1, 2. Ngokiu techang e a Jesus a omeka er kid er chelechang, e ngera me ngklou a ultutelel el bo dodengelii?

 A TA el odos a ulechotii a deuil a rengul er a loluches er a babilengel el mo er a rudam el oureor er sel klou el obis er kid el ngar er a Merikel el kmo: “Rudam, ngdiak el sebechek el mechur a taem el kemiu a mla meskak a suobel el mesaod er a tekoi el ngak a kmal ousbech er ngii.” Kau, ngdirrek el uaisei a uldesuem? A rebetok er kid a uaisei. Me tiang ngkora beches el tekoi? Ngdiak.

² A suobel el dengai er a ungil el blsechel a ochotii el kmo a Jesus el ngii a Bdelul a ongdibel a otutii a telbilel el kmo ngmo omeka er kid el ousbech a Tekingel a Dios. Ngmeruul er tia el tekoi el okiu techang? A Jesus er sera losaod el kirel a olangch er a demiel, e ngdilu el kmo ngmo ousbech er a “blak a rengul e mellomes a rengul el mesiou” el mo omesterir a rebebil el mesiou “a kelir er sel belsechel.” (Monguiu er a Mateus 24:45-47.) A Jesus a ousbech er ngika el blak a rengul el mesiou el omeka er a rultirakl er ngii er chelecha el taem er a ulebongel. Me ngklou a ultutelel el bo dodengelii ngika el mesiou, e le klisichel a klaumerang er kid me a deleuill er kid me a Dios a ultuil er a kall el dolai el okiu ngii.​—Mt. 4:4; Jn. 17:3.

3. Ngera sel dimla omesodel a babilenged el kirel a okesiu er a blak a rengul el mesiou?

³ Me ngera belkul a okesiu er a Jesus el kirel a blak a rengul el mesiou? A uchei e a babilenged a mle ua tiakid a omesodel: Ngar er a Pentekost er a rak er a 33, e a Jesus a tiltkii a blak a rengul el mesiou el mo oungerachel er tirke el bebil el mesiou. Me ngika el mesiou a omtechei er tirke el rokui el ngellitel el Kristiano er a beluulechad el ua ta el cheldebechel el ulemuchel er seikid el taem el mei er chelechang. Me tirke el bebil el mesiou a melutk el mo er a rederta er tirka el ngellitel. E sera rak er a 1919, e a Jesus a tiltkii a blak a rengul el mesiou el mo “oungerachel a rokui el kloklel” el ike el tekoi el kirel a Renged el ngar tia el beluulechad. Me nguaisei, engdi a ungil el omerriter  er a suobel me a omeluluuch a mileketeklii el kmo a klemedengei er kid er a tekingel a Jesus el kirel a blak a rengul e mellomes a rengul el mesiou a kirel el lmuut el obeketakl. (Osi. 4:18) Me deluut el mo merriter er tia el okesiu me sel uchul e ngar er ngii a lerellii er kid, alta e kede oba omelatk el mo kiei er a eanged me a lechub e ngtia el chutem.

4-6. Ngera uchul me ngsebeched el melekoi el kmo a okesiu er a Jesus el kirel a blak a rengul el mesiou a ulemuchel a otutel er a uriul er a rak er a 1914?

⁴ Aike el Bades er a uchei me a uriul er a okesiu el kirel a blak a rengul el mesiou a ochotii el kmo ngdimlak el taut tia el tekoi er a Pentekost er a rak er a 33, ngbai mo tmaut er a taem er a ulebongel. Me bo desang el kmo ngmekerang a Bades e meketeklii tia el tekoi.

⁵ A okesiu el kirel a blak a rengul el mesiou a telkib er a ulochel a Jesus el kirel a “olechotel sel [lemei], e mo oingera ulebongel er a beluulechad.” (Mt. 24:3) Sel telkib er a uchelel tia el ulaoch el llechukl er a Mateus 24:4-22, a ngar er ngii a eru el otutel, el kot er ngii a ngar er aike el rak er a 33 el mo er a 70, e a ongerung a melutk el kirel chelecha el taem er kid. Me tiang belkul a kmo a tekingel a Jesus el kirel a blak a rengul el mesiou a mo er ngii a eru el otutel? Ngdiak.

⁶ Ngar er a tekingel a Jesus el llechukl er a Mateus 24:29, e ngulemuchel el di milsaod el kirel a tekoi el mo duubech er chelecha el taem er kid. (Monguiu er a Mateus 24:30, 42, 44.) Ngmilsaod el kirel a taem er a kloul ringel el kmo, a rechad a mo mesa “Ngelekel a Chad el mermang el ngar a eabed.” E dirrek el milengelechel er tirke el mo kiei er a taem er a uriul sils me di lemekar er a ledu el kmo: “Ng diak modengelii a le mer ngii a Rubak er kemiu,” me a “Ngelekel a Chad a mei er sel kmal diak momdasu el kmo ng mei er ngii.” * Me sera losaod aika el tekoi e ngdirrek el silodii a okesiu el kirel a blak a rengul el mesiou. Seikid a uchul me ngsebeched el melekoi el kmo a omesodel el kirel a blak a rengul el mesiou a ulemuchel a otutel er a uriul er a rak er a 1914, el ngii sel rak el lulemuchel a uriul sils. Me tia el omesodel a kmal bleketakl. E ngera uchul?

7. Ngera el klou a ultutelel el ker a mlo er ngii er sera lomuchel a temel a omeridm, e ngera uchul?

⁷ Ka di molatk er a ker el kmo: “Ng techa ngikel blak a rengul e mellomes a rengul el mesiou?” Sel taem er a rechapostol, e ngdimlak a ultutelel el doker er tia el ker. Ngar er sel mlo merek el suobel e kede silubii el kmo a rechapostol a mle sebechir el meruul a mengasireng el tekoi e a rebebil a dirrek el mlo sebechir el meruul aika el tekoi el okiu tir, el olechotel a kmo a Dios a uluusbech er tirka el apostol. (Rellir 5:12) Me a rechad a mle beot er tir el dongcheterir tirke el luluusbech er tir a Kristus el mo omekrael er a rechedal. Engdi a blekeradel a kuk mle ngodech er sera rak er a 1914. A temel a omeridm a ulemuchel er seikid el rak. Me ngmocha temel el bo loleakl a mekngit el dellomel er a ungil. (Mt. 13:36-43) Me sera lomuchel a omeridm e a klou a ultutelel el ker a mlo er ngii el kmo: Ngar er a delongelir tirka el mla mo betok el leko te Kristiano el melekoi el kmo te obengkel a Jesus, e ngmilekerang e sebechir a rechad el dongcheterir a rungil el dellomel el tir a ngellitel el Kristiano? A okesiu el kirel a blak a rengul el mesiou a milsterir a nger er tia el ker, e le ngulechotii el kmo a rengellitel el Kristiano a tirke el ngilai a betok el kall el okiu a Tekingel a Dios.

8. Ngera uchul me te di rengellitel a toketekii a chelechad er a blak a rengul el mesiou?

⁸ Te di rengellitel el Kristiano el ngar tia el chutem a toketekii a chelechad er a blak a rengul el mesiou. Tirkang a okedongall el “king el priist” e tir a mla mukngerachel el ‘momerk a chetengel chomerellel ngikel milekedongeterir era ilkolk losisebeterir ra mengasireng el llemesel.’ (1 Pe. 2:9, BT) Ngkmal melemalt el tekoi el kirir tirke el “king el priist” el olisechakl er a rekldemir er a klaumerang.​—Mal. 2:7; Och. 12:17.

9. Tirke el rokui el ngellitel el ngar tia el chutem te chedal a blak a rengul el mesiou? Mosaod.

⁹ Me tirke el rokui el ngellitel el ngar tia el chutem te chedal a blak a rengul el mesiou? Ngdiak. E  le ngdiak el rokui el ngellitel a oungerachel el merous er a Tekingel a Dios el mo er a rekldemir er a klaumerang el meliuekl er a beluulechad. Ngar er ngii a rengellitel el odam el tir a mesiou el mechuodel el ngar er aike el ongdibel el lengar er ngii me a lechub e te rudam el mesiou er a ongdibel. Te olisechakl er a rechad er a ongdibel me sel loldingel a obliil, e dirrek el blak a rengrir el olengesenges a ulekrael el mei el ngar sel klou el obis er kid el ngar er a Merikel. Engdi ngdiak el teloi er a ureor el merous er a Tekingel a Dios el mo er a rudam el meliuekl er a beluulechad. Te dirrek el ngar er ngii a rengellitel el odos el tir a kmal ngariou a rengrir me ngdiak lolasem el orribech a ngerechelir a rudam el olisechakl er a chelsel a ongdibel.​—1 Ko. 11:3; 14:34.

10. Ngtecha ngike el blak a rengul e mellomes a rengul el mesiou?

¹⁰ Me a leuaisei, e ngtecha ngike el blak a rengul e mellomes a rengul el mesiou? A mesiou a tirke el mekesai el ngellitel el odam el tir a mengetmokl e merous a tekingel a Dios er a temel a demiel a Kristus, el di ua omeruul el lurruul er ngii a Jesus er a irechar el ulemekang er a rebetok el okiu a chimorir a remekesai. Me ngar er a chelsel aika el uriul sils, e a rengellitel el odam el tir a toketekii a blak a rengul el mesiou a oureor el mesiou el ngar sel klou el obis er kid el ngar er a Merikel. Ngar er aika el mereko el betok el rak e a Chelechad er a Ruungerachel er a Resioning er a Jehovah a toketekii ngika el mesiou. Ngungil a bo dodengei el kmo ngar er a okesiu er a Jesus e ngdi milsaod el kirel a ta el “mesiou.” Me a Chelechad er a Ruungerachel a blechoel el dmak el tibir a ta el uldasu.

11, 12. (a) A blak a rengul el mesiou ngmukngerachel el mo meruul a ngera el eru el tekoi? (b) Ngoingerang e a Jesus a ulemekngerachel er a blak a rengul el mesiou el mo omekerreu er a rebebil el mesiou? E rua techang a lengilelteterir?

¹¹ Ngklou a ultutelel el bo dodengei el kmo ngar er a okesiu er a Jesus, e a blak a rengul e mellomes a rengul el mesiou a mukngerachel el mo meruul a eru el tekoi. A kot e ngkirel el omekerreu er a rebebil el mesiou. E a ongerung e ngkirel el mo oungerachel a rokui el kloklel a mastang er ngii. Tia el okesiu a mo tmaut er chelecha el taem er a ulebongel a uchul me ngika el mesiou a ngmai aika el ngerachel er a uriul er a rak er a 1914, el ngii a taem el ulemuchel er ngii a demiel a Kristus el King.

¹² Ngoingerang e a Jesus a ulemekngerachel er a blak a rengul el mesiou el mo omekerreu er tirke el bebil el mesiou? A omesodel a tekoi el dilubech er a uchelel a temel a omeridm er a rak er a 1914 a ngosukid el mo onger er tia el ker. Kede mla suubii el kmo, seikid el taem e ngkmal mle betok a cheldebechel el millekoi el kmo te Kristiano. Me a Jesus ngmo melilt er a rechad er a chelsel a ngera  el cheldebechel el mo toketekii ngii el mesiou? A nger er tia el ker a ulebeketakl er a uriul er a bo lorriter er a okesiu el templo ngii me a Demal er a rak er a 1914 el mo er a uchelel a rak er a 1919. * (Mal. 3:1) Ngmlo dmeu a rengrir el mesa kekerei el cheldellir a Remesuub er a Biblia el ulechotii el kmo ngkmal mle betik a rengrir er a Jehovah me a Tekingel. Me alta ngmla er ngii a bebil el tekoi el mle kirir el melodech, engdi ngmle ngariou a rengrir me te kilengei er a omesmechokl el mlo er tir er sel taem. (Mal. 3:2-4) Me tirka el mle blak a rengrir el mesuub er a Biblia a mera el Kristiano el tir a ungil el dellomel el ngar er sel okesiu er a Jesus. Me sera rak er a 1919 e a Jesus a ngilelteterir a rebebil el ngellitel el odam er a delongelir el toketekii a blak a rengul e mellomes a rengul el mesiou, e ulemekngerachel er tir el mo omekerreu er a rebebil el mesiou.

13. Te rua techang a uldimukl er tirke el bebil el mesiou e ngera uchul?

¹³ Me a leuaisei, te rua techang tirke el bebil el mesiou? Tirke el melai a kall el okiu ngika el blak a rengul el mesiou. Ngar er a uchelel a uriul el sils e tirke el bebil el mesiou a di mle rengellitel. E a uriul e a kloul seked er a rengodech el sib a dirrek el mlo uldimukl er tirke el bebil el mesiou. Me chelechang e a ruumesingd el chedal a “tal delebechel” er a Kristus a ngodech el sib. (Jn. 10:16) A rengellitel me a rengodech el sib a di diul melai a klungiolir er a kall el lengai er ngika el blak a rengul el mesiou er sel blsechel. Me tirke el odam el chedal a Chelechad er a Ruungerachel el tir a toketekii a blak a rengul e mellomes a rengul el mesiou te dirrek el uldimukl er tirke el bebil el mesiou? Tirka el odam a dirrek el ousbech a kall el melisiich a klaumerang er tir. Me te oba klengariourreng el kongei el kmo, a derta er tir a di ua tirke el bebil el mesiou el tir a rokui el mera el Kristiano.

14. (a) A blak a rengul el mesiou ngmla mukngerachel el mo mekerang? E tiang uldimukl er a ngerang? (b) A Jesus ngmilsang a blak a rengul el mesiou a ngera el uleklatk? (Momes er a baks el “Chomko Ng Mekngit el Mesiou . . . ”)

¹⁴ A Jesus a milsang a blak a rengul e mellomes a rengul el mesiou a kmal klou a ultutelel el ngerachel. Sera taem er a omelechesel a Biblia e a bekongerachel el mesiou a uluungerachel a rokui el kloklel a mastang er ngii. (Lk. 12:42) Me ngdi osisiu, a blak a rengul e mellomes a rengul el mesiou a mla mukngerachel el mo mengetmokl a rokui el kloklel a Kristus er tia el chutem. E aikang a uldimukl er ngii a udoud, blai, ureor er a berkel a klumech me a prokuram er aike el meklou el ongdibel. Ngdirrek el uldimukl er a oketmeklel aike el babier el mesaod er a Biblia el dousbech sel doldingel a obliil, sel dosuub el di kid el tang me sel temel a miting. Me tirke el bebil el mesiou a kmal ousbech aike el rokui el kall el loltobed ngika el blak a rengul el mesiou.

15, 16. Ngoingerang e a Jesus a mo tutkii a mesiou el mo oungerachel a “rokui el kloklel”?

¹⁵ Ngoingerang e a Jesus a mo tutkii a mesiou el mo meruul er sel ongeru el tekoi el mo oungerachel a “rokui el kloklel”? Ngdilu el kmo: “Ngii el mesiou a mo ungil a rengul a lsekum a mastang er ngii a lmuut el me remei e metik er ngii el dirk meruul a ngerchelel! Ak uuchais er kemiu el kmo ng ulterekokl a mastang er ngii el mesiou el mo rullii el mo oungerachel a rokui el kloklel.” (Mt. 24:46, 47) Me kede mesang el kmo, a Jesus a mo omekngerachel er a mesiou el mo meruul er sel ongeru el tekoi sel lluut el mei e lebetik er ngii el “dirk meruul a ngerchelel” el merous a tekingel a Dios. Me ngbelkul a kmo aika el eru el tekoi a diak di leduubech er a ta el taem. Me a lsoad el mo medengelii a temel me a rolel a Jesus a lolutk er a mesiou el mo oungerachel a rokui el kloklel, e ngkired el mo medengei a eru el tekoi: a temel a luut er ngii, e ngerang a uldimukl er a kloklel.

¹⁶ Me a Jesus nglmuut el mei er oingerang? Aike el bades er a uchei er a Mateus 24:45-47 a onger er tia el ker. Ngar er aike el bades e sel losaod er a Jesus el “mei” e ngmelutk el kirel sel taem el lemei el mo oukerrekeriil er a rechad el rokui e okngemedeterir tirke el mekngit er a ulebengelel tia el blekeradel er a beluulechad. * (Mt. 24:30, 42, 44) Me a tekoi el “lmuut el mei remei” el ngar sel okesiu er a blak a rengul el mesiou a mesaod el kirel a Jesus sel lemei er a temel a kloul ringel.

17. Nguldimukl er a ngerang a kloklel a Jesus?

¹⁷ A “rokui el kloklel” a Jesus nguldimukl er a ngerang? Nguldimukl er a tekoi el ngar er a eanged, el diak el di el tekoi el ngar er tia el chutem. A Jesus a dilu el kmo: “A rokui el klisiich er omerreder er a eanged ma beluulchad a bla le beskak.” (Mt. 28:18; Efe. 1:20-23) Me chelechang e a Rengedel a Dios a dirrek el kloklel. Ngngiluu tia el Renged er sera rak er a 1914 e mo teloi er tirke el ngellitel el  chedal e te dmak el mengedereder er ngii el Renged.​—Och. 11:15.

18. Ngera uchul me ngmo dmeu a rengul a Jesus el tutkii a blak a rengul el mesiou el mo oungerachel a rokui el kloklel?

¹⁸ Me ngera belkul aika el tekoi? Sel lemei a Jesus el okngemedeterir a remekngit er a temel a kloul ringel, e ngmo metik er ngika el mesiou el mla mo betok el rak el leblak a rengul el merous a tekingel a Dios el mo er tirke el bebil el mesiou er sel lungil blsechel. Me ngkmal mo dmeu a rengul el tutkii ngika el mesiou el mo oungerachel a rokui el kloklel. Tirke el odam el toketekii ngika el blak a rengul el mesiou a mo nguu tia el ngerachel sel lebo er a eanged e longedereder el obengkel a Kristus.

19. A nguked el bo lenguu a blak a rengul el mesiou er a eanged ngkuk klou er a nguked el mo er tirke el bebil el ngellitel el Kristiano? Ka mosaod.

 ¹⁹ Me a nguked el bo lenguu a blak a rengul el mesiou er a eanged ngkuk klou er a nguked el mo er tirke el bebil el ngellitel el Kristiano? Ngdiak. A telbiil el miltib el mo er a kekerei el cheldellir a rechad a dirrek el sebechir a rekuk bebil el mo nguu er a uriul. El ua tiang, ka molatk er a tekingel a Jesus el mo er tirke el 11 el blak a rengrir el apostol er ngii er sel kesus er a uchei er a lemad. (Monguiu er a Lukas 22:28-30.) Ngtilbir el mo er tirka el mekesai el chad el kmo te mo nguu a kmal ungil el nguked el kirel a blakerreng er tir. Te mo mengedereder el obengkel el ngar er a eanged. Engdi a uriul er isei e ngulechotii el kmo tirke el rokui el 144,000 a mo mengedereder el obengkel el ngar er a eanged. (Och. 1:1; 3:21) Me ngdi osisiu, a Mateus 24:47 a ochotii el kmo a Jesus a tilbir el mo er a kekerei el cheldellir a rechad, el tirke el ngellitel el odam el toketekii a blak a rengul el mesiou el kmo te mo oungerachel a rokui el kloklel. Engdi a mera er ngii, e tirke el rokui el 144,000 a mo dmak el oungerachel a kloklel a Kristus.​—Och. 20:4, 6.

20. Ngera uchul me a Jesus a tiltkii a blak a rengul el mesiou? E ngerang a soad el melemolem el meruul er ngii?

²⁰ Me a Jesus a omeka er a rebetok er chelechang el okiu a blak a rengul el mesiou, el di ua omerellel el ulemeka er a rebetok el okiu a chimorir a remekesai er a irechar. Ngtiltkii ngika el mesiou me bo el sebechir a remera el Kristiano el rengellitel me a rengodech el sib el melai a tekingel a Dios er sel ungil blsechel er a chelsel a taem er a ulebongel. Me dolemolem el olecholt a omereng el saul er kid el kirel tia el tekoi el oeak sel leblak a rengud el olengesenges er tirke el ngellitel el odam el tir a toketekii a blak a rengul el mesiou.​—Heb. 13:7, 17.