1. Ngera el ungil el tekoi a loldeu a rengrir er ngii a rebetok el ngeasek el chad?

 A TAEM el dekiei er ngii a kmal klou a ultutelel. Ngdiak el ua ngii di el taem er a reksi, e le remiliol el ngar er a bek el renged a mermang el mo mesiou er a Jehovah. (Och. 7:9, 10) A rebetok el ngeasek el chad a ngar er ngii a kmal desemeriar er ngii el chisir er a longemedaol er a rechad el mo “nguu a ralm er a klengar el diak locheraol.” (Och. 22:17) Tirka el ngeasek a mla ngosuterir a rechad el mo mesuub a Biblia e remuul a klengar er tir el mo ungil. E a rebebil a kongei er a omelsemai er a omesubel a beches el omelekoi e dirrek el mo omerk er a ungil chais el ngar er a basio el ngodech a omelekoi er ngii. (Psa. 110:3; Isa. 52:7) Ngera kirem el meruul er ngii me bo mteloi er tia el kmal ungil el ureor?

2. Ngmekerang a kerebai er a Timothy e ochotii el kmo a Jehovah a soal el omesterir a rengeasek a ngerechelir? (Momes er a siasing er a uchelel a suobel.)

² Ngsebechem el melilt a tekoi er chelechang el mo uchul a betok el techall el kirel a omesiungem el mo er a Jehovah er a uriul. El ua tiang, a Timothy a millilt a melemalt el tekoi el uchul me sera bo lengeasek me a lechub e ng 20 me a derengel a rekil e ngmlo rredemelel a mo mesiou el missionari. (Rel. 16:1-3) Me nglocha di mle sesei el buil er a uriul e a Paulus a ullengit er a Timothy el mo er sel beches el ongdibel er a Thesalonika, el rudam er sei a mle meringel el modechelakl. A Paulus a mlorimel el mo tuobed er sel beluu, engdi nguluumerang el kmo a Timothy a sebechel el mo melisiich er a rudam. (Rel. 17:5-15; 1 Th. 3: 1, 2, 6) Me ka di momdasu er sel deuil a rengul a Timothy er a lenguu tia el ngerachel!

3. Ngera sel kot el klou a ultutelel el tekoi el kirem el melilt er ngii er a klengar er kau, e oingerang e ke mo melilt er ngii?

³ Chelecha el taem el dirk mngeasek, e ngkirem el melilt a meklou a ultutelel el tekoi. Ngera sel kot el klou a ultutelel el tekoi el kirem el melilt er ngii? Ngomelilt er kau el mo mesiou er a Jehovah. Ngoingerang el taem e ngkirem el meruul er tia el omelilt? A Jehovah a melekoi el kmo molatk er ngii sel dirk mngeasek. (Oli. 12:1) Me sel di chimo el rolel e ngsebechem el melatk er a Jehovah a oeak a omosiou er ngii el oba rengum el rokir. (Dut. 10:12) Tiang a sel kot el klou a ultutelel el tekoi el kirem el mo melilt er ngii, e le ngar er ngii a lerellii er a klengar er kau er a ngar medam el klebesei.​—Psa. 71:5.

4. Ngera el meklou a ultutelel el omelilt a ngar er ngii a lerellii er a rolel a omosiou er a Dios?

⁴ Ngmera el tekoi el kmo a omelilt er kau el mo mesiou er a Jehovah a diak di el chimo el omelilt el ngar er ngii a lerellii er a klengar er kau er a ngar medam el klebesei. Ngdirrek el kirem el melilt el kmo ke mo bechiil me a lechub e ngdiak, techa el chad a bo bechil, me a ngera el ureor a bo moruul er ngii. Aika el tekoi a kmal meklou a ultutelel, me a kot e ngkirem el melilt el mesiou er a Jehovah el oba rengum el rokir. (Dut. 30:19, 20) E ngera uchul? E le aika el tekoi el bo molilt el kirel a chebechiil me a ureor a ngar er ngii a lerellii er a rolel a omosiou er a Dios. Me a urungulem el mesiou er a Dios a ngar er ngii a lerellii er a omelilt er kau el kirel a chebechiil me a ureor. (Momekesiu er a Lukas 14:16-20.) Me a leuaisei, e ngkirem el melilt el kmo ngera sel mo kot el klou a ultutelel el tekoi er a klengar er kau.​—Fil. 1:10.

5, 6. Ngmekerang a tekoi el dilubech el mo er a Yuichiro e ochotii er kid el kmo a ungil el omelilt a sebechel el mo uchul a betok el techall el kirel a omesiunged el mo er a Jehovah?

⁵ Mngiltii el mo mesiou er a Jehovah, bo modengei el kmo ngera soal a omoruul er ngii, e sola e mngiltii a rolel a mo klengar el soam. A ta el odam el chad er a Siabal a kmo: “Sera le 14 a rekik, e a kuleldingel ngak me a ta er a remechuodel er a ongdibel el ngii a milsang el kmo ngdimlak el deu a renguk el oldingel. Me ngmilekekokil el melekoi er ngak el kmo: ‘Bo mrei e Yuichiro. Bong e mdengchokl e mkerekikl el melatk el kirel aike el bla leruul a Jehovah el kirem.’ Me ak mirruul el uaisei, me ngmlo tela el klebesei el kulebedebek er ngii el tekoi e meluluuch. Cherengel a taem e ngmlengodech a uldesuek. Ngmlo sebechek el mesa el kmo ngmera el dmeu a renguk sel kusiou er a Jehovah. Ngkmal mle soak el menguiu el kirir a remissionari, me ak millatk el mo menglou er a omesiungek el mo er a Dios.”

⁶ A Yuichiro a mlo sebechel el melilt a ungil el tekoi. E tiang a mlo uchul e a uriul e ngmlo sebechel el mesiou er a Jehovah el ngar er a ta er a beluu. Ngmelekoi el kmo: “El uai tiang, ak ngileltii el mo er a skuul el mo mesuub a tekoi er a Merikel. E sera ktobed er a skuul, e ak mlo oureor el tedobech el sils el olisechakl a tekoi er a Merikel me bo el sebechek el pioneer. Me sera bo el 20 a rekik, e ak ulemuchel el mesuub a tekoi er a Mongolia er mlo er ngii a techellek el mo oldingel er a ta er a group er a rudam me a rudos el chad er a Mongolia. Eru el rak er a uriul, el mle 2007 e ak mlo er a beluu er a Mongolia. Sera bo kuldingel el obengterir a rebebil er tirke el mesiou el pioneer e kisa el kmo a rebetok el chad a ulsiik er a klemerang, e ngmlo soak el melukl el mo er sei e olengeseu er tir. Me ak liluut el mo er a Siabal el mengetmokl er ngak el kirel tia el tekoi. Sera April 2008 e ak mla mesiou el pioneer el ngar er a beluu er a Mongolia. Alta e a klengar a diak el beot, engdi a rechad a sorir el orrenges er a ungil chais, e ngar er ngii a techellek el olengeseu er tir el olekeed er tir er a Jehovah. A kuumerang el kmo ak ngileltii a kot el ungil el rolel a klengar.”

7. Ngera el omelilt a kirem el meruul, e ngera sebeched el suubii er a Moses?

⁷ Ngkirem el di kau el melilt er a rolel e ke mo ousbech er a klengar er kau el mesiou er a Jehovah. (Jos. 24:15) Ngdiak el sebecham el melekoi er  kau el kmo ke mo bechiil me a lechub e ngtecha mo bechim? Ngdirrek el diak el sebecham el melekoi el kmo ngera el ureor a kirem el meruul? Ke mo sikii a ureor el diak mousbech er a klou el osisechakl el kirel? A rebebil er kemiu a kiei er a mechebuul el basio, e a rebebil a kiei er aike el kuk merau el mats. Ngkakerous a blekerdeliu, duch er kemiu, osisechakl el bla mngai, tekoi el msemeriar er ngii, me a turrekong er kemiu er a omesiungiu el mo er a Dios. A klengar er kemiu a locha di uai a klengar er a Moses el mle ngodech er a klengar er a rengeasek el chad er a Hebru el mla er a Ekipten. Ngii a mle ngelekel a ngelekel a king me ngmle merau, e tirke el bebil er a rengeasek el chad er a Hebru a mle sibai. (Exo. 1:13, 14; Rel. 7:21, 22) Te di uai kid el kiliei er a taem el mle kirir el melilt a meklou el tekoi er a klengar er tir. (Exo. 19:4-6) Engdi a derta er tir a mle kirir el melilt el kmo te mo mesiou er a Jehovah el oba rengrir el rokir me a lechub e ngdiak. A Moses a rirellii a melemalt el omelilt el mo meruul a soal a Jehovah.​—Monguiu er a Hebru 11:24-27.

8. Ke mo metik a ngeso er ker el mo ngosukau el melilt a ungil el tekoi?

⁸ A Jehovah a meskau a ulekrael el mo ngosukau el melilt a ungil el tekoi. Ngmekerang a loruul er tiang? Ngolisechakl er kau el kirel a omellach er a Biblia el sebechem el ousbech er a ngii di el blekeradel el bo mchelebangel er ngii. (Psa. 32:8) A lsekum e ngdiak modengelii a rolel a omoltaut aika el omellach, e ngsebechem el olengit a ngeso er a demam me a delam me a remechuodel er a ongdibel. (Osi. 1:8, 9) Me bo domes a edei el omellach er a Biblia el ngosukau el mo melilt a ungil el tekoi er chelechang.

9. (a) Ngmekerang a Jehovah a longebkall er kid el oeak sel lebeskid a ilmokl el mo melilt a tekoi el doruul? (b) Ngmekerang e mo uchul a klungiolem sel mosiik er a Renged el kot?

⁹ Mosiik er a Rengedel a Dios me a llemeltel el kot. (Monguiu er a Mateus 6:19-21, 24-26, 31-34.) A Jehovah a kobkellau el oeak sel lomeskau a ilmokl el mo melilt aike el bo moruul. Ngdiak bo ledu er kau el kmo ngkirem el ousbech a rokui el temem el omerk er a klumech. Me nguaisei, engdi a Jesus a ullisechakl er kid er a klungel a ultutelel a dosiik er a Renged el kot. Sel mosiik er a Renged el kot, e ngmo uchul a betok el techall el kirem. El ua tiang, ngmo betok a techellem el ochotii a bltkil a rengum el mo er a Jehovah me a retonari er kau e ochotii el kmo ke oba omereng el saul el kirel a omelatk er a diak a ulebengelel el klengar. A tekoi el bo molilt el kirel a chebechiil me a ureor, ngochotii el kmo ngsuebek a rengum el kirel a kloklem er a bai mosiik er a Rengedel a Dios me a llemeltel el kot?

10. Ngera mle uchul a deuil a rengul a Jesus, e ngera kirem el meruul me bo ledeu a rengum?

¹⁰ Bo betik a deurreng sel mosiou er a rebebil. (Monguiu er a Rel. 20:20, 21, 24, 35.) Tiang a omellach el kirel a klengar. A Jesus a mle medengelii tiang, me ngmilsiou er a Demal sel loruul a soal e milsiou er a rebebil er a lolisechakl er tir el kirel a ungil chais. E tiang a mlo uchul a deuil a rengul. (Lk. 10:21; Jn. 4:34) Ke locha dirrek el mla melechesuar a osisiu el deurreng sel mosiou er a rebebil. Me a leuaisei, e molilt a tekoi el ultuil er aike el omellach el lullisechakl a Jesus. A omoruul el uaisei e ngmo dmeu a rengum, e dirrek el mo uchul a deuil a rengul a Jehovah.​—Osi. 27:11.

11. Ngera uchul me a Baruk a mlo diak el deu a rengul, e ngera el omellach a lebilsang a Jehovah?

¹¹ A klou el deurreng a mo er ngii sel dosiou er a Jehovah. (Osi. 16:20) A Baruk, el mle melechesel a Jeremia, a mle ta el taem el mlo diak a deurreng er a klengar er ngii. Ngulemuchel el omdasu el di kirel a soal er a bai lomdasu er a soal a Jehovah. Me a Jehovah a ulemes er ngii, e dilu er ngii me lak ‘losiik a ngarbab el tekoi’ el di kirel. Omko ngolengesenges, e ngmo suobel sel lemetemall a Jerusalem. (Jer. 45:3, 5) Me ngera el tekoi a rullii a Baruk el mo dmeu a rengul? Sel loruul er a soal e bo lemokngemed, me a lechub e ngsel loruul a soal a Jehovah e lesobel sel lemetemall a Jerusalem?​—Jak. 1:12.

12. Ngera el omelilt a lurruul a Ramiro el ngilsuir el mo dmeu a rengul?

 ¹² A ta el odam el ngklel a Ramiro a miltik a deurreng sel lolengeseu er a rechad. Ngmelekoi el kmo: “Ngak me a telungalek er ngak a mechebuul e kiliei er a beluu er a Bolivia. Me a obekuk er a ledu el kmo ngmo harau er a skulek e ak mo er a daingak, e a kulemes er ngii el kmal klou el techall. Engdi ak dirk miltecholb el ta er a Sioning er a Jehovah, e dirrek el ngiluu a ta er a okedong el mo mesiou el obengkel a ta er a pioneer el ngar er a ta er a basio. Me ak mlo er sel basio, e milsuub el mo meduch el mengimd a chui, e miluchelii a siobai er ngak er a omengimd el mo olengeseu er ngak.” A rebetok el chad a kilengei er a omesubel a Biblia. E a uriul, e ngulemuchel a beches el ongdibel el ousbech er a omelekoi er ngii el basio, e tiang a mle omelekingel a Ramiro. Me ngileltii el mo teloi er tia el ongdibel e mla mo teruich el rak el losiou el ngar sel basio. Ngmelekoi el kmo ngdiak a ngodech el ureor el msang a deurreng el mo uai sel lolengeseu er a rechad el mo mesuub er a Biblia el ousbech er a tekingir.

13. Ngera uchul me ngungil el taem er chelechang el bo mosiou er a Jehovah el oba rengum el rokir?

¹³ Moldeu er a rengum el mesiou er a Jehovah. (Monguiu er a Olisechakl 12:1.) Lak momdasu el kmo ngkirel kot e ngmo er ngii a ungil el urerem e ngmochu sebechem el pioneer. Chelechang e ngkot el ungil taem el bo mosiou er a Jehovah el oba rengum el rokir er a uchei er a lebo er ngii a ngerechelem el mesiou er a telungalek. Ngmesisiich a bedengem e sebechem el kutmokl a ngii di el ureor el omngai. Kau ngera soam el meruul er ngii el kirel a Jehovah? Nglocha soam el mo pioneer, me a lechub e ke omerk er a klumech el mo er a rechad el ngar er a kuk ta er a omelekoi. Ngdirrek el sebechem el meruul a lmuut el betok er a chelsel a ongdibel er kau. Me nguaisei, engdi ngdirk kirem el mengereker. Di lekau el oker el kmo: ‘Ngera el ureor a bo kngiltii, e ua ngera el klungel a omesuub a kuusbech er ngii?’

14. Ngera kirem el mo kerekikl er ngii sel mosiik er a urerem?

¹⁴ Aike el edei el omellach er a Biblia el bla desaod a mo omekrael er kau el mo melilt el kmo ngera el ureor a mkengei er ngii. A rechad er a skulem me a rechad er a kabelment a locha medengei el kmo ngera el ureor a ngar er ngii er a basio el omkiei er ngii me a lechub e ngsel basio el soam el mo mesiou er ngii. Me alta te kongei el olengeseu, engdi ngkirem el mo kerekikl. E le rechad el diak el betik a rengrir er a Jehovah a mo melasem el melalem er a bltikerreng er a beluulechad er a chelsel a rengum. (1 Jn. 2:15-17) Me sel momes aike el tekoi el ngar er a beluulechad, e lak mobes el kmo a rengum a sebechel el mengeblad er kau.​—Monguiu er a Osisechakl 14:15; Jer. 17:9.

15, 16. Ngtecha sebechel el omeskau a melemalt el ulekrael el kirel a ureor?

¹⁵ Sel bo modengei el kmo ngera el ureor a ngar er ngii el sebechem el meruul, e kousbech a ungil el ulekrael. (Osi. 1:5) Ngtecha sebechel el ngosukau el ousbech a omellach er a Biblia el mo merriter a ureor el soam el mo meruul er ngii? Morrenges er a rechad el betik a rengrir er a Jehovah, e betik a rengrir er kau e medengelkau me a tekoi el omchelebangel er ngii. Te mo ngosukau el mo medengei el kmo ngera el tekoi a sebechem el meruul me aike el soam el meruul. Aike el lolekoi a locha sebechel el ngosukau el lmuut el melatk el kirel a turrekong er kau. A lsekum e a demam me a delam a betik a rengrir er a Jehovah, e ngkmal sebechir el ngosukau. A remechuodel er a ongdibel a dirrek el sebechir el meskau a ungil el ulekrael. Moker er tirke el mesiou el pioneer me tirke el odam el oldingel a ongdibel el kmo ngera uchul me te millilt el mo ousbech a temir me a klisichir el mo mesiou er a Jehovah. Te milekerang e mo omuchel el mesiou er a Jehovah? Ngera mle urerir? Me a ngera el klengeltengat a bla lengai?​—Osi. 15:22.

¹⁶ Tirke el kmal medengelkau a sebechir el meskau a melemalt el ulekrael. El ua tiang, ngera mo duubech a lsekum e ngmla mo soam el choitii a high school e mo pioneer e le ngkmal meringel a suobel el lomeskau? A chad el betik a rengul er kau a sebechel el mesa sel uchul me ngsoam el mo merek er a skuul. Me ngsebechel el ngosukau el mo medengei el kmo a lsekum e ke melemolem el outekangel el ngar er a skuul e ngosukau el mo klou a rengum. Tia el blekeradel a klou a ultutelel a lsekum e ngsoam el mesiou er a Jehovah el diak a ulebengelel.​—Psa. 141:5; Osi. 6:6-10.

17. Ngera el ureor a kirem el mengeroid er kau er ngii?

¹⁷ A rokui el chad el mesiou er a Jehovah a mo chelebangel a blekeradel el sebechel el choitechetur a klaumerang er tir e rulleterir el mo cheroid er a Jehovah. (1 Ko. 15:33; Kol. 2:8) Ngar er ngii a bebil er a ureor el sebechel mo uchul a telemellel a klaumerang er kau e a bebil a kuk diak. Ke locha mla mesa el kmo a rebebil a mla choitii a klaumerang er tir er a uriul er a lengiltii a ta er a bedengel a ureor. (1 Ti. 1:19) Me a leuaisei, e ngklou a ultutelel a mongeroid er kau er a ngii di el ureor el sebechel tomellii a deleuill er kau me a Jehovah.​—Osi. 22:3.

18, 19. A lsekum e ngdirkak bo el soam el pioneer, e ngera sebechem el meruul er ngii?

¹⁸ A lsekum e ngmera el soam el mesiou er a Jehovah, e mousbech er a techall el bla lebeskau er chelecha el dirk mngeasek. Chelechang e ngtaem el molilt a tekoi el mo uchul e ngsebechem el oldeu er a rengum el mesiou er a Dios.

¹⁹ E kuk mekerang a lsekum e ngdirkak bo el soam el mesiou er a Jehovah? Lak meterob el omekeroul er a mesisiich el klaumerang er kau er a Jehovah. A Paulus a milsaod er a tekoi el mle kirel el meruul me bo lenguu a klengeltengat er a Jehovah. Ngdilu el kmo: “Ngdi lsekum a re bebil er kemiu a ngodech a uldesuir, e a Dios a mo meketeklii er kemiu. Ngii di bo le blak a rengud el oltirakl a ikel bla bo dodengei.” (Fil. 3:15, 16) Lak mobes el kmo a Jehovah a betik a rengul er kau me a ulekrael el lomeskau a kot el ungil. Me a leuaisei, e becherei me lengesukau el mo melilt a ungil el tekoi er chelecha el dirk mngeasek.