Kede medengei el kmo a babilengel a Dios el Biblia a mera el ileakl el babier. A betok el biliol el Biblia a bla lotobed el llechukl er a dart el bedengel a omelekoi. A llomeserreng er a Biblia a ngar er ngii a klisichel el melodech er a rechad el mo ungil a klengar er tir.​—Monguiu er a 1 Thesalonika 2:13; 2 Timothy 3:16.

Kede medengei el kmo a Biblia a mla er a Dios ele ngmelemalt el omlaoch el kirel a ngar medad el taem. Ngdiak a chad el sebechel meruul er tiang el oba di klisichel. El uai tiang, a babier er a Isaia el kot el omelechesel a mirruul er a betok er a dart el rak er a uchei er a cherellel a Jesus, a lebiltik er ngii er a chelsel a ii el kmeed er a Ulekoad el Daob. E ngmelekoi el kmo a beluu er a Babilon a mo diak a rechad el kiei er ngii. Tiang a mlo klemerang er a betok el rak er uriul er a omesiungel a Jesus el ngar er tia el chutem.​—Monguiu er a Isaia 13:19, 20; 2 Petrus 1:20, 21.

A Biblia a milluches er a chelsel a bekord el 1,600 el rak. Te mla er ngii a kmeed el 40 el chad el milluches er a Biblia el tir a uleltirakl er a di chimo el tekoi e dimlak bo leketouch aike el lulluches. Ngmlekerang e mo uaisei? A Dios a ulemekrael aike el tekoi el lulluches.​—Monguiu er a 2 Samuel 23:2.

A lebebil er a taem e a Dios a milengedecheduch er tirka el milluches er a Biblia el okiu a rechanghel, ues, me a lechub e ngberrous. Ngblechoel el loia uldesuel er a uldesuel a chad e kongei er ngii el melilt a tekoi el bo lousbech el mesaod er a klemechel a Dios.​—Monguiu er a Ocholt 1:1; 21:3-5.