Ngera Uchul Me a Chelebirukel el Omeruul a Melemolem el Ngar er Ngii?

“A re bebil er a re chad er tial beluulechad a ngar er ngii a klisichir, e a re bebil a mo chuarm er tir.”​—OLISECHAKL 8:9.

TIA el tekoi a ungil el mesaod er a reksi er a omengederederir a rechad, el ngii a uchul a ringel me a chelebuul. Tirke el ungil a uldesuir el chad el mla melasem el kutmeklii a melemalt el klechad a blechoel el meterob er a rechorecherreng me a chelebirukel el omeruul. Ngera uchul me nguaisei? Ngera uchul me a chelebirukel el omeruul a melemolem el ngar er ngii? Ngoeak aika el edei el mekngit el ongetikaik.

1. A ongetikaik er a klengit.

A Biblia a melekoi el kmo kid ‘el rokui a longedereder er kid a klengit.’ (Rom 3:9) A klengit a kiei el ngar er a chelsed el ua rakt el demludiukes er ngii el diak lemukar. Ngdirrek el mla mengedereder er a klechad el uai a king el betok el telael el rak. A “llach” er ngii a melemolem el loureor er a chelsed. A urunguled el soad el meruul a mekngit a uchul e a rebetok el chad a di meruul a sorir me a lechub e te di ousbech er a rechad me bo lengai a kerruul me a lechub e ngderuchall.​—Rom 5:21; 7:17, 20, 23, 25.

2. A ongetikaik er a mekngit el beluulechad el dekiei er ngii.

A beluulechad a mui er a rechad el merechorech a rengrir. Ngar er a chelsel a chouaitia el blekeradel, e a rebebil el chad a meringel er tir el mo ngodech a blekerdelir. Tir el sorir a ngarbab el tekoi a uchul me te mo osiik a klisiich. Te dirrek el ngar er ngii a mesisiich el urungulir el mo ngmai a betok el udoud me a klalo el diak lousbech. Me ngmekngit a rengud, e le te kongei el meruul a mekngit el tekoi me bo ltaut aike el turrekong er tir. A choua itirka el chad a ‘oltirakl er a re betok el chad el mo meruul a mekngit’ er a bai loltngakl a mekngit el ongetikaik.​—Exodus 23:2.

3. A ongetikaik er a Satan el Diabelong.

A Satan el mekngit el anghel a “mengeblad er a beluulechad el rokir.” (Ocholt 12:9) Ngkmal soal el mengesuseu er a rechad. Me ngsebechel el mengeuid a urungulir a rechad el kirel a ungilbesul el rolel a klengar me te mo meruul a cheleblad el tekoi.

Tiang belkul a kmo ngkired el olengesenges er a Satan e meruul aike el soal? Kede mo suubii a nger er tiang el ngar er a ongingil el suobel.