A ta el redil el mle meringel er ngii el oumerang el kmo a Jehovah a sebechel el omekerreu er ngii a millekoi el kmo: “Sel uldasu el kmo ngdiak a ultutelek a uchul me ngmeringel er ngak el mo kmeed er a Dios.” Kau nguaisei a uldesuem? A leuaisei, e ke locha mo melatk el kmo, ‘A Jehovah ngmera el omekerreu er a derta el mesiungel?’ A nger er tiang a chochoi! Kede metik a olechotel a ulekerreuil a Jehovah el kirel a derta el chad el ngar er a tekingel a Jesus.​—Monguiu er a Johanes 6:44.

Ngerang millekoi a Jesus, el ngii a kmal ungil medengelii a blekerdelel me a moktek er a Jehovah? (Lukas 10:22) A Jesus a milsaod el kmo: “Ng diak a chad el sebechel el mer ngak a lak le Chedam el ngikel ulderchak a mekrolii el mer ngak.” Me a di ta el rolel a bo doltirakl er a Kristus e dongull er a Demad el ngar er a eanged el Jehovah a oeak sel lomekrael er kid a Jehovah el mo er Ngii. (2 Thesalonika 2:13) A lsekum e kede medengelii a belkul tiang, e kede mo mesa er a tekingel a Jesus a klou el olechotel a ulekerreuil a Dios.

Ngera belkul tia el tekoi el kmo a Jehovah a mekrolid el mo er ngii? Tiang a diak el belkul a kmo ngorrimel er kid el mo mesiou er ngii. A Jehovah a mla meskid a ilmokl el mo melilt a tekoi me ngdiak lorrimel er kid. (Duteronomi 30:19, 20) Ngomes a rengrir a rebetok el biliol el chad er tia el beluulechad el osiik er tirke el melemalt a rengrir. (1 Kronika 28:9) E sel lebetik er a chouaisei el chad, e ngmo rullii a kmal ungil el tekoi. Ngmo mekerang?

A Jehovah a mekekokil el olechau er a rengul a chad el melemalt. (Rellir 13:48) Ngmeruul er tiang el okiu a eru el rolel. A ta er ngii a okiu a ungil chais er a Biblia el derta el chad a sebechir el rongesii, e a kuk tang a okiu a chedaol klisichel. Sel lesang a chad el soal a klemerang er a Biblia, e ngousbech er a chedaol klisichel el ngosuir ngii el chad el mo medengelii a klemerang e mo oltaut er ngii er a klengar er ngii. (1 Korinth 2:11, 12) A lak a ngelsuil a Dios, e ngdiak el sebeched el mo oltirakl er a Jesus e leblak a rengud el mesiungel a Jehovah.

Me a leuaisei, e aike el tekingel a Jesus el ngar er a Johanes 6:44, ngera ngosisecheklid el kirel a Jehovah el Dios? A Jehovah a mekroleterir a rechad el mo er ngii e le ngmesa ungil er a chelsel a rengrir e omekerreu er a derta er tir. Ngike el redil el dulsaod er ngii er a uchei a kmal mlo ungil a rengul er a bo lodengelii tia el klemerang el tekoi. Ngmelekoi el kmo: “A demesiungel a Jehovah a kot el ngarbab el techall el sebechel a ngii di el chad el mo obang. Me a lsekum a Jehovah a ngileltak el mo mesiungel, e ngak a ulterekokl el kmal mekreos er a osengel.” E kau a kuk mekerang? Sel modengei el kmo a Jehovah a omekerreu er a rederta el mesiungel, e tiang rullau el mo soam el mo kmeed er ngii?