1, 2. Nglocha mle ua ngera uldesuir a rebebil er a rechapostol er a uchei er sel ulebongel el omerollel a Jesus el mo er a Jerusalem?

 ‘SEL domes er a eanged e ngdiak a eabed, e sebeched el mesang a buil. A kesus, e tirke el mengkar er a Jerusalem a locha dirrek el milsang. Sera bo lodengei a ngarbab el kort er a rechad er a Judea e te ultebedii a subed el kmo ngmla omuchel a beches el buil er a Nisan. Seikid e te milenguml a ngau el meruul a olangch me a lechub e a rullab a klumech a ulerreched el omerk er a chais. A rechad el ngar tiang a dirrek el mla rongesii tia el chais. A Jesus a ulterekokl el soal mo er a Jerusalem me bo el sebechel el mechii a temel a Baskua.’

² Aika el tekoi a locha mle uldesuir a rebebil er a rechapostol er a lobengkel a Jesus er a uchei er sel ulebongel el omerollel el mo er a Jerusalem. Ngar tia el taem, e te mla er a Perea, el ngii a mla er a bita el omoachel er a Jordan. (Mt. 19:1; 20:17, 29; Mk. 10:1, 32, 46) Me a rechad er a Judea sel bo lodengei el kmo ngoingerang a Nisan 1, e te mo mengiil el 13 el klebesei e mochu mengedaol er a Baskua er a uriul er a lengelt a sils er a Nisan 14.

3. Ngera me a Rekristiano a semeriar el kirel a temel a Baskua?

³ A temel a Chedaol Blsoil er a Rubak a di osisiu ngii me a temel a Baskua, e mo er ngii er a uriul er a ngeltel a sils er a April 14, 2014. Tiang a kmal mo ileakl el sils el kirir a remera el Kristiano me tirke el semeriar el chad. E ngera uchul? A 1 Korinth 11:23-25 a melekoi el kmo: “A Rubak el Jesus er sel kesus er a le moterau, e ng ngiluu a blauang, e uriul er a loreng a sulel a Dios e ng milechedii e dilu el kmo, ‘Tiang a bedengek el kiriu. Moruul er tiang el kirel a omeltkiu er ngak.’ Ng dirrek el mle ua isei er a kob.”

4. (a) Ngera el ker a sebechem el di kau el oker el kirel a Chedaol Blsoil? (b) Kede mekerang e medengei el kmo ngoingerang a temel a Chedaol Blsoil er a bek el rak? (Momes er a baks el “Chedaol Blsoil er a Rak er a 2014.”)

⁴ A Chedaol Blsoil a di chimo el taem el Jesus a dilu er a rultirakl er ngii me te mo mengedaol er ngii er a bek el rak, me ke ulterekokl el soam el mo er tia el tekoi. Me a uchei er tiang,  e ngungil a di lekau el oker el kmo: ‘Ak mekerang e kutmeklak el kirel a Chedaol Blsoil? Ngerang aike el klekedall el mo usbechall? Tia el miting ngmo ua ngerang a teletelel? Ngera uchul me ngklou a ultutelel er ngak a Chedaol Blsoil me aike el klekedall el usbechall er sel kesus?’

5. Ngera mle soal a Jesus a bo leketmokl a rechapostol el kirel a Baskua?

⁵ A Jesus er a loldurech er a rechapostol el mo mengetmokl er a basio el kirel a Baskua, e ngdimlak ledu er tir me lomelecha betok el besiich. Nglocha bai mle soal a bo losiik er a ungil e kltmokl el basio el sebechel ngii me a rechapostol er ngii el ousbech er ngii. (Monguiu er a Markus 14:12-16.) Tirka el apostol a dirrek el mle kirir el mo smiik aike el rokui el luluusbech el kirel tia el blengur, el uldimukl er ngii a diak a omkukel el blauang me a bekerekard el bilong. A uriul er a blengur er a Baskua, e a Jesus a milsaod el kirel a blauang me a bilong el ngii a eru el klekedall el usbechall er a temel a Chedaol Blsoil.

6. (a) Ngerang dilung a Jesus el kirel a blauang er a uriul er a blengur er a Baskua? (b) Ngera el blauang a usbechall er a temel a Chedaol Blsoil?

⁶ A apostol el Mateus a mla er tia el blengur e a uriul e ngmilluches el kmo: “A Jesus a ngiluu a telkib er a blauang, e milluluuch el mereng a sulel a Dios, e milechedii, e nguu el mesterir a rubengkel. Ng dilu el kmo, ‘Mnguu me monga er ngii.’” (Mt. 26:26) Tiang a dimlak a omkukel el “blauang,” el di osisiu el blauang el luluusbech er ngii er a blengur er a Baskua. (Exo. 12:8; Dut. 16:3) Tia el blauang a lurruul er ngii el ousbech a ralm me a merikengko el rruul er a wheat. Tiang a dimlak a omkukel me ngdiak lobkuuk. Ngdirrek el dimlak a ngera el lolecha er ngii el uai a sar. Ngmle cheliliik el ua brel, e beot el obechebached. Me chelecha el taem, e a uchei er a Chedaol Blsoil, e a remechuodel er a ongdibel a sebechir el olengit er a ta er a chad el mo meruul er a chouaitia el blauang. Ngkirel el meruul er ngii el ousbech a ralm me a merikengko el rruul er a wheat, e sebechir el mengerdoched er ngii el ousbech a sesei el cheluch. Ngar er a basio el diak a merikengko el rruul er a wheat, e ngsebechir el ousbech a merikengko el rruul er a beras, barley, mais me a lechub e ngkuk ta er a bedengel a grain.

7. Ngerang a mla er a chelsel a kob el luluusbech er ngii a Jesus er a temel a Chedaol Blsoil? Ngera el bilong a sebeched el ousbech er ngii el kirel a Chedaol Blsoil?

⁷ A Mateus a dirrek el millekoi el kmo a Jesus a “ngiluu a kob, e mirreng a sulel a Dios, e nguu el mesterir, e dilu el kmo, ‘Molim er ngii kemiu el rokui.’ ” (Mt. 26:27, 28) Me sel kob el luluusbech er ngii a Jesus a mla er ngii a bekerekard el bilong er a chelsel. Kede mekerang e medengei el kmo ngdimlak el di losechel a kreip? E le a temel a omeridm el kreip a meketeketang er a bo lemerek. Me alta e ngdimlak a bilong er sel kot el blengur er a Baskua el mla er ngii er a Ekipten, engdi a Jesus a dimlak ledu el kmo ngmle mekngit a lolim er a temel a blengur er a Baskua. Me a Rekristiano er chelecha el taem a ousbech a bilong er a temel a Chedaol Blsoil. Ngera el bedengel a bilong a usbechall? A bilong el usbechall er a Chedaol Blsoil a kirel diak a rrom me a ngii di el ngerang el urrechomel er ngii, e le ngdimlak el usbechall a ngii di el ngerang el mo melechel er a kerresel a rsechel a Jesus. Tia el bilong a sebechel a chad el di ngii el meruul er ngii, me a lechub e ngbilong el ua Beaujolais, Burgundy, me a lechub e ng Chianti el sebeched el omechar er a stoang.

8. Ngera uchul me a Rekristiano a semeriar el mo medengelii a belkul a blauang me a bilong?

⁸ A tekingel a apostol el Paulus a ochotii el kmo ngdiak el di rechapostol a kirir el mengedaol er a Chedaol Blsoil e lemerekong. Ngmilluches el mo er a rudam el ngar er a ongdibel er a Korinth el kmo: “Ele kngiluu er a Rubak a osisechakl el kbilskemiu el kmo a Rubak el Jesus . . . [a] ngiluu a blauang, e uriul er a loreng a sulel a Dios e ng milechedii e dilu el kmo, ‘Tiang a bedengek el kiriu. Moruul er tiang el kirel a omeltkiu er ngak.’” (1 Ko. 11:23, 24) Me a Rekristiano er chelecha el taem a muchelechel el mo mengedaol er a Chedaol Blsoil el ta el taem er a bek el rak, sei a uchul me te semeriar el mo medengelii a belkul a blauang me a bilong.

9. Ngera el cheleuid el tekoi a loumerang er ngii a rechad el kirel a blauang el luluusbech er ngii a Jesus?

⁹ A rebebil el chedal a klechelid a melekoi el kmo a Jesus a dilu el kmo ‘Tiang a bedengek.’ Me te oumerang el kmo ngmla er ngii a mengasireng el tekoi el dilubech me tia el blauang a ulebult el mo bedengel a Jesus. Engdi ngdimlak el uaisei. * A bedengel a Jesus me a diak a omkukel el blauang  a di dul mla er mederir a reblak a rengrir el apostol. Me ngbleketakl el kmo a Jesus a uluusbech er a blauang el okesiul a bedengel. E ngii a mle blechoel el ousbech a okesiu sel lolisechakl.​—Jn. 2:19-21; 4:13, 14; 10:7; 15:1.

10. Ngera belkul a blauang el dousbech er a Chedaol Blsoil?

¹⁰ Sel blauang el lulemes er ngii a rechapostol er a bochu longa er ngii a okesiul a bedengel a Jesus. Ngmla er ngii a ta el taem, el remera el Kristiano a uluumerang el kmo a blauang a okesiul a ongdibel er a rengellitel el Kristiano, el Biblia a omekedong er ngii el kmo ng “bedengel a Kristus.” Te uluumerang er tiang e le Jesus a milechedii a blauang el mo betok el blechebached engdi ngii a dimlak a ta el chiuesel el mecham. (Efe. 4:12; Rom 12:4, 5; 1 Ko. 10:16, 17; 12:27) Engdi a uriul er a klou el omerriter, e te mlo medengei el kmo a blauang a okesiul a bedengel a Jesus er a klechad. A Bades a dirrek el mesaod el kmo a Jesus a “mlo chuarm” e mlad er a teluo el kerrekar. Me a blauang el dousbech er a Chedaol Blsoil a okesiul a bedengel a Jesus er a klechad el tilengetengii el kirel a kngtid.​—1 Pe. 2:21-24; 4:1; Jn. 19:33-36; Heb. 10:5-7.

11, 12. (a) Ngerang millekoi a Jesus el kirel a bilong? (b) Ngera belkul tia el bilong el dousbech er ngii er a Chedaol Blsoil?

¹¹ Sel bo dodengelii a belkul a blauang e ngmo sebeched el mo medengelii a belkul a tekingel a Jesus er a lolekoi el kirel a bilong. Kede menguiu el kmo: “Ng dirrek el mle ua isei er a kob er a uriul er a blengur, e dilu el kmo, ‘Tiang a kob er a beches el telbiil er a rengedel a deleuill el okiu a resechek.’” (1 Ko. 11:25) A betok el Biblia a oleiuid er tia el bades el kmo: “Tial kob a beches el telbiil loeak a rsechek.” (BT) Me tia el kob el lulebang a Jesus ngmle beches el telbiil? Ngdiak. A Jesus a milsaod er sel bilong el mla er a chelsel a kob. Me tia el bilong ngokesiul a ngerang? Ngmle okesiul a rsechel el bo lolenget er ngii.

¹² Ngar er a cheldechedechal a Markus, e kede menguiu a tekingel a Jesus el kmo: “Tia rsechek el rasech era beches el telbiil el mo moitel el kirir ar betok.” (Mk. 14:24, BT) Ngdirrek el ngar er a Mateus, e kede menguiu el kmo a rsechel a Jesus a mo “metenget el kirir a rebetok el chad el kirel el melubet a klengit.” (Mt. 26:28) Me a bekerekard el bilong a okesiul a rsechel a Jesus el ngii a uchul me ngsebechel a kngtid el musubes.​—Monguiu er a Efesus 1:7.

13. Ngua ngera omengetmeklel a Chedaol Blsoil?

¹³ A lsekum e ngketengem el mo er a Chedaol Blsoil el obengterir a Resioning er a Jehovah, e ngmo ua ngera uldesuem? Tia el miting a mo er ngii er a basio el ungil el kltmokl, el sebechir a rokui el chad el dengchokl er a chelsel e dmeu a rengrir el orrenges er a cheldecheduch. Nglocha mo er ngii a sesei el besiich el bung, engdi ngdiak mues a betok el besiich er a chelsel, e dirrek el diak el uai a meklou el party. A ta er a mla metutk el mechuodel a mo otebedii a bleketakl e ungil el cheldecheduch el mengai a uchetemel er a Biblia el mesaod el kirel a Chedaol Blsoil er a Rubak. Ngmo mesaod el kmo a Kristus a mlad el kirel a olubet me bo el sebeched el melemolem el ngar. (Monguiu er a Rom 5:8-10.) Ngdirrek el mo mesaod el kirel a eru el omelatk el ngar er a Biblia.

14. Ngera el eru el omelatk a bo losaod ngike el mo oltobed er a cheldecheduch er a temel a Chedaol Blsoil?

¹⁴ A rebebil el Kristiano a oba omelatk el mo mengedereder el obengkel a Kristus el ngar er a eanged. E tiang a di omeltkir a redi kesai el Kristiano el uai tirke el blak a rengrir el apostol er a Jesus. (Lk. 12:32; 22:19, 20; Och. 14:1) Sel ta er a omelatk a lobang a ruumesingd el blak a rengrir el Kristiano. Te oba omelatk el mo kiei er a paradis el chutem el diak a ulebengelel. Me seikid el taem e a beluulechad a mo meketmokl el ua lulemdasu er ngii a Dios, e tiang a blekeradel el leblechoel a Rekristiano el meluluuch el kirel. (Mt. 6:10) A Biblia a mesaod el kirel a ungil klengar el bo loldeu a rengrir er ngii a  rechad el diak a ulebengelel.​—Isa. 11:6-9; 35:5, 6; 65:21-23.

15, 16. Kede mo mekerang er a diak a omkukel el blauang er a temel a Chedaol Blsoil?

¹⁵ Me a uriul er a losaod aika el eru el omelatk, e ngike el mengedecheduch a mo ouchais el kmo ngmla mo taem el bo doruul er sel tekoi el lurruul er ngii a Jesus er a longedaol er a Chedaol Blsoil. Ngmo er ngii a diak a omkukel el blauang me a bilong el ngar er a tebel er bita er ngii. Ngmo menguiu er a bades el mesaod er a tekoi el lurruul er ngii a Jesus el ousbech er a blauang. Nglocha mo menguiu er a tekingel a Mateus el kmo: “A Jesus a ngiluu a telkib er a blauang, e milluluuch el mereng a sulel a Dios, e milechedii, e nguu el mesterir a rubengkel. Ng dilu el kmo, ‘Mnguu me monga er ngii e tia ia bedengek.’” (Mt. 26:26) A Jesus a milechedii a blauang me bo el sebechel el merous er ngii el mo er a rechapostol el ngar bita er ngii. Sel lebo er ngii a Chedaol Blsoil er a April 14, e ke mo mes a diak a omkukel el blauang el ngar er a belatong.

¹⁶ A uchei er a bo lorrael a belatong, e ngmo er ngii a kedeb el nglunguuch. Ngmo er ngii a ungil a ildisel el belatong me bo el sebechir a rudam el mereched el orrael el ngar er a ungilbesul el rolel el oltirakl er a basio el lengar er ngii, e diak loruul er ngii el kmal mo klou el tekoi. Te locha di kesai me a lechub e ngdiak a mo mengang er a blauang, el ua aike el dilubech er a oumesingd el ongdibel er sera Chedaol Blsoil er a rak er a 2013.

17. A doltirakl er a ulekrael er a Jesus e kede mo mekerang er a bilong er a temel a Chedaol Blsoil?

¹⁷ A uriul e a odam a mo menguiu a tekoi el leriruul a Jesus el ousbech er a bilong: “Ngiluu a kob, e mirreng a sulel a Dios, e nguu el mesterir, e dilu el kmo, ‘Molim er ngii kemiu el rokui; e tia ia rsechek el melisiich er a telbilel a Dios. Ngiil rsechek a mo metenget el kirir a re betok el chad el kirel el melubet a klengit.’” (Mt. 26:27, 28) Me ngoltirakl a ulekrael er a Jesus, e nglmuut el mo er ngii a nglunguuch e sola e a rudam a mo orrael er a bilong er a delongelir a rokui el chad.

18. Ngera uchul me ngdirk klou a ultutelel a debo er a Chedaol Blsoil alta e te di kesai a mo menga blauang e melim a bilong?

¹⁸ Ngdi tirke el mo mengedereder el obengkel a Jesus el ngar er a eanged a mo menga blauang e melim a bilong. A ruumesingd el chad el mo er a Chedaol Blsoil a di mo orrael a blauang me a bilong el mo er ngike el ngar bita er ngii. (Monguiu er a Lukas 22:28-30; 2 Ti. 4:18) Me alta e a ruumesingd el Kristiano a diak longa blauang e lolim a bilong, engdi ngdirk klou a ultutelel a lebo er a Chedaol Blsoil. E ngera uchul? E le te ochotii el kmo te omes er a olubet el tengetengel a Jesus el klou a ultutelel. Me sel taem er a Chedaol Blsoil, e te mo melatk el kirel a rokui el klengeltengat el mo er ngii el olubet el tenget a uchul. El uai tiang, ngar er ngii a omeltkir el mo teloi er a “kloul seked” el tir a mo suobel er a “meringel el odechelakl” me a lechub e ngkloul ringel. Me a klaumerang er tir er a olubet el tengetengel a Jesus a uchul me te mo melemalt er a osengel a Dios, el ua le “sililek a bilir er a rsechel a Ngelekel a Sib me ng mlo becheleleu.”​—Och. 7:9, 14-17.

19. Ngera sebeched el kutmokl me bo dengai a klungioled er a Chedaol Blsoil?

¹⁹ Te mekerang a Resioning er a Jehovah er a beluulechad el rokir e mengetmokl el kirel a Chedaol Blsoil? Sesei el sandei er a uchei e kede mengemedaol er tirke el rokui el sebechir el me teloi er kid. Aike el sils er a uchei er tia el ileakl el miting e kede menguiu er a Biblia el kirel aike el tekoi el lurruul a Jesus me a tekoi el dilubech er a uchei er a Chedaol Blsoil er a Rubak er a rak er a 33. Kede kutmokl a ngii di el chelsengud er a uchei me bo el sebeched el mo er a Chedaol Blsoil. Ngungil a demereched el mo er tia el miting me bo el sebeched el outkeu er a rechad e lak de duob. Kid el rokui a mo ngmai a klungioled sel domiis a Biblia er kid el oltirakl er ngike el mengedecheduch sel longuiu e losaod a Bades. Me sel kot el klou a ultutelel er ngii el rokui, a mo sebeched el ochotii a omereng el saul er kid el kirel a tengetengel a Jesus me a blekongesenges er kid er a tekingel el kmo: “Moruul er tiang el kirel a omeltkiu er ngak.”​—1 Ko. 11:24.