Kau ngmla ta el bo mchelebangel a tekoi er a omengetukel? Ngmla ta el moruul a babilengem e lak lekengei er ngii, me a lechub e te diak lekengei el olengeseu er kau e mekngit a omerellir el bedul kau e le ke chad er a ngodech el beluu, e ngodech a chiro er a bedengem, e ngariou a deruchellem er a buai? A lsekum e nguaisei, e bo modengei el kmo tiang a dirrek el mla duubech el mo er a rebetok el chad. Engdi ngar er ngii a ungil el chais: A chouaika el mekngit el omeruul alta ngar er ngii er tia el beluulechad, engdi ngkmal diak debetik er a eanged. A apostol el Petrus a kmal mle ulterekokl a rengul er a ledu el kmo: “A Dios a meral di osisiu er a rengul a re bek el chad.”​—Monguiu er a Rellir 10:34, 35.

A Petrus a millekoi aika el tekoi er a lengar er a blil a chad er a Chisentael el Kornelius a ngklel. A Petrus a mlechell el chad er a Judea, e kiliei er a taem el rechad er a Judea a ulemes er a Rechisentael el diak leklikiid me ngdimlak el kirir el obengterir. Me ngera uchul me a Petrus a mla er a blil a Kornelius? E le Jehovah el Dios a kiltmeklii tia el miting er tir. A Petrus a ngiluu a ues el mla er a Dios e rirenges aika el tekoi el kmo: “A ikel bla ledu Dios el kmo ng klikiid, lak momdasu el kmo ng diak le klikiid.” A Petrus a dimlak lodengei el kmo a ta el sils er a uchei, e a Kornelius a dirrek el milsang a ues el mla er ngii a anghel el dilu er ngii el mo omekedong er a Petrus. (Rellir 10:1-15) A Petrus er a bo lolechesuar el kmo a Jehovah a kiltmeklii tia el tekoi, e ngdimlak lemeterob el mengedecheduch.

A Petrus a dilu el kmo: “Ak mocha medengei el kmo a Dios a meral di osisiu er a rengul a re bek el chad.” (Rellir 10:34) A tekoi er a Grik el “omengetukel” a belkul a kmo “omes a mederir a rechad.” (The Kingdom Interlinear Translation of the Greek Scriptures) A ta el chad el mesuub a Biblia a mesaod el kirel tia el tekoi el kmo: “Tiang a mesaod el kirel a chad er a kerrekeriil el di omes er a medal a chad e otebedii a kerrekerilel, me ngdiak loltirakl aike el tekoi el kirel tia el kerrekeriil, e ngbai di ultuil er ngii el kmo ngsoal ngika el chad me a lechub e ngdiak.” A Dios a diak di lekengei er a chad e le ngchad er a ngodech el beluu, e ungil a deruchellel er a buai me a lechub e ngkuk bebil er a tekoi.

A Jehovah a bai omes aike el ngar er a rengud. (1 Samuel 16:7; Osisechakl 21:2) A Petrus a dilechelii el kmo: “Tirikel meluu ra Dios e meruul a llemalt a le ngiiteterir ra bek el beluu.” (Rellir 10:35, BT) A doluu er a Dios e ngbelkul a kmo kede olecholt a omengull, e mengebkall e oumerang er ngii, e olechib er kid er a ngii di el ngerang el diak lodeuir a rengul. A bo doruul a llemalt e ngbelkul a kmo kede kongei el meruul aike el tekoi el melemalt er medal a Dios. A Jehovah a dmeu a rengul er a chad el mera el ngar er a rengul e meruul a melemalt el tekoi.​—Duteronomi 10:12, 13.

A lsekum e ngmla ta el bo mchelebangel a tekoi er a omengetukel, e ngar er ngii a ungil el uchul e ngsebechem el nguu a omelisiich er a tekingel a Petrus el kirel a Dios. A Jehovah a omekrael er a rechad er a rokui el renged el mo er a mera el omengull. (Johanes 6:44; Rellir 17:26, 27) Ngorrenges e onger a nglunguchir tirke el mengull er ngii alta te chad er a kakerous el beluu, el kakerous a deruchellir er a buai. (1 King 8:41-43) Ngsebechel el mo ulterekokl a rengud el kmo a Jehovah sel lengar er a eanged e lomes el mei er iou e ngdi omes er a rechad e merekong. Kau ngsoam el mo mesuub a lmuut el betok el kirel ngika el Dios el diak longetukel er a rechad?