A Kdekudel el Tekoi el Kirir a Ruungalek el Melatk er Ngii
OMESODEL A SUOBEL ER A IKREL: MOMEKERREU ER A RENGELEKIU!
A Kdekudel el Tekoi el Kirir a Ruungalek el Melatk er Ngii
A Heather me a Scott a dmeu a rengrir el obekel el oungalek er a mellomes a rengul e mesisiich a bedengel el edei a rekil el buik. * Te kmal el ungil el omekerreu er a ngelekir. Ngar tia el beluulechad er chelechang e tia el omeruul a diak el beot el tekoi, e le nguldimukl er a betok el sebekreng me a ngerachel. Ngkmal betok a tekoi el rengalek a kirir el mosisechakl er ngii. Me nguaisei, engdi Heather me a Scott a kmal melechesuar a berredel a chimo el tekoi. Te kmal sorir el omekerreu er a ngelekir er a telemellel a mekngit el deleboes el omeruul. E ngera uchul?
A Heather a kmo: “A demak a dimlak el chubechub e di cheltelaol e kesib a rengul. Ngmle meringel el mengelebed er ngak e mirruul a mekngit el deleboes el omeruul el me er ngak me a remerrengek.” * A rebetok a kongei el kmo aika el mekngit el omeruul a mo uchul a klou el telemellel a uldasu. Misei a uchul me a Heather a ulterekeklii a uldesuel el mo omekerreu er a ngelekel el sechal. A Scott a dirrek el mle uaisei a uldesuel.
A rebetok el oungalek a kmal bekikl el kirel a mekngit el omeruul el mo er a rengalek. Kau me ke locha dirrek el uaisei. Me nglocha diak mua Scott me a Heather el mla chormii tia el mekngit el omeruul me a telemellel, engdi ke ulterekokl el mla remenges a kmal mekngit el chais el kirel tia el ngar er ngii el kikiongel el omeruul. Meliuekl er a beluulechad el rokir e a rungil el oungalek el chad a kmal imis el medakt sel lerenges aika el dubecha el tekoi el mo er a rengalek el ngar er a basio el lekiei er ngii.
Ngdiak lemechas a rengud e le ta el chad er a omesubel tia el tekoi er a mekngit el deleboes el omeruul el mo er a rengalek a melekoi el kmo, a klungel tia el omeruul “a ta er a kot el mekngit el tekoi el bla debetik er ngii er chelecha el taem er kid.” Tiang a kmal mekngit el chais, engdi a chouaika el mla duubech, ngmechas a rengud er ngii el tekoi? Ngdiak el uaisei el kirir a remesuub a Biblia. A Tekingel a Dios a mesaod el kmo kede kiei er a taem el lomekedong er ngii el kmo “uriul sils,” el taem el mocholt el okiu aike el ngar er ngii el omeruul el rechad a mo “teleberechel,” e di mo “betik a rengrir ra di tir” e “diak le chubechub.”—2 Timothy 3:1-5, BT.
A mekngit el deleboes el omeruul a kmal klou el mondai. Me nguaisei, a rebebil er a ruungalek el chad a kmal mo meringel a uldesuir sel lolatk a mekngit el omerellir a rechad, el tir osiik er a rengalek el kirel a mekngit el deleboes el omeruul. Me a leuaisei, e tia el mondai ngkmal klou el diak el sebechir a ruungalek el sumecheklii? Me a lechub e ngar er ngii a sebechel el meketmokl el tekoi el ruungalek a sebechir el oltirakl me bo lomekerreu er a rengelekir? A ongingil el suobel a mo onger aika el ker.
[Aike el Footnote]
^ A ngakl el ngar aika el suobel a mla mengodech.
^ A mekngit el deleboes el omeruul el mo er a rengalek a duubech sel sekum a klou el chad a ousbech er a ngalek el meruul a ngelbesel a rengul el kirel a durs. A bebil er aika el omeruul a lomekedong er ngii a Biblia el deleboes me a lechub e ng por·neiʹa, el ngii a sebechel el uldimukl er a omeruul el merutech a berrotel el klekedellel a bedenged, meruul a tekoi er a durs, e dirrek el ousbech a ngor me a lechub a chemedach. Ngdirrek el ngar er ngii a bebil el mekikiongel el omeruul el uldimukl er sel lousekool a deterir a rengalek e losedem er tir el mo meruul a mekikiongel el tekoi, olecholt a siasing er a remeau el mo er a ngalek, osengel a tekoi er a durs el obengterir a rengalek, me a mekikiongel el olechotel a berrotel el klekedellel a bedenged. Aikaikid a uldimukl er a tekoi el lolekebai er ngii a Biblia, el ngii a “klekad” me a lechub e ng “kikiongel el omeruul el diak a bo le turk er ngii.”—Galatia 5:19-21; Efesus 4:19.
