1, 2. Ngerang mo meruul er ngii a Rengedel a Dios, e kede mekerang e medengei el kmo ngmei?

 SERA rak er a 31 e a Jesus a mla er a rois el kmeed er a beluu er a Kapernaum e ullisechakl er a ruleltirakl er ngii el mo meluluuch el kmo: “A Rengedem le mei.” (Mt. 6:10) Chelecha el taem, e a rebetok a omdasu el kmo tia el Renged a diak lemei. Engdi kid a mui el oumerang el kmo a Jehovah a mo onger a nglunguched el olengit er a Renged me lemei.

² A Jehovah a mo ousbech er a Rengedel el mo oldak a telungalek er ngii el ngar er a eanged me a ngar er a chutem. Me tia el moktek er ngii a ulterekokl el bo lotutii. (Isa. 55:10, 11) Me a betok el ungil el tekoi el mla meketmokl er a chelsel aika el mereko el 100 el rak a meketeklii el kmo, a Jehovah a mla mo King e meruul a mengasireng el tekoi el kirir a rebetok el miliol el mesiungel. (Sek. 14:9; Och. 15:3) Me nguaisei, engdi a omeruul el Jehovah a mo King a kuk ngodech er a taem el lemei a Rengedel a Dios el Jesus a ullisechakl er kid el mo meluluuch el kirel. Me ngera klekakerous er aika el eru el tekoi e ngerang rullii er kid?

3. (a) A Jesus ngulemuchel el mengedereder el King er ker er oingerang? (b) Ke mekerang e meketeklii el kmo a Jesus a ulemuchel el mengedereder er a rak er a 1914? (Momes er a footnote.)

³ A bekord el 20 el rak er a uchei er a rak er a 1900, e a remesiungel a Dios a ulemuchel el mo medengelii a belkul a ulaoch el lulluches er  ngii a Daniel er a betok er a 2,500 el rak er a mla me mong el kmo: “Sel taem el lorreder tirkel king, e a Dios el ngar a eanged a mo toketekii a rengedel el mo diak a ulebengelel.” (Dan. 2:44) Me a Remesuub er a Biblia a mle betok el rak el ouchais el kmo, ngar er ngii a meklou a ultutelel el tekoi el mo duubech er a rak er a 1914. Engdi seikid el taem e a rebetok el chad a ulemdasu el kmo ngdi mo ungilbesul a rokui el tekoi er a beluulechad. A ta er a chad a milluches el kmo: “A beluulechad er sera 1914 a mle mui er a omelatk me a techall er a ungil el klengar.” Me nguaisei, engdi seikid el rak e ngulemuchel a Kot el Mekemedil a Beluulechad me ngtilaut a ulaoch er a Biblia. A bosech er a kall, desiu, meringel el rakt, me a lmuut el bebil el ulaoch er a Biblia el mlo tmaut a mileketeklii el kmo, a Jesus Kristus a ulemuchel el mengedereder el ngar er a eanged el King er a Rengedel a Dios er a rak er a 1914. * Me a Jehovah a mlo King el ngar er a beches el rolel er sera lebsa klisichel a Ngelekel el mo Mesias el King!

4. Ngera sel kot el tekoi el lerirellii a Jesus er sera bo le King? E milekerang er a uriul?

⁴ Sel kot el tekoi el lerirellii a beches el King er a Dios a mlo oumekemad er a Satan el ngike el kot el ngarbab el cherrouel a Demal. A Jesus me a rechanghel er ngii a uldikii a Diabelong me tirke el anghel er ngii er a eanged. Tia mlo uchul a klou el deurreng er a eanged, engdi ngmlo uchul a lmuut el betok el ringel er a beluulechad. (Monguiu er a Ocholt 12:7-9, 12.) Me a uriul, e a King a ulemuchel el mengikiid, olisechakl, e mengetmokl er a remesiungel el ngar er a chutem el mo meruul a soal a Dios. Me bo desa el kmo, kede mekerang e ngmai a klubeled er a blekongesenges er tir er a ulekrael er a Jesus.

5. Ngera el omengikiid a dilubech er a delongelel a rak er a 1914 me a uchelel a rak er a 1919?

⁵ A uriul er a lekikidii a eanged er a mekngit el blekerdelel a Satan me a rechanghel er ngii a Jesus, e a Jehovah a ulderchii el mo merriter e mengikiid er a rechedal el ngar er a chutem. Me a profet el Malakai a milsaod er tia el omeruul el kmo ngomengikiid. (Mal. 3:1-3) A reksi a ochotii el kmo tia el omengikiid a dilubech er a delongelel a rak er a 1914 me a uchelel a rak er a 1919. * Me a lsekum ngsoad el mo chedal a telungalek er a Jehovah el ngar er a eanged me a chutem e ngkired el mo klikiid, me a lechub e kede mo chedaol. (1 Pe. 1:15, 16) Me a omengull er kid el mo er Ngii a kmal kirel el mo klikiid el diak el chelsechusem er a tekoi er a balatiks me a klsuul el klechelid.

6. Ngmekerang a suobel el mengai er a tekingel a Dios e motobed, e ngera uchul me ngmeklou a ultutelel?

⁶ Me a Jesus a uluusbech er a klisichel el King el mo tutkii a “blak a rengul e mellomes a rengul el mesiou.” Me ngika el mesiou a ngerechelel el “omesterir a kelir” tirke el rokui el chedal a “tal delebechel” el sib er a Jesus. (Mt. 24:45-47; Jn. 10:16) Me sera 1919 el mei e a remekesai el ngellitel el odam a millemolem el blak a rengrir el meruul er tia el klou a ultutelel el ureor el oba tekingel a Dios el omeka er “tirkel bebil er a re mesiou.” Me a blak a rengul e mellomes a rengul el mesiou a oltobed a betok el suobel el ngii a ua kall el melisiich a klaumerang er kid. Aika el suobel a ngosukid el mo mengikiid er a omengull er kid, omerelled, uldesued, me a bedenged el mo oltirakl a uldesuel a Dios. Ngdirrek el osisecheklid e melisiich er kid el mo blak a rengud el omerk er a klumech, el ngii a kot el klou a ultutelel el ureor el ngar er ngii er chelecha el taem. Me kau ke ngmai a mui el klungiolem er a suobel el oltobed a blak a rengul el mesiou?

7. Ngera el klou a ultutelel el ureor a lulemuchel er ngii a Jesus er a lengar er a chutem? E melemolem el mo oingerang?

⁷ A Jesus er sera lomuchel a omesiungel er tia el chutem, e ngdilu el kmo: “Ngak a dirrek el kirek el olisechakl er a Ungil Chais er a Rengedel a Dios er  a ikel bebil er a beluu, ele tiaikid a lulderchak a Dios el me meruul er ngii.” (Lk. 4:43) Me ngar er a chelsel a edei me a tedobech el rak er a klengar er ngii, e a ureor er a berkel a klumech a mle sel kot el klou a ultutelel el ureor er a rengul a Jesus. Ngullisechakl er a redisaiplo er ngii el kmo: “Bong e mouchais el kmo, ‘A Rengedel a eanged a kmedang!’” (Mt. 10:7) Me a uriul er a lebekiis er a kodall, e a Jesus a dilu el kmo, a rultirakl er ngii a mo merkii tia el klumech “el mo lmuut er a bek el beluu er a beluulchad.” (Rel. 1:8) Ngtilbir el kmo ngmo olengeseu er tir er tia el klou a ultutelel el ureor el mo lmuut er a ulebongel er a beluulechad.​—Mt. 28:19, 20.

8. Ngmilekerang a King e melisiich er a rechedal el mo omerk er a klumech?

⁸ Me ngar er a rak er a 1919, e a “Ebangkelio el kirel ngii el Renged” a liluut el medechel a belkul. (Mt. 24:14) E le King a mla mo mengedereder er a eanged e mla omuchel el mengudel er a kekerei el delebechel er a remla mekikiid el chedal el ngar er a chutem. E tirka el chad a kmal mle semeriar el olengesenges er a tekingel a Jesus el mo omerk er a ungil chais er a beluulechad el rokir el kmo, a Rengedel a Dios a mla omuchel el mengedereder el ngar er a eanged! (Rel. 10:42) El ua tiang, sera September 1922, e a bekord el 20,000 el mle sorir el mo chedal a Renged a mla er a klou el ongdibel el mla er a ngii er a Cedar Point, Ohio, U.S.A. Ka di molatk er sel klou el deurreng el mlo er ngii er sera lotebedii a cheldecheduch a Brother Rutherford, el dai er ngii a kmo “A Renged,” e ledu el kmo: “A Jesus a mengedereder el King! E kemiu a omtechei er ngii. Me chelechang e momerk, momerk, momerk a chisel a King me a rengedel.” Me sel ongingil el sils, e a 2,000 er tir a mlo oldingel a obliil, me a rebebil er tir a mlo omerk er a klumech er a beluu el 45 el mael a cherridel er sel basio el ble lekldibel er ngii. A ta er a odam a dilu el kmo: “Ngkmal diak kubes er sel okedong el mo omerk a chisel a Renged me a blakerreng er a rechad el mle kldibel!” Me a rebetok a di mle uai a uldesuel.

9, 10. (a) Ngera el skuul a osisecheklid el mo meduch el meruul er a omesiunged? (b) Ngera el klungiaol a cho bla mngai er aika el skuul?

⁹ Me ngar er a rak er a 1922 e ngmla mo er ngii a betok er a 17,000 el omerk er a klumech er a chelsel a 58 el beluu. Engdi ngmle kirir el mo mosisechakl. Sera irechar e ngike el ngellitel el King a milsterir a redisaiplo er ngii a bleketakl el ulekrael el kmo, a ureor te mo meruul er ngii er ker e mekerang a loruul er ngii. (Mt. 10:5-7; Lk. 9:1-6; 10:1-11) Me ngdi osisiu er chelechang, a Jesus a kutmokl a tekoi me bo el sebechir a rokui el omerk er a klumech el ngmai a ulekrael me a klekedall el lousbech me bo lungil el olisechakl. (2 Ti. 3:17) Me a Jesus a ousbech er a ongdibel er a Rekristiano el olisechakl er a rultirakl er ngii el mo meduch el meruul er a omesiungir. E a ta er a rolel a loruul er tiang a oeak a Skuul el kirel a Urerel a Dios el meketmokl er a chelsel a betok er a 111,000 el ongdibel er a beluulechad. Tia el skuul a olisechakl er a rekuk betok er a 7,000,000 el mo omerk er a klumech e olisechakl me bo el sebechir a “rokui el chad” el orrenges.​—Monguiu er a 1 Korinth 9:20-23.

 ¹⁰ Ngdirrek el ngar er ngii a bebil el skuul er a Biblia el meketmokl el olisechakl er a remechuodel, re pioneer, remesobil el odam, Rekristiano el obekel, rechedal a Branch Committee me a rebecherir, rudam el oldingel a ongdibel me a rebecherir, me a remisionari. * A rebebil el mlo er a Skuul er a Biblia el kirir a Rekristiano el Obekel a dilu el kmo: “Tia el ileakl el skuul el ki mngiluu a mla dochelii a bltkil a rengmam el mo er a Jehovah e ngosukemam el mo meduch el olengeseu er a rebebil.”

11. Te mekerang a rultirakl er a Jesus e melemolem el omerk er a klumech, alta e a Satan a omtok er tir?

¹¹ Ngika el cherroued el Satan a medengelii a klungel a ureor er a berkel a klumech el oberkang e mosisecheklang el mo er a rechad. Ngkmal soal a bo lak tia el ureor me ngmo er a bek el rolel a cheldechuul el merrob er tia el berkel a klumech me tirke el omerk er ngii. Engdi a ultekengel a Satan a diak el sebechel el mo tekoi, e le Jehovah a mla rullii a Ngelekel el mo kot el “ngar bab er a rokui el mengedereder er a melidiul, ma rulab a klisiich ma re ngar a deruchall, ma omerreder, ma re merreder.” (Efe. 1:​20-​22) Me a King el Jesus a ousbech er a klisichel el omekerreu e omekrael er a redisaiplo er ngii me bo lemeketmokl a soal a Demal. * Me a ungil chais a melemolem el oberk, me a rebetok el miliol el melemalt a rengrir el chad a mosisechakl el mo mengull er a Jehovah. Me ngkmal ileakl a techall el me er kid el mo sebeched el teloi er tia el kot el ungil el ureor!

12. Ngera el omelodech a mla er ngii er a chelsel a cheldebechelel a Dios er sera 1914 el mei?

¹² Sera lomuchel el mengedereder a Jesus er a 1914 el me lmuut er chelechang, e ngmengetmokl er a remesiungel me lemotaut a soal a Demal. (Monguiu er a Isaia 60:17.) Me sera 1919 e a derta el ongdibel a mlo er ngii a service director el mo omekrael a ureor er a berkel a klumech. E sera 1927, e a rechad a ulemuchel el oldingel a obliil a le Sandei. Sera 1931, e a remesiungel a Jehovah a mlo oungakl er a ngakl el Resioning er a Jehovah, el uchul me ngliluut el smisicheterir el mo menglou er a omesiungir el kirel a Renged. (Isa. 43:10-12) E ulemuchel er sera 1938, e ngmlo diak lolilt er a remo olab a ngerachel er a ongdibel el okiu a sengkio. Te bai mengilt a lsekum a blekerdelir a uleltirakl a ulekrael er a Biblia. E sera 1972, e ngmlo er ngii a chelechad er a remechuodel er a derta el ongdibel me ngmlo diak di el ta el odam a oungerachel a rokui el tekoi. Me tirke el rokui el mle rredemelel a mo ta er a remechuodel me a lechub e ngmesiou er a ongdibel a lullisiich er tir el mo omekerreu e omekrael er a ongdibel. (1 Pe. 5:2) E sera 1976 e a Chelechad er a Ruungerachel a mlo er ngii a elolem el committee er ngii el mo omekrael a berkel a klumech er a Renged er a beluulechad el rokir. Me seikid el taem el me lmuut  er chelechang e a Jesus a melemolem el mengetmokl er a rechedal el mo meruul a tekoi el oltirakl er a rolel a Dios.

13. Ngerang mla rullii er kau tia el omengederederel a Mesias el King?

¹³ Ka molatk aike el betok el tekoi el bla leketmokl a Mesias el King er a chelsel a kot el 100 el rak er a omengederederel. Ngmla mengikiid er a rebetok el chad el mo omtechei er a ngklel a Jehovah. Ngmla omekrael er a ureor er a berkel a klumech er a chelsel a 239 el beluu e mla osisecheklterir a rebetok el miliol el mo mengull er a Jehovah. Ngdirrek el mla oldak er a rebetok er a 7,000,000 el blak a rengrir el chedal el tir a kongei el mo meruul a soal a Demal. (Psa. 110:3) Me a Jehovah a mla ousbech er a Rengedel a Mesias el kutmokl a betok el meklou e ungil tekoi. Engdi ngdirk ngar er ngii a lmuut el betok el ungil el tekoi el mo meketmokl er a ngar medad el klebesei!

14. (a) Kede olengit er a Dios el mo mekerang sel doluluuch el kmo: “A Rengedem le mei”? (b) Ngerang a bades er kid er a rak er a 2014, e ngera uchul me ngkmal ungil?

¹⁴ Me alta e a Jehovah a milsa Ngelekel el Jesus Kristus a klisiich el mo mengedereder er a rak er a 1914, engdi ngdiak el belkul a kmo ngmla mecherrungel a nger er a nglunguched el kmo “a Rengedem le mei.” (Mt. 6:10) A Biblia a ulemlaoch el kirel a Jesus el kmo ngmo ‘mengedereder er a re cherrouel.’ (Psa. 110:2) Me chelechang e a kabelment er a rechad el chederedall er a Satan a dirk omtok er a Rengedel a Dios. Me sel doluluuch el olengit er a Rengedel a Dios me lemei, e kede olengit er a Dios me bo el sebechel a Mesias el King me tirke el obengkel el mengedereder, el okngemed a dereder er a rechad me a rokui el chad el omtok er a Renged. Me sel leduubech tia el tekoi e a ulaoch el llechukl er a Daniel 2:​44 a mo motaut. Tia el bades a mesaod el kmo, a Rengedel a Dios a “mo okngemed a ikel bebil er a renged el rokui.” Me ngmo okngemed aike el kabelment el omtok er a Renged. (Och. 6:1, 2; 13:1-18; 19:11-21) Me tia el tekoi el di kmedu el mo meketmokl a uchul me ngkmal ungil a bades er kid er a rak er a 2014 el ngar er a Mateus 6:10 el kmo: “A Rengedem le mei.” Me ngmla mo 100 el rak el longedereder a Jesus el ngar er a eanged!

15, 16. (a) Ngera el ungil tekoi a mo meketmokl er a chelsel a ta el telael el rak el omengederederel a Kristus? (b) Ngera sel mo ulebongel el tekoi el loruul er ngii a Jesus el ngii a Mesias el King? E tiang ngera belkul el kirel a moktek er a Jehovah?

¹⁵ A uriul er a lolekngemed er a recherrouel a Dios a Jesus, e ngmo mideklii a Satan me a remekngit el anghel er ngii er a chelsel a diak a btil el deliobech el kirel a ta el telael el rak. (Och. 20:1-3) Me sel bo lak a omengesuseu er a Satan me a rechanghel er ngii, e a Renged a mo ngosuterir a rechad el mo melai a klungiolir er a olubet el tengetengel a Jesus e okngemed a rokui el tellemall el mlo er ngii el okiu a kngtil a Adam. A King el Jesus a mo olekiis er a rebetok el miliol el chad er a kodall e kutmeklii a klou el ureor el olisechakl er tir el kirel a Jehovah. (Och. 20:12, 13) Me a beluulechad el rokir a mo paradis el di uai a sers er a Eden, me a rokui el blak a rengrir el chad a mo cherrungel.

¹⁶ A uriul er a ta el telael el rak el omengederederel a Kristus, e ngmo motaut a moktek er a Jehovah el kirel tia el chutem. Me seikid e a Jesus a mo olutii a Renged el mo er a Demal. (Monguiu er a 1 Korinth 15:24-28.) Me ngmo diak dousbech er a ngii di el chad el mo omtechei er kid er medal a Jehovah. Me a rokui el ngelekel a Dios el ngar er a eanged me a chutem a mo dmak el obengkel a Demerir el ua ta el klou el telungalek.

17. Ngera ke mla tibir el mo meruul el kirel a Renged?

¹⁷ Aika el betok el ungil el tekoi el dilubech er a chelsel a 100 el rak er a omengederederel a Renged a ochotii el kmo a Jehovah a dirk ngar er ngii a klisichel el mengedereder me a moktek er ngii el kirel tia el chutem a ulterekokl el mo tmaut. Me bo leblak a rengud el mesiou er Ngii e douchais er a rechad el kirel a King el Jesus me a Rengedel. Me ngulterekokl a rengud el kmo ngdi kmedung e a Jehovah a mo onger er a nglunguched el kmo: “A Rengedem le mei”!