1, 2. Ngera el mekemad a kmedu el mo er ngii? E kid kede mo teloi er ngii?

 SERA October 30, 1938, e a rebetok el miliol el chad er a Merikel a ulerrenges er a razio. Ngar sel prokuram, e a rechad el leko te ouchais a chais a ultebedii a subed el kmo a re aliens er sel planet er a Mars a mla me er a Beluulechad e mocha melemall er ngii. Me alta e te milsubed er a rechad er a uchei el kmo a prokuram a di cheldecheduch, engdi a rebebil el ulerrenges er ngii a dirk ulemdasu el kmo a mera el mekemad a toutang me te kmal mlo medakt. A rebebil er tir a dirrek el milengetmokl er tir el kirel a chiis.

² Ngdi kmedung e a mera el mekemad a mo er ngii. Engdi a ruumesingd el chad a diak longetmokl er tir el kirel. Tiang a mekemad er a Armakedon, el mekemedil a Dios el mo olekngemed er tia el mekngit el beluulechad. Tiang a diak di le cheldecheduch e lemerekong, e le Dios a mla subedid el okiu a Tekingel el Biblia. (Och. 16:14-16) Ngdiak bo deteloi er tia el mekemad. A Jehovah a bai mo ousbech er a klisichel el olsobel er kid el okiu a mengasireng el rolel.

3. Kede mo mesuub er a ngera el ulaoch? Ngera uchul me tiang a klou a ultutelel el kired er chelechang?

³ A ulaoch el ngar er a 14 el bliongel er a Sekaria a mesaod a betok el tekoi el kirel a mekemad er a Armakedon. Me alta e ngmilluches er a bekord el 2,500 el rak er a mla me mong, engdi tia el ulaoch a kmal klou a ultutelel el kired. (Rom 15:4) Ngmesaod a tekoi el dilubech el mo er a rechedal a Dios er sera lomuchel el mengedereder er a eanged a Kristus er a rak er a 1914 el me er chelechang. Ngdirrek el ouchais a ungil el tekoi el kmedu el mo er ngii. Tia el ulaoch a mesaod el kirel a “klou el dellas” me a “di ngar el ralm.” (Sek. 14:4, 8) Ngar tia el suobel, e kede mo medengelii a belkul  tia el dellas me sel rolel e ngsebechir a remengull er a Jehovah el mo mukerreu er a chelsel. Kede dirrek el mo suubii a belkul a di ngar el ralm me sel rolel e kede ngmai a klungioled er ngii. Me kede mo medengei el kmo ngkired el melim er tia el ralm e dirrek el mo soad el melim er ngii. Me bo dekerekikl el omtab er tia el ulaoch.​—2 Pe. 1:19, 20.

4. (a) Ngoingerang e ngulemuchel a “sils er a RUBAK”? (b) A rengellitel el Kristiano ngera te uluuchais er a betok el rak er a uchei er a 1914? E mle ua ngera omerellir a remengeteklel a balatiks me a klechelid?

⁴ A ulaoch el ngar er a 14 el bliongel er a Sekaria a omuchel el melekoi el kirel a “sils er a RUBAK.” (Monguiu er a Sekaria 14: 1, 2.) Me tiang sils er a ngerang? Tiang a di ua sel “sils er a Rubak” el ulemuchel er a rak er a 1914 er sel taem el Jesus a mlo King er a Rengedel a Dios el ngar er a eanged. (Och. 1:10; 11:15) A rengellitel el Kristiano a mle betok el rak el ouchais el kmo a “ulebengelel a omerrederir” a Rechisentael a mo er ngii er a rak er a 1914. Te dirrek el uluuchais el kmo ngar er seikid el taem el mong e nglmuut el mo betok a ringel er a beluulechad. (Lk. 21:24) A Rechisentael te mle kerekikl el orrenges er tia el uleklatk? Ngdiak, a remengeteklel a balatiks me a klechelid a bai millenguul e uleldechelakl er tirke el Kristiano. Me omerellir tirka el merreder a bai millenguul er a Dios el Olab a Bek el Klisiich, e le rengellitel el Kristiano a omtechei er a Rengedel a Dios.​—Heb. 12:22, 28.

5, 6. (a) Ngera te mirruul a recherrouir a rechedal a Dios? (b) Te rua techang a millemolem el “kiei er a Jerusalem”?

⁵ A Sekaria a ulemlaoch el kirel a omerellir a recherrouir a rechedal a Dios er a ledu el kmo: “A Jerusalem a mo mengai.” Me tia el Jerusalem a omtechei er a Rengedel a Dios, me a rengellitel el Kristiano el ngar er a chutem a chedal tia el Renged. (Fil. 3:20) A Jerusalem a ‘mlengai’ er a Kot el Mekemedil a Beluulechad er sel taem el tirke el odam el ullab a meklou el ngerachel er a cheldebechelel a Jehovah a mludechem e mlekelebus er a beluu er a Atlanta, Georgia, U.S.A. Me a ‘blai a milengai a klalo er ngii’ er sel taem el recherraro a mle mekngit a omerellir el mo er a rengellitel el Kristiano e ulemekcharm er tir. Te dirrek el milerrob a omerusel a babilengir e millasem el merrob er a urerir el omerk er a klumech.

⁶ Me alta e a remesisiich el cheraro a uleldechelakl er a rechedal a Dios e millekoi a blulak el tekoi el kirir, engdi ngdimlak el sebechir el tomellii a mera el omengull. Te mla er ngii a rengellitel el Kristiano el millemolem el blak a rengrir. Me tirka tirke el millemolem el “kiei er a Jerusalem” el ua ledilung a Sekaria.

7. Ngera el kerebai a bla leketmokl a rengellitel el Kristiano el kired?

⁷ A recherrouir a rechedal a Dios ngmlo diak loldechelakl er tir er sera bo lemerek a Kot el Mekemedil a Beluulechad? Ngdiak, sel odechelakl el lulemlaoch er ngii a Sekaria a millemolem. (Och. 12:17) El ua tiang, a rudam er kid a dirrek el mlodechelakl er sel taem er a Ongeru el Mekemedil a Beluulechad. Me a blakerreng er a rengellitel el Kristiano a melisiich er kid er chelechang el mo outekangel a ngii di el omelsemai el bo decharm er ngii. Me aikang a uldimukl er ngii a odechelakl el ngar er a blid, ngar er a urered, me a ngar er a skuul el mla er tirke el melenguul er kid el kirel a klaumerang er kid. (1 Pe. 1:6, 7) Me a ngii di leker el dekiei er ngii, e me dolemolem el blak a rengud e lak demedakt er tirke el omtok er kid. (Fil. 1:27, 28) Engdi kede mekerang e mo selebechakl  er a chelsel a beluulechad el ouketui er kid?​—Jn. 15:17-19.

8. (a) A lebebil er a taem e a rois el ngar er a Biblia ngomtechei a ngerang? (b) Ngomtechei er a ngerang a “Rois er Olib”?

⁸ Kede mla suubii el ngar tia el ulaoch el kmo a Jerusalem a omtechei er a Rengedel a Dios. Me sel “Rois er Olib el ongos er a Jerusalem,” ngomtechei er a ngerang? E mekerang e tia el rois e mo obii “el mo teblong”? Ngar er a tekoi er a Hebru e a Jehovah a omekedong er aika el teblo el rois el kmo “rois er ngak.” E ngera uchul? (Monguiu er a Sekaria 14:3-5.) Ngar er a Biblia, e a lebebil er a taem e a rois a omtechei a renged me a lechub a kabelment. Me a Biblia a blechoel el melekoi el kmo a klengeltengat me a ulekerreu a mei el okiu a rois er a Dios. (Psa. 72:3; Isa. 25:6, 7) Me a Rois er Olib a omtechei er a omengederederel a Jehovah er a eanged me a chutem.

9. Ngera belkul a lobii a Rois er Olib “el mo teblong”?

⁹ A ulaoch a melekoi el kmo sel Rois er Olib a mo obii “el mo teblong.” Me tiang ngera belkul? Ngbelkul a kmo a Jehovah a toketekii a ongeru el dereder, el ngii a Rengedel a Messias el longedereder er ngii a Jesus Kristus. Aika el eru el dereder a kloklel a Jehovah a uchul me ngomekedong aika el eru el rois el kmo “rois er ngak.”​—Sek. 14:4, NW.

10. Ngomtechei er a ngerang sel “klou el dellas” el ngar a delongelel aike el teblo el rois?

¹⁰ A ulaoch a mesaod el kmo sel lobii a Rois er Olib el mo teblong, el bita er ngii a mo bedul a diluches me a bitang a mo bedul a dimes, e a Jehovah a mo dechor er bebul aika el teblo el rois. Me ngmeteketek a “klou el dellas” er cheungel ochil a Jehovah. Me ngngera tia el dellas? Tiang a omtechei er a ulekerreuil a Dios. Me ngdi ua rechad el mukerreu er a chelsel a dellas er a delongelel a teblo el rois, e a remesiungel a Jehovah a selebechakl er cheungel a omengederederel me a omengederederel a Ngelekel. A Jehovah a kmal diak lekengei me lemetemall a bliochel el omengull. Ngoingerang e a Rois er Olib a ulebii? Ngulebii er sel rak er a 1914 er sera lomuchel a Jesus el mengedereder el ngar er a eanged. Me a rechedal a Jehovah te ulemuchel el chemiis el mo er tia el “klou el dellas” er oingerang?

11, 12. (a) Ngoingerang e a rechedal a Dios a ulemuchel el chemiis el mo er a dellas? (b) Ngera ochotii el kmo a Jehovah a omekerreu er a rechedal?

¹¹ A Jesus a ulemeklatk er a rubengkel el kmo: A “rokui el chad a mo ouketui er kemiu el ngak a uchul.” (Mt. 24:9) Tia el kltui a liluut el mo mesisiich er sera rak er a 1914 el mei, er sel taem er a lomuchel a uriul sils. Sel taem er a Kot el Mekemedil a Beluulechad e a recherraro a mle meringel el oldechelakl er a reblak a rengrir el ngellitel el Kristiano, engdi ngdimlak el sebechir el tomellii a bliochel el omengull. Ngar er sel rak er a 1919 e a rechedal a Dios a mlo mimokl er a Kloul Babilon, el ngii a klsuul el klechelid. (Och. 11:11, 12) * Ngar er tiaikid el rak e a rechedal a Dios a ulemuchel el chemiis el mo er a dellas.

¹² Sera rak er a 1919 el mei, e a Jehovah a millemolem el omekerreu er a rechedal el ngar er a bek el beluu. Me a klteketel a rak e a betok el kabelment a millasem el merrob er a Resioning er a Jehovah me lak lolisechakl me a lechub e te merrob a omerusel a babilengir. E tiang a melemolem el uaisei el ngar er a bebil er a beluu. Engdi a Jehovah a dirkak lekengei aika el  kabelment me letemellii a bliochel el omengull. Me a ngii di lengerang el loruul a kabelment el omtok, e a Jehovah a melemolem el ousbech er sel klou el klisichel el omekerreu er a rechedal.​—Dut. 11:2.

13. Kede mekerang e melemolem el kiei er sel dellas er a ulekerreuil a Jehovah? Ngera uchul me chelechang e ngkmal kired el kiei er a chelsel tia el dellas?

¹³ Me a lsekum kede melemolem el blak a rengud el mo er a Jehovah, e kede kiei er a chelsel a dellas er a ulekerreu. E ngii me a Ngelekel a kmal diak lekengei er a ngii di el chad me a lechub a ngii di lengerang me le cheridid er a ulekerreu er tir. (Jn. 10:28, 29) A Jehovah a meskid a rokui el ngeso el dousbech el ngosukid el melemolem el blak a rengud el kirel a omengederederel me a omengederederel a Ngelekel. Me kede kmal mo ousbech er a ngelsuil er a taem er a klou el ringel el di kmedu el mei. Me chelechang e ngkmal kired el kiei er sel dellas er a ulekerreuil a Jehovah.

14, 15. Ngera mo duubech el mo er tirke el diak loba ulekerreuil a Jehovah er sel sils el bo loumekemad er a recherrouel?

¹⁴ Me chelechang el mo er sel ulebengelel tia el mekngit el beluulechad, e a Satan a lmuut el mo meringel el oldechelakl er a rechedal a Dios. Engdi ngdi kmedung el mei sel ulebongel el odelecheklel a Satan. Ngar er seikid el sils, e a Jehovah a mo oumekemad e okngemedeterir a rokui el cherrouir a rechedal el ua lulemlaoch a Sekaria. Tia el mekemad a lmuut el mo meketeklii el kmo ngua techa el Dios er a Mekemad a Jehovah.​—Sek. 14:3.

¹⁵ Ngera mo duubech el mo er tirke el diak loba ulekerreuil a Jehovah er sel sils el bo loumekemad er a recherrouel? A Sekaria 14:6 a kmo: “Sel sils a lemei, e ngmo diak a llomes e a rokui el tekoi a mo medecherecher.” (NW) A ulaoch a kmo “ngmo diak a llomes,” el belkul a kmo ngmo diak lenguu a kengei er a Dios. A ulaoch a melemolem el kmo, “a uos, ma mule, ma kiamo, ma donkey, ma ngii di le charm” a mo “medecherecher.” Tia belkul a kmo a mesil me a klekedall er a mekemad a mo diak loureor. A Sekaria a melekoi el kmo, a Jehovah a mo omals er a recherrouel el oba “kdekudel rakt.” A chelsul a mederir me a chururir a “mo mechut.” Ngdiak dodengei el kmo tiang mera el rakt, engdi kede medengei el kmo ngmo diak el sebechir el melemall er kid me a lechub e lolekoi el omtok er a Dios. (Sek. 14:7, 12, 15.) A rokui el “king er a beluulchad ma re soldau er tir” a mo obengkel a Satan el oumekemad. Me alta e te ngar er a kakerous el beluu, engdi te rokui el di mo nguemed. (Och. 19:19-21) “Isel sils e tirkel lokodeterir a RUBAK a di mo berriid a cheklechir er a bital beluulchad el mor a bitang.”​—Jer. 25:32, 33.

16. Ngkired el di kid el oker er kid a ngera el ker? Ngkired el mo mekerang er sel taem er a klou el ringel?

¹⁶ A rokui el chad a mo chuarm er a mekemad el uldimukl er tirke el mo kats. Me kid a locha dirrek el mo chuarm er a taem er a klou el ringel. Nglocha mo diak a keled, e oriid a betok el klokled e dirrek el mo diak a llemelted el ua llemelted er chelechang. Me kede mo mekerang a lsekum kede mo chuarm a chouaika el tekoi? Kede mo bekikl? Ngmo diak a omeltked e mo mechitechut a rengud? Ngmo diak dosiou er a Jehovah? Ngar er sel taem er a klou el ringel e ngkmal kired el kiei er tia el dellas er a ulekerreu, el oeak sel dolemolem el blak a rengud el mo er a Jehovah e doumerang el kmo ngmo omekerreu er kid.​—Monguiu er a Habakuk 3:17, 18.

17, 18. (a) Ngerang a “di ngar el ralm”? (b) Ngomtechei er a ngerang a “Ulekoad el Daob” me a daob er a “Mediteranea”? (c) Ngsoad el mo blechoel el mekerang?

¹⁷ A uriul er a Armakedon e “a di ngar el ralm a mo omaoch” el okiu a Rengedel a Kristus. Tia el “di ngar el ralm” a omtechei a rokui el tekoi el Dios a mesterir a rechad me ngsebechir el kiei el mo cherechar. Me ngar er a ulochel a Sekaria e a “Ulekoad el Daob” a omtechei er tirke el ulekoad el chad. E a daob er a “Mediteranea,” a omtechei er a “kloul seked” el tir a mo suobel er a Armakedon. (Monguiu er a Sekaria 14:8, 9; Och. 7:9-15) Aika el eru el cheldebechel er a rechad a mo melim er a “di ngar el ralm” el omaoch er sel “omoachel er a ralm er a klengar.” E seikid, e a rechad el rokui a mo mecherrungel e mo kiei el mo cherechar.​—Och. 22:1, 2.

¹⁸ Sel lokngemedii tia el mekngit el blekeradel er a beluulechad a Jehovah, e ngmo omekerreu er kid e ngoikid el osisebid er a melemalt e beches el beluulechad. Me alta e a rokui el renged er tia el beluulechad a ouketui er kid, engdi kede mla tibir el mo blak a rengud el kirel a Rengedel a Dios e melemolem el kiei er a chelsel a dellas er a ulekerreuil a Jehovah.