1. (a)  Ngua ngerang a blekerdelir a rechad sel lengai a uleklatk, e ngera uchul? (b) Ngua ngerang a blekerdelel a kedidai a rengul el chad sel lenguu a omellach?

 A RECHAD a kakerous a omerellir sel lengai a uleklatk. Te ngar er ngii a rebebil el kongei a uleklatk er a chad el ngarbab a deruchellel e oltngakl er a uleklatk el mla er a chad el ua klungel me a lechub e ngariou a deruchellel. E a rebebil a nguu a uleklatk me a lechub e ngomellach, e mo mekngit a rengrir, meringel a uldesuir me a lechub e te mo merur. Engdi te ngar er ngii tirke el mo mesisiich a rengrir e mo sorir el lmuut el mo ungil er aike el loruul. Ngera uchul me a rechad a kakerous a omerellir sel lengai a uleklatk? A ta er a uchul, a kldidairreng. Sel sekum a kedidai a rengul el chad a nguu a omellach, e ngomdasu el kmo tia diak a ngera lerellii er ngii, e ngotngeklii me ngdiak lenguu a klungiolel er a ulekrael el lengilai.​—Osi. 16:18.

2. Ngera uchul me a remera el Kristiano a oba omereng el saul er a uleklatk el mengai er a Tekingel a Dios?

² Engdi a remera el Kristiano a diak leuaisei a omerellir. Kede omes a uleklatk el meklou a ultutelel, el ileakl a lsekum e ngmengai er a Tekingel a Dios. A uleklatk er a Jehovah a ngosukid el mo sebeched el mes a telemellel a mekngit el omeruul. El ua tiang, ngolengeseu er kid el mo cheroid er a ngii di el ngerang el mo uchul a telemelled el uai a skel a kerruul, deleboes el omeruul, me a mekngit el usbechel a kar me a rrom. (Osi. 20:1; 2 Ko. 7:1; 1 Th. 4:3-5; 1 Ti. 6:6-11) Kede dirrek el kmal dmeu a rengud e le kede olengesenges a omellach er a Dios.​—Isa. 65:14.

3. Ngera el blekerdelel ngike el milluches er a psalm a kired el oukerebai er ngii?

³ A lsoad a lolemolem a ungil el deleuill er kid me a Demad el ngar er a eanged, e ngkired el melemolem el ousbech a ulekrael er Ngii er a klengar er kid. Ngkired el mo ua blekerdelel a ta er a milluches er a psalm el dilu el kmo: “A llechum  a di kloklek el diak a ulebengelel; ng deuil a renguk.” (Psa. 119:111) Me kau, ke di uai ngika el milluches er a psalm el dmeu a rengum el olengesenges a omellach er a Jehovah? Me a lechub e ke omdasu a lebebil er a taem el kmo ngkmal meringel a dolengesenges? Alta e ngmo er ngii a taem el mo meringel er kau el kongei a omellach, engdi lak bo lemechitechut a rengum. Ngsebechem el melisiich er a klaumerang er kau el kmo ngblechoel el mo uchul a klungiolem sel molengesenges a omellach er a Dios. Ka me bo dosaod a edei el rolel a doruul er tiang.

4. Ngerang a chimo el tekoi el dimlak el sebechel el mengodech er a klengar er a David?

⁴ A King el David a mla er ngii a ungil me a mekngit el taem er a klengar er ngii, engdi ngmla er ngii a chimo el tekoi el dimlak el sebechel mengodech. Ngmle blechoel el mui el oumerang er ngike el Ulemeob er ngii. Ngdilu el kmo: “RUBAK, ak mengider er a renguk el ekor kau. Dios er ngak, ak uumeral ulsirs er kau.” (Psa. 25:1, 2) Ngmilekerang a David e mesuub el mo ultuil a klaumerang er ngii er a Demal el ngar er a eanged?

5, 6. A nglunguchel a David ngochotii a ngerang el kirel a deleuill er ngii me a Jehovah?

⁵ A rebetok el chad a di meluluuch el mo er a Dios sel lebo er ngii a meringel el mondai er tir. Te di uai a sechelid el di me mengedecheduch er kid sel bo lousbech a udoud me a lechub e ngsoal a derellii a kmung ngera el kirel. A cherengel a taem e kede locha mo melatk el kmo ngika el sechelid ngmera el betik a rengul er kid me a lechub e ngdiak. Engdi a deleuill er a David me a Jehovah a dimlak leuaisei. A nglunguchel a David a ochotii el kmo ngmera el uluumerang e betik a rengul er a Jehovah alta e ngmla er ngii a ungil me a mekngit el taem er a chelsel a klengar er ngii.​—Psa. 40:8.

⁶ Ka momtab er a rolel a David a loureng a sulel e loldanges er a Jehovah er a ledu el kmo: “O RUBAK, el RUBAK er kemam, a klengarbab er kau a moues el ngar a beluulchad el rokir! Ma odengesem a mo turkii a eanged.” (Psa. 8:1) Ngsebechem el mesa el kmo ngmle ua ngerang a deleuill er a David me a Demal el ngar er a eanged? A David a kmal mle mechas a rengul er a klisichel me a klebkellel a Jehovah me ngmle soal el oldanges er Ngii el “tal sils.”​—Psa. 35:28.

7. Kede mekerang e mongeseu sel deblechoel el mengedecheduch er a Jehovah?

⁷ Me kid a di uai a David el kired el blechoel el mengedecheduch er a Jehovah me bo el sebeched el otuil a klaumerang er kid er ngii. A Biblia a melekoi el kmo: “Molekeed er kemiu er a Dios, me bo lekeed er kemiu.” (Jak. 4:8) A doluluuch el mo er a Jehovah e ngolekeed er kid er ngii e dirrek el ta er a klou a ultutelel el rolel e kede nguu a chedaol klisichel.​—Monguiu er a 1 Johanes 3:22.

8. Ngera uchul me ngdiak el ungil a di domelekl a tekinged er a bek el taem el doluluuch?

⁸ Sel moluluuch e ke ousbech a di osisiu el tekoi er a bek el taem? A lsekum e ke uaisei, e mousbech er a telkib el taem er a uchei er a bo moluluuch el mo melatk el kirel aike el soam el mo melekoi. El ua tiang, oleko ke di melekoi a osisiu el tekoi el mo er a sechelim er a bek el taem el mkasoues, e ngmo ua ngerang a uldesuel? Nglocha mo diak el soal el orrenges er kau. Me nguaisei, engdi a Jehovah a kmal diak bo loltngakl er a nglunguchel a ta er a blak a rengul el mesiungel. Engdi ngungil a bo lak di domelekl a tekinged er a bek el taem el doluluuch.

9, 10. (a) Ngera kirel uldimukl er a nglunguched? (b) Ngera sebechel el remuul a nglunguched el mo er ngii a mera el belkul?

⁹ Ngbleketakl el kmo a lsekum e ngsoad el mo kmeed er a Dios, e ngdiak el sebeched el di meluluuch el kirel a tekoi er a bek el sils e lemerekong. Sel deblechoel el ouchais er a Jehovah el kirel aike el mera el ngar er a rengud, e ngosukid el mo otuil a klaumerang er kid er Ngii. Ngera kirel el uldimukl er a nglunguched? A Tekingel a Dios a melekoi el kmo: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel.” (Fil. 4:6) Me a ngii di el ngerang el ngar er ngii a lerellii er a klengar er kid  me a lechub a deleuill er kid me a Dios a sebechel el mo uldimukl er a nglunguched.

¹⁰ Ngkmal betok a sebeched el suub er a nglunguchir a reblak a rengrir el sechal me a redil er a irechar. (1 Sa. 1:10, 11; Rel. 4:24-31) Ngar er a babier er a Psalm e ngar er ngii a betok el nglunguuch me a cheliteklir a rechad el mo er a Jehovah er a taem er a klengiterreng el mo lmuut er a deurreng. Sel dosuub el kirel aika el nglunguuch e ngosukid el mo remuul a nglunguched el mo er ngii a mera el belkul.

11. Ngera me ngkired el melebedebek el kirel a omellach er a Biblia?

¹¹ A David a millekoi el kmo: “A tekingel a RUBAK a sebeched el oumeral ulsirs er ngii, ng mesterir a llomeserreng tirkel diak er tir.” (Psa. 19:7) Me alta e ngdiak a duch er kid, engdi ngsebechel el mo mellomes a rengud a lsekum e kede olengesenges a llechul a Dios. Engdi ngar er ngii a bebil el omellach el ngar er a Biblia el kired el melebedebek a lsekum e ngsoad el melemolem el blak a rengud er a chelsel a ngii di el blekeradel. El ua tiang, a dolebedebek a omellach er a Biblia e ngosukid el mo melemolem el blak a rengud sel bo dechelebangel a omelasem el mo meruul a mekngit er a skuul me a lechub a ureor. Ngdirrek el sebechel el ngosukid el mo olengesenges a llechul a Dios el kirel a rasech, e diak dolab el mo er a bitang me a ka lebitang, e mo oltaut a omellach er a Biblia sel dolilt a biled. Sel dolebedebek el kirel a uleklatk er a Dios e ngosukid el mo kltmokl el kirel a chouaika el tekoi. E seikid e ngmo sebeched el melilt el kmo ngera kede mo meruul er ngii er a uchei er a leduubech a tekoi. Tiang a sebechel el ngosukid me ngdiak bo doruul a tekoi el mo uchul e kede mo chuarm.​—Osi. 15:28.

12. Ngera el tekoi a kired el melatk me bo el sebeched el olengesenges a llechul a Dios?

¹² Me chelecha el dongiil er a telbilel a Dios el mo tmaut, e kid kede olecholt el kmo a klaumerang er kid el kirel aika el tekoi a dirk mesisiich e a soal a Dios ngdirk kot el klou a ultutelel er a klengar er kid? Kid kede mera el oumerang el kmo a Kloul Babilon a di kmedung e ngmo nguemed? Aike el klengeltengat el mo er ngii er a ngar medad el klebesei, el uai a diak a ulebengelel el klengar el ngar er a paradis el chutem me a okiis, ngdirk mera el tekoi er a rengud er chelechang el di uai sera dekot el mo medengei? A blakerreng er kid el kirel a odingel ngdirk mesisiich, me a lechub e kede mla remuul a soad el mo kot er a klengar er kid? A omengedolel a ngklel a Jehovah me a llemeltel el mengedereder ngdirk klou a ultutelel er kid? Sel dedmolech el melatk el kirel aika el ker e ngsebechel el ngosukid el mo blechoel el omes a ‘llechul el di klokled el diak a ulebengelel.’​—Psa. 119:111.

13. Ngera uchul me a Rekristiano er a irechar a mle meringel er tir el mo medengei a belkul a bebil el tekoi? Ka mosaod.

¹³ Ngar er ngii a bebil el tekoi el ngar er a Biblia el diak el ungil a klemedengei er kid er ngii e le ngdirkak el bo el temel er a Jehovah el mo ouchais er kid. A Jesus a mle blechoel el ouchais er a rechapostol er ngii el kmo ngkirel el mo chuarm e mad. (Monguiu er a Mateus 12:40; 16:21.) Engdi a rechapostol a dimlak lodengelii a belkul a tekingel. Te di mlo medengei a belkul a tekingel er a uriul er a lebekiis er a kodall, e bo lecholt er a redisaiplo er ngii, e lengesuterir el mo medengei aike el ulaoch el kirel a Kristus. (Lk. 24:44-46; Rel. 1:3) Ngdirrek el di mle sel taem er a lenguu a chedaol klisichel a Dios a rultirakl er a Jesus er a Pentekost er a rak er a 33, e te mlo medengei el kmo a Rengedel a Dios a mo mengedereder el ngar er a eanged.​—Rel. 1:6-8.

14. Ngera el ungil el kerebai a lebilecherei a rudam er kid er a bekord el dart el rak er a uchei?

¹⁴ Ngar er a osisiu el rolel, e a bekord el dart el rak er a uchei e a remera el Kristiano a mle cheleuid a uldesuir el kirel aike el mo duubech er a uriul sils. (2 Ti. 3:1) El ua tiang, sera 1914, e a rebebil el tir a ulemdasu el kmo ngdi kmedung e te mo er a eanged, engdi tiang a dimlak bo el tekoi. Engdi te millemolem er a omesubir er a Bades e mlo medengei el kmo a klou el ureor er a berkel  a klumech a kirel el ketmekill. (Mk. 13:10) Sera 1922, e a J. F. Rutherford el ngii a uluungerachel er a ureor er a berkel a klumech er sel taem, a dilu er tirke el mla er sel klou el ongdibel er a Cedar Point, Ohio, U.S.A. el kmo: “A Jesus a mengedereder el King! E kemiu a omtechei er ngii. Me chelechang e momerk, momerk, momerk a chisel a King me a rengedel.” Ngar sel taem el mei, e a remesiungel a Jehovah a merael a chisir el kirel a berkel a “Ungil Chais el kirel a Rengedel a Dios.”​—Mt. 4:23; 24:14.

15. Ngera me ngungil a dolebedebek el kirel aike el bla leruul a Jehovah el kirir a rechedal?

¹⁵ Ngungil a dolebedebek er a rolel a Jehovah a loltaut a telbilel el kirir a rechedal er a irechar me chelechang. Tiang a ngosukid el mo mui el oumerang el kmo a Jehovah a sebechel el oltaut a telbilel el kirel a ngar medad el klebesei. Sel dolebedebek a telbilel a Dios e kede melemolem el semeriar el kirel, e dirrek el mui el oumerang el kmo ngmo tmaut.

16. Ngera el klengeltengat a mo er ngii e le kede blak a rengud er a omesiunged?

¹⁶ A Jehovah a kot el mesisiich el Dios, el Dios er a omeruul. Ngike el milluches er a Psalm a dilu el kmo: “Ng diak a mesisiich el ua ikau.” Ngdilechelii el kmo: “Ke meral mesisiich! Ng meral klou a klisichem!” (Psa. 89:8, 13) Me ngii el Dios er a omeruul a uchul me ngdmeu a rengul sel lomes er kid el blak a rengud el mesiou er ngii, me ngomekngeltengat er kid. Ngomes er a rokui el mesiungel, el sechal me a redil, rengeasek me a remeklou, el “blechoel el mechesang” el mesiou er ngii. (Osi. 31:27) Sel demechesang er a omesiunged e kede oukerebai er ngike el Ulemeob er kid. Ngmo uchul a deuil a rengud sel doruul aike el sebeched er a omesiunged el mo er a Jehovah e dirrek el mo uchul a deuil a rengul.​—Monguiu er a Psalm 62:12.

17, 18. A otirekled er a ulekrael el lomeskid a Jehovah ngmekerang e ngosukid el mo oumerang er Ngii? Ka mosaod.

 ¹⁷ A otirekled er a ulekrael el lomeskid a Jehovah ngmekerang e ngosukid el mo oumerang er Ngii? Ka molatk aike el dilubech er sel taem er a bo lesiseb er a Beluu er a Nglat a rechad er a Israel. A Jehovah a dilu er a reprist el milengol er a Blil a Telbiil me lorael el mo metengel er a Omoachel er a Jordan. Engdi a rechad er sera lolekedang er a omoachel, e te milsang el kmo ngmla metengel a imui me ngkmal mesisiich a berius er a chelsel a omoachel. Me te mo mekerang? Te mo toketek a tento er tir er a tkul a omoachel e mengiil el sesei el sandei me a lechub e ngkemanget el taem el dimerekmo lebo er iou a ralm? Ngkmal diak, te mle mui el oumerang er a Jehovah e uleltirakl a tekingel. Me ngera dilubech? A Biblia a kmo: “Ser a le mei er a tkul a Jordan e bo le dechor er a chelsel a ralm, e a ralm a mlo diak lomaoch.” Me a “re prist el uleba Blil a Telbiil er a RUBAK a dilechor er a medirt el chutem er a belngel a Jordan, el dimerkmo rokui el chad bo le iuul er a bitang.” (Jos. 3:12-17) Ka di molatk er a deuil a rengrir a rechad er a Israel er sera lomes er a ralm el mlo diak lomaoch! A klaumerang er tir er a Jehovah a mlo mesisiich e le tir el uleltirakl a ulekrael el lebilsterir.

¹⁸ Me alta e a Jehovah a diak loruul a chouaika el mengasireng el tekoi el kirir a rechedal er chelechang, engdi ngomekngeltengat er kid sel dochotii a klaumerang er kid e doltirakl a tekingel. A chedaol klisichel a Dios a meskid a blekeu me bo el sebeched el omerk er a klumech er a Renged er a beluulechad el rokir. Me a Jesus Kristus, el ngii a ngaruchei el Sioning er a Jehovah, a tilbir el mo er a redisaiplo er ngii el kmo ngmo melisiich er tir el mo meruul er tia el klou a ultutelel el ureor. Ngdilu er tir el kmo: “Morael el mor a bek el bedengir a re chad er ker me ker e moruul er tir el mo obengkek.” E tilbir el kmo: “Ngak a mo obengkemiu el di blechoel el mo lmuut er a ulebongel er a beluulchad.” (Mt. 28:19, 20) A rebetok el Sioning el tir a sekemerur me a lechub e ngmeringel er tir el mengedecheduch er a rechad a melekoi el kmo a chedaol klisichel a Dios a mesterir a blekeu el mo sebechir el mengedecheduch er a rechad sel loldingel a obliil.​—Monguiu er a Psalm 119:46; 2 Korinth 4:7.

19. Me alta e ngdiak el sebeched el remuul a betok er a omesiunged el mo er a Dios, engdi ngulterekokl a rengud el kirel a ngerang?

¹⁹ A rebebil el rudam me a rudos a diak el sebechir el meruul a betok el ngar er a omesiungir el mo er a Dios e le ngsecher me a lechub e ngcheluodel a uchul. Engdi ngsebechel el mo ulterekokl a rengrir el kmo a “Chedam ra klechubechub, el Dios er a bek longelaod” a medengei a tekoi el lechelebangel. (2 Ko. 1:3) Ngomes aike el rokui el tekoi el doruul el kirel a omesiunged el kmo ngklou a ultutelel. E lak dobes el kmo a osebeled a ultuil er a klaumerang er kid er a olubet el tengetengel a Kristus.​—Heb. 10:39.

20, 21. Ngera bebil el rolel e kede ochotii el kmo kede oumerang er a Jehovah?

²⁰ A omengull er kid el mo er a Dios a uldimukl er ngii a usbechel a temed, klisichel a bedenged me aike el ngar er ngii er kid el kirel a omesiunged. Ngkmal soad el meruul aike el rokui el sebeched el kirel a ureor er a berkel a klumech. (2 Ti. 4:5) Ngdmeu a rengud el olengeseu er a rechad me bo “lodengelii a klemerang.” (1 Ti. 2:4) Ngbleketakl el kmo, sel dekebkellii e dodengesii a Jehovah, e kede mo merau er a tekingel. (Osi. 10:22) Ngdirrek el ngosukid el mo mui el oumerang er ngika el Ulemeob er kid er a chelsel a ngii di el blekeradel.​—Rom 8:35-39.

²¹ El ua bla desaod er a uchei, ngdiak el beot el tekoi a dotuil a klaumerang er kid er a ulekrael el lomeskid a Jehovah. Me a leuaisei e bo molisiich er a klaumerang er kau el okiu a nglunguuch. Molebedebek aike el rolel e a Jehovah a uleltaut a telbilel er a irechar me sel rolel e ngmo oltaut er a ngar medad el taem. E molemolem el mengull er a Dios me lolisiich er a klaumerang er kau er Ngii. Lak mobes, a uleklatk er a Jehovah a melemolem el diak a ulebengelel, me a lsekum e ke melemolem el olengesenges e ngsebechem el kiei el mo cherechar!