A BO donger er tia el ker, e ngkired el mo mesaod a eru el olechotel a kerrekerilel a Dois el ngar er a Biblia, el ngii a Ieleb er a taem er a Noah me a okngemedir a rechad er a Kanaan.

AIKE EL LOLEKOI A RECHAD: “A Dios a kmal mle mekngit a blekerdelel er sera lodureklii a ieleb el mo  olekngemed er a klechad el rokir e di ta el Noah me a telungalek er ngii a silobel.”

AIKE EL LOLEKOI A BIBLIA: A Dios a dilu el kmo: “Ng diak ledeu a renguk el mesa tal mekngit el chad el mad. Ng bai soak el mesang el mo diak le ngar a klengit me ng diak le mad.” (Esekiel 33:11) Me a Dios a kmal dimlak el soal el olekngemed er a remekngit el chad er a taem er a Noah. Me ngera uchul me ngmirruul el uaisei?

A Biblia a ouchais el kmo a Dios er sera loukerrekeriil er a rediak loumerang er ngii er a ngar er a mong, e ngmilecherei a “olachidnger el mor tirkel chad el diak loumerang er a Dios.” (2 Petrus 2:5, 6) Ngera el olachidnger a lebilecherei a Dios?

A kot, a Dios a ulechotii el kmo alta ngdiak el soal el olekngemed er a ngii di el chad, engdi ngomes a blekerdelir tirke el omekcharm er a rechad e oukerrekeriil er tir el kirel a omerellir. Ngmo er ngii a taem e ngmo olekngemed a rokui el chelebirukel me a ringel.

A ongerung, a omerellel a Dios er a ngar er a mong a ochotii el kmo ngomeklatk er a rechad er a uchei er a loukerrekeriil er tir. A Noah a ulemerk el kirel a llemalt engdi ruumesingd el chad a dimlak lorrenges er ngii. A Biblia a melekoi el kmo: “E di dimlak lodengei el kmo ng ngera ngar ngii el mochar er ser a le mei a eeleb el mecheklterir el rokui.”​—Mateus 24:39.

A Dios ngdirk meruul er a osisiu el tekoi? Chochoi. El uai tiang, ngulemeklatk er a rechedal el chad er a Israel el kmo a lsekum e te mo meruul a mekngit el di ua aike el renged el iliuekl er tir, e ngmo mechititerir a recherrouir me te mo soiseb er a belurir, e tomellii a Jerusalem, e ngoititerir el mo blebaol. Nguaisei, engdi a rechad er a Israel a mlo meruul a mekngit e dirrek el millenget er a rengelekir. Me ngmilekerang a Jehovah? Ngdi mle blechoel el oldurokl er a reprofet er ngii el mo omeklatk er tir el mo melodech a omerellir. Ngdilu el kmo: “Ng ulterekokl el diak a ngeral loruul er ngii a Rubak el DIOS e lak lochotii a uldesuel er a re mesiungel el profet?”​​—Amos 3:⁠7.

ROLEL E KE ULDIMUKL ER TIA EL TEKOI: A teletelel a Jehovah a loukerrekeriil er a ngar er a mong a meskid a omelatk. Ngsebechel el mo ulterekokl a rengud el omes el bedul uchei el kirel a kerrekerilel a Dios el mo er tirke el omekcharm er a rechad. A Biblia a kmo: “Ngdi re dengerenger a mo modik . . . ngdi tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.” (Psalm 37:9-11) Ngera uldesuem el kirel a kerrekeriil el mo uchul e ngmo diak a ringel er a klechad? Ngolechotel a mekngit el blekeradel me a lechub e ngklechubechub?

AIKE EL LOLEKOI A RECHAD: “A okngemedir a rechad er a Kanaan a kmal mle mekngit el tekoi el di uai aike el omeruul el meketmokl er sel taem el kabelment a sorir el omekoad er a chimo el bedengir a rechad.”

AIKE EL LOLEKOI A BIBLIA: “[A Dios a] cherrungel e melemalt el ngar a rokui el rolel. A Dios er kemiu a blak a rengul e merang.” (Duteronomi 32:4) A tekoi el loruul a Dios a diak el sebeched el omekesiu er ngii er a mekemedir a rechad. E ngera uchul? E le rechad a kakerous er a Dios e le ngii a sebechel el menguiu a rengrir a rechad.

El uai tiang, a Dios er a loukerrekeriil el kmo a Sodom me a Gomora a mo metemall, e a blak a rengul el chad el Abraham a mle soal el mesa el kmo tia el tekoi ngmle melemalt me a lechub e ngdiak. Ngdimlak loumerang el kmo a melemalt el Dios a sebechel el “melemall er a re melemalt el di uldak er a re mekngit.” Me a Dios a mle klou a rengul el melekoi er ngii el kmo ngmo lmuut me a di el teruich el melemalt el chad a mle medechel er a Sodom, me Ngii a diak bo lolemall er sel beluu. (Genesis 18:20-33) Me ngbleketakl el kmo a Dios a ulemes a rengrir tirka el chad e milsa el kmo ngkmal mle mekngit a blekerdelir.​—1 Kronika 28:9.

Me ngdi osisiu, a Dios a uluukerrekeriil er a rechad er a Kanaan e dilu el kmo ngmo olekngemed er tir. Tirka el chad a mle merael a chisir el kirel a mekngit el blekerdelir, el uldimukl er ngii a lolul er a rengelekir el mo tenget. * (2 King 16:3) A rechad er a Kanaan a mle medengei el kmo a Jehovah dilu er a rechad er a Israel kmo te mo nguu a beluu er a Kanaan el rokir. Tirke el di kiliei er a beluu e mlo oumekemad a ulemtok er a rechad er a Israel me a dirrek el Jehovah, el ngii a mle chemolt el kmo ngulebengterir a rechedal.

Me a lmuut el tang, a Dios a ulecholt a klechubechub el mo er tirke el chad er a Kanaan el chiloit a mekngit el blekerdelir e mlo kongei a llechul el kirel a ungil me a mekngit. El uai tiang, a Rahab el oteruul el redil er a Kanaan a silobel ngii me a telungalek er ngii. A rechad er a Gibeon el mats er a Kanaan a dirrek el ulsiik a klechubechub, me tir me a rokui el ngelekir a mlo suobel.​—Josua 6:25; 9:3, 24-26.

 ROLEL E KE ULDIMUKL ER TIA EL TEKOI: Ngsebeched el suubii a klou a ultutelel el tekoi er a kerrekeriil el mlo er a rechad er a Kanaan. Ngdi kmedung e ngmei sel meldung el “sils el bo le mukerrekeriil er ngii e lobals el nguemed tirkel chad el diak lomekerreu er a Dios.” (2 Petrus 3:7) A lebetik a rengud er a Jehovah, e kede mo ngmai a klungioled sel bo lolekngemed a ringel er a klechad el okiu a lokngemedeterir tirke el loltngakl er a omengederederel.

A Jehovah a omeklatk er kid el kmo aike el omelilt el loruul a rechedam me a rechedil a ngar er ngii a lerellii er a rengelekir. A Tekingel a Dios a kmo: “Mngiltii a klengar. Bo le betik a rengmiu er a RUBAK el Dios er kemiu e molengesenges er ngii e bo le blak a rengmiu er ngii . . . kemiu ma ruldidellel a rsechiu.” (Duteronomi 30:19, 20) Aika ngtekingel a mekngit a blekerdelel el Dios me a lechub e ngtekingel a Dios el betik a rengul er a rechad e soal a bo lungil a omelilt er tir?