Mrellii a Telungalek er Kau el Mo Blil a Ulekerreu

“Diak le chubechub.” A Biblia a ousbech aika el tekoi el mesaod er a blekerdelir a rebetok el chad er chelecha el taem er kid, el ngii a okedongall el “uriul sils.” (2 Timothy 3:​1, 3, 4, BT) A klungel a berkel a mekngit el omeruul el mo er a rengalek er a chelsel a telungalek a olechotel a klemerang er tia el ulaoch. A mera er ngii, a tekoi er a Grik el aʹstor·gos, el moiuid el tekoi er a Belau el kmo ng “diak le chubechub,” a melekoi el kirel a ngelsengesel a bltikerreng el kirel el ngar er ngii er a delongelir a ruungalek me a rengelekir. * E ngar er a chouaisei el deleuill er a telungalek, e ngblechoel el duubech a mekngit el omeruul el mo er a rengalek.

A rebebil el mesuub el kirel tia el mekngit el omeruul a kmo tirke el chad el meruul a mekngit el deleboes el omeruul el mo er a rengalek a sechal er a telungalek el ngar er a deruchellel a chedam er a blai. A rebebil er a resechal el kauchad tir me a telungalek a dirrek el blechoel el meruul er tia el tekoi. Me alta e a ruumesingd el ngalek el redil a meketmokl tiaikid el omeruul el mo er tir, engdi a rebetok el ngalek el sechal a dirrek el chelebangel er tia el mekngit el omeruul. A redil el meruul er tia el mekngit el omeruul a dirrek el kmal ngar er ngii. A ta er a kmal diak leblechoel el tuobed a chisel el mekngit el omeruul a meketmokl er a delongelir a ruchad, el klou me a lechub e ngmesisiich el ngalek a rullii a mekngit el omeruul el mo er a kekerei e mechitechut el ngalek. Me kau el oungalek a ulterekokl el metik a chouaika el omeruul el kmal mekngit.

Me ke mekerang e rullii tia el chetituokel el tekoi me ngdiak lebo er ngii er a telungalek er kau? A rebek el chedal a telungalek a kmal kirir el mesuub e mo urrekodel a bebil el omellach el ngii a olekebai aika el mekngit el omeruul el mo er a rengalek. Ngsebeched el metik aika el ulekrael el ngar er a Tekingel a Dios el Biblia.

A Tekingel a Dios me a Deleuill er a Rechad

A bo lemukerreu, e a bek el telungalek a kirir el mo urrekodel a llechul a Biblia el kirel a tekoi er a kldung. A Biblia a diak lomart a omesodel a tekoi er a durs, e le tiang a kuoll el tekoi me a omesodel a melemalt e kmal bleketakl. Ngochotii el kmo a Dios a kiltmeklii a tekoi er a durs el kmal mo uchul a deurreng el mo er a bechiil el sechal me a bechil. (Osisechakl 5:15-20) Me nguaisei, engdi ngolekebai er a tekoi er a durs er a ikrel a uleketmokl el chebechiil. El ua tiang, a Biblia a bleketakl el omtok a durs er a  delongelir a rekauchad el chad. Ngar er a Levitikus 18 el bliongel, e ngolekebai a durs el meketmokl er a delongelir a rekauchad el chad. Ka momtab aika el tekoi el kmo: “Ng diak a tar kemiu el mo bad el obengkel a chedal. Ngak a RUBAK.”​—Levitikus 18:6.

A Jehovah a dilu el kmo a omengetmeklel a durs er a delongelir a rekauchad el chad a “kikiongel el tekoi,” el oublals er a kodall. (Levitikus 18:26, 29) Ngbleketakl, Ngike el Ulemeob a kmal ngarbab a llechul el kirel tia el tekoi. Chelecha el sils, e a betok el llechul a kabelment a oba osisiu el uldasu, el olekebai a mekngit el deleboes el omeruul el mo er a rengalek el chedal a telungalek. Ngblechoel a llach er a beluu el mesaod er a ngalek el mleketmokl a mekngit el deleboes el omeruul el mo er ngii el ulekiu a klou el chad el kmo ngmloterebek. Ngera uchul me kede kmo a ngalek a mloterebek a lsekum a klou el chad a rirellii tia el omeruul e a ngalek a dimlak lomtok er ngii?

A rebetok el oltaut a llach er a beluu a mla mo melechesuar a dimla lolekoi er ngii a Biblia el kirir a rengalek el kmo, ngblekerdelir a rengalek el diak el sebechir el omes a omesodel a tekoi el ua remeklou el chad. El ua tiang, a Osisechakl 22:15 a kmo: “A klebelung a medechel er a chelsel a rengul a ngalek.” A apostol el Paulus a mlukrael el meluches el kmo: “Ser a kngalek e a . . . uldesuek me ng mle ua uldesuir a re ngalek, ma telbilel a renguk me ng mle ua telbilel a rengrir a rengalek. E chelechal bla bo kklou el chad, e ak mla chemoit a ikel tekoilngalek.”​—1 Korinth 13:11.

 A ngalek a dirkak el sebechel el mo ungil el medengelii a belkul a omengetmeklel a durs, me a lechub el sebechel el omtab aike el mo telemellel tia el mekngit el omeruul er a ngar medal el taem. Sei a uchul, me a ruumesingd el chad a kongei el kmo a rengalek a dirkak el bo el sebechir el melilt el kmo te meruul a tekoi er a durs me a lechub e ngdiak. Me a omesodel tiang a kmo, ngdiak el sebechel a klou el chad (me a lechub e ngkekerei el chad) el mo er a omerellel a deleboes el obengkel a kekerei el ngalek e mesaod er tia el omerellel el kmo, ngika el ngalek a dimlak a ultekengel er tia el omeruul me a lechub e ngmle soal. Ngika el klou el chad a mla tomellii a llach el kirel a oterebek. Tia el omeruul a omtok er a llach el kelebsengel a mo mekelebus. A ngerachel el kirel a oterebek a mo er ngike el chad el ulelterebek, el diak lebo er ngike el kekerei el ngalek, el ngii a dimlak lekengei er tia el omeruul.

Ngmekngit a rengud e le betok er aika el delengerenger a diak lobals er tirke el olab a ngerachel er a beluu er chelecha el sils. Ngar er a Australia e a bekord el 10 el basent er a remeruul er tia el mekngit el omeruul a mla mutaut er a llach e di mekesai er tir a mlekelebus. A bebil er a beluu a oba osisiu el ildois. Me a kabelment alta e ngdi sebechel el kutmeklii a telkib el mo omekerreu er a telungalek er a Rekristiano, engdi a otutel a omellach er a Biblia a lmuut el klou el ulekerreu a leketmeklii.

A remera el Kristiano a medengei el kmo a Dios el liluches aike el omellach el ngar er a Tekingel a dirkak lemengodech. Ngomes a rokui el tekoi el doruul, el mo lmuut er aike el tekoi el berrotel er a rechad. A Biblia a kmo: “A rokui el tekoi a di bleketakl er osengel, me kede rokui el mo mesaod er kid er ngii.”​—Hebru 4:13.

A Dios a mo oukerrekeriil er kid a lsekum kede tomall a llechul e tomelleterir a rechad. Engdi ngomekngeltengat er kid a bo doltirakl a melemalt el llechul el kirel a klengar er a telungalek. Ngerang a bebil er aika el llechul?

Telungalek el Modak el Okiu a Bltikerreng

A Biblia a ouchais er kid el kmo: A “bltikerreng a semesemel a rokui el tekoi el kmal mo ungil el uldak.” (Kolose 3:14) A Biblia a mesaod er a bltikerreng el diak el di el tekoi el dolechesuar er a rengud. Ngbai mocholt er a rolel a doruul a ungil e dolekebai a mekngit el omeruul. (1 Korinth 13:4-8) Ngar er a chelsel a telungalek, e a bltikerreng a belkul a kmo kede olecholt a omengull me a blekokuii er a delongeled. Ngbelkul a kmo a rolel a klengar er kid a olecholt el kmo kede oba osengel a Dios el kirel a derta el chedal a telungalek. E le Dios a mla mesterir a derta el chedal a telungalek a klou a ultutelel el ngerechelir.

A chedam el bdelul a delengchokl a kirel el olecholt a bltikerreng. Ngmedengei el kmo a chedam el Kristiano a diak a llemeltel el mo mekngit a omerellel el mo er a bechil me a lechub a rengelekel. Ngbai oltirakl er a kerebil a Kristus el ngii a bdelul a ongdibel. (Efesus 5:23, 25) Me ngoba delemedemek e olecholt a bltikerreng el mo er a bechil e klou a rengul e bekokuii el mo er a rengelekel. Ngblak a rengul el omekerreu er tir e mo er aike el sebechel el olekebai er a ngii di el ngerang el sebechel el tomellii sel budech, ulekerreu, me a klaumerang er a delongelir.

Nguaisei, a bechiil el redil el chedil a dirrek el ngar er ngii a klou a ultutelel el ngerechelel. A Biblia a ouchais el kmo a Jehovah me a Jesus a sorir el omekerreu er kid el di uai a charm el soal el omekerreu er a rengelekel. (Mateus 23:37) A chedil me ngdirrek el kmal kirel el omekerreu er a rengelekel. Ngolecholt er a bltkil a rengul sel lemereched el omekerreu er a rengelekel er a bai di lolatk er a di ngii. A chedam me a chedil a diak el kirir el ousbech er a klisichir el ngar er a mekngit el rolel el lorrouk me a lechub e lomekdakt er a derta el chedal a telungalek, me a diak el kengei er a rengelekir me lousbech chouaika el mekngit el blekeradel er a delongelir.

Me a derta el chedal a telungalek sel lolecholt a omengull er a delongelir, e a ungil el rolel a cheldecheduch a melemolem. A William Prendergast el meluches a babier a kmo: “A ruungalek a kirir el bek el sils el bo lungil el chadecheduch tir me a rengelekir.” Ngdilechelii el kmo: “Tiang a kot el ungil el rolel e ngmokebai sel mondai er a mekngit el deleboes el omeruul.” Nguaisei, a Biblia a melisiich er tiaikid el rolel a ungil el cheldecheduch. (Duteronomi 6:6, 7) Sel lemotaut tia el ulekrael, e a delengchokl a mo basio el sebechir a rechedal a telungalek el mo ungil el chadecheduch el olecholt aike el ngar er a rengrir.

Kid a kiei er a chelsel a mekngit el beluulechad me ngdiak el sebechel a rokui el mekngit el omeruul el mo diak. Me nguaisei, engdi a ulekerreu el delengchokl a ngar er ngii a klou el lerellii. Me a lsekum a rebebil el chedal a telungalek a metemall sel lecheroid er a blai, e te medengei el kmo ngsebechir el mo er ker el kirel a ongelaod me a ulekerreu. A chouaitia el delengchokl a basio er a ulekerreu el ngar tia el mekngit el beluulechad. Me a Dios bo lomekngeltengat er a meringel el ureriu el meruul er a telungalek er kemiu el mo blil a ulekerreu!

[Footnote]

[Baks el ngar er a 10 el llel]

Tekoi El Kirel A Ulekerreu El Delengchokl

Internet: A lsekum a rengelekem a ngar er ngii a techellir el ousbech er a Internet, e ngkirir el ngmai a ulekrael er a rolel a bo lungil el ousbech er ngii. Ngkmal betok a site el ngar er ngii a siasing er a remeau er ngii me a chat room me a dirrek el social network el lebo er ngii a remeklou el chad el osiik er a rengalek el bo longesuseu er tir el kirel a deleboes el omeruul. Ngkmal ungil a domelecha computer er a basio el sebechir a ruungalek el lomes er a rolel a rengelekir a lousbech er ngii. A rengalek a diak el kirir el ouchais aike el tekoi el di kirir el telungalek el medengei me a lechub e lolatk el mo omes er a chad el blo lekaodengei el okiu a Internet.​—Psalm 26:4.

Rrom: Ngar er a betok el blekeradel el deleboes el omeruul a mileketmokl el mo er a ngalek, e ngike el klou el chad a millim a rrom. A tekoi el dilubech a ochotii el kmo a remeklou el chad el imis el melim a rrom a mo diak a rrengir, e a rebebil er tir a kongei el oltaut a ngelbesel a rengrir, el ngii el tekoi a mle sebechir el lomtebechel a lsekum e ngdimlak el cheltelaol. Misei e tia el kdekudel el tekoi a ta er a uchul me ngkired el oltirakl er a omellach er a Biblia el mo mengeroid er kid er a cheltelaol er a rrom me a imis el omelim el rrom.​—Osisechakl 20:1; 23:20, 31-33; 1 Petrus 4:3.

Techall el Di Kid el Tang: A ta el redil a melatk el kmo: “Uriul er a lemad a delak, e ngdi mle ta el demak a mla er ngii a kateng er a mado er ngii me a lechub a chesimer er a delemerab er ngii. Ngdi ulemes aike el rokui el tekoi el ki moruul el mo lmuut er aike el taem el ki blo er a benjo.” Ngika el chad a mirruul a deleboes el mo er a rengelekel el redil el rokui. A rebek el chedal a telungalek a kirir el mo medengelii a klungel a ultutelel sel urungulel a chad el soal el di ngii el tang. A lebebil er a taem e a ruungalek a sorir el di tir el tang, me ngkirir el mesterir a rengelekir a techellir el kuk di tir el tang sel lorael el mo meklou el chad. A rungil el oungalek a meruul el mo er a rechad aike el sorir a rechad a loruul el mo er tir.​—Mateus 7:12.