1. Ngera ngmla ngosuir er a chebechiil a ungil el rolel a cheldecheduch?

 A TA el odam er a Canada a kmo, “Ak bai kongei el mengoit a temek el obengkel a bechik er a kubengkel a ta er a chad.” Ngdirrek el dilu el kmo sel lobengkel a bechil e ngremuul aike el taem er a deurreng el lmuut el mo ungil e remuul a meringel el taem el mo beot. A bechiil el sechal er a beluu er a Australia a milluches el kmo, “Ngar er a chelsel a 11 el rak el ki bechiil, e ngdirkak a ta el sils el mochib el diak kungedecheduch er a bechik.” Ngdmu el kmo, a ungil el rolel a cheldecheduch a mla ngosuterir el mo kaumerang er a delongelir e mla lmuut el smisichii a chebechiielir. A odos er a beluu er a Costa Rica a milluches el kmo a ungil el rolel a cheldecheduch a mla ngosuir ngii me a bechil el mo dmeu a rengrir er a chebechiielir. Ngdmu el kmo, “Ngmla olekeed er kemam er a Jehovah e omekerreu er kemam er a omengesuseu, e okesengii a deleuill er kemam e dirrek el mla mekurulii a bltikerreng er kemam.”

2. Ngera uchul me ngmo meringel er a rebechiil el chad el chadecheduch?

² Ngar er ngii a ungil el rolel a cheldecheduch er a chelsel a chebechiielem? Ngulterekokl el mo er ngii a mondai er a rolel a cheldecheduch er a delongeliu a lebebil er a taem, e le kom di dul diak mcherrungel e dirrek el kakerous a blekerdeliu. (Rom 3:23) Kom locha chad er a kakerous el beluu e kakerous a rolel a okuruliu, me ngrullii me ngkakerous a rolel a omongedecheduch. Tiaikid a uchul me tirka el merriter a chebechiil el John M. Gottman me a Nan Silver a meluches el kmo, a rebechiil a kirir el mo er aike el sebechir el melasem el meruul er a ungil a rolel a cheldecheduch er a delongelir me lolemolem a chebechiielir.

3. Ngera mla ngosuterir a rubekel el mo ungil a chebechiielir?

³ A mesisiich el chebechiil a ousbech er a ducherreng el rullii el mo ungil, e sebechel el mo uchul a klou el deuil a  rengrir a rubekel. (Oli. 9:9) Ka molatk er a chebechiielel a Isak me a Rebeka. (Gen. 24:67) A Biblia a ochotii el kmo a bltikerreng er tir a millemolem el mesisiich er a klteketel a taem el lebechiil. Te betok el obekel er chelechang a dirrek el ungil a chebechiielir. Ngera el tekoi a mla ngosuterir? Te mla mo meduch el mesaod a uldesuir me aike el mera el ngar er a rengrir el oba delemedemek. Te dirrek el oba sekutaberreng e olecholt a bltikerreng, omengull me a klengariourreng. Me bo dosaod er a rolel e aika el blekeradel a mo ngosuterir a rubekel el mo ungil el chadecheduch.

4, 5. Ngmekerang a sekutaberreng e ngosuterir a rubekel el mo kaodengei?

⁴ A Osisechakl 3:13 a kmo: “Ngeltengat ngikel chad el mo mellomes a rengul, el ngikel nguu a sekutaberreng.” Me a tekingel a Dios a meskid a sekutaberreng me a llomeserreng el dousbech el mo uchul a ungil el chebechiil. (Monguiu er a Osisechakl 24:3.) El ua tiang, a Genesis 2:18 a kmo a Dios a milebii a redil el mo kldemel a sechal. Ngmilebii a redil el kuk ngodech er a sechal me bo el sebechir el ungil el kaukledem. Sei a uchul me ngkakerous a rolel a longedecheduch a sechal me a redil. A ruumesingd el redil a sorir el ouchais a uldesuir e mesaod er a rechad me a deleuill. A dmolech e ungil el rolel a cheldecheduch a rulleterir el mo melechesuar a bltikerreng. Engdi a rebetok el sechal a diak el sorir el mesaod aike el ngar er a rengrir, e ngbai sorir el mesaod a tekoi el ua ureor me a omilil, me a mondai me a semecheklel a mondai. Te dirrek el sorir el mo medengei el kmo a rechad a mengull er tir.

⁵ A ta el odos er a beluu er a Britain a kmo, “A bechik a di soal el mereched el sumecheklii a mondai er a bai lorrenges er ngak.” Ngmesaod el kmo, ngsebechel el kmal mo meringel e le ngdi soal a bechil a bo lorrenges er ngii e bo lodengelii a uldesuel. A ta er a sechal a kmo, “Sera kibo bechiil e ngmle blekerdelek el soak el mereched el mesmechokl a mondai er a mechas er ngak.” Engdi ngmlo melechesuar el kmo a bechil a di mle soal a lorrenges er ngii el ouchais a uldesuel. (Osi. 18:13; Jak. 1:19) A bechiil el sechal el oba sekutaberreng a medengelii a uldesuel a bechil me ngsoal el rullii el mo melechesuar el kmo ngbetik a rengul er ngii. Ngkirel el ochotii el mo er ngii el kmo ngomes a uldesuel el meklou a ultutelel. (1 Pe. 3:7) A bechiil el redil el oba sekutaberreng a melasem el mo medengelii sel rolel a bechil a lomdasu a tekoi. Me a rubekel el oltaut aike el tekoi el soal a Dios el kirel a chebechiil a mo dmeu a rengrir, e dirrek el mo sebechir el dmak el melib a telbilir el oba llomeserreng.

6, 7. (a) Ngmekerang a Olisechakl 3:7 e ngosuterir a rubekel el mo oba sekutaberreng? (b) Ngmekerang a bechiil el redil e oba sekutaberreng sel longedecheduch er a bechil? E ngera kirel a bechiil el sechal el meruul er ngii?

⁶ A rubekel a kirir el mo medengei el kmo ngar er ngii a “belsechel el di deluk ma belsechel el dongedecheduch.” (Oli. 3:7) A odos el mla bechiil el teruich el rak a mla mo medengelii sel ungil el taem el bo longedecheduch er a bechil. Me a lsekum ngomes er a bechil el kora oberaod a uldesuel el kirel a urerel me a ngerechelel, e ngmengiil el mo er sel ungil el taem e mochu mengedecheduch er ngii. E tia uchul me ngmla lmuut el mo ungil a rolel a cheldecheduch er a delongelir. Me a bechiil el redil sel longedecheduch er a bechil el oba delemedemek “er sel kirel belsechel,” e a bechil a mo soal el orrenges er ngii.​—Monguiu er a Osisechakl 25:11.

⁷ A Kristiano el sechal a kirel el rullii a ngerechelel el diak di lorrenges er a bechil e ngdirrek el ouchais er a uldesuel. A ta er a remechuodel el mla bechiil el 27 el rak a kmo: “Ngdiak el beot er ngak el ouchais er a bechik aike el tekoi el ngar er a renguk.” Me a odam el mla bechiil el 24 el rak a dmu el kmo, ngchetil el mesaod a mondai. Ngomdasu el kmo, a lsekum ngdiak losaod, e ngmo diak. Ngdilu el kmo, “Ak mla mo medengei el kmo sel kusaod er a uldesuek e ngdiak el belkul a kmo ak mechitechut. Me sel bo lemeringel er ngak el mengedecheduch, e ak meluluuch me bo el sebechek el ungil el mesaod  er ngak el oba delemedemek. E sola e omuchel kung el mengedecheduch.” Ngklou a ultutelel el kirir a rubekel el omes er a ungil el taem el bo lechadecheduch, el ua sel taem el di tir el tang el mesaod aike el bades er a bek el sils me a lechub e te dmak el menguiu er a Biblia.

8. Ngera ngosuterir a rubekel el mo sorir el ngodechii a rolel a longedecheduch?

⁸ Ngsebechel el mo meringel er a rubekel el ngodechii a rolel a longedecheduch. Engdi a rubekel el betik a rengrir er a Jehovah, e olengit er ngii me lebesterir a chedaol klisichel, e omes er a chebechiielir el chedaol, a mo sorir el melodech er a rolel a lechadecheduch. A ta er a odos el mla bechiil el 26 el rak a meluches el kmo: “Aki omes er a chebechiielam el oba osengel a Jehovah me ngdiak a ta el ki molatk el mo chacheroid. Tia mla rullemam el mo blak a rengmam el mesaod e mesmechokl a mondai er kemam.” Me a rubekel el olecholt er tiakid el rolel a blakerreng el mo er a Dios a mo odeuir a rengul e mo mukngeltengat er ngii.​—Psa. 127:1.

9, 10. Ngera el tekoi a kirir a rubekel el remuul me lemukeroul a bltikerreng er tir?

⁹ A bltikerreng a kot el klou a ultutelel el tekoi er a chelsel a chebechiil. Me a Biblia a kmo a bltikerreng a “semesemel a rokui el tekoi.” (Kol. 3:14) Cherengel a taem e a mera el bltikerreng a mukeroul er a delongelir a rubekel er a chelsel aike el ungil me a meringel el taem er a klengar er tir. Nglmuut el okesengii a deleuill er tir e dirrek el rulleterir el mo sorir el mengoit a taem el dmak el terung. Te okesengii a chebechiielir el diak lokiu sel loruul a bebil el meklou el tekoi el ua domes er a mubi me a TV, e ngbai okiu a mekekerei el tekoi el loruul er a delongelir. Ngsebechel el di klaiuechull, ungil tekoi me a omeruul, ungil klikm, me a lechub e ngtekoi el kmo, “ngmle ua ngera sils er kau?” A chouaika el mekekerei el tekoi a kmal klou a lerellii er a chebechiil. A rubekel el dmeu a rengrir e mla bechiil el 19 el rak a kmo, ngbek el sils el lekaudengua me a lechub e te outext me bo lekaodengei.

¹⁰ Sel lekaubltikerreng a rubekel e te melasem el mo kaodengei er a delongelir. (Fil. 2:4) Sel lemukeroul a klaodengei er a delongelir e a bltikerreng me ngdirrek el mukeroul alta e te dul ngar er ngii a chelitecheterir. Me a ungil el chebechiil a lmuut el mo mesisiich er a cherengel a taem. Me a lsekum ke bechiil e di lekau el oker el kmo: ‘Ngua ngera klemedengei er ngak el kirel a bechik? Ak medengei a soal me a uldesuel el kirel a tekoi? Ak blechoel el melatk aike el blekerdelel el uchul me ngmlo soak el mo bechil?’

11. Ngera uchul me a omengull a klou a ultutelel er a chelsel a chebechiil? Mosaod er a kerebai el ngar er a Biblia.

¹¹ Ngmo lmuut er a ungil el chebechiil me ngdiak el mecherrungel. Me a lebebil er a taem e a rubekel a sebechir el mo kakerous a uldesuir, el di ua Abraham me a Sara. (Gen. 21:9-11) Engdi tiang a dimlak longitechut er a chebechiielir. E ngera uchul? E le te mle kakull el terung. El ua tiang, a Abraham a dilu er a Sara el kmo, “ak ulengit er kau.” (Gen. 12:11, 13) Me a Sara a ullengesenges er a Abraham e ulemekedong er ngii el “rubak.” (1 Pe. 3:6) Engdi a rubekel el mekngit a ngerir sel lechadecheduch a ochotii el kmo ngdiak lekakull. (Osi. 12:18) Me sel bo lak lekakull, e ngsebechel el metemall a chebechiielir.​—Monguiu er a Jakobus 3:7-10, 17, 18.

12. A rubekel sel lekot el mo bechiil, e ngera uchul me ngkmal kirir el mo olecholt a omengull sel lechadecheduch?

¹² A rubekel sel lekot el mo bechiil, e ngkirir el mesuub el mo ungil chadecheduch e mo kakull er a delongelir. Tiang a rullii el mo beot er tir el bleketakl el chadecheduch er a delongelir. A ta el bechiil el sechal a mesaod el kmo aike el kot el rak er a chebechiielir e ngdimlak lekaodengei a uldesuir, omerellir me aike el lousbech. Me a lebebil er a taem e tiang a rirellii a chebechiielir el mo meringel. Engdi ngmle sebechir el mekurulii a ungil el deleuill er tir el okiu a tabesul el rolel a cheldecheduch me a ngellakel. Ngdmu el kmo, ngklou a ultutelel el mle kirir el olecholt a klengariourreng e mo klou a rengrir e dirrek el mo ultuil a klaumerang er tir er a Jehovah. Me tiang a ungil el uleklatk el kired el rokui!

13. Ngera uchul me a klengariourreng a klou a ultutelel er a chelsel a chebechiil?

¹³ A rubekel a sebechir el chadecheduch el oba delemedemek me a budech a lsekum te ‘oba ngariourreng.’ (1 Pe. 3:8) A ta el odam el mla bechiil el 11 el rak a melekoi el kmo, a klengariourreng a ngosuterir a rubekel el mo sumechokl a mondai er tir e le ngmo sebechir el dmu el kmo, “mousubes.” A ta er a remechuodel el dmeu a rengul e mla bechiil el 20 el rak a kmo, “A lebebil er a taem e a tekoi el ‘mousubes’ a lmuut el klou a ultutelel er a tekoi el ‘ngbetik a renguk er kau.’” Ngmilsaod er a rolel e a nglunguuch a sebechel el ngosuir ngii me a bechil el mo olecholt a klengariourreng.  Ngdmu el kmo, “Sel ki bo er a Jehovah el teru el obekel e aki muklatk el kmo ngdiak ki mecherrungel me a ki ousbech er a klechubechub er a Dios.” Tia ngosuterir el mo ngariou a rengrir e mo tabesul a osengir el kirel a mondai el lechelebangel er ngii.

14. Ngera ngrullii er a chebechiil a kldidairreng?

¹⁴ A kldidairreng a rullii el kmal mo meringel er a rubekel el mo ungil el chadecheduch e mesmechokl a mondai er tir. A kedidai a rengul el chad a chetil me a lechub e ngdiak el sebechel el dmu el kmo, “Mousubes er ngak e ak kmal mlo mekngit.” Ngdi mesaod er ngii me a lechub e ngoltelechakl er a ta er a chad. Me sel lebo lekesib a rengul e ngdiak lekengei el meruul er a budech. Ngmo mekngit el mengedecheduch me a lechub e ngdi mo lmuk e diak longedecheduch. (Oli. 7:9) Me a kldidairreng a sebechel el tomall a chebechiil. Lak dobes el kmo, “A Dios omtok er a re mekedidai a rengrir, e ngdi ng omesterir a krasia a re ngariou a rengrir.”​—Jak. 4:6.

15. Ngmekerang a Efesus 4:26, 27 e ngosuterir a rubekel el mo mesmechokl a mondai er tir?

¹⁵ Sel lebo lekakerous a uldesuir a rubekel el kirel a tekoi, e ngkirir el mereched el mesmechokl er ngii er a bai longididai a rengrir. A Paulus a dilu er a Rekristiano el kmo: “Lak bechere klsbengel a rengmiu me le ngikemiu el mor a klengit, e lak di le kesib a rengmiu el ongeltii a sils. Lak ko bsa techall a Diabelong.” (Efe. 4:26, 27) Ngera sebechel el mo duubech a lsekum a rubekel a diak lotireklii tia el ulekrael el ngar er a Tekingel a Dios? A ta el odos a kmo: “Tiang a mlo uchul a kmal mekngit el cheliuek!” Ngbai ungil a bo doba delemedemek e demereched el mesmechokl er a mondai. Engdi a kot, e a rubekel a ousbech a taem el mo chelellakl a rengrir er a uchei er a bo losaod er a mondai. Ngdirrek el kirir el meluluuch el mo er a Jehovah me lengesuterir el mo ngariou a rengrir. Tiang a rulleterir el mo diak di lolatk er a di tir e bai mo osiik a rolel e te sumecheklii a mondai.​—Monguiu er a Kolose 3:12, 13.

16. Ngmekerang a klengariourreng e ngosuterir a rubekel el mo omes a duch er tir me a ungil el blekerdelir el mekreos?

¹⁶ A klengariourreng a ngosuterir a rubekel el mo omes a duch er tir me a ungil el blekerdelir el mekreos. El ua tiang, a bechiil el redil el ngar er ngii a ileakl el duch er ngii a ousbech er ngii el mo uchul a klungiolel a telungalek. Me a bechil el sechal el ngariou a rengul a diak el kirel el omdasu el kmo ngkirel el mo meduch el ua bechil a loruul a tekoi e bai mo melisiich er ngii me lolemolem el meruul aike el lemeduch er ngii el tekoi. Me sel loruul el uaisei, e ngochotii el kmo ngbetik a rengul e omekerreu er ngii. (Osi. 31:10, 28; Efe. 5:28, 29) Me a ngariou a rengul el bechiil el redil a diak lousimang er ngii me a lechub e lolenguul er a bechil e le ngdiak lemeduch er a tekoi el ua ingii. Tir el terung el mla mo “tal chad” a uchul me a lsekum ngmekedidai a rengrir e ngdi mo uchul a telemellir.​—Mt. 19:4, 5.

17. Ngera sebechel el ngosuir a chebechiil me lebo er ngii a deurreng er ngii e dirrek el kobkellii a Dios?

¹⁷ Ngulterekokl el soam a chebechiielem a bo leua chebechiielel a Abraham me a Sara me a lechub a Isak me a Rebeka. Ngulterekokl el soam a chebechiielem a lebo er ngii a deurreng, e lolemolem, e dirrek el mo kobkellii a Jehovah. Me bo moba osengel a Dios el kirel a chebechiil, e momekeroul er a sekutaberreng el oeak a Tekingel. Molisiich a ungil el blekerdeliu me loleketek a bltikerreng er a delongeliu. (Sal. 8:6) E bo leblak a rengmiu el omekeroul a klengariourreng e molecholt a omengull el mo er a rebechemiu. Me sel moruul aika el tekoi, e ngmo er ngii a deurreng er a chebechiieliu e dirrek el mo uchul a deuil a rengul a Demmiu el ngar er a eanged. (Osi. 27:11) A ta el odam el mla bechiil el 27 el rak a dmu el kmo: “Ngkmal diak el sebechek el kiei el cheroid er a bechik. A chebechiielam a di merael el mo mesisiich er a bek el sils, e le ngbltkil a rengmam el mo er a Jehovah me a ungil el rolel a cheldecheduch er a delongelam a uchul.” Me a chebechiielem a dirrek el sebechel el mo uaisei!