A ta er a klebesei el ngar er a Jerusalem, e a Jesus a milsaod el kirel a Demal el Jehovah e ullecholt a omerellir a reklsuul el mengeteklel a klechelid er sel taem. (Johanes 8:12-30) A tekoi el ledilung a olsisechakl er kid er a rolel a dorriter aike el klaumerang er a rechad el kirel a Dios er chelechang. A Jesus a dilu el kmo: “A kmo kom diblechoel ngara tikingek, e ko meral Obengkek, ko mo medengei a klemerang, ma klemerang a meskemiu a ilmokl.”​—Johanes 8:31, 32, BT.

“Kom diblechoel ngara tikingek.” A Jesus a ulechotii a rolel e kede mo medengei el kmo a osisechakl er a klechelid ng “klemerang” ngdiak. Me sel mrengesii a tekoi el kirel a Dios, e di lekau el oker el kmo, ‘Tiang ngoltirakl a tekingel a Jesus me a Chedaol Llechukl el rokui?’ Moukerebai er tirke el rirengesii a apostol el Paulus el mengedecheduch e “mle bek el sils el losuub er a Chedaol Llechukl el merriter el kmo a ikel lullekoi a Paulus ng klemerang ng diak.”​—Rellir 17:11.

A Marco, Rosa, me a Raymonde el dulsaod er tir er a uchei, a mle kerekikl el merriter a klaumerang er tir er sera losuub a Biblia el obengterir a Resioning er a Jehovah. Ngera te siluub?

Marco: “Ngike el milsuub a Biblia el obengkemam a uluusbech er a Biblia el onger a rokui el kerik me a keril a bechik. A bltkil a rengmam el mo er a Jehovah a ulemuchel el mukeroul, me kemam a dirrek el ulekesengii a deleuill er kemam el terung!”

Rosa: “A kot, e ak ulemdasu el kmo a Biblia a babier el di mesaod a uldesuir a rechad el kirel a blekerdelel a Dios. Engdi cherengel a taem, e ak mlo metik er a Biblia a nger er aike el kerik. Me chelechang e ak mla mo medengei el kmo ngkmal sebechek el oumerang er a Jehovah.”

Raymonde: “Ak milluluuch el mo er a Dios el kirel a ngeso el mo mesuub el kirel. E a uriul er isei, e ngak me a bechik a mocha omuchel el mesuub er a Biblia. Seikid e aki silubii a klemerang el kirel a Jehovah! Ngkmal mlo dmeu a rengmam el mo medengelii a blekerdelel a Dios.”

A Biblia a diak di loturk a blulak el tekoi el kirel a Dios, e ngbai ouchais a klemerang el kirel aike el ungil blekerdelel. A Biblia a mlukrael el Tekingel a Dios el ngosukid el mo “medengei a ikel bla leruul a Dios el kired.” (1 Korinth 2:12) Moutekangel el merriter er a Biblia e bo mesa rolel a longer aike el ker el leblechoel loker a rechad el kirel a Dios, moktek er ngii, me a ngar medad el taem. Monguiu a nger er a bebil er aika el ker el ngar er a “Bible Teachings > Bible Questions Answered” www.pr418.com. Ngdirrek el sebechem el olengit a omesubel a Biblia el ngar tia el Web site me a lechub a ta er a Resioning er a Jehovah. Ngulterekokl a rengmam el kmo a omoruul el uaisei, e ke mo metik el kmo ngmera el beot a doubltikerreng el mo er a Dios.