1. Ngera uchul me a Jehovah a ngike el kot el ngarbab el omerk er a klumech?

 A JEHOVAH EL DIOS a kot el ngarbab e dirrek el mle kot el mo omerk er a ungil chais. Sera bo lomtok a Adam me a Eva e a Jehovah a mle mereched el dmu el kmo a Satan el Diabelong a mo nguemed. (Gen. 3:15) Me a cherengel a taem e a Jehovah a ulechotii a rolel e ngmo mengikiid er a ngklel e sumechokl a mondai el Satan a ulemekdubech. Ngdirrek el ulechotii a rolel e a rechad a sebechir el nguu a omelatk el mo kiei el mo cherechar el ngii a tekoi el lurridii a Adam me a Eva. Aika el rokui el ungil chais a ngar er a Tekingel a Dios el Biblia.

2. (a) Ngoeak a ngera el rolel e a rechanghel a omerk er a ungil chais? (b) Ngera el kerebai a lekiltmeklii a Jesus el kirel a berkel a ungil chais?

² A rechanghel a dirrek el omerk er a ungil chais e olengeseu er a rechad el omerk er a ungil chais el ngar er a chutem. (Lk. 1:19; 2:10; Rel. 8:26, 27, 35; Och. 14:6) E kuk mekerang ngike el ngarbab el anghel el Mikael? Sera lengar er a chutem el mle Jesus e sel kot el klou a ultutelel el ureor el lurruul er ngii a berkel a ungil chais. Me a kerebil a ochotii el kmo a berkel a ungil chais a dirrek el kirel el mo sel kot el klou a ultutelel el ureor el doruul er ngii.​—Lk. 4:16-21.

3. (a) Ngerang a ungil chais el domerk er ngii? (b) Ngera el ker a kired el onger?

³ A Jesus a dilu er a redisaiplo er ngii el kmo ngkirir el mo omerk er a ungil chais. (Mt. 28:19, 20; Rel. 1:8) A apostol el Paulus a dilu er a Timothy el kmo: “Momerk er a Ungil Chais, e moruul a ikel rokui el ngerchelem kau el mesiungel a Dios.” (2 Ti. 4:5) Ngera sel ungil chais el domerk er ngii? Kede ouchais er a rechad el kmo a Demad el ngar er a eanged el Jehovah a betik a rengul er kid. (Jn. 3:16; 1 Pe. 5:7) Me a Rengedel a Dios a olechotel a bltkil a rengul el mo er a klechad. Kede dirrek el ouchais er a rechad el kmo a lsekum te mo chedal a Rengedel, e olengesenges er ngii e meruul a llemalt, e ngsebechir el mo sechelil. (Psa. 15:1, 2) A Jehovah a mo choroid a rokui el ringel, el uldimukl er a  kngtil a rengud el tekoi el dilubech er a ngar er a mong a uchul. Tiang a kmal ungil chais! (Isa. 65:17) Me kid el omerk er a ungil chais a kired el onger aika el eru el meklou a ultutelel el ker el kmo: Ngera uchul me a rechad a kirir el rongesii a ungil chais er chelechang? E kede mekerang e mo ungil el otutii a ngerecheled el mo omerk er a ungil chais?

4. Ngera el blulak el tekoi el kirel a Dios a lorrenges a rechad?

⁴ Ka molatk, oleko chad a omulak er kau el kmo a demam a mla merael e choitau kau me a telungalek er kau. Ngdmu er kau el kmo a demam a diak el soal el mo medengelkau, e dirrek el lomart a tekoi er kau, e mekngit a omerellel. E dirrek el dmu er kau el kmo a demam a mla mad me ngdiak a belkul el molasem el osiik er ngii. A rebebil a melekoi a osisiu el tekoi el kirel a Dios. Te kmo ngmekngit a blekerdelel e meringel er kid el mo medengelii. A rebebil el mengeteklel a klechelid a olisechakl el kmo a Dios a omals er a remekngit el chad er a beluu er a ngau el diak a ulebengelel. E a rekuk bebil a melekoi el kmo a Dios a uchul a meklou el telemellel a beluu el ngii a omekcharm er a rechad. Me alta e aika el tellemall a mekodeterir a rungil me a remekngit el chad engdi te melekoi el kmo a Dios a ousbech el omals er a rechad.

5, 6. Ngua ngerang a telemellel a osisechakl el kmo kede mla er a mongkii el mei me a osisecheklel a klsuul el klechelid?

⁵ A rebebil a melekoi el kmo ngdiak a Dios me kid a mla er a mongkii el mei. Me tirke el oumerang er tia el tekoi a kmo ngdiak a Ulemeob me a rokui el ngar a dimlak a chad el omeob. Me a rebebil a melekoi el kmo, a rechad el mla er a charm el mei a uchul me a lebebil er a taem e ngmekngit a omerellir e di melatk er a di tir. Me a rekuk bebil a melekoi el kmo ngblechoel el mo er ngii a chelebirukel e le te oumerang el kmo ngkirel a mesisiich el chad el mo mekngit a omerellel el mo er a remechitechut el chad. Me a rechad el oumerang el kmo kede mla er a mongkii el mei a diak a ulterekokl el omeltkir el kirel a ngar er a mederir el taem.

⁶ A osisechakl el kmo kede mla er a mongkii el mei me a dirrek el osisecheklel a klsuul el klechelid a bebil er a uchul me a rechad a chuarm er chelecha el taem er a ulebongel. (Rom 1:28-31; 2 Ti. 3:1-5) Chouaika el osisechakl a diak lungil chais. A apostol el Paulus a bai millekoi el kmo aika el osisechakl a uchul me a “bderrir a di milkolk,” e “diak a ruklir er sel klengar el ngar a Dios el mei.” (Efe. 4:17-19) A osisechakl el kmo kede mla er a mongkii el mei me a osisecheklel a klsuul el klechelid a dirrek el uchul me a rebetok el chad a diak lekengei er a ungil el chais el mla er a Dios el mei.​—Monguiu er a Efesus 2:11-13.

7, 8. Ngerang a di ta el rolel e a rechad a mo medengelii a ungil chais?

⁷ A rechad a kirir el mo oumerang el kmo ngar er ngii a Dios e medengei el kmo ngmo uchul a klungiolir a bo lodengelii er a uchei er a bo lomak a deleuill er tir el obengkel. Me ngsebeched el ngosuterir el mesuub el kirel a Dios el okiu sel dolisiich er tir el mo mesuub el kirel a blebelel. Me a rechad sel lomes a rokui el bleob el meliuekl er tir e bo lekerekikl el omtab aike el leues e ngmo sebechir el mesuub el kirel a llemesel a rengul a Dios me a dirrek el klisichel. (Rom 1:19, 20) Kede mekerang e ngosuterir a rechad el mo medengei el kmo a rokui el blebelel a Dios a kmal mengasireng? Ngsebeched el ousbech a eru el babier el Was Life Created? me a The Origin of Life​—Five Questions Worth Asking. Engdi ngar er ngii a bebil er a ker el diak el sebechel a chad el onger el di okiu a omesubel er a blebelel a Dios. El ua tiang, ngdiak el sebechel el suubii a uchul me a Dios a omechei a ringel me ngmelemolem, me sel moktek er a Dios el kirel tia el chutem, me a lechub e bo lodengei el kmo a Dios a omekerreu er a derta er kid.

⁸ A di ta el rolel e kede mo medengelii a ungil  chais el kirel a Dios me a moktek er ngii a sel dosuub er a Biblia. Kede oba ileakl el techall el mo sebeched el ngosuterir a rebebil el mo medengelii a ungil chais! Engdi a lsekum ngsoad el mo ungil el ngosuir a chad el mo oumerang er a Dios e mo sechelil, e ngdiak el sebeched el di osisecheklii er a klemedengei er a Biblia e lemerekong. Ngkired el ngosuir el mo medengelii a uchul me ngkirel el mo oumerang er a Dios. (2 Ti. 3:​14) Me ngkired el mesuub el mo meduch el olisechakl er a rechad el ua Jesus. Ngera uchul me ngmle meduch el olisechakl er a rechad? A ta er a uchul a ngii el kmal mle meduch el ousbech a ker. Kede mekerang e oukerebai er ngii?

9. Ngera kired el meruul er ngii a lsekum ngsoad el ngosuterir a rechad el mo oumerang er a ungil chais?

⁹ Ngera uchul me ngkired el oker a ker el ua Jesus sel doldingel a obliil? Ka di molatk er a toktang el dmu er kau el kmo ngkirem el mo er a klou el botk. Ke locha mo oumerang er ngii. Engdi ke mo mekerang a lsekum e ngdmu er kau aika el tekoi el di diak lomuchel el oker a ker el kirel a klisichel a bedengem? Seikid e ke locha mo diak moumerang er ngii. Ngmo lmuut er a meduch el toktang me ngkirel el oker a ker e kerekikl el orrenges er a chad er a uchei er a bo lolengeseu er ngii. Me a lsekum ngsoad el olengeseu er a rechad el mo oumerang er a ungil chais el kirel a Renged, e ngkmal kired el mesuub el mo meduch el ousbech a ker me bo dodengei el kmo ngera ngousbech a chad.

10, 11. Ngmo sebeched el mekerang a lsekum kede oukerebai er a rolel a lolisechakl a Jesus?

¹⁰ A Jesus a mle medengei el kmo a sensei a sebechel el ousbech a ker el mo medengelii a uldesuel a chad e dirrek el ngosuir el mo omdasu e ouchais er a uldesuel. El ua tiang, sel taem el Jesus a mle soal el olisechakl er a redisaiplo er ngii el kirel a klengariourreng e ngulemuchel el oker a ker el meruul er tir el mo omdasu. (Mk. 9:33) Ngmle ta el taem el uleker a ker er a Petrus e ullecholt a eru el nger er ngii e sola e dilu er ngii me ngmelilt er a melemalt el nger er ngii. Tiang a ngilsuir a Petrus el suubii a klou a ultutelel el tekoi. (Mt. 17:24-26) E a kuk ta er a taem e ngmle soal a Jesus el mo medengei a ngar er a rengrir a redisaiplo er ngii me nguleker a bebil el ker el ngosuterir el mo ouchais a ngar er a rengrir. (Monguiu er a Mateus 16:13-17.) A Jesus a dimlak di losaod a tekoi el kirir a rechad el meruul. Ngbai uluusbech er sel rolel a loker a ker el ngosuterir el mo kongei er a ungil chais e dirrek el mo sorir el melodech a klengar er tir.

¹¹ Sel dosuub er a rolel e a Jesus a uluusbech a ker e kede mo medengelii a ungil el rolel e kede ngosuterir a rederta el chad el debetik er tir sel doldingel a obliil. Kede dirrek el suubii a rolel e ngsebeched el mesaod a tekoi el mo er a chad el kuk ngodech a uldesuel. Kede dirrek el mo osisecheklterir a rechad el mo uchul a klungiolir. Me chelechang e kede mo mesaod a edei el kerebai el ochotii a rolel e ngsebeched el mo ungil el ousbech a ker.

12-14. Ke mekerang e ngosuir a ngelekem el mo ulterekokl a rengul sel lomerk er a ungil chais? Mosaod a kerebai.

¹² 1 el Kerebai: Ke mo mekerang a lsekum a ngeasek el ngelekem a medakt el mengedecheduch er tirke el ledak el ngar er a skuul el mesaod er a rolel e a Dios a ulemeob a rokui el tekoi? Ke mekerang e ngosuir el mo ulterekokl a rengul sel longedecheduch er tir? Lak di moungeroel er ngii me a lechub e di mosaod a tekoi el bo lolekoi e bai bo mua Jesus el oker er ngii a ker el mo ngosuir el olecholt er a uldesuel. Ke mekerang a omoruul er tiang?

 ¹³ Mobengkel a ngelekem el menguiu a bebil er a tekoi el ngar er a babier el The Origin of Life​—Five Questions Worth Asking. Me a uriul er a cho momes aike el eim el ker el ngar er tia el babier, e moker er ngii el kmo ngera er ngii a lesemeriar er ngii. Molisiich er ngii el mo melatk a bebil el uchul me ngoumerang er ngike el Ulemeob e ngera uchul me ngsoal el mesiou er a Dios. (Rom 12:2) Mouchais er a ngelekem el kmo ngdi ungilbesul a lsekum a uldesuel a kuk ngodech er a uldesuem.

¹⁴ E sola e mouchais er a ngelekem el kmo ngsebechel el mengedecheduch er a ngalek er a skuul el oltirakl er tiaikid el rolel a omongedecheduch er ngii. Ngsebechel el ouchais er ngii a bebil el tekoi el kirel a blebelel a Dios e oker er ngii er a uldesuel. El ua tiang, ngsebechel el dmu er a ngalek er a skuul me ngmenguiu er a baks el ngar er a page 21 sel babier. E ngii el ngelekem a oker er ngii el kmo, “Ngmera el tekoi el sebechel a DNA el oltekau a kmal betok el tekoi el kuk betok er a ngii di el computer er a beluulechad?” Me ngike el ngalek er a skuul a locha mo kongei. E seikid e a ngelekem a sebechel el oker er ngii el kmo, “Kede medengei el kmo ngar er ngii a chad el mirruul er a computer me a omomdasu a DNA ngsebechel el di ngii el duubech?” A lsekum e ke blechoel el melasem a chouaika el cheldecheduch el obengkel a ngelekem e ke ngosuir el mo ulterekokl a rengul sel longedecheduch er a rechad el kirel a klaumerang er ngii. A lsekum ke osisecheklii a ngelekem el mo meduch el ousbech a ker e ke ngosuir el mo meduch el omerk er a ungil chais.

15. Kede mekerang e mo ungil el oker a ker sel dongedecheduch er a chad el diak loumerang er a Dios?

¹⁵ 2 el Kerebai: Sel doldingel a obliil e ngsebeched el mo metik er a chad el oumededenger er a Dios me a lechub e ngdiak loumerang er a Dios. Ngdirk sebeched el mengedecheduch er ngii. Ngsebeched el oker er ngii el kmo ngua ngera klteketel el lomdasu el uaisei e ngera uchul me ngtilbir el mo diak loumerang er a Dios.  Me sel bo dodengelii a uldesuel e ngsebeched el chemat er ngii e le ngulterekokl el ulemdasu el kirel a klaumerang er ngii. Me ngsebeched el oker er ngii a lsekum e ngmo kongei el menguiu er a babier el mesaod a olechotel el kmo ngar er ngii a Ulemeob. A lsekum e ngkongei, e ngsebeched el msang a babier el Was Life Created? me a lechub e ngbabier el The Origin of Life​—Five Questions Worth Asking. Sel doba delemedemek e doba omengull el oker a ker, e ngsebechel el mo uchul e ngika el chad a kongei er a ungil chais.

16. Ngera uchul me ngkired el osisecheklii a chad el mesuub er a Biblia el mo diak di longuiu a nger er ngii er a babier?

¹⁶ 3 el Kerebai: Sel dosuub a Biblia el obengkel a chad e ngera sebechel el mo duubech a lsekum kede mecherei me ngdi omelekl a nger el llechukl er a babier? Nglocha mo meoud a klaumerang er ngii el olengeriakl. E ngera uchul? E le a chad el di omelekl a nger er ngii el diak lomdasu a sebechel el mo ua dellomel el di meched a risel. Ngsebechel el mo mechitechut er sel taem el rechad a mo omtok er ngii. (Mt. 13:20, 21) Me a lsoad el ngosuir a chad el mesuub e ngkired el oker er ngii er a uldesuel el kirel a tekoi el losuub. Molasem el mo medengei el kmo ngkongei a tekoi el losuub me a lechub e ngdiak, e ngera uchul me nguaisei a uldesuel. E mngesuir el mo meduch el mesaod a Bades me bo el sebechel a tekoi el loumerang el mo mengai a uchetemel er a Biblia. (Heb. 5:14) Sel bo dungil el ousbech a ker e ngsebeched el ngosuir ngika el mesuub el mo mesisiich a klaumerang er ngii, e melemolem el blak a rengul sel lengar er ngii a omtok me a lechub e ngmelasem el mengeuid er ngii. (Kol. 2:6-8) Ngera lmuut el bebil er a tekoi el sebeched el remuul me bo dungil el omerk er a ungil chais?

17, 18. Ke mekerang e ngosuir a chad er sel taem el longedecheduch er a chad er a blai?

¹⁷ A Jesus a uleldurech er a rederteru el disaiplo er ngii el mo omerk er a klumech. (Mk. 6:7; Lk. 10:1) E a uriul e a apostol el Paulus a milsaod el kirir a rechad el ‘ledilak loureor’ el omerk er a ungil chais. (Fil. 4:3) Me ngar er a rak er a 1953, e a cheldebechelel a Dios a ulemuchel el meruul a prokuram el melisiich er a rechad el oldingel a obliil el mo olisechakl er a rebebil el mo meduch el oldingel a obliil.

¹⁸ Ngera sebechem el meruul er ngii el olengeseu er a chad sel mobengkel er sel taem el longedecheduch er a chad er a blai? (Monguiu er a 1 Korinth 3:6-9.) Momes a bades el ousbech er a Biblia er kau. Bo mungil el lorrenges er ngii sel longedecheduch me bo el sebechem el olengeseu er ngii el mesaod a tekoi a lsekum e ngousbech a ngeso. (Oli. 4:12) Engdi bo mkerekikl me lak mongesang er ngii a lsekum e ngmla mechelii a ungil el cheldechedechal me a lechub a chad er a blai a mla omuchel el mengedecheduch. A lsekum ke dobengii a cheldechedecherir e ngsebechem el mengitechut er ngii me a lechub e ke rullii a chad er a blai el mo rrau a rengul. Ngdiak lemekngit sel moltobed er a kedeb el uldesuem engdi ngkirem el mecherei me nglomelemii a cheldechedechal.

19. Ngera kired el melatk er ngii, e ngera uchul?

¹⁹ Kom mekerang e sebechiu el kaingeseu er sel taem el mdak el oldingel a obliil? Mousbech a temiu el mesaod a rolel e ngsebechiu el lmuut el mo ungil el omuchel a cheldecheduch. Bo mkerekikl me lak mosaod a mekngit el kirir a rechad el ngar sel basio el moldingel er ngii. E lak mongeremrum el kirir a rudam me a rudos er kemiu. (Osi. 18:24) Lak dobes el kmo ngdiak a ta er kid el cherrungel. Ngoeak a ungil el omerellel a Jehovah e ngmla meskid a sengk el mo sebeched el ouchais er a ungil chais e dirrek el mla osisecheklid er a rolel a dolisechakl er a rechad. (Monguiu er a 2 Korinth 4:1, 7.) Me kid el rokui bo dochotii a omereng el saul er kid el kirel a ungil chais el okiu sel debo er a tkurrebab el sebeched el mo ungil el omerk er a klumech.