Ak milechell er a Santo Domingo, Dominican Republic, e mle kot el kekerei er a reteua el ngalek. A demak me a delak a mla er ngii a skulir e mle sorir a lungil a ulekerulam e ki mobengterir a remelemalt el chad. Eua el rak er a uchei er a kmechell, e a demak me a delak a mlo medengelterir a remissionari el chad er a Mormon. Te kmal mlo mechas a rengrir er a ungil el oketmeklir me a blekerdelir tirka el mekekerei el chad, me te tilbir el mo kot el telungalek er sel beluu el mo chad er a Church of Jesus Christ of Latter-day Saints, me a lechub e ng Ikelesia er a Mormon.

Me sera kurael el mo klou, e ak uleldeu a renguk er a tekoi el ki murruul er a ikelesia e dirrek el uleba omengull el kirel aike el tekoi el lolisiich el kirel a klengar er a telungalek me a tekoi er a kldung. Ngkmal mle dmeu a renguk el chad er a Mormon e mle soak el mo missionari er a ta er a klebesei.

Sera bo el 18 a rekik, e aki millukl el mo er a Merikel me bo el sebechek el lomelemii a skulek. A uriul er a ta el rak, e a merrengel a delak me a bechil el tir a Sioning er a Jehovah a mle oldingel er kemam er a Florida. Te uluuetkeu er kemam el obengterir el mo er a ta er a meklou el ongdibel er tir. Ngmera el mlo mechas a renguk e le rokui el chad el mla er bita er ngak a ulemes a bades e milluches a meklou a ultutelel el tekoi er a babilengir. Me ak ulengtir a ta er a oluches me a babier e mlo meruul er a osisiu el tekoi.

A uriul er tia el ongdibel e ngika el merrengel a delak me a bechil a dilu el kmo ngak el mle soak el mo missionari a uchul e te mo ngosukak el mesuub el kirel a Biblia. Ak kilengei er tiang e le seikid el taem e a klemedengei er ngak er a Babier er a Mormon a kuk mle klou er a klemedengei er ngak er a Biblia.

Me a klteketel a taem el ki mchadecheduch er a dengua el mesaod er a Biblia, e ngika el merrengel a delak me a bechil a millisiich er ngak el mo omes el kmo a klaumerang er ngak ngoltirakl a osisechakl  er a Biblia me a lechub e ngdiak. Ngmle sorir a di lengak el mo medengelii a klemerang.

Ngmle betok a klaumerang er a Mormon el blo kuumerang engdi ngdimlak sal medengei el kmo aikang ngoltirakl er a Biblia me a lechub e ngdiak. Ngika el merrengel a delak a uldureklii el mei er ngak a November 8, 1995 el Awake! el mirruul er a Resioning er a Jehovah, el mla er ngii a bebil el suobel el milsaod er a klaumerang er a Mormon. Ngkmal mle mechas a renguk e le ngdimlak sal medengei a betok er ngii. Me seikid e ak mlo er sel ulterekokl el Web site er a Mormon el mo mesa el kmo aika el tekoi el ngar er a Awake! ngmle klemerang me a lechub e ngdiak. Aika el tekoi a mle klemerang e dirrek el mle sebechek el mes el kmo ngklemerang er sera kbo er aike el museum er a Mormon el ngar er a Utah.

Ak mle blechoel el oumerang el kmo a Babier er a Mormon me a Biblia a dimlak el ketouch a tekoi el losaod. Engdi sera bo kerekikl el menguiu er a Biblia, e ak miles a bebil el tekoi el mle ketouch er a delongelel a osisechakl er a Mormon me a Biblia.

Me ngobengkel aika el ketouch el osisechakl, e ngdirrek el mle mekngit a uldesuek el kirel aike el osisechakl er a Mormon el melisiich a tekoi er a beluu. El ua tiang, a rechad er a Mormon a olisechakl el kmo a sers er a Eden a mla er a Jackson County, Missouri, U.S.A. Me a remengeteklel a klechelid er ngii a melekoi el kmo a ta er a klebesei e a Dios a mo mengedereder er a beluulechad el rokir el okiu a kabelment er a Merikel.

Me seikid e ak mlo melatk er a osisecheklir el kirel aike el mo duubech el mo er a bebil er a beluu, el uai sel beluu el kmlechell er ngii. Ak milsaod er tia el tekoi er a ta el taem el obengkel a ta el kekerei el chad er a Mormon el milsuub el mo missionari. Ak uleker er ngii el kmo ngmo kongei el omekoad er a rekuk bebil er a Mormon a lsekum a belual a uluumekemad er a belurir, e ngdilu el kmo choi. Me ak liluut el mo merriter a osisecheklel a klechelid er ngak e dirrek el uleker a ker er a rebebil el mengeteklel a Ikelesia er a Mormon. Te dilu er ngak el kmo a nger er a kerik a dimlak el bleketakl a omesodel, e a ta er a klebesei e ngmo obeketakl.

Ngdimlak el soak a omesodir, me ngdi mle ngak el merriter er a uchul me ngsoak el mo missionari er a Mormon. Ak mlo medengei el kmo a ta er a uchul tiang a ngak el mle soak el olengeseu er a rebebil. A lmuut el ta er a uchul a soak a rechad a bo lolecholt a omengull el mei er ngak. Nguaisei, engdi ngdimlak a kmal klemedengei er ngak el kirel a Dios. Me alta ngmle betok el taem el kulemes er a Biblia, engdi ngdimlak kumes er ngii el ua lemekreos el babier. Ngdirrek el dimlak kudengelii a moktek er a Dios el kirel tia el chutem me a lechub a klechad.

Ngoeak a omesubek er a Biblia el obengterir a Resioning er a Jehovah, e ak silubii a ngklel a Dios, me aike el duubech el mei er kid sel demad, me a deruchellel a Jesus er a otutel a moktek er a Dios. Ngmlo sebechek el mo ungil medengelii tia el kmal ungil el babier, e dirrek el mle dmeu a renguk el ouchais aike el klemerang el ksiluub el mo er a rebebil. Ak mle medengei el kmo ngmla er ngii a Dios, engdi chelechang e ngsebechek el mengedecheduch er ngii el okiu a nglunguuch el ua kmal kmeed el Sechelik. Ak miltecholb el ta er a Sioning er a Jehovah er a July 12, 2004, e a uriul er a elolem el buil e ak mlo soiseb er a mui el taem el omesiou.

Ak uluureor er sel klou el obis er a Resioning er a Jehovah el ngar er a Brooklyn, New York el eim el rak. Ngkmal mle dmeu a renguk el olengeseu el meruul e oltobed a Biblia me aike el babier el mlengai er a Biblia, el betok el miliol el chad a ngmai a klungiolir er ngii. Chelecha el taem, e ak dirk oldeu a renguk el olengeseu er a rebebil el mesuub el kirel a Dios.