Kau a Rredemelel a Mo Mesiou!

“Kemiu a diak di le kemiu el merreder er kemiu.”​—1 KORINTH 6:19.

NGMEKERANG A OMONGER?

Ngera mle ngerechelir a remesiou er a irechar?

Ngera el ngerachel a kirir a rokui el mesiungel a Dios el meruul?

Ngua ngerang a osenged el kirel a omesiunged?

1. Ngerang a osengir a rechad el kirel a ilmeklir?

 A BEKORD el 2,500 el rak er a ngar a mong, e a ta el chad er a Grik a milluches el kmo: “Ngdiak a chad el soal el oureor el mesiou er a ta er a chad.” E a rebetok er chelechang a kongei er tia el luldasu. A rechad a omes er a omesiou el tekoi el ua lomekringel e merenged er a chad el kirel el oureor el di mo uchul a klungiolir tirke el merreder er tir.

2, 3. (a) Ngera el ngerachel a mla moterekokl er a blak a rengul e mellomes a rengul el mesiou? (b) Te ngerang a teloi er a ureor er a omesiou el loruul er ngii a blak a rengul el mesiou?

² Me nguaisei, engdi a Jesus a milsaod el kmo a redisaiplo er ngii a mo mesiou. E tia el omesiou er a remera el Kristiano a diak lomekringel me a lechub e lomekcharm er tir, te bai dmeu a rengrir er a deruchall, klaumerang me a omengull el bla lenguu. Molatk a tekingel a Jesus el kirel a ta el mesiou er a uchei er a kodellel. A Kristus a dilu el kmo ngmo oterekokl a ngerachel el mo er a “blak a rengul e mellomes a rengul el mesiou.”​—Mateus 24:45-​47.

³ A ta er a cheldecheduch a mesaod el kirel a chad el oureor el “mesiou.” (Monguiu er a Lukas 12:42-​44.) A ruumesingd el blak a rengrir el Kristiano er chelechang a diak el chedal a chelechad er a blak a rengul el mesiou. Engdi a Biblia a ochotii el kmo a rokui el chedal a Dios a oureor el mesiou er Ngii. Te mukngerachel el mo mekerang? E ua ngerang a uldesuir el kirel a ngerechelir? Me bo dosaod a ngerechelir a remesiou er a irechar.

A URERIR A REMESIOU

4, 5. Ngera mle ngerechelir a remesiou er a irechar? Mosaod.

⁴ A irechar e a mesiou a mle blechoel el mukngerachel el mo omtebechel er a delengcheklel me a urerel a mastang er ngii. Me ngmla er ngii a klisichel el mengedereder e orrurt a ureor er a chelsel a delengcheklel,  mengetmokl a ududel, e dirrek el mengedereder er a rebebil el mesiungel a mastang er ngii. E tiang a sebeched el mesang er a ngerachel el mloterekokl er a Elieser, el mle mesiungel a Abraham. A Abraham a locha uldureklii el mo er a Mesopotamia el mo osiik er a bechil a ngelekel el Isak.​—Genesis 13:2; 15:2; 24:2-4.

⁵ A Josef el ngelekel a ngelekel a Abraham a milsiou er a delengcheklel a Potifar. (Genesis 39:1, 2) Cherengel a taem e ngmlo er ngii a mesiungel a Josef el mlo “oungerachel er a blil.” Ngika el mesiou a milengetmokl a tekoi me bo el sebechel el oltuchakl er a reteruich el odam er a Josef. E kilengei el kutmeklii a tekoi el kirel a mirrechorech el kebengel a mastang er ngii. Me ngbleketakl el kmo a mesiou a kltmokl el meruul a ngerachel el moterekokl er ngii.​—Genesis 43:19-​25; 44:1-​12.

6. Ngera el rolel a omesiou a mla moterekokl er a Rekristiano el mechuodel?

⁶ Betok el rak er a uriul, e a apostol el Paulus a milluches el kirir a remengeteklel a ongdibel el kmo te “oungerachel a urerel a Dios.” (Titus 1:7) A remla metutk el klekerengel a “delebechel el sib er a Dios” a omekrael a bek el tekoi er a chelsel a ongdibel. (1 Petrus 5:1, 2) E aikang a kakerous el ngerachel. El ua tiang, a oumesingd er a remechuodel a mesiou a derta el ongdibel, e tirke el mechuodel el oldingel a ongdibel, a kuk mesiou a betok el ongdibel. Tirke el mechuodel el ngar er a Branch Committee a oureor el mesiou a betok el ongdibel er a chelsel a meklou el beluu. Me tir el rokui a kirir el mo blak a rengrir el mengetmokl a ngerechelir e le te rokui el “mo mesaod er tir er a Dios.”​—Hebru 13:17.

7. Kede mekerang e mo medengei el kmo a rokui el Kristiano a mesiou?

⁷ E kuk mekerang el kirir tirke el blak a rengrir el Kristiano el tir a diak el mechuodel er a ongdibel? A apostol el Petrus a milluches el mo er a rokui el Kristiano el kmo: “A ta ma tar kemiu bo lungil el ousbech a ikel le meduch er ngii el tekoi el le ngilai er a Dios, el mo klungiolir a re bek el chad.” (1 Petrus 1:1; 4:10) Me ngokiu a diak el mekimd el bltkil a rengul a Dios e ngmla meskid a duch er kid, me aike el ngar er ngii er kid, el sebeched el ousbech el mo uchul a klungiolir a rekldemed er a klaumerang. Misei, e a rokui el chedal a Dios a mesiou, e a omesiungir a mo er ngii el okiu a klebkall, klaumerang me a ngerachel.

KEDE KLOKLEL A DIOS

8. Ngerang a klou a ultutelel el omellach el kired el melatk er ngii?

⁸ Ngsebeched el omtab a edei el omellach el kired kid el mesiou el mo oltirakl. A kot: Kede rokui el kloklel a Dios e kired el mo mesaod er kid er ngii. A Paulus a milluches el kmo: “Kemiu a diak di le kemiu el merreder er kemiu, ele kom chederdellel a Dios. Ng milechar a klengar er kemiu” el okiu a rsechel a Kristus. (1 Korinth 6:19, 20) Me kid el kloklel a Jehovah a uchul me ngkired el olengesenges a llechul el ngii a diak lemeringel. (Rom 14:8; 1 Johanes 5:3) Kede dirrek el mo mesiungel a Kristus. Me kede ua remesiou er a irechar, el ngar er ngii a ilmekled engdi ngdiak el ilmekled el di meruul a soad, ngbai kired el meruul a ngerecheled el oltirakl a ulekrael. Me kid el rokui a mesiou er a Dios me a Kristus alta e ngkakerous a ngerachel el dolab.

9. Ngmilekerang a Jesus er a lomekesiu er a deleuill er a mastang me a mesiungel?

⁹ A Jesus a ngosukid el mo medengelii a deleuill er a mastang me a mesiungel. Ngmle ta el losaod el mo er a redisaiplo er ngii el kirel a mesiou el mlo remei er a uriul er a loureor el ta el sils. A mastang ngmo dmu er ngii el kmo: “Mereched el me omengur sel be lerei?” Ngdiak. Ngbai melekoi el kmo: “Mkedmeklii a belsilek, e sola e mutechulau e mosiou er ngak me sel bo kmerek e momengur kung.” Ngmilekera Jesus er a loltaut  er a okesiu? “Ng dirrek el ua isei er kemiu, sel bla mruul a ikel rokui el mlodurch el mo meruul e mdu el kmo, ‘Kid a di mesiou; ma ikel bla deruul a kired el meruul.’”​—Lukas 17:7-​10.

10. Ngera ochotii el kmo a Jehovah a dmeu a rengul er a omesiunged el mo er ngii?

¹⁰ A Jehovah a dmeu a rengul el kirel a omesiunged, e le a Biblia a kmo: “A Dios a diak le chebirukel me di lobes a ureriu ma bltkil a rengmiu er ngii.” (Hebru 6:10) A Jehovah a blechoel el tabesul a uldesuel el bedulkid, me a tekoi el longerechir er kid el mo meruul a diak lemeringel e di mo uchul a klungioled. Engdi sel okesiu er a Jesus a meketeklii el kmo a mesiou a diak di loruul a soal e loldeu er a rengul. Me tiang a belkul a kmo, sel detengetengii a klengar er kid el mo er a Dios, e ngkired el nguu a Dios el mo kot er a klengar er kid. Me kau ke kongei er tia el tekoi?

A TEKOI EL SOAL A JEHOVAH A BO DORUUL

11, 12. Me kid el mesiou, ngkired el olecholt a ngera el blekeradel, e ngera kired el mengeroid er kid er ngii?

¹¹ A ongerung el omellach a kmo: Kid el mesiou a rokui el kired el oltirakl a osisiu el llach. Alta e a rebebil a mla mukngerachel el mo meruul a ileakl el ureor er a chelsel a ongdibel, engdi a ngerecheled el rokui a di osisiu el di ngerachel. El ua tiang, ngklou a ultutelel el de kaubltikerreng er a delongeled a de disaiplo er a Kristus e de Sioning er a Jehovah. A Jesus a dilu el kmo a bltikerreng a olengchelir a remera el Kristiano. (Johanes 13:35) A bltikerreng er kid a diak di lebo er a rudam er kid e lemerekong, e ngkirel el mocholt el mo er a rokui el chad. E tiang a sebeched e kired el rokui el meruul er ngii.

¹² Kid el rokui a kired el olecholt a ungil el blekeradel, e soad el mengeroid er kid er a ngii di el rolel a klengar el louketui er ngii a Dios. A Paulus a milluches el kmo: “Ng diak el sebechir el mo soiseb er a Rengedel a Dios a re ngar a deleboes el delengerenger, ma re mengull el meluluuch a bleob el chelid, ma re ngar a laokreng, ma re menguchet a raod, ma re merechorech, ma re bechelechelingaol a rengrir, ma re di cheltelaol, ma re melemall a chisir a rechad, ma re mengeblad e mela kloklir a re chad.” (1 Korinth 6:9, ​10) Ngdiak el beot el doltaut a melemalt el llechul a Dios, engdi a dolasem e ngmo uchul a betok el klungiaol, el uldimukl er a ungil el klisichel a bedenged, ungil el deleuill er kid me a rebebil, e mo uchul e kede nguu a kengei er a Dios.​—Monguiu er a Isaia 48:17, 18.

13, 14. Ngera el ngerachel a mla moterekokl er a rokui el Kristiano, e ua ngera osenged el kirel tia el tekoi?

¹³ Kid me a remesiou a dul kired el oureor. Kede mla nguu a mekreos el sengk el ngii a klemedengei el kirel a klemerang, me a Dios a mengerechir er kid el mo ouchais er ngii el mo er a rebebil. (Mateus 28:19, 20) A Paulus a milluches el kmo: “Ng kiriu el melebedebek el kmo kemam a mesiungel a Kristus e oungerachel el omerk a klemerang el bertelel a Dios.” (1 Korinth 4:1) Me ngngar er a osengel, e ngulemes er tia el rolel a omesiou el belkul a kmo ngkired el mesebechakl er a “bertelel a Dios” e mo blak a rengud el ouchais er ngii el mo er a rebebil el ua ledilung a Mastang, el Jesus Kristus. ​—1 Korinth 9:16.

¹⁴ Ngrolel a bltikerreng a douchais er tia el klemerang el mo er a rechad. Engdi a derta el Kristiano a kakerous a rolel a klengar er tir, me ngdiak el sebechir el meruul a osisiu el tekoi el rokui. E a Jehovah a ungil medengelii tia el tekoi. Me a klou a ultutelel el tekoi a kmo ngkired el meruul aike el rokui el sebeched, me bo dolecholt er a diak lemekimd el bltikerreng el mo er a Dios me a rechad.

 A KLUNGEL A ULTUTELEL A BLAKERRENG

15-17. (a) Ngera uchul me ngkirel a mesiou el mo blak a rengul? (b) Ngmilekerang a Jesus er a losaod er a telemellel a lak leblak a rengud?

¹⁵ A ongedei el omellach a kmo: Ngkirel el mo blak a rengud. A mesiou el ungil a blekerdelel e betok a lemeduch er ngii a sebechel el mo diak a ultutelel a lsekum ngdiak el bekongerachel e diak el blak a rengul el mo er a mastang er ngii. Me a blakerreng er a mesiou a rullii el mo ngar er ngii a ultutelel. Me a Paulus a milluches el kmo: “E a re chad el oungerachel a tekoi a kirir el sebeched el ultuil er tir er a ngerechelir.”​—1 Korinth 4:2.

¹⁶ Kede ulterekokl el mo ngmai a omeksaul a lsekum e ngblak a rengud, engdi kede mo oriid a techelled a lsekum ngdiak el blak a rengud. Kede mo medengelii a belkul tiang lokiu a okesiu er a Jesus el kirel a udoud. Tirke el mesiou el mle blak a rengrir el “mengereker” lousbech a ududel a mastang a mlukngeltengat. E ngike el dimlak leblak a rengul el mengereker a mlukerrekeriil el “mekngit” e “mesaik” e “diak a belkul” el mesiou. Me ngmilengai a udoud el lulebang e mlodik el mo diak el oureor.​—Monguiu er a Mateus 25:14-​18, 23, 26, 28-​30.

¹⁷ A ta el taem e a Jesus a milsaod a telemellel a lak leblak a rengud el kmo: “Ng mlar ngii a tal merau el chad el mlar ngii a mesiungel el omtebechel a kloklel. Ng rirenges ngiil merau el chad el kmo a tebechelel a kloklel a di melengerenger a udoud, me ng milekedongii e oker er ngii el kmo, ‘Ng ngera ikal kurrenges el kirem? Mngai a record er a urerem el mei e ke merekong el tebechelel a kloklek.’” (Lukas 16:1, 2) Me a mastang a uldikii ngika el mesiou e le ngmle meterekakl a ududel a mastang er ngii. Ngkired el nguu a klubeled er tia el tekoi, e le ngdiak el  soad el mo beot a rengud er a ngerachel el mloterekokl er kid.

NGUNGIL A DOMEKESIU ER KID ER A REBEBIL?

18. Ngera me ngdiak el ungil a domekesiu er kid er a rebebil?

¹⁸ Ngungil a di lekid el oker el kmo, ‘Ngua ngera osengek el kirel a omesiungek?’ Ngmo uchul a mondai sel domekesiu er kid er a rebebil, e a Biblia a mellach er kid el kmo: “Ma ta ma tar a chad di le ngii el merriter a urerel, me ng ngar ngii a ungil el le rirellii e bo lungil a rengul, e lak lomekesiu a urerel er a urerel a kuk tar a chad.” (Galatia 6:4) Me ngbai ungil a dolatk aike el sebeched el remuul e lak domekesiu er kid er aike el sebechir a rechad el meruul. E tia mo omekerreu er kid me ngdiak bo lekedidai a rengud me a lechub e bo lemechitechut a rengud. Lak dobes el kmo ngsebechel el mo mengodech a blekerdelel a klengar er kid, alta kede mo smecher, mo chuodel, me a lechub e ngmo er ngii a kuk bebil el ngerecheled el uchul me ngmo diak el sebeched el meruul aike el durruul er a ngar er a mong. Me a lechub e ngkuk mo er ngii a techelled el remuul a betok er chelechang. A lsekum e ngmo uaisei, e ngungil a dolasem el menglou er a omesiunged.

19. Ngera uchul me ngdiak el kirel mo mechitechut a rengud a lsekum ngdiak denguu a techall er a omesiou?

¹⁹ A ta er a tekoi el kired el melatk er ngii a ngerachel el dolab er chelechang me a lechub e kede oureng el mo meruul. El ua odam el oureng el mo mesiou el ta er a remechuodel er a ongdibel me a lechub e ngmo oltobed a cheldecheduch er aike el meklou el ongdibel. Ngungil el tekoi a dolasem el oureor el kirel a chouaika el techall engdi ngdiak el kired el mo mechitechut a rengud a lsekum ngdiak lemutaut a urunguled. A lebebil er a taem e ngdiak el sebeched el ngmai aika el techall er chelechang engdi ngsebeched el mo ngmai a techelled er a uriul er a betok el rak. El ua Moses el ulemdasu el kmo ngmla mo kltmokl el omekrael er a rechad er a Israel el tuobed er a Ekipten engdi ngmle kirel el mengiil el 40 el rak. Tiang a milsa techellel el mo omekeroul a blekeradel el uluusbech el mo omekrael er a remekedidai a rengrir el chad.​—Rellir 7:22-​25, 30-​34.

20. Ngera kede suubii er a tekoi el dilubech el mo er a Jonathan?

²⁰ A lebebil er a taem e ngdiak el sebeched el ngmai a ileakl el techall er a omesiou. E tiang a dilubech el mo er a Jonathan, el ngelekel a King el Saul, me ngmla er ngii a techellel el mo king er a Israel. Engdi a Dios a ngileltii a kekerei el chad el David el mo king. Ngmlo ua ngerang a osengel a Jonathan? Ngkilengei er tia el tekoi e dirrek el ullengeseu er a David el mo lmuut er a bo locherur a kodall. Ngdilu er a David el kmo: “Kau a mo king er a Israel e ngak a mo ongingim.” (1 Samuel 23:17) Me ngsebeched el mesang el kmo a Jonathan a dimlak leua demal el mlo mechechei er a David e bai kilengei er tia el tekoi. Me kid el rokui bo leblak a rengud el meruul a ngerachel el mla moterekokl er kid e lak demechechei er a rebebil. Kede ungil el medengei el kmo ngar er a chelsel a beches el beluulechad, e a Jehovah a mo omekngeltengat er a remesiungel el kirel a urungulir.

21. Ngua ngera osenged el kirel a omesiunged?

²¹ Me ngdiak el belkul a kmo kid el blak a rengud el mesiou a chuarm a ringel me a klengiterreng. Kede bai dmeu a rengud er a ileakl el techall el mla moterekokl er kid, me kede meruul er tia el ureor er a berkel a klumech er a ungil chais el di kmedu el mo merek. Me sel doruul er tia el ngerachel el mla moterekokl er kid e nguchul a deuil a rengud. Me bo leblak a rengud el mesiou e dongreos er tia el techelled er omesiou el mo er ngike el Kot el Ngarbab el merreder er a eanged me a chutem.

[Aike el Ker er a Suobel]

[Aike el siasing el ngar er a 20 el llel]

Bo leblak a rengud el meruul a ngerecheled