1, 2. (a) Ngera el blekeradel a ngosukid el mo outekangel a omelsemai? (b) Ngerang a klaumerang? Mosaod.

 A OMESIUNGED el mo er a Jehovah a uchul a deurreng er kid. Engdi a lebebil er a taem e kede mo chelebangel a ringel er a klechad e dirrek el ‘mo chuarm e le kede meruul a llemalt.’ (1 Pe. 3:14; 5:8, 9; 1 Ko. 10:13) Me kede ousbech er a klaumerang me a blekeu me bo el sebeched el outekangel a ngii di el omelsemai.

² Ngerang a klaumerang? A apostol el Paulus a milluches el kmo: “A chad el oumerang a kmal medengei a ikel tekoi el lolatk e mengiil, e ultebechel a uldesuel el kirel a ikel diak le moues.” (Heb. 11:1) A ta er a oidel a kmo: Sel doba klaumerang e ngdi ua sel lengar er ngii a uleketmokl el babilengel a chetemed. Me a klaumerang a rullid el mo ulterekokl a rengud el kirel a tekoi el diak desang. (The Simple English Bible) Me a lsekum e ngar er ngii a babilengel a chetemed e ngulterekokl a rengud el kmo kede ouklalo er sel chutem. Me ngdi osisiu, kid el oumerang el kmo a Dios a blechoel el oltaut a telbilel a uchul me ngulterekokl a rengud el kmo kede mo mesang a otutel a telbilel el ngar er a Biblia, e dirrek el ulterekokl a rengud el kirel a tekoi el diak el sebeched el omes er chelechang.

3, 4. (a) Ngerang a blekeu? (b) Ngera ta er a rolel e kede melisiich er a klaumerang er kid me a blekenged?

³ A ta er a dictionary a mesaod er a belkul a blekeu el kmo ngchad el mesisiich a klaumerang er ngii, uldesuel, me a rengul me ngsebechel el dechor el mtekangel a ringel me a odechelakl. (The New Interpreter’s Dictionary of the Bible) Me a lsekum kede oba blekeu e ngmo sebeched el outekangel a ngii di el ringel.​—Mk. 6:49, 50; 2 Ti. 1:7.

⁴ A klaumerang me a blekeu a ungil el blekeradel. Engdi kede mo mekerang a lsekum e ngesonges a klaumerang er kid me a blekenged? A Biblia a mesaod el  kirir a rebetok el chad el tir a ullecholt aika el ungil el blekeradel. Me a ta er a rolel e kede melisiich a klaumerang er kid me a blekenged a sel dosuub el kirel a omerellir.

5. Ngera nguluusbech er ngii a Josua el mo kutmeklii a ngerechelel?

⁵ Ka me dolatk er a tekoi el dilubech er a bekord el 3,500 el rak er a uchei. A Moses a mla mo 40 el rak el omekrael er a rechad er a Israel er a uriul er a Jehovah a lotebedeterir er a klsibai er a Ekipten. Me ngmla er a bebul a Rois el Nebo e omes er a Beluu er a Nglat e mlad er a bocha el 120 a rekil. Me ngike el mlo omtechei er ngii el Josua a mle chad el “mlukeek er a llomeserreng.” (Dut. 34:1-9) A rechad er a Israel a di kmedu el mo nguu a beluu er a Kanaan, me ngmle kirel a mengeteklir el Josua el ousbech er sel llomeserreng el mla er a Dios. Ngdirrek el mle kirel el oumerang er a Jehovah me bo el mesisiich e loba blekeu.​—Dut. 31:22, 23.

6. (a) A Josua 23:6 ngmesaod el kmo kede ousbech er a blekeu el mo mekerang? (b) Ngera kede suubii er a Rellir 4:18-20 me a Rellir 5:29?

⁶ A llomeserreng, blekeu me a klaumerang er a Josua a kmal millisiich er a rechad er a Israel er sera loumekemad el melai er a beluu er a Kanaan. Ngmle kirir el mo bekeu er sel taem er a mekemad engdi te dirrek el uluusbech er a kuk ta er a rolel a blekeu el mo olengesenges er a Dios. Me ngar er a ulebongel el tekingel a Josua e ngdilu el kmo: “Isei e bo le blak a rengmiu el oltaut a ikel rokui el llechukl er a babier er a Llach er a Moses, el kele mtuchakl er a ngii di le tar ngii.” (Jos. 23:6) Kid me kede dirrek el ousbech er a blekeu el mo olengesenges er a Jehovah er a bek el taem. E tiang a uldimukl er aike el taem el rechad a orrimel er kid el mo meruul a tekoi el omtok er a Dios. (Monguiu er a Rellir 4:18-20; 5:29.) Me a Jehovah a mo meskid a blekenged a lsekum kede meluluuch e mo ultuil er Ngii.

7. Ngera mle kirel a Josua el meruul me bo el bekeu e le meduch el meruul a tekoi?

⁷ Ngkired el mo blak a rengud el mesuub e oltirakl a Tekingel a Dios a lsekum ngsoad el mo bekeu el meruul a soal. Aikakid a tekoi el meldung el mo er a Josua el ngii a mlo omtechei er a Moses el kmo: “Bo mesisiich, e bo bekeu, e bo le blak a rengum el churrungel a Llach el ike le bilskau a mesiungek el Moses. . . . Ng kmal diak le kirem el obes er a babier er a Llach. Ng kirem el mesuub er ngii er a llomes ma klebesei, e kerekikl el oltaut er a klengar er kau a bek el tekoi el llechukl er a chelsel. Isei e ng di mo ungilbesul a ikel rokui el moruul.” (Jos. 1:7, 8) Me a Josua a uleltirakl er tia el omellach e mlo ‘ungilbesul a ikel rokui el loruul.’ Me a doruul el uaisei e kede mo bekeu e mo ungil el rullii a omesiunged el mo er a Dios.

8. Ngerang a bades er a rak er a 2013, e ngmekerang e ngosukau?

⁸ Ngulterekokl a Josua el kmal mlo mesisiich a rengul er sera lerenges aika el tekingel a Jehovah el kmo: ‘Bo mesisiich e bekeu! Lak medakt ma lechub e le telirm a rengum ele ngak el Jehovah el Dios er kau a mo obengkem er a ikel bek el bor ngii.’ (Jos. 1:9) Me a Jehovah a dirrek el obengked, me ‘lak demedakt e louedikel a rengud’ sel bo dechelebangel  a omelsemai. E bai dolatk er a tekoi el kmo: ‘Bo mesisiich e bekeu! . . . Ele ngak el Jehovah el Dios er kau a mo obengkem.’ Me tia el bades er a Josua 1:9 a mla mengilt el mo bades er a rak er a 2013. Aika el tekoi me a lmuut el bebil el kerebai el kirel a klaumerang me a blekeu a mo melisiich er kid er a chelsel aika el merael el mei el buil.

9. Ngmilekerang a Rahab e ulechotii a klaumerang me a blekeu?

⁹ A Josua er a lodureklterir a reteru el ourabek el mo er a Kanaan, e a oteruul el dil el Rahab a ulemart er tir e milengeuid er a recherrouir. Me sel klaumerang me a blekengel a mlo uchul e ngsilobel ngii me a rechad er a blil er sera letemellii a beluu er a Jeriko a rechad er a Israel. (Heb. 11:30, 31; Jak. 2:25) Me a Rahab a ngildechii a rolel a klengar er ngii me bo el loldeu er a rengul a Jehovah. Me a rebebil el mlo Kristiano a dirrek el uaisei el mlo oumerang me te mlo mesisiich e bekeu e ngmodech a rolel a klengar er tir me bo loldeu er a rengul a Dios.

10. Ngmilekerang a Ruth e mo dechor el kirel a mera el omengull? E tia ngmlo uchul a ngera el klengeltengat?

¹⁰ A uriul er a lemad a Josua e a melakl dil er a Moab el Ruth a dirrek el mle bekeu el dechor el kirel a mera el omengull. Ngii el mle bechil a chad er a Israel a uchul me ngmla er ngii a telkib el klemedengei er ngii el kirel a Jehovah. A delal a bechil el Naomi el kiliei er a Moab a millukl el mo er a Bethlehem er a beluu er a Israel. Me ngar er a omerollir e a Naomi a dilu er a Ruth me lluut el mo er a rechedal engdi a Ruth a dilu el kmo: “Lak moldurech er ngak me kungoit er kau; e lak molekebai er ngak a kubengkem! . . . A re chad er a beluam a mo chedak; ma Dios er kau a mo Dios er ngak.” (Rut. 1:16) Me a Ruth a ultaut a tekingel, e mlo bechil a chedal a Naomi el Boas e milechellii a ngelekel el sechal. Me ngmlo ta er a uldidellel a rasech er a David me a Jesus. Me nguaisei, a Jehovah a omekngeltengat er a rechad el olecholt er a klaumerang me a blekeu.​—Rut. 2:12; 4:17-22; Mt. 1:1-6.

11. Ngmilekerang a Jehoiada me a Jehoseba e ochotii a blekeu? E tia ngmlo uchul a ngerang?

¹¹ A klaumerang er kid me a blekenged a lmuut el mo mesisiich sel dodengei el kmo a Dios a obengterir tirke el diak lolatk er a di tir e bai meruul a soal e kerekikl er a rudam me a rudos er tir. Ka molatk er a omerellel a Ngarbab el Prist el Jehoiada me a bechil el Jehoseba. A uriul er a lemad a King el Ahasia e a delal el Atalia a milekodeterir a rengelekel e di mle ngii el rullii el mo kuin. Engdi a Jehoiada me a Jehoseba a mlo ocherur a kodall el omart er a di ta el mlo medechel el ngelekel a Ahasia el Joas el elolem el rak. Me ngar sel ongeuid el rak e a Jehoiada a rirellii a Joas el mo king e milekodir a Atalia. (2 Ki. 11:1-16) E a uriul e a Jehoiada a ngilsuir a King el Joas el omekbeches er a templo. Me sera lemad a Jehoiada er a bo el 130 a rekil e ngmildakl el teloi er a reking “ele ng mle ungil a omerellel el mor a beluu er a Israel, e ungil omerellel el mor a Dios ma Templo.” (2 Kr. 24:15, 16) Me a blekengel a Jehoiada me a bechil a mlo uchul e ngmillemolem a klengelakel er a David el mo er a Messias.

12. A blekeu, ngrirellii a Ebedmelek el mo mekerang?

¹² A Ebedmelek el mle ngarbab el mesiou er a blil a King el Sedekia, a mlo ocherur a kodall el kirel a klengar er a Jeremia. A re ofiser er a Juda a ultelecheklii a Jeremia er a mekngit el omeruul me a king a milechititerir me te orbetii er a chelsel a chido me lemad. (Jer. 38:4-6) Me a Ebedmelek a tilbir el mo omes er a King el Sedekia e le ngmle soal el olsobel er a Jeremia, engdi te betok a uluuketui er a Jeremia me tia el omeruul a kmal mle kdekudel. Me a Sedekia a kilengei er a ongtil e uldureklterir a re 30 el chad el obengkel el mo  olsobel er a Jeremia. Me a Dios a dilu er a Jeremia me lesbedii a Ebedmelek el kmo ngmo suobel er sel taem el Babilon a mo odelecheklii a Jerusalem. (Jer. 39:15-18) Me a blekeu el ngar er a Dios el mei a mo uchul a klengeltengat.

13. Ngmle ua ngerang a blekengir tirke el tedei el buik? E ngera el klungiaol a dengai er a tekoi el dilubech?

¹³ Bekord el 600 el rak er a uchei er a Kristus, e a retedei el buik er a Israel el milsiou er a Jehovah a mlukngeltengat e le tir el ullecholt a klaumerang me a blekeu. A King el Nebukadnesar a milengudel er a rengarbab el chad er a Babilon e milengelechel er tir el mo mengull er a klou el bleob el chaus el rruul er a kolt. E ngike el chad el diak lekengei el mengull er ngii a mo medul er a ngau. Tirka el buik a dilu er a Nebukadnesar el kmo: “A Dios el ngikel kimosiou er ngii a sebechel el osebelemam er a ngeuil a stob ma klisichem, me ng mo osebelemam. Ngdi lsekum ng diak losebelemam, e bo modengei kau el kuoll el kmo ng diak ki bo mongull er a chedum, ma ka ki bo mosus er a bleob el kolt el mtileketekii.” (Dan. 3:16-18) Me a mengasireng el osobelir tirka el buik a bleketakl a omesodel el ngar er a Daniel 3:19-30. Me alta e ngdiak bo demedul er a ngau engdi kede medengei el kmo ngmo measem a blakerreng er kid. Me a Dios a mo omekngeltengat er kid a lsekum kede olecholt a klaumerang me a blekeu.

14. A doltirakl er a Daniel 6 el bliongel, e ngmilekerang a Daniel e ochotii a blekeu? E ngera dilubech?

¹⁴ A Daniel a ulechotii a klaumerang me a blekeu er sel taem el recherrouel a mlo mengeluch er a King el Darius er a Midia me lerellii a llach el kmo: “A chelsel okedel klebesei e ng diak el subed er a ngii di le chad el meluluuch el olengit a ngii di le ngerang er a ngii di le chelid ma lechub e ng chad el diak le kau el kuoll. E ngikel tomellii tial llach bo lobidokl er a chelsel a blil a laion.” Me a Daniel er a lerengesii tia el tekoi e ngmlo er a blil e mlo outubuach “er bita er a belkais el mado e meluluuch el mor a Dios el edei er a tal sils el di ua blekerdelel er a bek el sils.” (Dan. 6:6-10) Me a bekeu el Daniel a ulebidokl er a blil a laion engdi a Jehovah a ulsebelii.​—Dan. 6:16-23.

15. (a) Ngua ngera el klaumerang me a blekeu a lulechotii a Akuila me a Prisila? (b) Ngera belkul a tekingel a Jesus el ngar er a Johanes 13:34, e ngera el rolel a bltikerreng a lolecholt er ngii a rebetok el Kristiano?

¹⁵ A Biblia a melekoi el kmo a Akuila me a Prisila a mlo ocherur a kodall el kirel a Paulus. (Rel. 18:2; Rom 16:3, 4) Te mle bekeu el oltirakl er a tekingel a Jesus el kmo: “Mak meskemiu a beches el llach el kmo, bo mkaubltikerreng. Ng kiriu el kaubltikerreng el ua ngak a kuubltikerreng el ekor kemiu.” (Jn. 13:34) A Llach er a Moses a milengelechel  er a chad el mo betik a rengul er a ngar bita er ngii el ua lebetik a rengul er a di ngii. (Lev. 19:18) E a llechul a Jesus a mle “beches” el omesodel a bltikerreng el chad a mo mad el kirir a rebebil el ua omeruul el lerirellii. Me a rebetok el Kristiano a ulechotii tiaikid el rolel a bltikerreng el mlo ocherur a kodall el omekerreu er a rudam er tir me lak lemukcharm me a lechub e lomekoad er tir a recherrouir.​—Monguiu er a 1 Johanes 3:16.

16, 17. Ngmilekerang e measem a klaumerang er a Rekristiano er a irechar? E milekerang e measem a klaumerang er a rebebil el Kristiano er chelechang?

¹⁶ A rekot el Kristiano a di ua Jesus el milengull er a di ta el Jehovah. (Mt. 4:8-10) Te dimlak lekengei el mo melul a ochod el mengull er a emperor er a Rom. (Momes er a siasing.) A Daniel P. Mannix a milsaod el ngar er a babilengel el Those About to Die el kmo, ngmla er ngii a olengetongel el ngar sel basio el di kmard a ngau er ngii. Ngdmu el kmo a kelebus el soal el mo mimokl a di mo mriid a sesei el ochod er a chelsel a ngau e te msang a babilengel e ngmo mimokl. Te smodii el mo er ngii el kmo tia el omeruul a diak lebelkul a kmo ngmo mengull er a emperor. Ngbai olechotel a kmo ngkongei el kmo a emperor er a Rom a chelid. Te di mle mekesai el Kristiano a kilengei el mo meruul er tia el tekoi.

¹⁷ A Rekristiano el mlo kelebus er a Nazi a mla er ngii a techellir el mo mimokl e diak el mad. Ngdi ngmle kirir el saing er a babier el ochotii el kmo te mla mo diak longull er a Jehovah. Me te di mle kesai a mle saing er tia el babier. A Resioning el chad er a Tutsi me a Hutu a mlo ocherur a kodall el omekerreu er a rudam er tir er a mekemad el mla er ngii er a Rwanda. Me a rechedal a Dios a dirrek el ousbech a blekeu me a klaumerang er a chelsel a chouaika el taem.

18, 19. Ngera el kerebai er a klaumerang me a blekeu a ngosukid el mo ungil el omerk er a klumech?

¹⁸ Kid a oba ileakl el techall el mo ouchais el kirel a Rengedel a Dios e meruul er a remo disaiplo, e tiang a kot el klou el ureor el Dios a mla mesterir a remesiungel el ngar er a chutem. (Mt. 24:14; 28:19, 20) Kede oba omereng el saul el kirel a cherrungel el kerebil a Jesus, el “mirrael el mor a meklou ma mekekerel beluu el olisechakl a Ungil Klumech el kirel a Rengedel a Dios.” (Lk. 8:1) Me kid a di uai ngii el kired el oba klaumerang me a blekeu el omerk er a klumech el kirel a Renged. Me ngokiu a ngelsuil a Dios e kede mo bekeu el ua Noah, el ngii a ‘ulemerk ra llemalt’ er a chelsel a “diak loluu ra Dios el belulechad” el ngilemed er a Ieleb.​—2 Pe. 2:4, 5, BT.

¹⁹ A nglunguuch a ngosukid er a urered er a berkel a klumech. A rebebil el disaiplo er a Jesus el tir a mlodechelakl a milluluuch el olengit er a blekeu ‘me bo lak le medakt el omerk a tekingel a Dios,’ me a nglunguchir a mlonger. (Monguiu er a Rellir 4:29-31.) Me a lsekum ke dirk medakt el oldingel a obliil, e moluluuch el mo er a Jehovah me lebeskau a klaumerang me a blekeu.​—Monguiu er a Psalm 66:19, 20. *

20. Ngera el ngeso a denguu kid el mesiungel a Jehovah?

²⁰ Ngdiak el beot el tekoi a dosiou er a Dios er a chelsel tia el meringel el beluulechad. Engdi ngdiak di lekid el tang, e le Dios a obengked. Me a Ngelekel el Bdelul a ongdibel a dirrek el olengeseu er kid. E dirrek el ngar er ngii a betok er a 7,000,000 el Sioning er a Jehovah el meliuekl er a beluulechad el teloi er kid. Me bo dolemolem el olecholt er a klaumerang e domerk er a ungil chais. E denguu a omelisiich el kirel a urered er sel mo bades er kid er a rak er a 2013 el kmo: ‘Bo mesisiich e bekeu! . . . Ele ngak el Jehovah el Dios er kau a mo obengkem.’​—Jos. 1:9.