kmo: “Kau a mer ngak el oba saider, ma biskang, ma javelin e ngdi ngak ekong el oba ngklel a RUBAK el Olab a Bek el Klisiich, el Dios er a re soldau er a Israel, el bla moltuub er ngii.” (1 Samuel 17:45) A David a mle ultuil er a ngelsuil a mera el Dios e millechii a Goliath el mekodir el ousbech er a di chimo el bad. Me a klteketel a klengar er a David e ngmle ultuil er a Jehovah e uleba omengull el kirel a chedaol Ngklel. Ngdirrek el millisiich er a rechad er a Israel el mo ‘mengebkall er a chedaol ngklel a RUBAK.’—Monguiu er a 1 Kronika 16:8-10.
5. Te mekerang a rechad er chelechang e mo ua omerellel a Goliath?
5 Me kau, ngdmeu a rengum el oudios er a Jehovah? (Jeremia 9:24) Ke mo mekerang a lsekum a retonari er kau, rechad er a urerem, skuul me a rechedam a melenguul er a Jehovah me a Resioning er ngii? A rechad sel bo loltuub er a Dios el ua omerellel a Goliath, e ke mesebechakl er a ngklel a Jehovah e oumerang el kmo ngmo ngosukau? A lebebil er a taem e ngungil a “di deluk,” engdi ngdiak el kired el mo merur e le kid el Sioning er a Jehovah e oltirakl er a Jesus. (Olisechakl 3:1, 7; Markus 8:38) Ngkirel el mo ungil a omerelled el mo er a rechad el chetirir a klemechel a Jehovah, engdi ngdiak el kired el mo uai rechad er a Israel el di rirengesii a Goliath “e mlo medakt.” (1 Samuel 17:11) Ngbai kired el mesebechakl er a chedaol el ngklel. Ngkmal soad el ngosuterir a rechad el mo medengelii a Jehovah, e ousbech er a Biblia el ochotii a uchul me ngungil a bo lodengelii.—Jakobus 4:8.
6. Ngera sel kot el klou a ultutelel el uchul e a David a mlo okeuad er a Goliath? Ngerang a klou a ultutelel el tekoi er a uldesued?
6 Ngar er ngii a lmuut el ta er a tekoi el desuubii er tia el cheldecheduch. A David er sera lerurt el mo er a medal a mekemad e nguleker el kmo: “Ngera ng mo nguu a chad a lokodir ngikel chad er a Filistia e le ngebetii a Israel er tial terached?” Me a rechad a ulenger er ngii el kmo: “Ngikel mekodir a bo le rellii a king el mo meteet, e nguu a ngelekel el msang me ng mo bechil.” (1 Samuel 17:25-27) Engdi a David a dimlak di losiik a omeksaul, ngbai mle soal el mengebkall er ngike el mera el Dios, e le tiang a mle mekreos el tekoi er a rengul. (Monguiu er a 1 Samuel 17:46, 47.) Me kid, ngdi soad el meruul a chised e merekong? Ngdi soad el osiik a betok el udoud me a ngarbab el deruchall er tia el beluulechad? Ngdiak, ngbai soad el mo ua David el milengitakl el kmo: “Mobengkek el omerk er a klengarbab er a Dios, e bo de dak el oldanges er a ngklel!” (Psalm 34:3) Me bo dultuil er a Dios e dekerekikl el kirel a ngklel er a bai di dolatk a meruul a chised.—Mateus 6:9.
7. Ngmekerang a domekeroul a mesisiich el klaumerang me bo el sebeched el oldingel a obliil el mo lmuut er a taem el rechad a chetirir el orrenges?
7 A ngeasek el David a mle mesisiich a klaumerang er ngii er a Jehovah a uchul me ngmle sebechel el okeuad er a Goliath. A David a mle bek el sils el lulsuub el mo ultuil er a Jehovah el oeak a urerel el mengkerengel a sib. (1 Samuel 17:34-37) Ngkirel el mo mesisiich a klaumerang er kid me bo el sebeched el melemolem el omerk er a klumech er a taem el rechad a chetirir el orrenges er kid. Ngsebeched el omekeroul a chouaitia el klaumerang el mo er a Dios el okiu a omerelled er a bek el sils. El ua tiang, ngsebeched el mesaod er a Biblia sel dechadecheduch kid me a rechad el ngar er a makit me a bank. Ngdirrek el sebeched el mengedecheduch er tirke el chad el desterir sel doldingel a obliil.—Rellir 20:20, 21.
A DAVID A MILENGIIL ER A TEMEL A JEHOVAH
8, 9. Ngmilekerang a David e ulechotii el kmo ngmle blechoel el oba osengel a Dios er a omerellel el bedul a Saul?
8 A David a dirrek el ullecholt er a klaumerang er ngii el mo er a Jehovah el oeak a uldesuel el kirel a Saul el ngii a mle kot el king er a Israel. A Saul a mle mechechei er a David me ngmle edei el taem el lomurech er ngii, engdi a David a uliiu e dimlak bo lokoad er a king e bai chiliis. (1 Samuel 18:7-11; 19:10) E a uriul e a Saul a ngilititerir a re 3,000 el chad er a Israel e mlo osiik er a David er a ked. (1 Samuel 24:2) A ta el taem e a Saul a mlo er a ii, el David me a rechedal a ulemart er tir er a chelsel. A David a mle sebechel el ousbech er tia el techall el mekodir a Saul e le ngmle medengei el kmo a Dios a mla tutkii el mo ongingil el king. (1 Samuel 16:1, 13) Me a rechedal a David a dirrek el millisiich er ngii el mo omekoad er ngii, engdi ngdilu el kmo: “A RUBAK bo longkar er ngak me lak temellii a mastang er ngak el ngii a le ngileltii a RUBAK el mo king!” (Monguiu er a 1 Samuel 24:4-7.) Sel taem e a Jehovah a dirk ulemechei er a Saul el king me ngdimlak el soal el mo orribech er sel deruchellel. Me ngbai di tilkur a telkib er a rsel a bilel a Saul el ulechotii el kmo ngdimlak er a uldesuel a omekoad er ngii.—1 Samuel 24:11.
9 A David a dirk ulecholt a omengull el mo er a Saul el mle ngellitel er a Dios er sel mlo ulebongel el klasoes er tir. Ngii me a Abisai a mlo er a kiamp er a Saul e miltik er ngii el mechiuaiu. A Abisai a ulemdasu el kmo a Dios a kiltmeklii tia el tekoi el msa techellel a David me lokodir a Saul, me ngdilu el kmo, ‘bechikak me kbrechii.’ Engdi David a dimlak lekengei er ngii. (1 Samuel 26:8-11) A David a mle blechoel el oba osengel a Dios el kirel a tekoi a uchul me ngdimlak lekengei el omekoad er a Saul.
10. Ngera el omelsemai a sebeched el mo chelebangel er ngii? E ngerang a ngosukid el mo meruul a soal a Jehovah?
10 A rechad a dirrek el sebechir el melisiich er kid el mo oltirakl a uldesuir er a bai doltirakl er a soal a Jehovah. Me a lechub e ngsorir a dolilt a tekoi er a uchei er a bo dolatk er a osengel a Jehovah, el ua omerellel a Abisai el mo er a David. Me ngkired el mo blechoel el oba osengel a Jehovah el kirel a tekoi e tibir el mo meruul a soal me lak demekesuseu el mo oltirakl a uldesuir a rechad.
11. Ngmilekerang a David e ochotii el kmo a soal a Dios a klou a ultutelel er ngii? E kede mekerang e oukerebai er ngii?
11 A David a milluluuch el mo er a Jehovah el kmo: “Mosisecheklak el mo meruul a soam.” (Monguiu er a Psalm 143:5, 8, 10.) Me ngdimlak lultuil er a di uldesuel me a lechub el oltirakl a uldesuir a rechad. Ngbai mle semeriar el mo mosisechakl er a Dios, me ngdilu el kmo: “Ak melatk er a ngar a mong, e omdasu a ikel rokui el bla mruul; e melebedebek a rokui el omerellem.” Ngdirrek el sebeched el mo oba osengel a Jehovah el kirel a tekoi, a lsekum kede kerekikl el mesuub er a Biblia e melebedebek a omerellel el mo er a rechad er a irechar.
A DAVID A MLE MEDUCH EL OLTAUT A OMELLACH
12, 13. Ngera uchul me a David a milengubel er a ralm?
12 Ngdirrek el sebeched el oukerebai er a omerellel a David el uleltirakl a omellach. A omellach a di ua uldasu me a lechub e ngklemerang el ngosukid el mo medengelii a uldesuel a Jehovah e mo ungil melilt a tekoi. Me ngsebeched el mo ua David el omtab a belkul a llechul a Jehovah. El ua tiang, a ta el taem e a David a uluureng el melim a ralm er a chido er a Bethlehem, engdi a rechad er a Filistia a mla er tia el mats. Me a retedei el chedal a David a kilengei el mo ocherur a kodall el mo melai a ralm er sel chido, engdi a David a dimlak lolim e “chilubel el odars el mor a RUBAK.” E ngera uchul? A David a dilu el kmo: “Ngkmal diak kulim a ikal ralm, ele ngdi ua kulim a rsechir tirkal chad el klengar er tir a mlo ocherur a kodall!”—1 Kronika 11:15-19.
13 A David a mle medengelii a llach el kmo a rasech a diak el kall e kirel el mechubel er a chutem. Ngdirrek el mle medengelii a uchul me a Jehovah a millekoi er tia el llach, e le ngmle medengei el kmo: “A klengar er a bek el outeliil a ngar a rasech.” Engdi tiang a di ralm el diak el rasech. Ngera uchul me ngdimlak lolim? Ngdimlak lolim e le ngmle medengelii a omellach el mengai er tia el llach. A rasech a mekreos er a osengel a Jehovah. Me a David a ulemdasu el kmo a bo lolim er tia el ralm, e ngdiak lolecholt a omengull el kirel a rsechir tirka el chad el kilengei el mo ocherur a kodall el mo melai er ngii. Me ngdimlak lolim, ngbai ulechebelii er a chutem.—Levitikus 17:11; Duteronomi 12:23, 24.
14. Ngerang a ngilsuir a David el mo medengelii a uldesuel a Jehovah?
14 A llechul a Dios a mle klou a ultutelel er a osengel a David, me ngmilengitakl el kmo: “Dios er ngak, ng kmal soak el meruul a tekingem! Ak sichedekl osisecheklem er a renguk.” (Psalm 40:8) A David a mle kerekikl el mesuub e millebedebek a llechul a Dios, e dirrek el mle medengei el kmo ngmo uchul a klungiolel a lolengesenges aika el llach. Ngdimlak di loltirakl a Llach er a Moses e ngdirrek el uleltaut a omellach el mengai er aika el llach. Me sel dosuub er a Biblia e dolebedebek a tekoi el dosuub e ngmo sebeched el oltaut a omellach er ngii er a klengar er kid er a bek el sils, me a tekoi el doruul a mo odeuir a rengul a Jehovah.
15. Ngoeak a ngera el rolel e a Salomon a mlo diak loltirakl a llechul a Dios?
15 A Jehovah a ulemekngeltengat er a Salomon el ngelekel a David, engdi a uriul e ngmlo diak loltirakl er a Llechul. El ua tiang, ngmlo becherir a rebetok el redil er a ngodech el beluu. (Duteronomi 17:17) Me sera bo lechuodel e a rebechil a milengesuseu er ngii “el mo oltirakl a ngodech el chelid.” Me alta e a Salomon a mla er ngii a uchul e ngmirruul el uaisei, engdi ng “mlor a klengit el omtok er a RUBAK, ng dimlak le cherrungel el oltirakl er ngii. Ng dimlak le ua demal er a David el mle cherrungel el oltirakl er a RUBAK.” (1 King 11:1-6) Me ngkmal kired el oltirakl a llach er a Biblia me a dirrek el omellach er ngii, el ileakl el klou a ultutelel er sel taem el dolatk el mo bechiil.
16. Ngera kede suubii er a llechul a Jehovah el kirel a chebechiil?
16 Ngmo ua ngerang a uldesuem a lsekum a chad el diak el Kristiano a soal kau? Ke mo ua David el uleba osengel a Dios me a lechub e ke mo ua Salomon el dimlak lolengesenges er a Jehovah? A remera el Kristiano a muchelechel el mo bechiil “el oltirakl er a Rubak.” (1 Korinth 7:39) Me a Kristiano el soal el mo bechiil a kirel el mo bechil a ta er a Kristiano. Me ngokiu tia el llach e kede dirrek el mo medengei el kmo a Jehovah a chetil a domak a deleuill er kid me a rediak loumerang. Me ngdiak dekengei el mo bechil a chad el diak loumerang, e dirrek el diak el soad el melisiich er a uldesuel el soal kid.
17. Kede mekerang e diak demekesuseu el mo omes a siasing er a remeau?
17 A omerellel a David el uleba osengel a Jehovah a ngosukid el mo oltngakl a ongetikaik el kirel a osengel a siasing er a remeau. Monguiu aika el bades, e molatk a belkul a omellach er a chelsel me bo modengelii a uldesuel a Jehovah el kirel tia el tekoi. (Monguiu er a Psalm 119:37; Mateus 5:28, 29; Kolose 3:5.) Ngkired el melebedebek a ngarbab el llechul a Jehovah me lak demekesuseu el mo omes a siasing er a remeau.
BO BLECHOEL EL OBA OSENGEL A DIOS
18, 19. (a) Alta e a David a dimlak lecherrungel, engdi ngmilekerang e melemolem el oba kengei er a Dios? (b) Ngera ke mo meruul er ngii?
18 Me alta e a David a ungil el kerebai el kired, engdi ngdirrek el riruul a oberaod el klengit. (2 Samuel 11:2-4, 14, 15, 22-27; 1 Kronika 21:1, 7) Me nguaisei, engdi ngulechotii el kmo nguluuchel er a rengul e ulebult er a kngtil. A Biblia a kmo, ngdimlak ‘ltuchakl e melemalt a blekerdelel.’ (1 King 9:4) Ngera uchul me ngsebeched el melekoi el uaisei? E le ngmle blechoel el melasem el oldeu er a rengul a Jehovah el oba osengel el meruul a tekoi.
19 Kid el diak demecherrungel el chad a sebeched el oba kengei er a Jehovah. Me ngkired el melemolem el mesuub e melebedebek er a Tekingel e oltaut a tekoi el dosuub. A doruul el uaisei, e kede mo ua ngike el milluches er a psalm el milluluuch el olengit er a Jehovah el kmo: “Mosisecheklak el mo meruul a soam.”
[Aike el Ker er a Suobel]
[Siasing el ngar er a 10 el llel]
Ngera uchul me a David a dimlak lokodir a Saul?
[Siasing el ngar er a 11 el llel]
Ngera kede suubii er a omerellel a David el milengubel er a ralm?
