AMARIA a mlo outubuach er a chutem el kmal mekngit a rengul. Ngdirk melatk er a lengelel a ngelekel er sera lemad er a uriul er a betok el sikang el lecharm. A eanged a mlo milkolk engdi tia el taem a dirk mle cheldecheos. Me a chutem a melmesim. (Mateus 27:45, 51) A Maria a locha mlo omelechesiu el kmo a Jehovah a mle soal a beluulechad a bo lodengei el kmo ngii, el kuk ngaruchei er a ngii di el chad, a kmal mlo mekngit a rengul er a kodellel a Jesus Kristus.

Me sel taem e ngieta sils er a Golgatha me a lechub a “Blil Omilel a Bedul,” e a Maria a kmal lilangel el mekngit a rengul er a ngelekel. (Johanes 19:17, 25) Ngmlo melatk a betok el tekoi el ta er ngii a dilubech er a bekord el 33 el rak er a uchei. Ngii me a Josef er sera loba ngika el mekreos el ngelekir el tolechoi el mo er a templo el ngar er a Jerusalem, e a rubak el ngklel a Simeon a mlukrael el mo omlaoch. Ngulemlaoch a meklou el tekoi el kirel a Jesus e dilechelii el kmo, a ta er a klebesei e a Maria a mo melechesuar a ringel el ua lengar er ngii a kedorm el oles el mo tomellii a rengul. (Lukas 2:25-35) Me ngar tiaikid el meringel el taem, e a Maria a mlo medengei a belkul aike el tekoi el meldung el kirel.

Ngmla medung el kmo a kodellel a ngelekel a chad a kot el meringel el tekoi el sebechel a chad el mo chelebangel er ngii. A kodall a mekngit el cheraro e dirrek el omekringel er kid el rokui el oeak a betok el rolel. (Rom 5:12; 1 Korinth 15:26) Ngsebechel a chad el mo outekangel a chouaika el ringel? A bo dolatk er a klengar er a Maria er sera lomuchel a Jesus el ngar er a omesiungel el mo engelakl er sel taem er a kodellel, e kede mo mesuub a lmuut el betok el kirel sel klaumerang el ngilsuir a Maria el mo outekangel er a kngtil a rengul.

A Maria a mlo melechesuar el kmo a ngodech el tekoi a mochu er ngii er a edei el rak me a tedobech er a uchei er a kodellel a Jesus. Ngar er a kekerei el beluu er a Nasareth e a rechad a milsaod el kirel a Johanes el Techolb me sel klou a ultutelel el klemechel el kirel a tekoi er a bult. A Maria a milsa el kmo ngika el ketengel el sechal a ulemes aika el tekoi el kmo ngocholt el kirel sel taem el bo lomuchel er a omesiungel. (Mateus 3:1, 13) Engdi tiang a mle belkul a kmo a bo ledibus a Jesus e ngmo uchul a meringel el taem el kirel a Maria me a telungalek er ngii. E ngera uchul?

A bechil a Maria el Josef a locha mla mad. A leuaisei, e a Maria a mla chobengelii tia el tekoi. * A Jesus a lomekedong er ngii el “ngelekel ngikel daiksang” e dirrek el “ngikel daiksang.” A leuaisei, e a Jesus a mla mo oungerachel er a siobai er a demal e dirrek el oungerachel aike el lousbech a telungalek, el uldimukl er ngii a lekesengil e te telolem el ngalek el mlechell er a uriul er ngii. (Mateus 13:55, 56; Markus 6:3) Me alta e a Jesus a ullisechakl er a ochellel er a Jakobus el mo oureor el daiksang, engdi a bo ledibus ngii el Jesus e ngsebechel el mo uchul a ringel el mo er a telungalek. A Maria a kmal mle klou a ngerechelel, me ngera mle uldesuel el kirel tia el omelodech el mochu er ngii er a klengar er ngii? Ngdiak dodengei. Engdi a kuk klou a ultutelel el ker a kmo: Ngmo ua ngera uldesuel er sel taem el Jesus er a Nasareth a mo Jesus Kristus, el ngike el meltib el Mesias? A ta er a cheldecheduch er a Biblia a ochotii a tekoi el kirel tiang.​—Johanes 2:1-12.

 A Jesus a mlo er a Johanes el mo metecholb, el mo Ngike el Ngellitel er a Dios me a lechub ng Mesias. (Lukas 3:21, 22) E sola e mlo omuchel el melilt er a redisaiplo er ngii. Me alta e ngkmal mle orechudel a urerel e ngdi nguluusbech a taem el mo oldeu er a rengul el obengkel a telungalek er ngii me a resechelil. Ngii me a delal, me a redisaiplo er ngii, me a ruchellel a dilak el mo er a merengel a chebechiil el ngar er a Kana, el beluu el ngar er a bebul a bukl el bekord el 8 el mael a cherridel er a Nasareth. Ngar tiaikid el ungil el klebesei, e a Maria a mlo medengelii a mondai. Nglocha milseterir a rebebil er a rechederir tirka el obekel el kora suebek a rengrir e mocha kakelulau e le ngmla mo diak a bilong. Ngar er a siukang er tir, e a chouaitia el omeruul a mo uchul a rur el mo er a telungalek. Me a Maria a mlo mekngit a rengul er tir me ngmileltii el mo er a Jesus.

Ngdilu er a ngelekel el kmo, “Ng mla mo diak a bilong er tir.” Ngera ngmle soal a bo loruul er ngii a ngelekel? Ngdiak dodengei, engdi ngmle medengei el kmo a ngelekel a klou a ultutelel el chad el sebechel el remuul a meklou el tekoi, e locha uluureng el kmo ngmo omuchel er chelechang. Me ngdi ua lolekoi er ngii el kmo, “Rungalek, mrellii a tekoi el kirel tiang!” A nger er a Jesus a locha chilsir a rengul. Ngdilu el kmo: “Ngera me ke mengesang er ngak el kirel tiang?” A rebebil a omdasu el kmo a Jesus a dimlak lolecholt a omengull el mo er a delal. Engdi a tekingel a bai ullecholt a medemedemek el uleklatk. A Jesus a ulemeklatk er a delal el kmo ngmla mo diak el kirel el mesaod er a rolel a loruul er a omesiungel, e le tiang a ngerechelel a Demal el Jehovah.

A Maria a kilengei er a ulekrael er a ngelekel e le ngkmal mle medemedemek e ngariou a rengul el redil. Ngmileltii el mo er tirke el mesiou er a ungil el klebesei e dilu el kmo: “A ikel bo ledu er kemiu cho bo mruul.” Ngmilsa el kmo ngdikea el ngerechelel el omekrael er a ngelekel, e ngbai kirel ngii me a rebebil el melai a ulekrael er ngii. A Jesus a dirrek el ulechotii el kmo nguleba osisiu el uldasu el ua delal el melatk er tirka el obekel. Me tiaikid a kot el mengasireng el tekoi el lerirellii, el omult a ralm el mo ungil el bilong. Me ngera mlo rsel? “Ma rubengkel a mlo oumera er ngii.” A Maria me ngdirrek el mlo oumerang er a Jesus. Ngulemes er ngii el diak di lengelekel, e ngdirrek el Rubak er ngii e Osebelel.

A ruungalek er chelechang a sebechir el mesuub a betok er a klaumerang er a Maria. Nguaisei, el dirkak a chad el mla mekurulii a ngalek el ua Jesus. Engdi a diak el cherrungel el ngalek sel lorael el mo klou el chad e tia el okurulel a sebechel mo uchul a omelsemai. A chedam me a lechub e ngchedil a sebechel el melemolem er a ngelekel el ua ledirk kekerei el ngalek, alta e tia el omeruul a diak el ungil. (1 Korinth 13:11) Me ngmekerang a chedam me a lechub e ngchedil e mo sebechel el olengeseu er a mla mo klou el ngelekir? A ta er a rolel a mo melekoi er a blak a rengul el ngelekel el mo melemolem el oltaut a osisechakl er a Biblia me bo lenguu a klengeltengat er a Jehovah. A tekingel a chedam me a lechub e ngchedil el kirel a klaumerang me a omelisiich a mo uchul a klungiolir a remeklou el ngelekir. A Jesus a ulterekokl el uleba omereng el saul el kirel a ngelsuil a Maria.

A Evangkelio a di ouchais a mekesai el tekoi el kirel a Maria er sel taem er a omesiungel a Jesus el edei el rak me a tedobech. Lak mobes el kmo a Maria a locha melakl el dil me ngdiak a bechil e locha dirk ngar er ngii a remekekerei el ngelekel el ngar er a blai. Me a leuaisei e kede medengei el kmo nglocha dimlak el sebechel el mo oltirakl er a Jesus er a lomerk er a klumech el ngar er a belual el rokir. (1 Timothy 5:8) Ngdi ngii a millemolem el melebedebek aike el lesiluub el kirel a Mesias e mo er a miting er a blil a ongdibel el di ua sel mle siukang er tir el telungalek.​—Lukas 2:19, 51; 4:16.

A Maria a locha mle dengchokl el teloi er a rechad el orrenges er a Jesus er a longedecheduch er a blil  a ongdibel er a Nasareth. Ngulterekokl el kmal mlo dmeu a rengul er a lorrenges er a ngelekel el mesaod el kmo a ulaoch el meldung er a betok el rak er a uchei el kirel a Mesias a toutang er ngii. Engdi nglocha kmal mlo mekngit a rengul el omes er a rechad er a Nasareth el dimlak lekengei er a ngelekel. Te bai millasem el omekoad er ngii.​—Lukas 4:17-30.

Ngdirrek el kmal mlo mekngit a rengul er a blekerdelir a ruchellel a Jesus. Kede mesuub el ngar er a Johanes 7:5 el kmo tirke el teua el ochellel a Jesus a dimlak loba sel klaumerang er a derrir. Kede menguiu el kmo: “A re tar ngii me ng dimlak loumera er ngii.” A Biblia a diak losaod a ngerang el kirir a ruchedal a Jesus, el kesengil e te mle terung er seikid el taem. * A Maria a mlo medengelii a ileakl el ringel el mo er ngii sel dekiei er a delengchokl el rechad er ngii a kakerous a klechelid er tir. Me ngmle kirel el mo oba tabesul el uldasu el kirel a klungel a ultutelel a mera el klechelid e diak lorrimel er tir el mo obengkel.

A ta er a klebesei, e a rebetok el chedal a Jesus el locha uldimukl er a ruchellel a dilak el mong el “mo melai” er a Jesus. Te melekoi el kmo: “Ngika mla mo kebelung.” (Markus 3:21, 31) A Maria a dimlak lomdasu el uaisei engdi ngulebengterir a rengelekel el sechal el mong, el locha uluureng el kmo te mo suubii a tekoi el ngosuterir el mo omekeroul a klaumerang er tir. Te mlo oumerang? Alta e a Jesus a millemolem el meruul a mengasireng el ureor e olisechakl a klemerang el tekoi, engdi tirke el bebil er a rengelekel a Maria el sechal a dimlak bo loumerang er ngii. Me ngika el redil nglocha kmal mlo seselk a rengul el melatk el kmo ngera el tekoi a mo sebechel el remutech a rengrir a rengelekel?

Kau ke kiei er a delengchokl el kakerous a klechelid er ngii? A klaumerang er a Maria a sebechel el osisecheklau er a betok el tekoi, e le ngmillemolem el oumerang el kmo a rechedal a mo oumerang. Me ngdi milechititerir me bo lesa el kmo a klaumerang er ngii a milsa deurreng me a budech er a rengul. Ngdirrek el millemolem el melisiich er ngika el blak a rengul el ngelekel. A lebebil er a taem e a Maria nguluureng el ulekum a Jesus a dirk ngar er a blai el obengterir el ongalek? A leuaisei, e ngmle sebechel el di ngii el mengellakl er a rengul, e le ngmilsa el kmo ngmle techellel el olengeseu e melisiich er a ngelekel. Me kau ngdirrek el sebechem el mo ngosuterir a rengelekem el nguu a Dios el mo kot er a klengar er tir?

A Maria ngmlukngeltengat er a klaumerang er ngii er a Jesus? A Jehovah a blechoel el omekngeltengat a klaumerang, me ngulterekokl el ulemekngeltengat er a Maria. (Hebru 11:6) Ka di molatk er a Maria el orrenges er a ngelekel el mengedecheduch me a lechub e lorrenges a chisel a cheldechedechal el mla er tirke el chad el rirengesii er a longedecheduch.

Ngar er aike el okesiu er a ngelekel, e a Maria ngmle sebechel el melatk a tekoi el dilubech er a lomekeroul er ngii el ngar er a Nasareth? A Jesus er a losaod er a redil el meriik er a blil el osiik er a ririid el udoud, e meremet a merikengko el mo blauang, me a lechub e ngmekerdii a olbidel e loia er a olsechelel, e a Maria ngmillatk er a buik el mla er bita er ngii er a loruul a chouaike el ureor er a bek el sils? (Lukas 11:33; 15:8, 9; 17:35) Me a Jesus er a losaod el kmo a ongelungel er ngii a beot me a chelungel er ngii a kebekakl, e a Maria ngmle sebechel el melatk er a ta el chodochosong er a ngar er a mong er a lomes er a Josef el olisechakl er a ngeasek el Jesus er a rolel a bo lekerekikl sel loruul er a ongelungel me bo el sebechel a charm el diak lemeringel a bedengel sel longol er ngii? (Mateus 11:30) A Maria a ulterekokl el kmal mle dmeu a rengul er a lolebedebek er a ileakl el techall el Jehovah a milsang el mo olengeseu el omekeroul e olisechakl er a ngelekel el ngii a mo Mesias. Ngdirrek el locha kmal mlo dmeu a rengul el orrenges er a Jesus, el kot el ngarbab el sensei, el mle sebechel el ousbech  a tekoi me a blekeradel er a bek el sils el olisechakl a meklou a ultutelel el suobel.

Me nguaisei, engdi a Maria a millemolem el ngariou a rengul. A ngelekel a dimlak lolekoi el kmo ngkirir a rechad el mo mengull er a delal. Me ngar er a omesiungel, e a ta el redil el teloi er a seked a mle klou a ngerel el melekoi el kmo a delal a Jesus a ulterekokl el kmal dmeu a rengul el milechellii. E ngii a ulenger el kmo: “Te bai ngeltengat tirkel rongesii a tekingel a Dios e mo oltirakl er ngii!” (Lukas 11:27, 28) Me a rebebil el chad el teloi er a seked er a lesbedii a Jesus el kmo a delal me a ruchellel a ngar er isei, e ngdilu el kmo tirke el oumerang a mera el delal me a rudam er ngii. A Maria a dimlak bo lekesib a rengul, e le ngmle medengelii a belkul a tekingel a Jesus, a deleuill el obengterir a rudam me a rudos er kid er a klaumerang a kuk klou a ultutelel er a deleuill er a klechad.​—Markus 3:32-35.

Engdi ngera el tekoi a sebechel el mesaod er sel ringel el Maria a mlo omelechesiu er ngii er a lomes er a ngelekel el chuarm er a meringel el kodall el ngar er a teluo el kerrekar? A chad el milsa tia el mekngit el kodall, el apostol el Johanes, a uriul e nglilechesii tiaikid el tekoi el ngar er a babilengel: Ngar tiaikid el meringel el taem, e a Maria a dilechor er bita er a teluo el kerrekar er a Jesus. Ngdiak a ngii di lengerang el sebechel el olekebai er ngika el blak a rengul e betik a rengul el chedil me lak bo lobengkel ngika el ngelekel el mo er a ulebongel. A Jesus a milsang, me alta e sel louteliil e ngmlo uchul a klou el ringel me a longedecheduch e ngdirrek el chilarm er a ringel engdi ngdilu tekingel. Ngulterekeklii a ulekerreuil a delal el mo er ngike el betik er a rengul el apostol el Johanes. Seikid el taem e a ruchellel a Jesus a dirkak bo loumerang, me a Jesus a ulterekeklii a Maria el mo er a ta er a blak a rengul el disaiplo er ngii. Me ngulechotii el kmo ngkmal klou a ultutelel el kirel a chad el oumerang el mo omekerreu er a telungalek er ngii, el ileakl el kirel sel deleuill er tir el obengkel a Dios.​—Johanes 19:25-27.

Me sel taem er a kodellel a Jesus, e a Maria a mlo melechesuar sel ringel el meldung er a uchei el kmo a kedorm el oles a mo tomellii a rengul. Me a lsekum e ngmeringel er kid el mo medengelii sel ringel er a rengul, e ngulterekokl el diak el sebeched el mo omtab er sel deuil a rengul er a edei el klebesei er a uriul. A Maria a mlo medengelii sel kot el klou el mengasireng el tekoi el kmo, a Jesus a mla mekiis er a kodall! E liluut el kmal mlo dmeu a rengul e le Jesus a mlo duum el mo er a ochellel er a Jakobus el di ngii el tang. (1 Korinth 15:7) Sel miting a mla er ngii a lerellii er a rengrir tirke el kuk bebil er a ruchellel a Jesus me a Jakobus. Kede mo medengei er a uriul el kmo te mlo oumerang el kmo a Jesus a Kristus. E a uriul e te mlo er a miting er a Rekristiano el obengkel a derrir el “blak a rengrir el meluluuch.” (Rellir 1:14, BT) A reteru er tir, el Jakobus me a Jude, a uriul e te liluches a babier el ngar er a Biblia.

Kede metik er a ulebongel el olechotel a ngklel a Maria el ngar er a miting el meluluuch el obengterir a rengelekel el sechal. Ngkol ua ngera el ungil a ulebengelel a klengar er ngii, e ngii a dirrek el kmal ungil el kerebai el kired! A klaumerang er ngii a uchul e ngmle sebechel el outekangel er a kngtil a rengul e a uriul e ngmlukngeltengat el kirel. Me a lsekum kede oukerebai er a klaumerang er a Maria, e kid a dirrek el sebeched el mo outekangel a ringel el bo dechelebangel er ngii el ngar tia el beluulechad, e mo oldeu a rengud er a klengeltengat el diak a mekesiur.