1, 2. (a) Ngera el meringel el tekoi me a ker a lechelebangel er ngii a telungalek? (b) E mekerang a ruungalek me a rengelekir e mo ungil el kltmokl er a uchei?

 NGSEBECHEL el kmal mo meringel er kau sel bo modengei el kmo a rechad er a blim el mle mesisiich e di tir el mengisemuk a klengar er tir a dikea el sebechir el di tir el omekerreu er tir. Ke locha mo medengei el kmo a demam me a lechub e ngdelam a mloubuu el mecham a uchul a ochil, me a lechub e ngmla mo bubong me ngdi mecheuid er a lebo er ngii, me a lechub e ngkmal oberaod a secherel. Me a lmuut el tang, ngsebechel el kmal mo meringel er a remechudelang el kongei el kmo a blekerdelel a klengar er tir a mla mengodech el ileakl sel lolatk el kmo ngdikea el sebechir el di tir el omekerreu er tir. (Job 14:1) Me kede mekerang e ngosuterir? E oeak a ngera el rolel e ngsebeched el omekerreu er tir?

² A ta er a suobel el kirir a remechuodel a kmo, alta e ngsebechel el mo meringel a dosaod el kirel a mondai er a cheluodel, engdi a telungalek el mo chadecheduch e smaod aika el tekoi er a uchei er a leduubech a chetituokel, a mo ungil a omelilt er tir el kirel a ukeruul. Ngkired el melatk el kmo ngdiak a chad el sebechel el imiu er a cheluodel. Seikid a uchul me ngkmal klou a ultutelel el kired el telungalek el mo ungil el kutmeklid. Me ngmekerang a telungalek e oba bltikerreng el dmak el melib a meklou a ultutelel el tekoi?

3. Te mo mekerang a rechedal a telungalek sel lebo lousbech a ngeso a remechudelang el demerir me a derrir? (Momes er a siasing er a uchelel a suobel.)

³ Ngmo er ngii a taem el ruumesingd er a ruungalek a mo kirir el ousbech a ngeso e le ngmo diak el sebechir el di tir el omekerreu er tir. (Monguiu er a Olisechakl 12:1-7.) Me sel lebo leuaisei, e tir me a rengelekir a kirir el mo dengchokl e mesaod el kmo ngera sel kot el ungil el rolel e ngmo sebechir a rengelekir el omekerreu er tir. Ngungil a bo ledak el telungalek e losaod el kmo ngera el rolel a ngeso a usbechall, e mekerang e mo sebechir el nguu a ngeso, e mekerang e mo sebechir el rokui el lolengeseu. Ngkirir el rokui el mo bleketakl e ungil el chadecheduch er a delongelir. Me a ker a kmo, tirka el mechudelang ngdirk sebechir el kiei el ileakl el di tir el tang? * Mchadecheduch el smodii el kmo ngera sebechel a derta er kemiu el meruul me bo el sebechir a redemmiu me a redelemiu el mongeseu. (Osi. 24:6) A rebebil a sebechir el olengeseu el kirel aike el tekoi er a bek el sils, e a rebebil a kuk sebechir el omechar er a ukeruul er tir. Ngkirir a rokui el chad el mo medengei a ngerechelir engdi a cherengel a taem e ngsebechel el mengodech a ngerechelir me a lechub e te mo kaitutechei el olengeseu.

4. Te mo metik a ngeso er ker a rechedal a telungalek sel lemengodech a blekeradel?

⁴ Me sel bocha momekerreu er a demam me a lechub e ngdelam, e mosuub el mo medengei a rokui el kirel a secherel, el uldimukl er aike el tekoi el sebechel el mo duubech er a cherengel a taem. (Osi. 9:⁠9) Momekedong er aike el obis er a kabelment el olengeseu er a remechudelang. E mosiik a prokuram el sebechel el msang a lmuut el bebil er a ngeso a demam me a lechub e ngdelam me a lechub e ngkuk ngosukau er a telkib. Sel molatk aika el mengedengodech el blekeradel e ke locha mo mekngit a rengum, e dirrek el kibetiekl me a lechub e ngmo rrau a rengum. Sel bo muaisei e ngsebechem el ouchais a uldesuem el mo er a sechelim el ngii a omoumerang er ngii. E sel kot el ngarbab er ngii, mouchais a rokui el ngar er a rengum el mo er a Jehovah. Ngii a kmal sebechel el meskau a budech er a rengum me ngmo sebechem el rullii tia el ngerechelem er a chelsel a ngii di el blekeradel.​—Psa. 55:22; Osi. 24:10; Fil. 4:6, 7.

5. Ngera uchul me ngungil a dedak el telungalek el mesaod a kakerous el rolel a ulekerreu er a uchei?

⁵ Ngkmal ungil el tekoi a lsekum a rechedam me a rechedil a mo dmak tir me a telungalek er tir e mesaod el kmo ngua ngera el rolel a ulekerreu a ungil el kirir. El ua tiang, ngsebechir el mo medengei el kmo ngungil a bo lekiei el obengterir a rengelekir me a lechub e kuk losiik a bebil er a tekoi el sebechir el meruul. Ngoeak tiaikid el rolel e ngmo sebechir el telungalek el ungil el kltmokl er sel taem el lebo er ngii a “blekiklreng ma uldikel” er a taem er a cheluodel. (Psa. 90:10) Me a telungalek el diak longetmokl er tir el kirel tiang a locha mo morimel el meruul a tekoi er sel taem el lebo el chelebangel aika el meringel el tekoi. A ta el chad el mesuub el kirel tiang a dmu el kmo “tiang a kot el meringel el taem el doruul a omelilt er kid.” Me a lsekum a telungalek a di mo orreched el melilt aike el bo loruul e ngmo meringel a uldesuir, e dirrek el locha mo kakebosech a uldesuir el kirel a tekoi el ketmekill. Me nguaisei, engdi a lsekum kede kutmeklid er a uchei e ngmo beot er kid el mesmechokl a uldesued el kirel a tekoi el mengedechang.​—Osi. 20:18.

6. Ngera uchul me ngungil a ledak a telungalek el mesaod a tekoi el kirir a redemerir me a rederrir?

⁶ Ngsebechel el mo meringel a omosaod a tekoi el obengterir a redemmiu me a redelemiu el kirel a omeldechel a tekoi er a blirir me a lechub e ngmo kirir el melukl er a ta er a taem el mo er a kuk ngodech el basio. Engdi a rebetok a melekoi el kmo chouaika el cheldecheduch er a delongelir a kmal ngilsuterir er a uriul. E ngera uchul? E le ngmo beot er tir el smaod a meklou el mondai, e ungil el kaiuerenges, e dirrek el kutmokl a tekoi er a uchei er a leduubech a secher. Me ngar er a ungil taem me a basio e ngsebechir a rechedal a telungalek el dengchokl el ungil el smaod a uldesuir, e tiang a dirrek el okesengii a deleuill er tir e  mo uchul e te melatk er a bltikerreng el ngar er ngii er a delongelir. Me a remechudelang a locha sorir el melemolem el ileakl a lsekum ngdirk sebechir. Ngkmal mo beot er a rokui el chad a lsekum a rechedam me a rechedil a chadecheduch tir me a rengelekir el melib e mesaod aike el mo ungil el rolel a ukeruul me a ngeso el bo lolai.

7, 8. Ngera el tekoi a kirir a rechedal a telungalek el mesaod, e ngera uchul?

⁷ Me kemiu el chedam me a chedil, sel taem el mosaod aika el tekoi e mouchais er a rengelekiu aike el somiu, e ngua ngera ildisel a udoud a sebechiu el mengoit e ngera el ngeso a omousbech. Me sel taem el mocha diak el sebechiu el melilt a tekoi e ngsebechir a rengelekiu el medengei a tekoi el loruul el oltirakl aike el mle somiu. Te locha sorir el kullii a uldesuem e dirrek el mo er aike el sebechir el remuul me bo el sebechem el melemolem el ileakl. (Efe. 6:2-4) El ua tiang, kau ngsoam el mo kiei el obengkel a ta er a rengelekem me a telungalek er ngii, me a lechub e ngar er ngii a ngodech el soam? Bo mungil el omdasu e lak mobes el kmo a rebebil el ngar er a telungalek er kau a locha kuk ngodech a uldesuir er a uldesuem. Me kom rokui el ousbech a taem el mo melodech a uldesuiu.

⁸ Sel dungil el chadecheduch e detib a tekoi e ngsebechel el mo kesai a mondai er a uriul. (Osi. 15:22) Mongedecheduch er a telungalek er kau e mouchais a uldesuem. Mosaod aike el tekoi el ngar er a Durable Power of Attorney (DPA) card el kid el Sioning er a Jehovah a ousbech er ngii. Ngar er ngii a llemeltem el mo medengei a kakerous el rolel a ukeruul e dirrek el ngar er ngii a llemeltem el kongei me a lechub e ke otngeklii. Tia el DPA card er kau a ocholt aike el soam el kirel tia el tekoi. Me sel mngiltii a chad el moumerang er ngii el mo ua health-care agent er kau, e ngmo sebechel el melib a tekoi el kirem a lsekum ngmo kirel. A remechudelang, me tirke el omekerreu er tir, me ngike el health-care agent a kirir el mo er ngii a copy er tia el DPA card el lobang. A rebebil er tirka el mechudelang a kutmokl aika el babilengir el obengkel a lmuut el bebil er a meklou a ultutelel el babilengir el ua babier er a insurance, bank, me a will er tir, me a lmuut el bebil.

9, 10. Ngoingerang e a rechedam me a rechedil a mo ousbech a ngeso er a rengelekir?

⁹ Oumesingd el taem e a rechedal a telungalek a sorir a lolemolem el kiei el ileakl a remechudelang el demerir me a rederrir. Me a rengelekir a locha diak lolasem el mesaod a rokui el tekoi er a klengar er tir a lsekum te dirk sebechir el di tir el meruul a kelir, e mengetmokl, e melim a kar e ungil el mengedecheduch er a rengelekir. Me nguaisei, engdi a cherengel a taem e a lsekum e ngmo meringel er tir el merael, e mo shopping, me a lechub e te mo besbes e ngmo kirir a rengelekir el melodech er a rolel a delengcheklir a redemerir me a rederrir.

¹⁰ A remechudelang a locha mo blechoel el di rrau a rengrir e meringel a uldesuir. Ngdirrek el locha mo mechad a dingerir, mekngit a osengir, besbes me a lechub e te mo mekngit el ngar er a benjo. Me a lsekum e ngmo duubech aika el tekoi e ngungil a lemereched el mo er a ukeruul e lomes er a toktang. Me a rengelekir a mo kirir el obetiterir el mo er a ukeruul e dirrek el meruul a lmuut el bebil er a tekoi. Me a lsekum ngsorir el mo ungil el omekerreu er a redemerir me a rederrir e ngkirir el  mo mesaod el kirir e dirrek el meruul a babilengir e oltak er tir el mo er a appointment er tir me a lmuut el bebil er a tekoi.​—Osi. 3:27.

11. Ngera sebechel el meketmokl me bo el sebechir a rechedam me a rechedil el kongei a omeldechel a tekoi?

¹¹ A lsekum a demam me a lechub e ngdelam a ngar er ngii a rektel el diak el sebechel el mukar, e nglocha mo kirem el melodech a tekoi er a blirir me a lechub e ngsel rolel a cho momekerreu er tir. El ua tiang, a lsekum e ke kiei er a cheroid el beluu e nglocha sebechem el olengit er a tonari er tir me a lechub a ta er a Sioning me ngmo oldingel er a rechad er a blim e mesubed er kau el kmo ngua ngerang a blekerdelel a klengar er tir. Tirkang te di ousbech er a chad el meruul a kelir e mengetmokl er a blirir? A mekekerei el omelodech er a chelsel a blirir ngrullii el mo beot er tir el omais er a chelsel e mo melecholb e meruul a lmuut el bebil er a tekoi? Te locha sebechir el melemolem el kiei el ileakl a lsekum a ta er a chederir a blechoel el mong e olengeseu er tir el meruul aika el tekoi. Me a chouaika el mekekerei el omelodech a rullii el mo beot er tir el kongei aika el tekoi. Engdi a lsekum ngmla mo diak el sebechir el kiei el di tir el tang e nglocha kirel a ta er a rengelekir me a lechub e ngchederir el mo kiei el obengterir el omekerreu er tir. Me a ngii di el blekeradel el lebo lechelebangel er ngii, e ngungil a lsekum a rengelekir a osiik a ngeso er a beluu el lengar er ngii.​—Monguiu er a Osisechakl 21:5. *

12, 13. Ngera te mla remuul a rebebil me bo el sebechir el olecholt a omengull e lomekerreu er a redemerir me a rederrir el kiei el cheroid er tir?

¹² Ngsoad a demad me a delad a bo lungil a delengcheklir e lulekerreu e le ngbetik a rengud er tir. Ngungil a rengud sel dodengei el kmo a demad me a delad a ngar er ngii a rechad el omekerreu er tir. Me nguaisei, engdi a rebetok el chad a kiei el cheroid er a redemerir me a rederrir. Me a rebebil er tir a ousbech aike el ulengellir er a ureor el mo oldingel er a redemerir me a rederrir e olengeseu er tir e dirrek el meruul aike el tekoi el tir a dikea el sebechir el meruul. Me a rengelekir a sebechir el ochotii a bltkil a rengrir el mo er a redemerir me a rederrir sel leblechoel el oudengua el mo er tir, e loluches a babier me a e-mail el mo er tir.​—Osi. 23:24, 25.

¹³ A lsekum e ke kiei el cheroid er a demam me a delam, e ngmo kirem el melilt el kmo ngua ngera el rolel a ulekerreu a kirel el ketmekill. Me a lsekum a demam me a delam a Sioning e ngsebechem el mengedecheduch er a remechuodel er sel ongdibel er tir e olengit a ngeso er a uldasu. E a ngaruchei, moluluuch el mo er a Jehovah el kirel a demam me a delam. (Monguiu er a Osisechakl 11:14.) Me kau a dirk kirem el “mengull er a demam ma delam” alta te diak el Sioning. (Exo. 20:12; Osi. 23:22) Me a bek el telungalek a kakerous a uldesuir. A rebebil a ngoititerir a redemerir me a lechub a rederrir el mo kiei el obengterir me a lechub e te sikii a blil el kmeed er tir. Engdi a lebebil er a taem e tiang a diak el sebechel el meketmokl. A rebebil el chedam me a chedil a diak lekengei el mo kiei el obengterir a rengelekir me a telungalek er tir. Ngdiak el sorir el omekberaod er a rengelekir me te bai kongei el kiei el ileakl el blai. Me a rebebil el ngar er ngii a ududir a kongei el omechar er a chad e ngolengeseu er tir.​—Oli. 7:12.

14. Ngera el mondai a sebechel el mo er ngii el kirir tirke el di blechoel el meruul a betok el mo omekerreu er a redemerir me a rederrir?

¹⁴ Ngar er a betok el telungalek, e ngike el ngalek el kiei el kmeed er a demal me a delal a blechoel el meruul a betok el mo omekerreu er tir. Me tirka el ngalek a kirir el mo tabesul a omerellir sel lomekerreu er a redemerir me a rederrir me a dirrek el kuk di telungalek er tir. Ngar er ngii a telkelel a klisichel me a temel a chad. Me a lsekum ngika el ngalek el omekerreu a kuk mo mengodech a blekeradel el lechelebangel e ngmo kirir a rechedal a telungalek el mo mesaod er tia el tekoi. A ta el chedal a telungalek, ngkuk kmal betekngang a ngerechelel? Ngsebechir a rebebil el kuk olengeseu el remuul a bebil er a ngerachel, me a lechub e ngsebechir el kaitutechei el omekerreu er a redemerir me a rederrir?

15. Ngmekerang e sebechel ngike el omekerreu el diak el sal mo oberaod er a ngerechelel?

 ¹⁵ Sel taem el chudelang el chad a mla mo ousbech a ngeso er a bek el taem, e ngklou a techellel ngike el omekerreu er ngii el kmal mo mesaul a bedengel. (Oli. 4:6) A rebetik a rengrir el ngelekir a kmal sorir el meruul aike el rokui el sebechir el omekerreu, engdi tia el ngerachel a sebechel el kmal mo meringel. Me ngike el omekerreu a kirel el mo tabesul a uldesuel e dirrek el locha sebechel el kuk olengit a ngeso er a rebebil. Me a lsekum te mo er ngii a rullengeseu er ngika el omekerreu a lebebil er a taem, e ngsebechel tia el ngerachel el mo kebekakl.

16, 17. Tirke el omekerreu er a remechudelang ngsebechel el mo ua ngerang a uldesuir? Ngera sebechel el ngosuterir el mo tabesul a uldesuir? (Dirrek el momes er a baks el “Dmeu a Rengrir el Omekerreu.”)

¹⁶ Ngmekngit a rengud sel domes er a demad me a delad el di merael el mo mechuodel. Me tirke el omekerreu er a redemerir me a rederrir a lebebil er a taem e ngmo mekngit a rengrir, suebek a rengrir, seselk a rengrir, kesib a rengrir, mekngit a ukltkir, me a lechub e ngmo chetirir a tekoi. A lebebil er a taem e a chudelang el demerir me a lechub e ngderrir a mo dmung a tekoi el diak lungil me a lechub e ngdiak loreng a sulir. Me a lsekum ke mo chelebangel er tia el tekoi, e molasem el diak di lemereched el mo kesib a rengum. A ta el chad el mesuub el kirel a uldasu a kmo sel lebo er ngii a mekngit el uldesued e ngkmal kired el mereched el kongei el kmo nguaisei a uldesued e dirrek el kired el melasem el mo diak domdasu el kmo kede kmal mla mo mekngit el chad e le kid el uaisei a uldesued. Mongedecheduch er a bechim me a lechub e ngta er a chad er a blim me a lechub e ngkmeed el sechelim e mouchais er ngii er aika el uldesuem. Choua ikaikid el cheldecheduch a sebechel el ngosukau el mo tabesul a uldesuem el kirem.

¹⁷ Nglocha mo er ngii a taem el redemerir me a rederrir a kmal mo smecher me ngmo meringel er a rechedal a telungalek el omekerreu er tir er a blai. Me seikid e ngmo kirir el nguu el mo er a osbitar. A ta el Kristiano el odos a di ulemais el mo oldingel er a delal er a blirir a remechuodel. Ngdmu el kmo: “Ngmlo diak el sebecham el omekerreu er a delemam el 24 el sikang. Ngkmal mle meringel er a rengmam me a uldesuam sel ki molatk el obang el mo er a blirir a remechuodel. Engdi tiaikid a di mle ta el rolel e ngmo sebechel a delemam el mukerreu er a chelsel aike el ulebongel el taem er a klengar er ngii me ngdirrek el mlo kongei e aki nguu el mong.”

18. Ngsebechel el mo ulterekokl a rengrir a rengalek el kirel a ngerang?

¹⁸ A ngerachel el mo omekerreu er a remechudelang el demad me a delad a sebechel el mo chetituokel e dirrek el uchul a ringelel a uldesued. Me ngdiak a mla moterekokl el rolel e ngmo sebeched el ungil el omekerreu er tir e le rokui el chad a kakerous a blekerdelel a klengar er tir. Engdi a lsekum kede mo ungil el melatk a tekoi el doruul, e dmak el kaingeseu el telungalek, e mo ungil el chadecheduch, e a ngaruchei kede meluluuch el mo er a Jehovah, e ngmo sebeched el kutmokl aike el ngerecheled el mo er tirka el betik er a rengud el chad. Ngulterekokl el kmal mo dmeu a rengum sel bo moruul aika el tekoi e le ke medengei el kmo ke omesterir a ngeso el tir a kmal ousbech er ngii. (Monguiu er a 1 Korinth 13:4-8.) E a ngaruchei er ngii el rokui ngmo er ngii a budech er a rengum e dirrek el mo uchul a klengeltengat er a Jehovah el mei er kau.​—Fil. 4:7.