A NOAH a milekiis el tometii a ulkel me a bedengel e le ngkmal mesaul a bedengel. Ka di molatk er ngii el dengchokl er bebul a kerrekar el klekedellel a chedoel a arhe, e olengull e omes er tia el klou el arhe. Ngsebechel turengur a klou el bul a kortang e orrenges a oto er a dongu e le ngultaut a ureor. Me ngar sel ledengchokl er ngii, e sebechel el meseterir a rengelekel el meringel el oureor el meruul aike el chelseklel tia el arhe. A bechil, me a rengelekel me a rebecherir, a meketeketang el loureor el obengkel el meruul er tia el ureor. Me alta te mla rokir a telkib er ngii, engdi ngdirk medechel a klou el ureor el kirir el meruul er ngii.

A rechad er a beluu a ulemdasu el kmo te mle mekebelung. Me sera lomekedechor er tia el arhe, e a rechad a di ulecherechur sel bo lolatk el kmo ngmo er ngii a klou el ieleb. Te ulemdasu el kmo tia el tellemall el lulsaod er ngii a Noah a kmal klebelung el tekoi. E dirrek el dimlak lodengelii a uchul me a Noah me a telungalek er ngii a sebechir el di choitii a klengar er tir e mo meruul er a arhe. Me nguaisei, engdi a Jehovah a dimlak lomes er a Noah el kmo ngkebelung.

A Tekingel a Dios a kmo: A Noah a “mle ungil a delongelel ngii ma Dios.” (Genesis 6:9) Tiang ngera belkul? Ngbelkul a kmo a Noah a kmal ullengesenges er a Jehovah e mle betik a rengul er ngii el di uai a kmal kmeed el sechelil. A betok el telael el rak er a uriul, e a Biblia a melekoi el kmo: “A Noah a uluumerang a uchul . . . e a beluulchad a mlo chemolt el mledebeakl.” (Hebru 11:7) Ngmekerang e uaisei? Ngera sebeched el suubii er chelechang er a klaumerang er ngii?

A Noah a mlukeroul er a taem el di mirrael a tekoi el mo mekngit. Ngmle mekngit a blekeradel er sel taem er a lekiei a Enok, el ngii a mle ta er a melemalt a rengul el uleltirakl er a Dios. A Enok a ulemlaoch el kmo ngdi kmedung e te mo mukerrekeriil tirke el diak loluu er a Dios el ngar tia el chutem. Engdi a taem er a Noah a lmuut el kmal mle mekngit. Me ngar osengel a Jehovah, e tia el beluulechad a kmal mle mekngit e le ngmui er a uldikel. (Genesis 5:22; 6:11; Jude 14, 15) Ngera uchul me ngdi mirrael a tekoi el mo mekngit?

Ngmla er ngii a mekngit el tekoi el dilubech er a delongelir a rechanghel er a Dios. A ta er tir a ulemtok er a Jehovah, e mlo okedongall el Satan el Diabelong e le ngultubii a Dios e milengetikaik er a Adam me a Eva el mo er a klengit. Ngar er a taem er a Noah, e a rebebil er a rechanghel a ulemuchel el mo omtok er a llemeltel a Jehovah el mengedereder. Sera lechoit a deruchellir er a eanged, e te mlei er a beluulechad, e mlo olab a bedengir a rechad, e mlo becherir a reklebokel el redil er tia el chutem. Tirka el mekedidai a rengrir el anghel a kmal mle mekikiongel a omerellir me te mle mekngit el ocholt el mo er a rechad.​—Genesis 3:1-5; 6:1, 2; Jude 6, 7.

Me a lmuut el tang, e ngtir el mlo obengterir tirka el redil er tia el chutem a uchul me te mlo omechell er a rengalek el sechal el kmal mle mekoar e mesisiich. Tirka el imis el mekoar el chad a kmal mle mekngit a blekerdelir el uchul me ngkmal mlo klou a delengerenger. Sei a uchul me Ngike el Ulemeob a ulemdasu el kmo “a re bek el chad er a beluulchad a kmal mle dengerenger, ma mekngit el uldasu a blechoel el omekeek  a uldesuir.” A Jehovah a tilbir er a rengul el mo olekngemed er tia el mekngit el telecheroll er a chelsel a 120 el rak.​—Genesis 6:3-5.

Ka molatk er kau el melasem el omekeroul er a telungalek er kau er a chouaisei el beluulechad! Me nguaisei, engdi a Noah a mirruul er tia el tekoi. Ngmiltik er a ungil bechil, e a uriul er a bo el 500 a rekil, e ngmlo er ngii a retedei el ngelekel el sechal el Sem, Ham me a Jafeth. * Ngii me a bechil a mle kirir el omekerreu er a rengelekir er a mekngit el tekoi el iliuekl er tir. A rengalek el sechal a uaisei el blechoel el mo mechas a rengrir e dirrek el sorir a ‘rebekeu’ me a ‘remerael a chisir,’ me te ulterekokl el mlo sorir tirke el Nefilim. Me alta Noah me a bechil a dimlak el sebechir el omart a bek el tekoi el lurruul tirka el mekoar el chad, engdi ngmle sebechir el olisechakl er a rengelekir a klemerang el kirel a Jehovah, el ngii a ouketui a mekngit el tekoi. Ngmle kirir el olengeseu er a rengelekir el mo mesa el kmo a Jehovah a mekngit a rengul sel lomes a uldikel me a ultok el mla er ngii er a beluulechad er sel taem.​—Genesis 6:6.

A ruungalek er chelecha el taem a ungil medengei a tekoi el lechilebangel a Noah me a bechil. A beluulechad el dekiei er ngii a mui er a uldikel me a ultok. A rolel a ongelaod el kirir a rengalek a dirrek el ngar er ngii a chouaika el tekoi er ngii. A rungil el oungalek a meruul aike el sebechir el mengeroid aika el mekngit el blekeradel, el oeak a lolisechakl er a rengelekir el kirel a Jehovah el Dios er a budech, el ngii a mo torob a rokui el uldikel er a ta er a klebesei. (Psalm 11:5; 37:10, 11) Ngsebechir a ruungalek el kutmeklii tia el tekoi, e le Noah me a bechil a mle sebechir el meruul el uaisei. A rengelekir el sechal a mlukeroul el mo ungil a blekerdelir el chad, e mlo becherir tirke el kilengei el nguu a Jehovah el Dios el mo kot er a klengar er tir.

A ta er a klebesei, e a klengar er a Noah a kmal milengodech. A Jehovah a milengedecheduch er ngika el mesiungel e uluuchais er ngii el kirel a moktek er Ngii el mo olekngemed er a remekngit el chad er sel taem. Ngdilu er a Noah el kmo: “Bo mdesechii er a ungil kerrekar a diall el kirem.”​—Genesis 6:14.

Tia el arhe a diak el uai a teletelel a diall el ua lomdasu a rebebil. Ngdimlak a ongengel me a kuk bebil er a klekedall el rullii el mo uai a diall, e ngbai di uai a klou el baks. A Jehovah a uluuchais er a Noah el kirel a klungel me a teletelel tia el arhe me a rolel a longesbereber er ngii er a kortang. Ngmillekoi er a Noah er a uchul me ngkirel meruul er tiang el kmo: “Ak mo odureklii a eeleb el mor a chutem . . . A rokui el ngar ngii er a chutem a mo mad.” Me nguaisei, engdi a Jehovah a milsang a Noah a ulekrael el kmo: “Ke mo doiderekl er ngii el diall kau ma bechim, ma re ngelekem el sechal ma re becherir.” A Noah a dirrek el mle kirel el olsiseb a bek el bedengel a charm er a arhe. Me ngdi mle tirke el ngar er a chelsel a arhe a mle sebechir el mo suobel er a ieleb.​—Genesis 6:17-20.

A Noah a kmal mle klou a ureor el bo loruul er ngii. Tia el arhe a mle kirel kuk betok er a 400 el fit a klemengetel, e kuk betok er a 70 el fit a tengel, e kuk betok er a 40 el fit a kldidiul. Tiang a lmuut el klou er a ngii di el meklou el kerrekar el diall el mla meruul. A Noah ngmillasem el mo diak loruul er tia el ureor, e di mengeremrum el kirel a ringelel me a lechub e lolodech a teletelel me bo el beot er ngii? A Biblia a melekoi el kmo a “Noah a riruul a rokui el tekoi el le dilu er ngii a Dios.”​—Genesis 6:22.

 Tia el lureor a mle bekord el 40 el mo bedul a 50 el rak el loruul er ngii. Ngmle kirir el meluk e olengemai a kerrekar e melasech e melabek e dirrek el omech. Tia el arhe a mle kirel el mo edei el chellibel, e betok a delemerab er a chelsel, e di mo chimong a chesmerel. Ngmla er ngii a mado er bab, e mle kirel el telkib el ngarbab a belngel a chedoel tia el arhe me lak lemekaud a ralm.​—Genesis 6:14-16.

Me a cherengel a taem e tia el arhe a mocha mekekokil el meteketek, me a Noah a ulterekokl el mle dmeu a rengul e le ngulemes er a telungalek er ngii el ullengeseu er ngii. Engdi ngdirrek el mla er ngii a telengtengil tia el ureor el kuk mle meringel er a lomekedechor er a arhe. A Biblia a ouchais er kid el kmo a Noah a ‘ulemerk ra llemalt.’ (2 Petrus 2:5, BT) Me nguleba blekeu el omeklatk er a rechad er sel mekngit el taem el kirel a tellemall el mochu er ngii. Te milekerang er a lerengesii tia el tekoi? A Jesus Kristus a millekoi el kirel tia el taem el kmo tirke el chad a “dimlak lolechesiu.” Ngmillekoi el kmo te kmal mle mechesang er a klengar er tir er a bek el sils el omengur, e melim, e meruul a chebechiil, me ngdimlak lorrenges a tekingel a Noah. (Mateus 24:37-39, BT) Ngulterekokl el mla er ngii a rebetok el uleltuub er a Noah me a telungalek er ngii, me a rebebil a ulemekdakt e mle meringel el omtok er ngii.

Me nguaisei, engdi a Noah me a telungalek er ngii a dimlak lemeterob. Te di millemolem el omekedechor er a arhe alta rechad el iliuekl er tir a ulemdasu el kmo ngklebelung el tekoi. A Rekristiano el telungalek er chelecha el taem a klou a lesubii er a klaumerang er a Noah me a telungalek er ngii, e le kede kiei er a taem el lomekedong er ngii a Biblia el kmo nguriul el sils. (2 Timothy 3:1) A Jesus a millekoi el kmo a taem el dekiei er ngii a di mo uai sel taem er a lomekedechor er a arhe a Noah. Me a lsekum a rechad a diak el semeriar e melenguul e oldechelakl er a Rekristiano sel lomerk er a klumech er a Rengedel a Dios, e ngungil a Rekristiano a lolatk er a Noah. E le ngdiak el di el tir el tang a mla chelebangel a chouaika el omelsemai.

Ngmla chuib a betok el rak, e tia el arhe a mocha merek. Me a Noah er a bocha el 600 a rekil, e ngmlad a rebetik er a rengul. A demal er a Lamek a mlad, * e a eim el rak er a uriul e a demal a Lamek el Methusela a mlad er a le 969 a rekil. Ngikang a mle kot el kemanget a klengar er ngii el chad el ngar er a Biblia. (Genesis 5:27) A Methusela me a Lamek a mle chad er sel taem el lekiei ngike el kot el chad el Adam.

Ngar sel osisiu el rak, e a Noah a ngiluu a beches el tekoi el mla er a Jehovah el kmo: “Bo mdiderekl er a diall kau ma rokui el chad er a telungalek er kau.” A Jehovah a dirrek el dilu er a Noah el kmo ngkirel el olsiseb a bek el bedengel a charm er a arhe. Ngmle kirel el olsiseb a dersekleuid er aike el klikiid el charm el kirel a tenget, e aike el kuk bebil er a charm a mle kirel olsiseb a derteblo er ngii.​—Genesis 7:1-3.

Tiang a ulterekokl el kmal mle mengasireng el tekoi. Ka molatk aika el betok el bedengel a charm el merael, me a resuebek, me a remelekesako, me a remekekoketerir el merael el rokui el kakerous a meklungel me a teletelel me a blekerdelel. Engdi a Noah a dimlak el meringel el oldubech e lolsiseb aika el tebelik el charm el mo er a chelsel a arhe. Tia el cheldecheduch a melekoi el kmo te “mlo soiseb er a diall el obengkel a Noah.”​—Genesis 7:9.

A rebebil el diak loumerang a mo oker el kmo: ‘Ngmekerang e sebechel duubech a chouaisei el tekoi? E mekerang e sebechel aika el charm el dmak el kiei el ngar er a budech er a chelsel tia el kekerei el basio?’ Ka molatk er tiang: Ngika el ulemeob er a uldekial a eanged me a chutem ngmera el sebechel el omtebechel a charm el lulemeob me bo lechelellakl? A Jehovah a ngike el Dios el ulemii er a Bekerekard el Daob e rirellii a sils me ngdi chelellakl. Me a leuaisei,  e ngika ngsebechel el remuul aike el tekoi el soadel er a cheldechedechal a Noah? Ngulterekokl el sebechel, e mera el mirruul el uaisei.

A Jehovah a mle sebechel el olsobel a charm el ngar er a kuk ta er a rolel. Me nguaisei, engdi ngileltii a rolel el sebechel el omeklatk er kid er sel ngerachel el lebilsterir a rechad el mo omekerreu a rokui el di ngar er tia el chutem. (Genesis 1:28) A rebetok el oungalek er chelecha el taem a ousbech er a cheldechedechal a Noah el olisechakl er a rengelekir el kmo a Jehovah a omes a rechad me a charm el meklou a ultutelir.

A Jehovah a dilu er a Noah el kmo a Ieleb a mei er a chelsel a ta el sandei. A Noah me a telungalek er ngii a ulterekokl el kmal mle mechesang er tiaikid el taem. Ka di molatk er tir el orrael aika el charm e lolengemai a kelir el mo er aike el kirel el ngar er ngii e lolengakt a klekedellir el olengasech er a arhe. A bechil a Noah me a rebecherir a rengelekir a ulterekokl el mle mechesang el meruul er a mo ungil el delengcheklir er a chelsel a arhe.

Ngera te mirruul tirke el chad el mle iliuekl er tir? Alta ngkmal mle betok a olechotel a kmo a Jehovah a ulemekngeltengat er a Noah me aike el tekoi el loruul, engdi te “dimlak lolechesiu.” Me alta te miles aika el charm el merael el mo tmuu er a arhe, engdi ngdiak lemechas a rengud er a blekerdelir el dimlak lesemeriar el kirel. A rechad er chelecha el taem a diak lolechesuar aika el betok el olechotel a kmo kede kiei er a uriul el sils er tia el beluulechad. Me nguai aike el lulemlaoch a apostol el Petrus, te ngar er ngii a remo melenguul er tirke el olengesenges er a uleklatk er a Dios. (2 Petrus 3:3-6) Me nguaisei, a rechad me te dirrek el millenguul er a Noah me a telungalek er ngii.

Ngoingerang e ngmlo diak a omelenguul? Tia el cheldecheduch a ouchais el kmo a Noah er sera lengititerir a telungalek er ngii me a charm el mo er a chelsel a arhe, e a “Dios a chilsmerii a chesimer.” A lsekum e te mla er ngii a remelenguul el ngar bita er tir, e te ulterekokl el di mlo diak a tekoi er a ngerir. E a lsekum e ngdiak, e sel chull el mlo er ngii er a uriul a ulterekokl el milutek a ngerir. Ngdi mle chull el kemanget el taem, el uchul me ngmleieleb tia el beluulechad, el di uai a lullekoi a Jehovah.​—Genesis 7:16-21.

A Jehovah ngmle dmeu a rengul er a kodellir tirke el mekngit el chad? Ngkmal diak. (Esekiel 33:11) E le ngbai milsterir a techall el mo melodech a blekerdelir e bo loruul a ungil. Tirka ngmle sebechir el mo meruul el uaisei? A blekerdelel a klengar er a Noah a onger er tia el ker. Ngulechotii el kmo ngmle sebechir el mo suobel el oeak a lorael el obengkel a Jehovah e lolengesenges a rokui el tekingel. Me tiang a belkul sel tekoi el kmo, a Noah a uluumerang a uchul me a beluulechad a mlo chemolt el medebeakl, e le a omerellel a ulechotii a mekngit el blekerdelir a rechad er sel taem. A klaumerang er ngii a uchul e ngsilobel ngii me a telungalek er ngii. Me a lsekum e ke oukerebai er a Noah, e ngmo sebechem el osebelau kau me a rebetik er a rengum. Me nguai a Noah, e ngsebechem el merael el obengkel a Dios el uai a lesechelim el mo cherechar.