1, 2. Ngera uchul me a rebebil a sorir el mesuub el kirel a rodech el fig?

 KAU, ngsoam el menga fig? A rechad er a Israel a mle sorir el menga fig. (Nah. 3:12; Lk. 13:6-9) Me chelechang, e a kerrekar el fig a ngar er ngii er a betok el beluu er a beluulechad. Ngungil er a bedenged, e a rebebil el chad a melekoi el kmo ngdirrek el smisiich a chaidirengud.

² A Jehovah a mle ta el omekesiu er a rechad el mo er a fig. Ngmilsaod el kirel a blekerdelel a rengrir. Me a tekoi el ledilung a sebechel el ngosukid, kid me a rebetik er a rengud. Ngdimlak losaod er a rolel e a fig a melisiich a bedengir, e ngbai millekoi el kirel a rengrir. Me bo dosaod a tekoi el ledilung, e bo dolatk aike el tekoi el kid el Kristiano a sebeched el mesuub.

3. Ngera mle belkul aike el fig el losaod er ngii a 24 el bliongel er a Jeremia?

³ Ngar er a rak er a 617 er a uchei er a Kristus, e a rechad er a Juda a mirruul a betok el tekoi el Jehovah a uluuketui. Ngmilsang a Jeremia a ues el kirel a tekoi el mo duubech el mo er a Juda. Ngmilsaod a teblo el sualo el fig, el omtechei er a eru el cheldebechel er a rechad. A ta er a sualo a mla er ngii a “kmal ungil fig,” e sel kuk tang a mla er ngii a “kmal mekngit el fig.” (Monguiu er a Jeremia 24:1-3.) A mekngit el fig a millutk el kirel a King el Sedekia me tirke el uai ngii el di kmedung el mo modechelakl er a King el Nebukadnesar me a resoldau er ngii. Engdi a Esekiel, Daniel, tirke el tede el sechelil, me a rebebil el mo mengai el mo blebaol el mo er a Babilon, a uaike el kmal ungil fig. A rebebil er tir a liluut el mo er a Jerusalem el mo meleketek er a templo er a uriul.​—Jer. 24:8-10; 25:11, 12; 29:10.

4. Ngera uchul me a tekoi el ledilung a Dios el kirir a rungil el chad er a Juda a melisiich er kid?

⁴ A Jehovah a millekoi el kirir tirke el ungil el chad el kmo: “Ak mo kilou a rengrir me te mo medengei el kmo  ngak a RUBAK; te mo chedak.” (Jer. 24:7) Tia kmal melisiich er kid e le Dios a kltmokl el mo ngosukid el mo soad el mo medengelii e mo teloi er a rechedal. Me kede mekerang e omekeroul er tia el uldesued el soad el mo medengelii? Ngkired el mo mesuub er a Biblia e oltaut aike el bla desuub, e dirrek el ouuchel er a rengud e chemoit aike el mekngit el omerelled. Cherengel a taem, e kede mo tuib a rengud el mo er a Dios e mo metecholb el oba ngklel a Chedam, me a Ngalek, me a chedaol klisiich. (Mt. 28:19, 20; Rel. 3:19) Me kau, ke mla remuul aika el tekoi? Me a lechub e ke blechoel el mo er aike el miting er a Resioning er a Jehovah e mocha meruul aika el tekoi?

5. A babier er a Jeremia ngmilluches el kirir a rua techang?

⁵ Me alta kede mla remuul aika el rokui, engdi ngkirel el melemolem el ungil a blekerdeled e dirrek el mo kerekikl er a omerelled. E ngera uchul? Kede mo medengei a nger sel bo dosaod a tekoi el lulluches a Jeremia el kirel a rengud. Me alta e a babier er a Jeremia a ngar er ngii a omesodel el kirel aike el renged el iliuekl er a Juda, engdi ngkuk betok a omesodel el kirel a renged er a Juda er cheungel a omengederederir a reteim el king er ngii. (Jer. 1:15, 16) Me a klemechel a Jeremia a mlo er a rechad el tir el mla tuib a rengrir el mo chedal a Jehovah. Sel taem er a Moses e a rechad a kilengei el mo chedal a Jehovah. (Exo. 19:3-8) Me sel taem er a Jeremia e a rechad a dilu el kmo: “Aki merma er kau ele kau a RUBAK el Dios er kemam.” (Jer. 3:22) Engdi a blekerdelel a rengrir ngmle ungil?

6. Ngera uchul me kede semeriar er a tekingel a Dios el kirel a rengud?

⁶ A retoktang a ousbech a mesil el omes er a chelsel a bedenged e mesa chaidirengud el kmo ng uangerang. Engdi a Jehovah a sebechel el omes er a rengud, el ngii a mera el blekerdeled. Ngdmu el kmo: “Ng techa sebechel el mo medengelii a rengul a chad? Ng diak a cheblad el ua ingii; ng kmal smecher me ng diak le mukar. Ngak el RUBAK a merriter a uldasu e melasem a reng, mak meruul el mor a re bek el chad el oltirakl a blekerdelel a klengar er ngii ma ikel loruul.” (Jer. 17:9, 10) A Dios a sebechel el omes a tekoi el soad, uldesued, blekerdeled me aike el tekoi el dolatk e soad el mo meruul er a klengar er kid. Me a Dios a mo merriter er a rengum, engdi kau a dirrek el sebechem el omuchel el merriter er ngii.

7. Ngerang dilung a Jeremia el kirel a rengrir a ruumesingd el chad er a Juda er sel taem?

⁷ Ngkired el merriter a rengud. Ngmle uangera osengel a Jehovah el kirel a rengrir a rechad er a Juda er a taem er a Jeremia? Ngar er a Jeremia 9:26 e ngdilu el kmo: “A rokui el chad er a Israel a diak le blotk a rengrir.” (NW) Ngdimlak lolekoi el kirel sel botk el kirir a resechal er a Juda el oltirakl er a Llach er a Moses. Kede mekerang e medengei? Alta e tirka el chad er a Juda a mle blotk, engdi a Jehovah a dilu el kmo, te “ua lak le blotk,” el belkul a kmo, ng “diak le blotk a rengrir.” (Jer. 9:25, 26) Me tia ngera belkul?

8, 9. A ruumesingd el chad er a Juda, ngmle kirir el mekerang me lemesmechokl a rengrir?

⁸ A Dios a uluuchais er a rechad er a Juda aike el kirir el mo meruul, e tiang a ngosukid el mo medengelii a belkul a tekoi el “diak le blotk a rengrir.” Ngdilu er tir me lebedebedii el choitii sel mekngit el tekoi el ngar er a rengrir. E ngera uchul? Ngmilsaod el kmo: “E a lsekum ng diak, e a ngesechel a renguk a mo . . . er kemiu el kngtmiu a uchul.” Me ngdimlak lolengesenges er a Jehovah e le ngmle kikiongel a rengrir. (Monguiu er a Markus 7:20-23.) Te ulemtok e mle chetirir el melodech a blekerdelir.  Me ngar er a osengel a Jehovah e a rengrir, el uldimukl a urungulir me a uldesuir a kmal mle mekngit. (Monguiu er a Jeremia 5:23, 24; 7:24-26.) A Dios a ulechotii a rolel a bo lengedechii tia el blekerdelir er a ledu el kmo: “Bo mobotk el kirel a Jehovah, el medebedii a budel a rengmiu.”​—Jer. 4:4, NW; 18:11, 12.

⁹ A Rechijudea er a taem er a Jeremia a mle kirir el ua bo lobotk a rengrir. A rechad er a Israel er a taem er a Moses a dirrek el mle kirir el meruul a osisiu el tekoi. (Dut. 10:16; 30:6) Me te milekerang a Rechijudea e “medebedii a budel” a rengrir? Ngmle kirir el medobed el chemoit a rokui el uldesuir me a urungulir el rulleterir el mo diak loltirakl a llechul a Jehovah.​—Rel. 7:51.

10. Ngmilekerang a David er a lorriter er a rengul? E mekerang a doukerebai er ngii?

¹⁰ Ngkired el oba omereng el saul e le Dios a ngosukid el mo medengelii a belkul a tekoi el rengud. Me kid el mesiungel a Jehovah, ngkired el mo kerekikl er a rengud? A ruumesingd el chad er a ongdibel a blak a rengrir el mesiou er a Jehovah e klikiid a omerellir, me tir a diak el uaike el “mekngit el fig.” Engdi lak mobes a tekingel a melemalt el chad el David el mo er a Jehovah el kmo: “Morriter er ngak kau el Dios, e bo modengelii a renguk; e mesemak me betik a uldesuek. Momes ma le ngar ngii a cheleblad er a chelsek, e morolak er a rael el di ngar ngii el mo cherechar.”​—Psa. 17:3; 139:23, 24.

11, 12. (a) Ngera uchul me ngkired el merriter a rengud? (b) Ngera diak el kired el mengerechir er ngii er a Jehovah?

¹¹ A Jehovah a soal kid el rokui a bo dodengelii, el belkul a kmo, kede mo nguu a kengei er ngii e melemolem el obang. A Jeremia a dilu el kmo, a Jehovah a merriter er a remelemalt e omes a “ngar a rengrir ma uldesuir.” (Jer. 20:12) Me seikid a uchul me kid el rokui a kired el merriter aike el ngar er a rengud. (Monguiu er a Psalm 11:5.) E sel doruul el uaisei, e ngsebeched el metik a mekngit el urunguled, uldesued me a lechub e ngtekoi el soad el mo meruul, el ngii a sebechel el melecherecher a rengud. Me alta ngdirrek el meringel er kid el mo olengesenges er a Jehovah. Me a lsekum nguaisei, ngkirel el ua bo lobotk a rengud, el melai aike el mekngit er a rengud el mengoit. Ngera bebil er aike el mekngit el urungulel me a uldesuel a rengud? Ngmekera dolodech aikang?​—Jer. 4:4, NW.

¹² A Jehovah a diak bo lorrimel er kid el melodech a blekerdeled. Ngdilu el kmo tirke el “ungil fig” a bo ‘kilou a rengrir me te mo medengelkak.’ Engdi ngdiak lorrimel er tir el mo melodech a rengrir. Ngmle kirir el ngiltii el mo medengelii a Dios, me kid me ngdirrek el kired el meruul el uaisei.

13, 14. Ngmekerang e sebechel el mo kdekudel a uldesuel a chad?

¹³ A Jesus a dilu el kmo: A “mekngit el uldasu a ngar a reng el mei el choteklii a chad el mo omekoad, e mor a laokreng, e mo meruul a kuk bebil er a mekngit el tekoi.” (Mt. 15:19) El ua tiang, a lsekum a  chad a nguibes a rengul, e ngsebechel el mo er a laokreng me a deleboes el omeruul. Me a lsekum ngdiak lobult er a kngtil, e ngoridii a kengei er a Dios. Me alta e a chad a diak lerebet er a klengit, engdi ngsebechel tia el ngibes el melemolem el ngar er a rengul. (Monguiu er a Mateus 5:27, 28.) Ngklou a ultutelel el kired el merriter a rengud me lolemolem el klikiid. Me kau, ke blechoel el melatk er a ta er a chad er a rolel el modengei el kmo a Jehovah a diak lekengei er ngii? Ngmla mo kirem el ngodechii a uldesuem?

¹⁴ Me a lechub e a Kristiano a sebechel el mecherei a ngesechel a rengul me ngmukeroul el rullii el mo ouketui er a odam er ngii. (Lev. 19:17) Me ngkirel el blak a rengul el mengikiid er ngii er tia el mekngit el uldasu.​—Mt. 5:21, 22.

15, 16. (a) Mosaod er a rolel e a Kristiano a sebechel el ‘diak le blotk a rengul.’ (b) Ngera uchul me a Jehovah a soal a bo ‘le blotk a rengud’?

¹⁵ A ruumesingd el Kristiano a diak el bechei a chouaika el uldasu me lolemolem el ngar er a rengrir. Engdi a Jesus a dirrek el millekoi el kirel a “mekngit el uldasu.” El ua tiang, ngsebeched el mo omdasu el kmo ngkired el blak a rengud el mo er a rechedad el kot. Me nguaisei, a Rekristiano a kirir el betik a rengrir er a rechederir e diak bo leua tirke el ngar er a beluulechad er chelechang el “mekngit omerellir el mor a re chad.” (2 Ti. 3:1, 3) Engdi ngsebechel el mo diak el tabesul a uldesued el kirel tia el tekoi. A rebetok a melekoi el kmo: “A rechedad a kirir el mo er uchei er a rokui el tekoi.” Me a lsekum a ta er a chederir a ngmasech a rengul er a omerellel a ta er a chad, e tir me te dirrek el mo ngmasech a rengrir. A ruchedal a Dina a kmal mlo kesib a rengrir er a omeruul el mlo er ngii, el mlo uchul e te milekodeterir a rebetok el chad. (Gen. 34:13, 25-30) Me a klsbengel a rengul a Absalom a rirellii el mo mekodir a Amnon. (2 Sa. 13:1-30) Me nguaisei, a “mekngit el uldasu” a sebechel kmal mo kdekudel.

¹⁶ A rebebil el Kristiano a kmal mo kesib a rengrir a lsekum a chad a mle mekngit a blekerdelel el mo er ta er a chederir, me a lechub e te di omdasu el kmo ngmle mekngit a blekeradel el bedul ngii. Me ngmo uangera omerellir el mo er ngike el chad el leko ngmle mekngit a blekerdelel? Nglocha mo chetirir el obengkel me a lechub e longemedaol er ngii el me er a blirir. (Heb. 13:1, 2) Engdi a Kristiano el betik a rengul er a rudam er ngii a diak bo leuaisei a omerellel.  A Jehovah a medengei aike el tekoi el ngar er a rengud, me a lsekum e ngmo omes aika el mekngit el uldesued, e ngmo melekoi el kmo kid a ‘diak le blotk a rengud.’ (Jer. 9:25, 26, NW) Engdi a Jehovah a kmo: ‘Bedebedii a budel a rengmiu.’​—Jer. 4:4, NW.

17. Ngera uchul me a omeluu el mo er a Jehovah a ngosukid el mo mengikiid a rengud?

¹⁷ Sel morriter er a rengum, e ngsebechem el mo medengei el kmo ke telkib el meoud el olengesenges a ulekrael er a Jehovah e le rengum a ua le dirkak lobotk. Me alta e ke medakt er a uldesuir a rechad el kirem, me a lechub e ngsoam a bo lorael a chisem e bo lebetok a ududem. Me a lechub e ngdirk medecherecher a rengum e a lebebil er a taem e ke di oba rengum el meruul aike el soam. A rebebil a dirrek el mle uaisei a uldesuir. (Jer. 7:24; 11:8) A Jeremia a milluches el kirir tirke el Chijudea el dimlak el blak a rengrir el kmo: Ng “medecherecher a rengrir e diak lorrenges a tekoi.” Ngdimlak el ‘loluu er a Jehovah,’ el ngike el betik a rengul er tir e milsterir aike el rokui el lousbech. (Jer. 5:23, 24) Me a lsekum kede meluu er a Jehovah, el belkul a kmo, kede oba omengull el kirel, e kede mo medobed el chemoit aike el mekngit el tekoi el ngar er a rengud. Me ngmo beot er kid el mo meruul aike el soal.

18. Ngerang tilbir a Jehovah el mo er tirke el ngar er a beches el telbiil?

¹⁸ Me sel dolemolem el mengikiid er a rengud, e a Jehovah a mo ‘kilou a rengud’ me ngmo soad el mo medengelii. Ngtilbir el mo meruul el uaisei el kirir a rengellitel, el tir a ngar er a beches el telbiil. Ngdilu el kmo: “Ak mo locha llechuk er a uldesuir e luchesii el mor a rengrir. Ak mo Dios er tir, me tir a mo chedak. . . . Ng diak a ta er tir el mo olisechakl er a re bebil el melekoi el kmo, ‘Bo modengelii a RUBAK.’ Te rokui el mo medengelkak, el ngar a re kot el ngariou el chad el mo lmuut er a re kot el ngarbab. Ak mo ousubes a kngterir e dikea bo kulatk a chelebirukel el le riruul.”​—Jer. 31:31-34. *

19. Ngera el tekoi a domes el beduluchei el kirel?

¹⁹ Kede omes el beduluchei el kirel aike el telbilel a Dios el kired. Me kid el rokui a kired el melilt el mo medengelii a Jehovah e mo teloi er a rechedal. Engdi a di ta el rolel a bo dodengelii a Jehovah e denguu a diak a ulebengelel el klengar, a sel lemusubes a kngtid el oeak a olubet el tengetengel a Kristus. Me kid el mla musubes a kngtid a uchul me ngkired el mo ousubes er a rechad, el mo lmuut er taem el meringel er kid el ousubes er tir. E diak dolemolem el kesib a rengud er tir. Me tiang a ochotii el kmo kede ungil medengelii a Jehovah e dirrek el soad el mo mesiou er ngii. Me kede mo uai tirke el chad el Jehovah a millekoi el kirir el kmo: “Kom mo osiik er ngak e mo metik er ngak sel mosiik er ngak el oba rengmiu el rokir.”​—Jer. 29:13, 14.