1. Ngua ngera uldesuir a rechad el kirel a klsibai? E ngoeak a ngera el rolel e a klsibai el losaod er ngii a Rom 6:22 a kuk ngodech?

 A RECHAD sel lolatk el kirel a sibai e te melatk er a chad el mastang er ngii a mesisiich el mengedereder er ngii e mekngit a omerellel el bedul ngii. Engdi a chad el sibil a Dios a kuk ngodech. A Tekingel a Dios a ochotii el kmo a Kristiano a sebechel el ngiltii el mo sibil a betik a rengul el Mastang. Me a Paulus er sera losaod er a Rekristiano el kmo te “sibil a Dios” e a mle belkul a tekingel a kmo te milsiou er ngii e le ngmle betik a rengrir er Ngii. (Rom 6:22) Me tia ngera el rolel a klsibai? Kede mekerang e diak bo desibil a Satan me tia el beluulechad er ngii? E ngera el klungiaol a dengai a bo desibil a Jehovah e leblak a rengud el mesiou er ngii?

2. (a) Ngera uchul me a chad er a Israel el sibai a kongei el melemolem el sibai? (b) Ngolechotel a ngerang a lsekum a sibai a kongei me lobsibs a dingal?

² A Llach el Dios a milsterir a rechad er a Israel a ngosukid el mo medengelii a rolel a klsibai el longerechir er kid a Jehovah. A chad er a Hebru el mle sibai a mla er ngii a techellel el mo mimokl er a uriul er a losiou er a mastang er ngii el euid el rak. (Exo. 21:2) Engdi a lsekum e ngkmal mle betik a rengul er a mastang er ngii e ngmle sebechel el melemolem el kiei. A llechul a Jehovah a mla er ngii a omesodel el kirel tia el tekoi. A bo leuaisei, e a mastang a kirel el nguu el mo er a chesimer e misebsii a dingal. (Exo. 21:5, 6) E ngera uchul? Ngar er a tekoi er a Hebru e a tekoi el olengesenges a mlengai er a tekoi el orrenges. Me a sibai el kongei me lobsibs a dingal a ochotii el kmo ngsoal el melemolem el olengesenges er a mastang er ngii. Me ngdi osisiu el kired sel detib a rengud el mo mesiou er a Jehovah. Sel detib a rengud el mo er ngii e kede ochotii el kmo ngsoad el olengesenges er ngii e le ngbetik a rengud er ngii.

3. Ngera uchul me kede tuib a rengud el mo er a Jehovah?

³ Uchei er a bo demetecholb e kede tilbir a rengud el mo mesiou er a Jehovah me a lechub e kede mo sibil. E sera detibir  a rengud el mo er ngii e kede tilbir el mo olengesenges er ngii e meruul a soal. Ngdimlak a chad el ulerrimel er kid el mo meruul er tia el telbiil. Mo lmuut er a taem el bo lemetecholb a rengeasek, e te meruul er ngii e le ngsorir el meruul er ngii el diak el belkul a kmo te di oldeu a rengrir a redemerir me a rederrir. Me kid el rokui a tuib a rengud el mo er a Mastang er kid el Jehovah e le ngbetik a rengud er ngii. A apostol el Johanes a milluches el kmo: A “bltikerreng er a Dios a belkul a kmo kede oltirakl a llechul.”​—1 Jn. 5:3.

4. Kede mekerang e mo “sibil a llemalt”?

⁴ Kede mereng a sulel a Jehovah e le ngmla kutmeklii a rolel e ngsebeched el mo sibil! A klaumerang er kid er a olubet el tengetengel a Kristus a uchul me ngsebeched el mo diak desibil a klengit, el belkul a kmo a klengit a mo diak longedereder er kid. Me alta e ngdiak demecherrungel, engdi kede ngiltii a Jehovah me a Jesus el mo Mastang er kid. A Paulus a mle bleketakl el smodii tiang er a loluches el kmo: “Ng kiriu el dirrek el melebedebek er kemiu el ua isei, el mla mad el kirel a klengit e di ngar er chelechang el kirel a Dios el obengkel a Kristus Jesus.” E dilechelii el kmo: “Kom ungil el medengei el kmo sel bo msibai, el orrenges er a tar a chad, e kom mla mo sibil ingikel chad el cho morrenges er ngii. Ng dirrek el ua isei: a klengit cho morrenges er ngii e ng mo mekrolemiu el mor a kodall; e a blekongesenges cho morrenges er ngii, e ng mo mekrolemiu el mor a llemalt. E ngdi ng meral mesaul a Dios! Ele ser a ngar a mong, e kom mle sibil a klengit; e ngdi chelechang, e ng kmal blak a rengmiu el oltirakl a blekerdelel osisechakl el cho mngilai. Kom mlengubet er a klengit e mlo sibil a llemalt.” (Rom 6:11, 16-18) Momtab a tekingel a Paulus el kmo, ngkirel el mo ‘blak a rengud el oltirakl’ a tekingel a Dios. Me sel detib a rengud el mo er a Dios e kede mo “sibil a llemalt.”

5. Ngkired el oumekemad er a ngerang, e ngera uchul?

⁵ Kid el mla tuib a rengud el mo sibil a Dios a kired el oumekemad el kirel a eru el tekoi. A kot, e kid el diak demecherrungel. A Paulus a dirrek el mle kirel el oumekemad el omtok a chelitechetul e milluches el kmo: “Ngak a dmeu a renguk er a llechul a Dios er sel kmal chelsel a renguk. E ngdi kmetik er a kuk tar a blekeradel el ngar ngak el oureor, el ngii el blekeradel a omtok er sel llach el ungil er a renguk. Me ng rullak mak kelebus er a llach er a klengit el oureor el ngar a bedengek.” (Rom 7:22, 23) Me kid el diak demecherrungel a uchul me ngkired el melemolem el oltngakl a ngelbesel a rengud. A apostol el Petrus a mengelechel er kid el kmo: “Mngar el mimokl el chad, e ngdi lak mousbech er a ilmokl el mngar ngii el omart a mekngit, e bai mngar el sibil a Dios.”​—1 Pe. 2:16.

6, 7. Ngmekerang a Satan e rullii tia el beluulechad me ngmo ungil er a osenged?

⁶ A ongerung, e ngkired el oumekemad el omtok er tia el beluulechad el longedereder er ngii a remekngit el anghel. A Satan a merreder er tia el beluulechad e ousbech a bek el klekedall er a chelsel el melasem el melemall er a blakerreng er kid el mo er a Jehovah me a Jesus. Ngsoal el meruul er kid el mo sibil me ngmengesuseu er kid el mo chedal tia el beluulechad er ngii. (Monguiu er a Efesus 6:11, 12.) A ta er a rolel e ngmeruul er ngii a oeak sel loruul er tia el beluulechad me ngmo ungil er a osenged me bo el soad el teloi er ngii. Engdi a apostol el Johanes a omeklatk er kid el kmo: “A le betik a rengmiu er a beluulchad e ng diak le betik a rengmiu er a Chedam. A ikel rokui el tekoi er a beluulchad, el ikel mekngit el ngelbesel a klechad ma ikel leues a chad e nguibes er ngii, ma ikel rokui el uchul e ng kedidai a rengrir a diak a tar ngii el mlar a Chedam el mei; ng rokui el di tekingel a beluulchad.”​—1 Jn. 2:15, 16.

⁷ Ngar er a beluulechad el rokir e a rechad a sorir a bo lebetok a kloklir. A Satan a rulleterir a rechad el mo omdasu el kmo a bo lebetok a ududir e ngmo dmeu a rengrir. Ngmla mo betok a meklou el stoang me a dirrek el advertisement a melisiich er a uldasu el kmo ngklou a ultutelel a bo lebetok a klokled e deblechoel el milil. El ua tiang,  aike el travel agency a melisiich er kid el mo mesarech a cheroid el beluu el obengterir a rechad er a beluulechad. Nguaisei, a blekeradel er tia el beluulechad a blechoel el melisiich er kid el mo melodech a klengar er kid el mo oltirakl a soal.

8, 9. Ngklou a techelled el mo mekerang? E ngera uchul me tiang a kdekudel?

⁸ Sel taem er a rekot el Kristiano e a Petrus a milengelechel er a Rekristiano el kirir tirke el ngar er a chelsel a ongdibel el mla mo oba osengel tia el beluulechad. Ngdilu el kmo: “A deuil a rengrir, a meruul a ngii di le ngerang el soal a bedengir a le cheldecheos; te omekrur e mengidokel a blengur el moruul sel lekong el mo teloi er kemiu, e di melemolem el oldeu a rengrir er a ikel cheleblad el omerellir! Te melekoi a ngarbab e chelsengsang el tekoi, e ousbech a ngibes er a deleboes el omedikl er tirkel dirk ulemuchel er a rolel osobel, el tilobed er a delongelir a re chad el ngar a cheleuid el tekoi. Te melekoi er tir el kmo te mo mimokl, e tir a di sibil a klengit el di melemall er tir, ele chad a sibil a ngii di le ngerang el mla mo merreder er ngii.”​—2 Pe. 2:13, 18, 19.

⁹ A bo dolasem el melai a rokui el tekoi el ‘deues e nguibes er ngii’ e ngdiak bo demimokl. Kede bai mo sibil a Satan el Diabelong, el ngii a diak lemoues el mastang er tia el beluulechad. (1 Jn. 5:19) Ngklou a techelled el mo sibil a tekoi er a kerruul. Me a bo dobedikl er tia el tekoi e ngsebechel el mo meringel er kid el mo mimokl er ngii.

10, 11. A Satan ngileakl el soal el oldechelakl er a rua techang? Ngmekerang a ngarbab el skuul e rullii a klengar er a ngeasek el Kristiano el kmal mo meringel?

¹⁰ A Satan a oldechelakl er tirke el dirk olengesonges a klemedengei er tir. Me chelecha el taem e ngileakl el soal el oldechelakl er a remekekerei el chad. Me ngkmal chetil sel lomes er a kekerei el chad me a lechub e ngii di el chad el tibir a rengul el mo sibil a Jehovah. A Satan a soal a chouaitirka el chad a lemetemall a blakerreng er tir el mo er a Dios.

¹¹ Ngulterekokl a sibai el mlo melechesuar a telkib el ringel er sera lobsibs a dingal. Engdi a uriul e a llechul a medechel el olechotel a kmo ngtilbir el melemolem el sibil a mastang er ngii. Ngdirrek el sebechel el mo meringel er a remekekerei el chad el ngiltii a rolel a klengar el ngodech er a rechad el iliuekl er tir. El ua tiang, a Satan a melisiich er a uldasu el kmo a ungil el ureor a mo uchul e ngmo er ngii a mera el belkul a klengar er kid. Engdi a mera er ngii, sel denguu a Jehovah el mo kot e ngmo er ngii a mera el belkul a klengar er kid. A Jesus a dilu el kmo: “Te ngeltengat a re medengei el kmo te chebuul a lak lousbech er a Dios.” (Mt. 5:3) A Rekristiano a tuib a  rengrir el mo meruul a soal a Jehovah el diak loruul a soal a Satan. Te blechoel el menguiu er a Biblia e melebedebek er ngii “er a llomes ma klebesei.” (Monguiu er a Psalm 1:1-3.) Engdi a lsekum e te mo er a ngarbab el skuul e ngklou a techellir el mo mechesang me ngmo diak a temir el melebedebek a Tekingel a Dios e mesiou er a Jehovah.

12. Ngera el omelilt a ngar er ngii el kirir a remekekerei el chad er chelechang?

¹² A merreder er a ureor a sebechel el rullii a klengar er a sibai el Kristiano el kmal mo meringel. Ngar er a kot el babilengel el mo er a ongdibel er a Korinth e a Paulus a dilu el kmo: “Me kau el chad, ke mle sibai er ser a cho mokedong? A le ua isei, e lak bo louedikel a rengum. E ngdi le ngar ngii a techellem el mo diak msibai, e mnguu ngii el techall.” (1 Ko. 7:21) A lsekum a merreder er a ureor a rullii a klengar er a sibai el kmal mo meringel, e ngbai ungil a bo lemimokl a sibai. Me ngar er a betok el beluu er chelechang e ngar er ngii a llach el oterekokl a ildisel a rak el kirir a rengalek el mo er a skuul. Me a uriul er aika el rak e ngsebechir el di tir el melilt el kmo te melemolem er a skulir me a lechub e ngdiak. Me a Kristiano el ngiltii el mo er a ngarbab el skuul e le ngsoal a lebo er ngii a ungil el urerel a sebechel el mo meringel er ngii el mesiou er a Jehovah el mui el taem.​—Monguiu er a 1 Korinth 7:23.

13. Ngera el skuul a ungil el kirir a remesiungel a Jehovah?

¹³ A Paulus a milengelechel er a Rekristiano el kiliei er a beluu er a Kolose el kmo: “Bo mkerekikl me lak a chad el ebedemiu er a chelsengsang el leko ng llomeserreng er a klechad, el uldelid el mei el okiu a re chad ma ikel leko ng chelid el olab a dereder er a eanged, e diak le mlar a Kristus el mei.” (Kol. 2:8) Me a rebetok el sensei er chelechang a olisechakl a “chelsengsang el leko ng llomeserreng er a klechad, el uldelid el mei el okiu a re chad.” A ngarbab el skuul a dirrek el melisiich aika el uldasu, me a rebetok el ngalek el tuobed aika el skuul a diak a duch er tir er a ureor er a chim el uchul me ngdiak lekltmokl el kirel a klengar er a bek el sils. A Rekristiano a bai ngiltii a skuul el olisechakl er tir aike el tekoi el usbechall el mo kiei el beot a rolel a klengar er tir me bo el sebechir el mesiou er a Dios. Te oumerang er a tekingel a Paulus el mo er a Timothy el kmo: “Ng klou a klungiolel a deko Dios el ungilbesul er a rengud a ikel ngar ngii er kid; Me bo lungilbesul er a rengud a le ngar ngii a biled ma keled.” (1 Ti. 6:6, 8) Me a remera el Kristiano a diak lomes a ngarbab el skuul el ua lemeklou a ultutelel el tekoi er a klengar, e te bai mo er aike el sebechir el olengeseu er a rechad el mo disaiplo er a Jesus el oeak  sel leblak a rengrir el omerk er a klumech.​—Monguiu er a 2 Korinth 3:1-3.

14. Ngera kede suubii er a osengel a Paulus el kirel a chad el sibil a Dios me a Kristus sel donguiu er a Filipi 3:⁠8?

¹⁴ Kede mesuub a betok el tekoi er a kerebil a Paulus. A Gamaliel el chad er a Llach er a Judea a mle sensei er ngii, me a skuul el lebla er ngii a sebeched el omekesiu er ngii el uaike el ngarbab el skuul er chelechang. Engdi ngmle ua ngerang a uldesuel a Paulus sel lomekesiu er a skulel el mo er sel techellel el mo sibil a Dios me a Kristus? Ngdilu el kmo: “A rokui el tekoi a diak a belkul er ngak a kulatk er sel lmuut el kmal klou a belkul el tekoi el kmo, ak mo medengelii a Kristus Jesus el Rubak er ngak.” E dilechelii el kmo: “Ng ngii a uchul mak mla chemoit a rokui el tekoi; ak umes el di ua le besbas kung, ma meral klungiolek a di mo Kristus.” (Fil. 3:8) Me a osengel a Paulus a sebechel el ngosuterir a rengeasek el Kristiano me a rechad er a blirir sel lolilt el kirel a ungil el skuul. (Momes er a siasing.)

15, 16. Ngera el rolel a osisechakl a dengai el okiu a cheldebechelel a Jehovah e ngerang a moktek er ngii?

¹⁵ Ngua ngerang a blekeradel er a betok el ngarbab el skuul? A rebetok el mo er aika el skuul a sorir el di omtok e olecholt a ngesechel a rengrir el kirel a kabelment me a lmuut el bebil el rolel a dereder. (Efe. 2:2) Engdi a cheldebechelel a Jehovah a meskid a kot el ungil el skuul el denguu er a chelsel a ongdibel el ngar er ngii a budech er ngii. Ngsebeched el rokui el ngmai a klungioled el okiu a Skuul el kirel a Urerel a Dios. Ngdirrek el ngar er ngii a lmuut el bebil el skuul el sebeched el ngmai a klungioled er ngii. El ua Skuul er a Biblia el kirir a Remesobil el Odam el pioneer, me a Skuul er a Biblia el Kirir a Rekristiano el Obekel el pioneer. Me aika el skuul a ngosukid el mo olengesenges er a Mastang er kid el Jehovah.

¹⁶ Ngsebeched el mesuub a betok el ungil el tekoi el oeak sel dorriter a suobel el ousbech aike el betok el babilenged me a dirrek el Watch Tower Publications Index me a Watchtower Library el CD. A moktek er a omesubed er a Biblia a osisecheklid el mo meduch el mengull er a Jehovah. Ngosisecheklid er a rolel e kede ngosuterir a rebebil el mo sechelil a Dios. (2 Ko. 5:20) E a uriul e tirke el dolisechakl er tir a mo sebechir el olisechakl er a rekuk bebil.​—2 Ti. 2:2.

17. Ngera el klungiaol a dengai sel dolilt er sel kot el ungil el rolel a skuul?

¹⁷ Ngar er a okesiu er a Jesus el kirel a udoud, e a mastang a chilat er tirke el teru el blak a rengrir el mesiungel el kirel a urerir. Me te dul mlo dmeu a rengrir e a mastang er tir a milsterir a lmuut el bebil er a urerir. (Monguiu er a Mateus 25:21, 23.) Ngmo dmeu a rengud e mo er ngii a mera el belkul a klengar er kid sel dengiltii a kot el ungil el rolel a skuul. El ua tiang, a Michael a kmal mle ungil a teng er ngii er a skuul. Me a resensei er a lolengit er ngii el mo teloi er tir el oumiting el mesaod a techellel el mo er a ngarbab el skuul, e ngmlo mechas a rengrir er a bo lodengei el kmo ngdimlak lolatk el mo er a ngarbab el skuul. Ngbai millilt el mo er a skuul el di kedeb el taem el mesuub el kirel a ureor er a chim me bo el sebechel el di ngii el mesiou er ngii e le pioneer er a osisiu el taem. Me ngmlo ouuchel a rengul er a uriul? Ngdiak, ngdmu el kmo a tekoi el bla lesuub er a Biblia e dirrek el okiu a omesiungel el ta er a remechuodel er a ongdibel a kmal mekreos er a osengel. Ngdochelii el kmo: “A klengeltengat me a techall er a omesiou el bla kngai a lmuut el mekreos er a ngii di el udoud el mle sebechek el mengereker. Ngkmal ungil a renguk e le ngdimlak bo er a ngarbab el skuul.”

18. Ngera uchul me ngsoam el ngiltii a kot el ungil el skuul?

¹⁸ A kot el ungil el skuul a olisechakl er kid a soal a Dios e ngosukid el mo sibil a Jehovah. Ngmeskid a omeltked el mo “mengubet er a klisichel a kodall,” e a cherengel a taem e kede mo “soiseb er a mededaes el klebkellir a re ngelekel a Dios.” (Rom 8:21) Me a ngarbab er ngii el rokui, e ngosisecheklid er a kot el ungil el rolel e kede ochotii el kmo ngmera el betik a rengud er a Mastang er kid el Jehovah.​—Exo. 21:5.