1, 2. Ngerang a klekakerous er a uldesuel a oumesingd el klechelid me a Resioning er a Jehovah el kirel a ngklel a Dios?

 A OUMESINGD el klechelid el leko te Kristiano a diak lousbech er a ngklel a Dios. El ua tiang, ngar er a uchelel sel Revised Standard Version el Biblia el tekoi er a Merikel e ngmelekoi el kmo “ngkmal mekull” a domekedong er a Dios el ousbech er a ngklel.

² Engdi kid a Resioning er a Jehovah a kmal dmeu a rengud el oba tia el ngakl e dirrek el mengebkall er ngii. (Monguiu er a Psalm 86:12; Isaia 43:10.) Ngdirrek el kmal dmeu a rengud el medengelii a belkul a ngklel a Dios me sel klungel a ultutelel e ngkirel ngii el ngakl el mo chedaol. (Mt. 6:9) Me bo dosaod a edei el meklou a ultutelel el ker el sebechel el omeklatk er kid el kmo ngkmal klou a techelled el mo medengelii a Jehovah. Aika el ker a kmo: Ngera belkul a bo dodengelii a ngklel a Dios? Ngmekerang a Jehovah e mla ochotii el kmo ng rredemelel tia el ngklel? E kede mekerang e mo “merael el oba ngklel a Jehovah”?

3. Ngera belkul a bo dodengelii a ngklel a Dios?

³ A bo dodengelii a ngklel a Dios e nglmuut el klou a belkul er a di bo dodengelii a ngakl el “Jehovah.” Ngkired el mo medengei el kmo ngua techa el Dios a Jehovah, e ua ngerang a chisel, blekerdelel, moktek er ngii me a omerellel el ileakl sel loruul a tekoi el kirir a rechedal. Me a Jehovah sel loltaut a moktek er ngii e ngmekekokil el mo chemolt a blekerdelel. (Osi. 4:18) Kede medengei el kmo ngulechotii a ngklel er a Adam me a Eva e le sera lochellii a Kain a Eva, e nguluusbech er tia el ngakl. (Gen. 4:1) Me a reblak a rengrir el mesiungel a Jehovah el Noah, Abraham, Isak, me a Jakob a dirrek el mle medengelii. Te siluub a betok el blekerdelel er sera lomekngeltengat er tir e lomekerreu er tir e louchais a moktek er ngii el mo er tir. E a uriul e ngliluut el smodii a belkul a ngklel el mo er a Moses.

4. Ngera uchul me a Moses a uleker er a Dios el kirel a ngklel? Ngera me ngmle soal a Rechisrael a bo loumerang el kmo a Dios a mo osobelterir?

 ⁴ Monguiu er a Exodus 3:10-15. Sera bo el 80 a rekil a Moses e a Dios a dilu er ngii el kmo: “Ak uderchau . . . el mo melai er a re chedak el Israel el oltobed er tir er a Ekipten.” Me a Moses a uleker er a Jehovah el kmo: ‘A lsekum a rechad er a Israel a oker er ngak el kmo ngtecha ngklem, e ak mo dmu el kmo ngerang?’ A rechedal a Dios a meketeketang er a bo lodengelii a ngklel a Dios, me ngera uchul me a Moses a uleker er tia el ker? Ngmle soal el mo medengei a lmuut el betok el kirel a blekerdelel ngika el Jehovah el Dios. Ngdirrek el mle soal a rechad er a Israel a bo loumerang el kmo a Jehovah a mo olsobel er tir, e le tirkang a mle meketeket el lesibai me nglocha mle meringel er tir el mo oumerang el kmo a Jehovah a sebechel el olsobel er tir. E a rebebil er tir a dirrek el milengull a chelid er a Ekipten!​—Ese. 20:7, 8.

5. A Jehovah ngullecholt a ngera el tekoi el kirel a ngklel el mo er a Moses?

⁵ Ngera mle nger er a Jehovah el mo er a Moses? Ngdilu er ngii me bo louchais er a rechad er a Israel el kmo: “A RUBAK el Dios er a rucheliu . . . a uleldurch er ngak el mer kemiu.” E dirrek el mle kirel el dmu er tir el kmo: “NGAK A NGAK a ulderchak!” * Me ngoeak aika el tekoi e a Jehovah a ulechotii el kmo ngsebechel el mo ngii di lengerang me lotaut a moktek er ngii. Me ngii a Dios el di blechoel el oltaut a telbilel. Seikid a uchul me ngsebechel el melekoi el kmo: “Tiakid a ngklek el mo cherechar, e tiakid a ngklek el bo lomekedong er ngii a ikel rokui el dirk mei el telecheroll.” Ngulterekokl aika el tekingel el kmal millisiich er a klaumerang er a Moses!

6, 7. Ngmilekerang a Jehovah e otaut a telbilel?

⁶ Ngdi mle telkib er a uriul er a longedecheduch er a Moses a Jehovah, e ngultutii a telbilel e ulsebelterir a Rechisrael. Ngulemals er a rechad er a Ekipten el olab a teruich el ringel e ulechotii el kmo a Farao me aike el chelid er a Ekipten a kmal diak a klisichir. (Exo. 12:12) E sola e milingii a Bekerekard el Daob, e ulemekrael er a rechad er a Israel el mo imuul er ngii, e ulerros er a Farao me a resoldau er ngii. (Psa. 136:13-15) Ngii el Jehovah a millemolem el omesterir a kelir me a imelir a rebetok el miliol el chad er a Israel er a lengar er a ked. A bilir me a oecherir me ngdimlak bo el mechut. (Dut. 1:19; 29:5) Aika el rokui a meketeklii  el kmo ngkmal diak a ngii di lengerang el sebechel el torebengii a Jehovah me lak loltaut a telbilel. E a uriul e ngdilu er a Isaia el kmo: “Ng di ngak el tang a RUBAK, el di ngak el tang a sebechek el olsobel er kemiu.”​—Isa. 43:11.

⁷ Ngike el mlo ongingil el mengeteklir a rechad er a Israel el Josua a dirrek el miles a mengasireng el omerellel a Jehovah el mileketmokl er a Ekipten me a ked. Me ngar er a ulebongel er a klengar er ngii e ngdilu er a Rechisrael el kmo: “E kemiu el rokui a medengei er a rengmiu ma chomeltkiu el kmo ng diak a tar a ikel rokui el le tilib a RUBAK el Dios er kemiu el kiriu el dimlak bo le tekoi. Ng rokui el le tilib a di mlo ungilbesul el dimlak a tal mlor ngii a ngelsengesel.” (Jos. 23:14) Me ngbleketakl el kmo a Jehovah a riruul a telbiil el letilbir el mo meruul.

8. Ngmekerang a Jehovah e oltaut a telbilel er chelechang?

⁸ A Jehovah a dirrek el oltaut a telbilel er chelechang. Ngulekiu a Ngelekel e ngulemlaoch el kmo, a uriul sils e ngkirel a ungil chais er a Renged el mo oberk er a “beluulchad el rokir.” (Mt. 24:14) Ngdi ta el Jehovah a sebechel el omlaoch el kirel tia el ureor e dirrek el ngar er ngii a klisichel el oltaut er ngii. E ngii a ousbech er a redi chad el meruul er ngii! (Rel. 4:13) Me sel domerk er a klumech e kede olengeseu el oltaut er a ulaoch er a Biblia. Kede mengebkall er a Demad e ochotii el kmo ngmera el ngar er a rengud el meluluuch el kmo: “Bo le modanges a chedaol ngklem; a Rengedem le mei; bo le motaut a soam er a beluulchad el ua ingii er a eanged.”​—Mt. 6:9, 10.

9, 10. Ngera kede suubii el kirel a Jehovah er a omerellel el mo er a Rechisrael?

⁹ A Jehovah a liluut el meketakl a blekerdelel el mo er a Rechisrael er a uriul er a letobed er a Ekipten. Ngoeak a Llach er a Moses e ngtilbir el mo omekerreu er tir el ua omerellel a bechiil el sechal el mo er a bechil. Me a Rechisrael a mlo ua lebechil a Jehovah, me te mle okedongall el lousbech er a ngklel. (Isa. 54:5, 6) Ngmo omekerreu er tir e mesterir a budech e omekngeltengat er tir a lsekum te olengesenges a llechul. (Ule. 6:22-27) Me a rokui el renged a mo medengei el kmo ngdiak a Dios el mo ua Jehovah el Dios. (Monguiu er a Duteronomi 4:5-8; Psalm 86:7-10.) Me alta e a Rechisrael a mle chedal a Dios, engdi a rebetok el chad er a ngodech el beluu a dirrek el ngileltii el mo mengull er a Jehovah. Te di ua redil er a Moab el Ruth el dilu er a Naomi el kmo: “A re chad er a beluam a mo chedak; ma Dios er kau a mo Dios er ngak.”​—Rut. 1:16.

¹⁰ Ngar er a bekord el 1,500 el rak e  ngliluut el obeketakl a blekerdelel a Jehovah el oeak a omerellel el mo er a rechad er a Israel. Alta e ngdimlak lolengesenges er ngii el betok el taem, engdi ngulechotii a klou el klechubechub me a kllourreng el mo er tir. (Exo. 34:5-7) Engdi a kllourreng er a Jehovah a mla er ngii a telkelel. Me sel taem er a bo lak loumerang er a Jesus e lokodir, e te mlo diak lomtechei er a Dios me a ngklel. (Mt. 23:37, 38) Me ngar er a osengel a Jehovah e te di ua mertong e medei el kerrekar. (Lk. 23:31) Ngmlo uangerang a uldesuir a Rechisrael el kirel a ngklel a Dios er a uriul?

11. Ngera uchul me a Rechisrael a mlo diak lousbech er a ngklel a Dios?

¹¹ Cherengel a taem e a Rechisrael a ulemuchel el mo cheleuid a uldesuir el kirel a ngklel a Dios. Te mlo omdasu el kmo tia el ngakl a kmal chedaol me ngdiak el kirir el ousbech er ngii. (Exo. 20:7) Me te mlo diak lousbech er ngii el ngakl, e tiang a kmal kilengtir a rengul a Jehovah sel lomes er tir el mocha diak loba omengull el kirel a ngklel. (Psa. 78:40, 41) A ngklel a Jehovah a kmal klou a ultutelel er ngii, e le Biblia a melekoi el kmo ngmengerirs er a ngklel. Me a omerellir a Rechisrael el mle meterekakl er a ngklel a uchul me ngmlo diak lerredemelel a omtechei er ngii. (Exo. 34:14) Me tiang a omeklatk er kid el kmo ngkmal klou a ultutelel el kired el mo kerekikl er a ngklel a Ulemeob er kid.

12. Te rua techang a mlokedong a ngklel a Dios er bebrir?

¹² Ngulekiu a Jeremia e a Jehovah a tilbir el mo meruul er a “beches el telbiil” el obengkel a beches el renged. Me a rokui el chedal tia el renged “el ngar a re kot el ngariou el chad el mo lmuut er a re kot el ngarbab” a mo medengelii a Jehovah. (Jer. 31:31, 33, 34) Me ngoingerang e a Dios a rirellii tia el beches el telbiil? Ngulemuchel er sera Pentekost er a rak er a 33. Me ngrirellii el obengterir a rua techang? Ngar er a Biblia e te okedongall el “Israel ra Dios” e tirkang a chad er a rokui el renged. Me a Jehovah a kmo, te chad el “mlokedong a ngklek er bebrir.”​—Gal. 6:16, BT; Rel. 15:14-17, BT; Mt. 21:43.

13. (a) Tirke el kot el Kristiano te uluusbech er a ngklel a Dios? Kede mekerang e medengei? (b) Ngua ngera uldesuem sel mousbech er a ngklel a Dios er a berkel a klumech?

¹³ A rekot el Kristiano el chedal tia el beches el renged a uluusbech er a ngklel a Dios. Te uluusbech er ngii sel losaod aike el bades er a Biblia el tekoi er a Hebru. * A apostol el Petrus a uluusbech er ngii el ngakl el betok el taem er sera longedecheduch er a klou el seked er a Rechisrael me a Rechisentael el uleltirakl er a Llach er a Pentekost er a rak er a 33. (Rel. 2:14, 20, 21, 25, 34) A Jehovah a ulemekngeltengat er a rekot el Kristiano er a urerir el omerk er a klumech, e le tir el milengebkall er ngii. Me sel douchais er a rechad el kirel a ngklel, e dochotii er a Biblia er tir, e a Jehovah a dirrek el mo omekngeltengat er a urered. Me tiang a kmal ileakl el techall e le ngsebechel el mo uchul e a rechad a mekur a ungil el deleuill er tir me a Jehovah, el sebechel el melemolem el diak a ulebengelel.

14, 15. Kede mekerang e medengei el kmo a Jehovah a omekerreu er a ngklel?

¹⁴ Telkib el taem er a uriul er a lemad a rechapostol, e a rebebil a ulemuchel el melisiich a klsuul el osisechakl er a ongdibel er a Rekristiano. (2 Th. 2:3-7) Tirka el klsuul el sensei a dirrek el mlo oltirakl er a siukang er a Rechijudea el mlo diak lousbech  er a ngklel a Dios. Me a Jehovah ngmilecherei a ngklel me ngremiid? Ngkmal diak! Alta e ngdiak dodengelii a mera el omelekingel a ngklel a Dios engdi tia el ngakl a dirk ngar er ngii. Ngar er aika el mereko el betok el rak e a ngklel a Dios a dirk mle llechukl er a betok el oidel a Biblia me a babilengir a rechellimosk er a Biblia. Ngar er a rak er a 1757, e a Charles Peters a milluches el kmo a belkul a ngklel a Jehovah a smodii el kmo ngii ngua techang el Dios e ngii el ngakl a kuk ungil er a ngii di el dui. Ngar er a babier el milluches er a rak er a 1797 el kirel a omengull el mo er a Dios, e a Hopton Haynes a kmo a Jehovah a ngakl el luluusbech er ngii a Rechijudea el omekedong er a Dios, “el di chimo el Dios el lulengull er ngii; me a Kristus me a rechapostol me te dirrek el milengull er ngii.” A Henry Grew (1781-1862) a uluusbech er a ngklel a Dios, e dirrek el mle medengei el kmo tia el ngakl a mla motuub me ngkirel el lmuut el mechedaol. A George Storrs (1796-1879) me a Charles T. Russell el dilak el oureor a dirrek el uluusbech er tia el ngklel a Dios.

¹⁵ Sel rak er a 1931 a kmal klou a ultutelel el kirir a rechedal a Dios. Uchei er isei e te mle okedongall el International Bible Students. Engdi seikid el rak e te ngiluu a ngakl el Sioning er a Jehovah. (Isa. 43:10-12) Te kmal mle dmeu a rengrir el ouchais er a beluulechad el kmo te chad “el kirel a ngklel” a Dios me te mengebkall er ngii el ngakl. (Rel. 15:14, BT) Me a omerellel a Jehovah el mla omekerreu er a ngklel a mekltkid er a tekingel el ngar er a Psalm 113:3 el kmo: “Sel le ngasech a sils el mor sel le ngelt e a ngklel a RUBAK a mo modanges.”

16. Ngkirel mo uangerang a uldesued er a ngakl el dobang el Sioning er a Jehovah?

¹⁶ A profet el Mika a milluches el kmo: “A derta er aike el beluu a mo merael el oba ngklel a di chedul, engdi kid a mo merael el oba ngklel a Jehovah el Dios er kid el mo cherechar el diak a ulebengelel.” (Mik. 4:5, NW) Ngmle klou el chetengakl el kirir a Remesuub er a Biblia e le Jehovah el kilengei er tir me te mlo oungakl er a ngklel. Ngdirrek el mle olechotel a kmo te uleba kengei er a Dios. (Monguiu er a Malakai 3:16-18.) Me kau nguaisei a uldesuem? Ngblak a rengum el “merael el oba ngklel a Jehovah”?

17. Ngera belkul a bo ‘dorael el oba ngklel a Jehovah’?

¹⁷ Ngar er ngii a edei el tekoi el kired el meruul a lsoad el “merael el oba ngklel a Jehovah.” A kot, e ngkired el ouchais er a rechad el kirel ngii el ngakl, e le ngdi tirke el “omekedong er a ngklel a Jehovah a mo suobel.” (Rom 10:13, NW) Ongerung, e ngkired el mo olecholt aike el blekerdelel a Jehovah el ileakl a bltikerreng. Ongedei, e ngkmal kired el mo olengesenges a llechul a Dios me bo dekebkellii a ngklel a Demad. (1 Jn. 4:8; 5:3) Me kau ke melemolem el “merael el oba ngklel a Jehovah el Dios er kid” el diak a ulebengelel?

18. Ngera uchul me tirke el mengebkall er a ngklel a Jehovah a dmeu a rengrir el omes el beduluchei?

¹⁸ Tirke el diak lolengesenges er a Jehovah e omtok er ngii a di kmedu el mo medengei el kmo ngii ngua techa el Dios. (Ese. 38:23) Te di ua Farao el dilu el kmo: “Ng techa RUBAK? Ngera uchul me ng kirek el orrenges er ngii?” A Farao a mle kirel el mo morimel me bo lodengei el kmo ngua techa el Dios a Jehovah. (Exo. 5:1, 2; 9:16; 12:29) Engdi kid a mla ngiltii el mo medengelii a Jehovah e mo sechelil. Me ngkmal dmeu a rengud el mo bekongesenges el chedal e mo oungakl er a ngklel. Kede omes el beduluchei e oumerang er a telbilel el ngar er a Psalm 9:10 el kmo: “Tirkel medengelii a ngklem a oumeral ulsirs er kau, ele kau e RUBAK a diak mchititerir a rusiik er kau.”