Chad er a Ngodech el Beluu el Di “Ultechakl er Tial Beluulchad”

“Ak mengelechel er kemiu el ua cho mchad er a ngodech el beluu e ultechakl er tial beluulchad me lak mrebet el mo meruul a ikel ngelbesel a bedengel a chad.”​—1 PETRUS 2:11.

NGERANG A NGER ER KAU?

Ngera uchul me kede dmu el kmo a rengellitel a di ultechakl?

Ngokiu a ngera el rolel e a rengodech el sib a di ultechakl?

Ke semeriar el mengiil er a ngera el tekoi?

1, 2. A Petrus ngulemekedong er a rua techang el “re ngellitel,” e ngera uchul me ngdilu el kmo te di “ultechakl er tial beluulchad”?

 A BEKORD el 30 el rak er a uriul er a kodellel a Jesus, e a apostol el Petrus a milluches el mo er a “re ngellitel el chedal a Dios el kiei . . . el berberiid er a beluu er a Pontus, ma Galatia, ma Kapadosia, ma Asia, ma Bithinia.” (1 Petrus 1:1) Me a tekoi el “re ngellitel” a melutk er tirke el ua Petrus el mla mengilt el okiu a oureor el klisichel a Dios el mo nguu a “beches el klengar” me a omelatk el mo mengedereder el obengkel a Kristus el ngar er a eanged. (Monguiu er a 1 Petrus 1:3, 4.) Engdi ngera uchul me ngulemekedong er tir el “chad er a ngodech el beluu e ultechakl er tial beluulchad”? (1 Petrus 2:11) E tiang ngera belkul el kired er chelechang, a lsekum te di mekesai el Sioning el meliuekl er a beluulechad a melekoi el kmo te ngellitel?

² A rengellitel er a irechar a okedongall el “chad er a ngodech el beluu e ultechakl er tial beluulchad” e le te di ua rengellitel er chelechang el delengcheklir er tia el chutem a diak lolemolem. A apostol el Paulus el ta er tirka el “kekerel delebechel” a dilu el kmo: “Ngdi meral beluad a ngar a eanged, me kede semeriar el mengiil er a Osebeled, el Rubak el Jesus Kristus, el ngar a eanged el mei.” (Lukas 12:32; Filipi 3:20) Me a mera el belurir a rengellitel a “ngar a eanged” a uchul, me sel lemad e te mo nguu a lmuut el ungil el klengar el mo kiei er a eanged el diak a ulebengelel. (Monguiu er a Filipi 1:21-​23.) Seikid a uchul me te “chad er a ngodech el beluu e ultechakl” er a chelsel tia el beluulechad el longedereder er ngii a Satan.

3. Ngera el ker a mo duubech el kirir tirke el ‘kuk bebil el sib’?

 ³ E kuk mekerang el kirir tirke el ‘kuk bebil el sib’? (Johanes 10:16) Te oba omelatk el mo kiei er tia el chutem el diak a ulebengelel! Me nguaisei engdi ngdirrek el sebeched el melekoi el kmo te “di ultechakl er tial belulechad.” El okiu a ngera el rolel?

A ROKUI EL BLEOB A “ONGINGD ER A RINGEL”

4. Ngera el tekoi a diak el sebechir a rechad el torebengii?

⁴ Sel taem er a ultekengel a Satan el me lmuut er chelechang, e a rokui el chad el uldimukl er a Rekristiano a melemolem el chuarm el mo lmuut er a bo lak tia el mekngit el beluulechad. A Rom 8:22 a kmo: “Kede medengei el kmo a rokir el bleob a ongingd er a ringel el me lmuut er chelechang.” Me a remerreder a beluu, rescientist, me a rechad el olengeseu er a remechebuul a kmal diak el sebechir el torebengii tia el mekngit el blekeradel.

5. Ngera te mla rullii a rebetok el chad, e ngera uchul?

⁵ Ngulemuchel er a rak er a 1914 el mei e a rebetok el miliol a mla kongei el mo chederedall er a King el Jesus Kristus. Me ngdiak lekengei el mo chedal tia el mekngit el beluulechad e lolisiich er a omengederederel a Satan. Te bai ousbech a rokui er tir el olengeseu er a ureor el kirel a Rengedel a Dios.​—Rom 14:7, 8.

6. Te ua ngera el chad a Resioning er a Jehovah?

⁶ A Resioning er a Jehovah a kiei er a chelsel a kuk betok er a 200 el beluu. Engdi ngar er a chelsel aika el beluu e te di ua rechad er a ngodech el beluu el diak el teloi a tekoi er a balatiks me a lmuut el bebil er a mondai er a beluu. Te melekoi el kmo te chedal sel beches el beluulechad el bo longetmokl er ngii a Dios. Te dmeu a rengrir el di ultechakl er tia el mekngit el beluulechad e le te medengei el kmo ngdi kmedung el mo nguemed.

7. Te mekerang a remesiungel a Dios e mo kiei el diak a ulebengelel? E te mo kiei er ker?

⁷ Ngdi kmedung a Kristus el mo  okngemedii tia el beluulechad er a Satan. Me a kabelment er ngii el Kristus a mo kikidii a beluulechad er a rokui el klengit me a ringel. Ngmo okngemed a rokui el tekoi el ngii a mle uchul a ultok el kirel a omengederederel a Jehovah. Me a reblak a rengrir el mesiungel a Dios a mo chedal tia el Paradis el beluulechad el mo cherechar. (Monguiu er a Ocholt 21:1-5.) Me a rokui el bleob a mo “mengubet er a klisichel a kodall, e mo soiseb er a mededaes el klebkellir a re ngelekel a Dios.”​—Rom 8:21.

NGKIRIR A REMERA EL KRISTIANO EL MEKERANG?

8, 9. Msodii a tekingel a Petrus el “lak mrebet el mo meruul a ikel ngelbesel a bedengel a chad.”

⁸ A Petrus a milsaod el kirir a Rekristiano el kmo: “Kemiu el betik er a renguk, ak mengelechel er kemiu el ua cho mchad er a ngodech el beluu e ultechakl er tial beluulchad me lak mrebet el mo meruul a ikel ngelbesel a bedengel a chad el di blechoel el okoad el omtok a reng er kemiu.” (1 Petrus 2:11) Tia el tekingel a millutk el kirir a rengellitel el Kristiano, engdi ngdirrek el kirir a rengodech el sib el oltaut er ngii.

⁹ Ngmo uchul a deuil a rengud a lsekum kede meruul a soad el tekoi el ngii a oltirakl a soal ngike el Ulemeob. El ua urunguled el soad a ungil el kall me a ilumel, e teloi a ungil el rolel a omilil el obengterir a rungil el sechelid. Me sel urungulel a chad el soal el meruul a tekoi er a durs el lobengkel a bechil a dirrek el mo uchul a deurreng er tir. (1 Korinth 7:3-5) Engdi a Petrus a di milsaod el kirel aike el mekngit el “ngelbesel a bedengel a chad” el ‘omtok a reng er ngii.’ Me ngbleketakl el kmo a ngii di el urungulel a chad el ngii a omtok er a moktek er a Jehovah a sebechel el tomellii a ungil el deleuill er ngii me a Dios. Me ngkirel el kerekikl me lak di loruul a ngelbesel a rengul e le ngsebechel el mo uchul e ngoridii a klengar er ngii.

10. Ngmekerang a Satan e rulleterir a Rekristiano el mo chedal tia el beluulechad?

¹⁰ A moktek er a Satan a soal el mengitechut er a remera el Kristiano me ngmo diak el sebechir el kiei el ua “chad er a ngodech el beluu e ultechakl” er tia el beluulechad er a Satan. Me a skel a kerruul, deleboes el omeruul, chetengakl, me a uldasu el kmo ‘ngak a kot’ me a uldasu el kmo a belurir a kuk ngarbab er a bebil el beluu, a rokui el bedeklel a Satan el kired el mo medengei. Me sel doltngakl aika el ngibeserreng e kede meketeklii el kmo kede di ultechakl er a chelsel, e diak el soad el mo chedal tia el mekngit el beluulechad er a Satan. Ngbai soad el blak a rengud el mengetmokl er kid el kirel sel merael el mei el melemalt el beluulechad er a Dios.

UNGIL EL OMERUUL

11, 12. Ngua ngerang a osengir a rechad el bedul a rechad er a ngodech el beluu? E ua ngerang a uldesuir el kirir a Resioning er a Jehovah?

¹¹ A Petrus a lmuut el mesaod el kirir a Rekristiano el di “ultechakl” el ngar er a 12 el kekerei el bades el kmo: “A blekerdeliu er mederir tirkel diak loumerang er a Dios a kirel kmal mo ungil me sel loltelechakl er kemiu er a mekngit el omeruul, e te mo mes a ungil el omerelliu e mo oldanges er a Dios er sel le mei er ngii el Sils.” A rechad a blechoel el melaes e mekngit a uldesuir el kirir a rechad er a ngodech el beluu e le tir el ngodech a rolel a longedecheduch, me a loubail, e dirrek el ngodech a mederir me a omerellir. Engdi ngmo diak a  ungil el uchul a tekingir sel lomes er tir el ungil a omerellir.

¹² Me ngdi osisiu, a remera el Kristiano a kuk ngodech er a retonari er tir, el okiu a omerellir me a omelekingir me a rolel a ongelaod el lolilt el meruul. Te dirrek el chemolt el ngodech er a rechad el okiu a rolel a loubail me a longetmokl er tir. Me a lebebil er a taem e aika el omerellir a mo uchul e a rechad a oltelechakl er tir el kmo te mekngit el chad. Engdi a rekuk bebil a chemat er sel rolel a klengar er tir.

13, 14. Ngera belkul a “llomeserreng er a Dios a chemolt el klemerang el oeak a ikel lukdubech el tekoi”? Mosaod a tekoi el dilubech.

¹³ A ungil el omeruul a sumechokl a cheleuid el ultelechakl. A Jesus el mle cherrungel a blakerreng er ngii el mo er a Dios me ngdirrek el mlotelechakl el kmo “ng ngemokel e chad er omelim, e ousechelei er a re chad er omelai el tax ma re kuk bebil er a re mekngit el chad.” Me a ungil el omerellel a mileketakl a ultelecheklir a rechad el kmo ngdiak lemera el tekoi. Me ngdilu el kmo: “Ngdi llomeserreng er a Dios a chemolt el klemerang el oeak a ikel lukdubech el tekoi.” (Mateus 11:19) Me tiang a klemerang el tekoi. El ua tiang, a rechad el kiei er a Selters er a beluu er a Dois a omes er tirke el rudam me a rudos el oureor er a Bethel el kora ngodech a blekerdelir. Engdi a mayor er tia el beluu a bai chilat er tir e dilu el kmo: “A Resioning el oureor er tia el basio a ngar er ngii a ileakl el rolel a klengar er tir, engdi ngdiak lolemall a klengar er a rechad er a beluu.”

¹⁴ A osisiu el tekoi a dilubech el mo er a Resioning er a Jehovah el kiei er a Moscow, er a beluu er a Rosia. Te mlotelechakl el kirel a betok el mekngit el tekoi. Engdi sera June 2010, e a European Court of Human Rights er a Strasbourg, er a beluu er a France a tilbir el kmo a ultuteklir a rechad er a Moscow el kirir a Resioning er a Jehovah a dimlak el melemalt el rolel a kerrekeriil, e dirrek el dimlak a llemeltir el merrob er tir er aike el miting er tir. Ngdilu el kmo aike el court er a beluu er a Rosia a dimlak a ungil el uchetemel a ultuteklir el kmo a Resioning a ngar er a klengit, e te dirrek el dimlak loba tabesul el rolel el oltaut aika el mesisiich el llecherir.

OLTIRAKL A LLACH

15. Ngera el omellach a loltirakl er ngii a remera el Kristiano?

¹⁵ A Resioning er a Jehovah er a beluu er a Moscow me a beluulechad el rokir a oltirakl a ulekrael el kirir a Rekristiano el lullekoi a Petrus. Ngdilu el kmo: “Bo mungil el oltirakl er tirkel olab a dereder; moltirakl er tir el kirel a Rubak, a Emperor, el kot el ngarbab el merreder, ma re kabernor.” (1 Petrus 2:13, 14) Me alta e a remera el Kristiano a diak el chedal tia el mekngit el beluulechad, engdi te kongei el olengesenges er a  remerreder er a beluu el ua ledilung a Paulus.​—Monguiu er a Rom 13:1, 5-7.

16, 17. (a) Ngerang a ochotii el kmo a kid a diak domtok a kabelment er a beluu? (b) Ngera te melekoi a rebebil el chedal a balatiks?

¹⁶ A Resioning er a Jehovah sel letibir el di mo “ultechakl” er tia el beluulechad er a Satan, e ngdiak el belkul a kmo te chedal a cheldebechel el meruul a ultok, me a lechub e lorrob er a rebebil el tir a sorir el mo teloi er a tekoi er a balatiks me a tekoi er a beluu. Me alta e a bebil er a klechelid a teloi er a tekoi er a balatiks, engdi a Resioning er a Jehovah a diak el uai tir. Ngdirrek el diak lolasem el omekrael er a rechad er a kabelment sel longetmokl a llach er a beluu. Me ngkmal diak er a uldesuir a sorir el melemall a llechul a beluu!

¹⁷ Sel lolengesenges er a remerreder er a kabelment e a Rekristiano a ochotii el kmo te oltirakl a uleklatk er a Petrus el kmo: “Mongull er a Emperor.” (1 Petrus 2:17) Me a lebebil er a taem e a remerreder er a beluu a kongei el kmo a Resioning er a Jehovah a diak lolisiich a ultok el kirel a kabelment. El ua tiang, a Steffen Reiche el mle chedal a parliament er sel beluu er a Brandenburg er a beluu er a Dois a dilu el kmo ngkmal mle ungil a omerellir a Resioning er a Jehovah er sera loldechelakl er tir a rechad er a Nazi. Te dimlak el kengei el mo ngodechii a klaumerang er tir er sera lemodechelakl, e mle ungil a omerellir el mo er tirke el ledilak el kelebus. Ngmelekoi el kmo a chouaika el blekeradel a kmal meklou a ultutelel er a chelsel a beluu er a Dois, e le rebebil er a rechad a merael el mo mekngit a omerellir el mo er a rechad er a ngodech el beluu me a lechub e ngtirke el ngodech a klaumerang er tir me a lechub e ngngodech a uldesuir el kirel a tekoi er a balatiks.

MOLECHOLT ER A BLTIKERRENG

18. (a) Ngera uchul me ngbeot er kid el olecholt er a bltikerreng er a delongeled? (b) Ngera te dmung a rechad el tir a diak el Sioning?

¹⁸ A apostol el Petrus a milluches el kmo: “Bo le betik a rengmiu er a re chedal a Dios el mdak el oumerang, e mongull el medakt er a Dios.” (1 Petrus 2:17) A Resioning er a Jehovah a mengull er a Dios el uchul me te kongei el meruul a soal. Te dmeu a rengrir el mesiou er a Jehovah el obengterir a rebetok el rudam me a rudos er tir el meliuekl er a beluulechad. Tiaikid a uchul me te oubltikerreng el mo er a rokui el “chedal a Dios.” A lebebil er a taem e a rechad a kmal mo mechas a rengrir sel lomes er tia el ileakl el rolel a bltikerreng. El ua tiang, a ta el chad el oureor el tour guide el kirir a rechad er a Merikel, a kmal mlo mechas a rengul er a lomes er a klou el bltikerreng el mocholt er a delongelir a Resioning er a Jehovah el chad er a kakerous el beluu, el mlo kldibel er a klou el ongdibel er tir er a beluu er a Dois er sera rak er a 2009. Ngdilu el kmo ngdirkak a ta el lesa chouaitia el tekoi el meketmokl er a klemengetel a taem el loureor er tia el urerel. Me kau ke mla ta el mesterir a rechad el mo mechas a rengrir el omes a blekerdelir a Resioning?

19. Ngera kired el meruul er ngii, e ngera uchul?

¹⁹ Ngoeak aika el betok el tekoi el bla desaod e a Resioning er a Jehovah a meketeklii el kmo te di “ultechakl” er tia el beluulechad er a Satan, e sorir el melemolem er tia el telbilir. Ngar er ngii a ungil el uchul a mesisiich el omeltkir el kmo ngdi kmedung e te mo kiei el diak a ulebengelel el chedal sel beches e melemalt el beluulechad el bo longetmokl er ngii a Dios. Me kau, ke semeriar el mo omes er a otutel tia el omelatk?

[Aike el Ker er a Suobel]

[Siasing el ngar er a 23 el llel]

Kid a diak dolasem el mesmechokl er tia el beluulechad er a Satan

[Siasing el ngar er a 23 el llel]

Kede melisiich er a beches el beluulechad er a Dios

[Siasing el ngar er a 25 el llel]

A Biblia a mla ngosuir tia el telungalek el ngar er a Rosia el mo ta rengrir