1, 2. Ngerang a klekakerous er a osengel a Jehovah el bedulkid me aike el camera el ngar er a chelsel a stoang?

 NGAR er a betok el beluu e a rechad el ousiobai a mla ruedem a camera er a chelsel a stoang er tir me bo el sebechir el omes er a okiaksang er tir me tirke el chad el sorir el merechorech. Me aike el rokui el meketmokl er a chelsel a stoang a sebechel el mengai a llecheklel el uchul me ngsebechir el mdechemeterir a remerechorech. Me aika el camera a mla rulleterir a remerechorech el mo meringel er tir el meruul a delengerenger.

² A Biblia a kmo a Jehovah a “omes a ikel duubech er ker me ker.” (Osi. 15:3) Me tiang belkul a kmo ngdi kerekikl el omdidm er kid el osiik a telemelled? Ngdi mengiil er sel taem el deruul a cheleuid me bo lomals er kid? Ngkmal diak leuaisei! (Jer. 16:17; Heb. 4:13) A Jehovah a omes er kid e le ngkmal betik a rengul er kid e dirrek el soal a bo demukerreu e ledeu a rengud.​—1 Pe. 3:12.

3. Ngerang a eim el rolel e a Jehovah a omekerreu er kid?

³ Kede mekerang e lmuut el mo ungil el medengelii a bltkil a rengul a Dios el bedulkid? Kede mo mesaod a eim el rolel e a Jehovah a omekerreu er kid. (1) Ngomuchel el mengelechel er kid er a uchei er a debo er a klengit, (2) ngomeklemalt er kid sel demecheuid,  (3) ngomekrael er kid el okiu a omellach er a Biblia, (4) ngosukid er sel taem er a omelsemai e (5) meskid a omeksulled el kirel a melemalt el omerelled.

4. Ngera uchul me a Dios a milengelechel er a Kain er a uchei?

⁴ A kot, e kede mo mesaod a rolel e a Jehovah a mengelechel er kid er a uchei er a debo er a klengit. (1 Kr. 28:9) El ua tiang, a Kain a “kmal mlo kesib a rengul” e le Jehovah el dimlak lekengei er ngii. (Monguiu er a Genesis 4:3-7.) Me a Jehovah a milengelechel er ngii el kmo, a omerellel a mekngit me nguchul e ngsebechel el ruebet er a klengit. Me ngdi ua dedu el kmo a “klengit a ua tar a tebelik el charm el di mengiil” el mo omdechem er ngii. Me a Jehovah a dilu er ngii el kmo: “Ngdi kau a kirem el mesisiich er ngii.” A Jehovah a mle soal a Kain a bo ‘le blekebek a medal,’ me oleko ngrirengesii tia el omengelechel e ngmillemolem el ungil a deleuill er ngii me a Dios.

5. A Jehovah ngmengelechel er kid el okiu a ngera el rolel?

⁵ A Jehovah a ungil el medengei el kmo kede ua ngera el chad. E tiang a klemerang el kired er chelecha el taem. Ngungil el medengei a uldesued me a urunguled me ngsebechel el mes a rokui el tekoi el doruul. Ngkmal betik a rengul er kid e soal a doruul a llemalt engdi ngdiak lorrimel er kid. Ngmengelechel er kid sel leues a mekngit el omerelled. El oeak a ngera el rolel? Ngsebeched el mo medengei a omengelechel er ngii el okiu sel deblechoel el menguiu er a Biblia, me aike el babilenged, e debo er a miting. Ngmla ta el monguiu er a babier me a lechub e ke rongesii a tekoi el ngilsukau el mo mesisiich er a mondai er kau el di ta el Jehovah a medengelii? Aikaikid el omengelechel el mla er a Jehovah a mei er sel taem el desal lousbech er ngii.

6, 7. (a) Ngera ochotii el kmo a Jehovah a omekerreu er a derta er kid? (b) Ke mekerang e ngmai a klungiolem er a ulekerreuil?

⁶ A rokui el omengelechel el ngar er a Biblia a ochotii el kmo a Jehovah a kmal betik a rengul er a derta er kid. Ngklemerang, a Biblia me aike el babilenged me a rokui el miting a mo uchul a klungiolir a rebetok el miliol el chad. Engdi a Jehovah a olengit er kau me bo el blak a rengum el olengesenges a omellach er a Biblia me bo el sebechem el meruul a llemalt. Tiakid a olechotel a kmo Ngii a kmal omekerreu er kau.

⁷ Kede mekerang e ngmai a klungioled er a omengelechel er a Dios? Ngkmal kired el mo oumerang el kmo ngomekerreu er kid e dirrek el mo oltaut a Tekingel er a klengar er kid. Me a lsekum e ngar er ngii a tekoi el domdasu el ngii a mekngit er a osengel a Dios, e ngkmal kired el mereched el smuld er a uldesued me ngmo diak dolatk. (Monguiu er a Isaia 55:6, 7.) Me a lsekum kede mereched el olengesenges er ngii e ngsebeched el oibngid er a betok el ringelel a uldasu. Engdi ngmo ua ngerang a lsekum ngdiak dolengesenges? Ngdirk mo melemolem a Jehovah el omekerreu er kid?

8, 9. Ngmekerang a uleklatk el lomeskid a Jehovah el okiu a remesiungel e ochotii a klungel a ulekerreuil el mei er kid? Mosaod er a olechotel.

⁸ Kede ungil el medengei el kmo a Jehovah a omekerreu er kid er sel taem el losmechokl er kid. (Monguiu er a Hebru 12:5, 6.) Nguaisei, kede rokui el diak el soad a lomeklatk e lollach e lomeklemalt er kid a rechad. (Heb. 12:11) Engdi a lsekum a chad a mellach er kid el ousbech er a Biblia e ngkmal kired el mo medengelii a uchul me ngmeruul el uaisei. Ngmeruul el uaisei el diak lebelkul a kmo ngsoal el melemall er a rengud, e ngbai omes e medengei el kmo a deleuill er kid me a Jehovah a kmedu el mo metemall. Me ngkongei el mengoit a temel me a klisichel el olengeseu er kid el mo mesang el kmo ngmekerang a Biblia e sebechel el ngosukid el lmuut el mo kmeed er a Jehovah. Me ngkired el oba omengull e nguu a omellach e le Jehovah a Ngike el Uchul tia el omellach.

 ⁹ El ua tiang, a ta el odam a mle smau el omes a siasing er a remeau er a uchei er a bo lodengelii a klemerang. Engdi sera bo lodengelii a klemerang e ngmlo diak loruul er tia el tekoi. A uriul e ngmilecherar a cell phone er ngii e liluut el mo meruul er a osisiu el tekoi el mlo omes a siasing er a remeau el ngar er a Internet. (Jak. 1:14, 15) Me ngulebeketakl el kmo sel di mla urungulel el soal aika el tekoi a dirk mle mesisiich er a uldesuel el ua melilial el ngau. A ta er a taem e ngkilengei er a ta er a remechuodel me nglongir a dengua er ngii, me ngmiles a siasing er a remeau er a chelsel. Me ngdi mle mereched ngii el odam el mellach er ngii. Me ngkilengei el nguu a uleklatk e a cherengel a taem e ngmlo diak loruul er tia el mekngit el omerellel. Me a Jehovah a omes aike el berrotel el kngtid e sebechel el omeklemalt er kid er a uchei er a detemellii a deleuill er kid el obengkel. Me kede kmal oba omereng el saul el kirel tia el ulekerreuil.

10, 11. (a) Kede mekerang e ‘lotkii a RUBAK’? (b) Mosaod a tekoi el dilubech el mo er a telungalek el ullengesenges a ulekrael er a Jehovah.

¹⁰ A ta er a milluches er a psalm a milengitakl el mo er a Jehovah el kmo: “Ke mengetikaik er ngak el oba ngesou er a ungil uldasu.” (Psa. 73:24) Kede ‘lotkii a RUBAK’ el okiu sel dosiik a ulekrael el ngar er a Tekingel. Ngokiu tiaikid el rolel e kede mo medengelii a uldesuel, e oltirakl a ulekrael er ngii me ngmelemolem el kmes a deleuill er kid me Ngii. Me a ulekrael er ngii a dirrek el ngosukid el mo ungil el omekerreu er kid me a telungalek er kid.​—Osi. 3:6.

¹¹ El ua tiang, a ta el chad er a sers me a bechil me a klou el telungalek er tir a milleng er a chetemel a ta er a chad e kiei er ngii er a beluu er a Huriping. Tirka el obekel a dul mle regular pioneer. A ta er a klebesei e ngike el ouchutem er tia el chutem a lilechesii a babilengel el mo er tir el kmo ngmla mo chetil a lekiei er tia el basio. Te kmal kilebetiekl e a uriul e te mlo medengei el kmo a ta er a chad a uleltelechakl er tir er a cheleblad el omeruul. Me ngika el odam a kmal mlo suebek a rengul e le ngdimlak lodengei el kmo te mo kiei er ker. Engdi nguluumerang er a Jehovah me ngdilu el kmo: “A Jehovah a mo ngosukid. Ngdi blechoel el meskid aike el dousbech er a chelsel a ngii di el blekeradel.” Te mle blak a rengrir el oltirakl a omellach er a Biblia e millemolem el uleba omengull e meruul a budech, alta te chilarm er a betok el ultelechakl. Sesei el klebesei er a uriul e ngika el ouchutem er a chutem a dilu er tir el kmo ngsebechir el melemolem el kiei. Ngkmal mlo mechas a rengul er a ungil el  omerellir el kirel a ultelechakl el mlo er tir me ngbai ngildechii a uldesuel e dilechelii a klungel a chutem el sebechir el ousbech er ngii el melalem a dellemelir. (Monguiu er a 1 Petrus 2:12.) Me ngbleketakl el kmo a lsekum kede oltirakl a omellach er a Biblia, e a Jehovah a mo omekrael er kid er sel taem el dechelebangel a meringel el blekeradel.

12, 13. Ngoingera el taem e ngmo meringel er kid el oumerang el kmo a Dios a omekerreu er kid?

¹² Me kid el mesiungel a Jehovah a mo chelebangel a betok el omelsemai, e a bebil er ngii a melemolem el kemanget el taem el ua secher, odechelakl, me a lechub e ngultok el ngar er a rechedad el mei. E a ta er a kot el meringel el tekoi el kired el outekangel er ngii a sel lebo er ngii a klekakebosech er a delongeled kid me a ta er a chad er a ongdibel e le ngkakerous el blekerdeled a uchul.

¹³ El ua tiang, alta e a tekingel a odam el bedulkau a kmal tilemellii a rengum. Me ke locha mo melatk el kmo: ‘Tia kmal diak el kirel el meketmokl er a chelsel a cheldebechelel a Dios!’ Engdi sel momes e a rebebil er a chelsel a ongdibel a omdasu el kmo ngika el tilemellii a rengum a kmal ungil el chad, e dirrek el mocha er ngii a betok el ngerechelel er a chelsel a ongdibel. Me ke locha mo omdasu el kmo: ‘Tiang ngmekerang e mo uaisei? Ngika el Jehovah ngdiak el sebechel el omes aika el tekoi? Ngdi chelellakl e diak lokerang el kirel tiang?’​—Psa. 13:1, 2; Hab. 1:2, 3.

14. Ngera uchul me a Jehovah a mechititerir a rudam er kid me ngsebechir el meringel el mellach er kid?

¹⁴ A Jehovah a sebechel el mes a tekoi el diak el sebeched el omes, e dirrek el sebechel el omechei a tekoi me ngmelemolem e le ngar er ngii a ungil el uchul. El ua tiang, ngsebechel el mo mekngit er a uldesued a omellach el denguu e le kede omdasu el kmo ngdiak el kirel el mo uaisei. Engdi a Dios a locha a ngodech a uldesuel el kirel tia el tekoi. Kid kede rredemelel a nguu tia el omellach? A Brother Karl Klein a uluuchais er a ta el tekoi el dilubech er a klengar er ngii el kmo a Brother Rutherford a mle ta el taem el blo lemeringel el mellach er ngii. E a uriul e a Brother Rutherford a uluuetkeu er ngii e ngii a di liluk. Me a Brother Rutherford a mlo medengei el kmo a Brother Klein a dirk kesib a rengul er ngii. Me ngdilu er a Brother Klein el kmo “Bo mkerekikl, a Diabelong a oldekedek er kau.” Me tia el uleklatk a kmal ngilsuir a Brother Klein. Me a uriul e ngmlo ta er a chedal a Chelechad er a Ruungerachel e dilu el kmo ngsilubii el kmo a rudam er kid a ngar er ngii a llemeltir el mellach er kid, me a lsekum ngmo kesib a rengud er tir e a Diabelong a sebechel el mdechemid. *

15. Ngera kired el melatk er ngii sel dechelebangel a omelsemai?

¹⁵ Kid a soad sel lemereched el mo diak a omelsemai, engdi ngklou a ultutelel el dosuub el mo oba kllourreng. A omelsemai a sebechel el mo ua omomekall el ngar er a klou el traffic er a chelsel a klou el mats. Ngsebechel el mo klou a rengum e mengiil er a traffic el mekekokil el merael, engdi ngdikea el sebechem el mtekengelii a rengum me ke ngodechii a omerollem el mo merael er a ngodech el rael. Me ke riiedang e mocha meoud el mo er a basio el kirem el mo er ngii. Me oleko ngmle klou a rengum el mengiil e ke locha lilemelemii a omerollem e mlo sebechem el mechir a temem el mo er a basio el kirem el mo er ngii. Me ngdi osisiu el kirel a taem el dechelebangel a omelsemai. A lsekum ngmo klou a rengud e oltirakl a omellach er a Biblia, e a Jehovah a ngosukid el outekangel.

16. Ngera uchul me a Jehovah a mechikid me kede chuarm?

¹⁶ A Jehovah a sebechel el mechei a omelsemai me ngmelemolem e le ngsoal a bo demesisiich er ngii. (Monguiu er a 1 Petrus 5:​6-​10.)  Ngkmal diak el kired el mo omdasu el kmo a Dios a uchul a omelsemai el dechelebangel. (Jak. 1:13) Ngike el uchul a betok el ringel a “cherrouiu el Diabelong.” Engdi ngklou a ultutelel el bo dodengei el kmo a Jehovah a medengei a ringeled e dirrek el kmal betik a rengul er kid. Me ngmo kutmokl a tekoi me lak lolemolem aika el ringeled. Aikang a di ngar er ngii “el telkib” el taem. Me bo el ulterekokl a rengum el kmo a Jehovah a kmal omekerreu er kau e mo meskau a klisichem el outekangel el mo lmuut er a ulebongel.​—2 Ko. 4:7-9.

17. Ngera uchul me a Jehovah a merriter a rengrir a rokui el chad?

¹⁷ A Jehovah a merriter a rengrir a rokui el chad el osiik er tirke el mera el betik a rengrir er ngii. A profet el Hanani a dilu er a King el Asa el kmo: “A osengel a RUBAK a mekelekelii a beluulchad el rokir, me ng omesterir a klisichir tirkel blak a rengrir er ngii.” (2 Kr. 16:9) A Jehovah a mo ‘meskau a klisichem’ el belkul a kmo ngmo omekerreu er kau e dirrek el meskau a omeksullem.

18. Ngera me ngulterekokl a rengud el kmo kede mo nguu a omeksulled er a Jehovah el kirel a ungil el omerelled? (Momes er a siasing er a uchelel a suobel.)

¹⁸ A Jehovah “a mo ungil a tekingel” el bedulkid el belkul a kmo ngsoal el omeskid a omeksulled. Me a lsekum ngsoad a klengeltengat er ngii, e ngkired el “osiik a ungil,” e mo ‘betik a rengud er a ungil,’ e dirrek el “mo meruul a ungil.” (Amo. 5:15; Osi. 11:27; 1 Pe. 3:11, 12) Me a Jehovah a mesterir a omeksullir a remelemalt el chad el mo lmuut er a taem el diak a rechad el medengei a ungil el omerellir. (Psa. 34:15) Tiang a sebeched el mesang er a kerebai er a reteru el redil er a Israel el ullengeseu er a rumechell, el Sipra me a Pua. A Farao a dilu er tir me bo lomekoad er a rokui el mechell el ngalek el sechal. Tirka el redil a bai kilengei el olengesenges er a Jehovah me ngdimlak lomekoad er tirka el tolechoi. Me a Jehovah a miles a ungil el omerellir me ngmilsterir a omeksullir me ngmlo er ngii a rengelekir. (Exo. 1:15-17, 20, 21) Me a lebebil er a taem e kede omdasu el kmo ngdiak a chad el mes a ungil el omerelled, engdi a Jehovah a di sebechel el mes a rokui el ungil el tekoi el deruul. Me ngmo meskid a omeksulled.​—Mt. 6:4, 6; 1 Ti. 5:25; Heb. 6:10.

19. Ngera el tekoi a dilubech el mo er a ta el odos?

¹⁹ A lebebil er a taem e kede omdasu el kmo a Jehovah a diak lesang a blakerreng er kid er a urered el omerk er a klumech, engdi ngkmal sebechel el mesang. A ta el odos el redil er a Hungary e kiei er a beluu er a Austria a ngiluu a address er a ta el redil el melekoi a tekoi er a Hungary. Me ngdi mle mereched el mo er tia el blai engdi ngdimlak a chad er ngii. Ngmillemolem el omais el mong el ta el rak me a tedobech el omechei a babier me a letter me a dengua er ngii. A lebebil er a taem e ngmo medengei el kmo ngar er ngii a chad er a blai engdi ngdiak a nguu a chesimer. A ta er a taem er a lebong e a ta el ungil a blekerdelel el redil a ngiluu a chesimer e uluuetkeu er ngii el mo tmuu er a blai. Ngdilu el kmo: “Ak mla chemuiu a rokui el babier el mngilai el mei e chelechang e ak di milengiil er kau.” Ngika el redil a mla er a ukeruul el melai er a chemotherapy e dimlak el soal el mengedecheduch er a rechad. Ngkilengei el mo mesuub er a Biblia. Me ngika el odos a mlo medengei el kmo a Jehovah a omes er a blakerreng er ngii me ngmilsang a omeksullel.

20. Ngua ngera uldesuem el kirel a ulekerreuil a Jehovah el bedulkau?

²⁰ A Jehovah a sebechel el mes a rokui el tekoi el doruul e dirrek el sebechel el merriter a rengrir a rokui el chad el ua bla desuub er tia el suobel. Ngdiak domdasu el kmo ngmelasem el di osiik a telemelled me a lechub e loluches a rokui el cheleuid el deruul. Kede bai olekeed er kid er ngii e le kede medengei el kmo ngomekerreu er kid e dirrek el kmal soal el olengeseu er kid e mo meskid a omeksulled el kirel a ungil el omerelled.