1, 2. (a) Ngera el tekoi el dilubech a ochotii a klungel a ultutelel a doker a ungil el ker? (Momes er a siasing er a uchelel a suobel.) (b) Ngera uchul me ngdiak el kired el medakt el mesaod a dmolech el suobel?

 A TA el odos a milsaod er a Biblia el obengkel a bechil el dimlak el Sioning er a Jehovah. E ngii a dilu el kmo ngoumerang er a osisechakl el kirel a Trinidad. Ngika el odos a mlo medengei el kmo a bechil a dimlak lodengelii a osisecheklel a klechelid er ngii el kirel a Trinidad. Me nguleba delemedemek e uleker el kmo, “Kau ke oumerang el kmo a Dios a Dios, me a Jesus a Dios, me a chedaol reng a Dios, engdi ngdiak el tedei el Dios e ngdi tang?” A bechil a kilebetiekl e dilu el kmo, “Ngkmal diak kuumerang er tilecha el tekoi!” Me tiang a mlo uchul e ngmlo sebechir el ungil el chadecheduch el mesaod el kirel a mera el blekerdelel a Dios.

² Me ngera sebeched el suubii er tia el tekoi? Ngklou a ultutelel a doker a ungil el ker el oba delemedemek. Kede dirrek el suubii el kmo ngdiak el kired el mo medakt el mesaod a dmolech el suobel el uai a omesodel a Trinidad, beluu er a ngau, me a lechub e Ngike el Ulemeob a rokui el tekoi. Me a lsekum e kede mo ultuil er a Jehovah me a rolel a osisechakl el lomeskid e ngmo sebechel a osisechekled  el olechau a rengrir tirke el orrenges. (Kol. 4:6) Ngar tia el suobel, e kede mo mesaod a rolel e ngsebeched el mo ungil el olisechakl el okiu a (1) doker a ker el rullii a chad el mo olecholt er a uldesuel, (2) dungil el mesaod a Bades, e a (3) dousbech a okesiu el omeketakl a tekoi.

3, 4. Ngera uchul me ngklou a ultutelel a dousbech a ker el mo medengelii a klaumerang er a chad? Ka mosaod.

³ A ker a sebechel el ngosukid el mo medengei el kmo ngerang ngoumerang er ngii a chad. Ngera uchul me tiang a klou a ultutelel? A Osisechakl 18:13 a kmo: “A lsekum a chad a onger a ker er uchei er a lorrenges, e ng klebelung e otuball.” Me ngkired el omuchel el mo medengelii a klaumerang er ngika el chad el orrenges. E le lak e ngsebechel el mo uchul e kede choitii a klou el taem el omeketakl er a cheleuid el tekoi e a uriul e kede mo medengei el kmo ngii el chad me ngdiak loumerang er tia el tekoi.​—1 Ko. 9:26.

⁴ El ua tiang, ngsebeched el mesaod el kirel a beluu er a ngau el obengkel a chad. A rebebil a omdasu el kmo a beluu er a ngau a basio el ngar er ngii a ngau el melul er a remekngit el chad. Me a rekuk bebil a oumerang el kmo a beluu er a ngau a belkul a kmo a chad a diak a ungil el deleuill er ngii me a Dios. Me nglocha sebeched el dmu el kmo: “A rechad a kakerous a uldesuir el kirel a beluu er a ngau, ngsebechek el mo medengelii a uldesuem el kirel tiang?” Me sel bo dodengelii a nger er ngii, e ngmo sebeched el ngosuir el mo medengei aike el lolisechakl a Biblia.

5. Ngmekerang a ker e ngosukid el mo medengelii a uchul me a chad a oumerang er a tekoi?

⁵ A ungil el ker a dirrek el sebechel el ngosukid el mo medengelii a uchul me a chad a oumerang er a tekoi. El ua tiang, kede mo mekerang a lsekum a chad a melekoi el kmo ngdiak loumerang er a Dios? Kede locha mo omdasu el kmo ngdiak loumerang el kmo kede ulebeob. (Psa. 10:4) Engdi a rebebil a mla mo diak loumerang er a Dios e le te chuarm a betok el ringel e dirrek el omes er a rechad el chuarm. Me ngmeringel er tir el mo oumerang el kmo a betik a rengul el Ulemeob a sebechel el omechei a ringel me ngmelemolem. Sei a uchul me a lsekum a chad er a blai a kmo, “Ngdiak kuumerang er a Dios,” e ngsebeched el korir el kmo, “Kau ke mle blechoel el omdasu el uaisei?” A lsekum e ngkmo ngdiak, e ngsebeched el korir er sel uchul me ngmlo omdasu el kmo ngdiak a Dios. A nger er ngii a sebechel el ngosukid el mo meduch el olengeseu er ngii.​—Monguiu er a Osisechakl 20:5.

6. Ngera kired el meruul er ngii er a uriul er a doker a ker?

⁶ Me a uriul er a doker a ker, e ngkired el mo kerekikl el orrenges er a nger er a chad e ochotii el mo er ngii el kmo kede mengull er a uldesuel. El ua tiang, ngsebechel el mo ouchais el kirel a mekngit el tekoi el dilubech el mlo uchul e ngmlo diak loumerang er a betik a rengul el Ulemeob. Me ngungil a domuchel el ngosuir el mo medengei el kmo ngdiak lemekngit a doker er a uchul me kede chuarm. E sola e ngsebeched el mesaod er a uchul me kede medengei el kmo ngar er ngii a Dios. (Hab. 1:2, 3) Me a lsekum e ngmo klou a rengud e oba bltikerreng e nglocha mo soal el mo medengei a lmuut el betok. *

7. Ngmekerang e mo ungil a omesiunged?

⁷ A Biblia a kot el klou a ultutelel el klekedall el dousbech er ngii el ngar er a omesiunged. Ngngosukid el mo “ungil kldmokl e ulsemuul el kirel a bek el ungil ureor.” (2 Ti. 3:16, 17) Me a ungil el omesiunged a diak di lultuil er a  ildisel a bades el donguiu. Ngdirrek el kired el mo meduch el mesaod e omeketakl a belkul a bades. (Monguiu er a Rellir 17:2, 3.) Me bo dosaod a edei el olechotel.

8, 9. (a) Ngera ta er a rolel e ngsebeched el omeketakl a tekoi el mo er a chad el oumerang el kmo a Jesus a Dios? (b) Me kau ke milekerang e meketeklii tia el tekoi el mo er a chad?

⁸ Kot el Olechotel: Ngar er a omesiunged, e kede metik er a chad el oumerang el kmo a Jesus a Dios. Ngera el bades a sebeched el ousbech el mesaod er tia el tekoi? Ngsebeched el olengit er ngii me longuiu er a tekingel a Jesus el ngar er a Johanes 6:38 el kmo: “Ngak a mlar a eanged el mei el diak be kuruul a soak, e ak bai meruul a soal ngikel ulderchak.” Me a uriul er a longuiu er a bades, e ngsebeched el oker er ngii el kmo: “A lsekum a Jesus a Dios, e ngtecha ngike el ulderchii el mei er tia el beluulechad? Ngdiak el Ngike el kuk ngarbab er a Jesus? E le ngike el oldurech a kuk ngarbab er ngike el mlodurech.”

⁹ Ngdirrek el sebeched el menguiu er a Filipi 2:9. Ngar tia el bades e a apostol el Paulus a mesaod el kirel aike el lurruul a Dios er a uriul er a kodellel me a okisel a Jesus. Tia el bades a melekoi el kmo a Dios a ulengesecheklii a Jesus “el mor sel kot el ngarbab el deruchall e milsa ngakl el kuk ngarbab er a rokui el ngakl.” Me a bo el sebeched el ngosuir ngii el chad el mo medengelii a belkul tia el bades, e ngungil a doker el kmo: “A lsekum a Jesus a mle Dios er a uchei er a lemad e a uriul e a Dios a ulengesecheklii el mo er a ngarbab el deruchall, e tia ngdiak lerellii a Jesus el kuk mo ngarbab er a Dios? Engdi ngsebechel a chad el kuk mo ngarbab er a Dios?” A chouaitia el omesaod a sebechel el ngosuterir a remelemalt a rengrir el oba omengull el kirel a Tekingel a Dios el mo sorir el mo medengei a lmuut el betok.​—Rel. 17:11.

10. (a) Kede mekerang e ngosuir a chad el oumerang er a beluu er a ngau? (b) Me kau ke milekerang e meketeklii tia el tekoi el mo er a chad?

¹⁰ Ongeru el Olechotel: A chad er a blai a oumerang el kmo a remekngit el chad a mo medul er a beluu er a ngau el diak a ulebengelel. Nglocha oumerang el kmo ngar er ngii a beluu er a ngau e le ngsoal a remekngit el chad a bo lobals el kirel a mekngit el omerellir. Me ke mekerang e ngosuir a chad el uaisei a uldesuel? A kot, e kede mengelaod er ngii el kmo a remekngit el chad a ulterekokl el mo obals. (2 Pe. 3:7) E sola e ngsebeched el olengit er ngii el mo menguiu er a Genesis 2:16, 17 el melekoi el kmo a blsel a klengit a kodall. Ngsebeched el mesaod el kmo ngkngtil a Adam a uchul me a rokui el chad a oudiukes er a klengit. (Rom 5:12) Ngdirrek el sebeched el subedii el kmo a Dios a dimlak a ta el losaod el kirel a beluu er a ngau el mo er a Adam. E sola e mo chiuii a Genesis 3:19. Ngar tia el bades e a Dios a dilu er a Adam  el kmo a blsel a kngtil a kmo ngmo moluut el mo er a chutem. Me ngsebeched el oker el kmo, “Omomdasu e ngmle ungil a lolekoi er a Adam el kmo ngmo er a chutem engdi a mera er ngii e ngmo er a beluu er a ngau?” A chouaitia el ker a sebechel el ngosuir a melemalt a rengul el chad el mo omtab er tia el tekoi.

11. (a) Ngera ta er a rolel e ngsebeched el omeketakl a tekoi el mo er a chad el oumerang el kmo a rokui el ungil el chad a mo er a eanged? (b) Me kau ke milekerang e meketeklii tia el tekoi el mo er a chad?

¹¹ Ongedei el Olechotel: Ngar er a omesiunged, e kede metik er a chad el oumerang el kmo a rokui el ungil el chad a mo er a eanged. Tia el uldasu a ngar er ngii a lerellii er a klaumerang er ngii er a Biblia. El ua tiang, a lsekum e kede menguiu er a Ocholt 21:4, e ngii el chad a locha omdasu el kmo tia el bades a mesaod el kirel a klengar el ngar er a eanged. (Monguiu.) Me ngmekerang a omosaod er tia el tekoi? Ngungil a lak dousbech a betok el bades, e kede bai di mesaod er a tekoi el ngar er a Ocholt 21:4 el kmo, “ng dikea lluut el mor ngii a kodall.” Me ngsebeched el oker el kmo: “Kau ke kongei el kmo a tekoi el dikea lluut el mor ngii a mesaod er a tekoi el mla er ngii er a uchei?” Nglocha mo dmu el kmo chochoi. E seikid e ngsebeched el dmu el kmo me a leuaisei e ngdiak a kodall er a eanged. A rechad a di mad er tia el chutem. Me ngbelkul a kmo a Ocholt 21:4 a mesaod el kirel a klengeltengat el mo er ngii er tia el chutem.​—Psa. 37:29.

12. Ngera uchul me a Jesus a uluusbech a okesiu el olisechakl?

¹² A Jesus a uluusbech a okesiu el olisechakl. (Monguiu er a Mateus 13:34, 35.) Me aika el okesiu a mlo uchul e a rechad a mlocholt el kmo ngmelemalt a rengrir e sorir el mesiou er a Jehovah me a lechub e ngdiak. (Mt. 13:10-15) Ngdirrek el uluusbech a okesiu me bo el sebechir a rechad el melatk a osisecheklel e lungil a rengrir el orrenges er ngii. Me ngmekerang a dousbech a okesiu sel dolisechakl er a rechad?

13. Ngera el okesiu a sebechem el ousbech er ngii el olisechakl el kmo a Dios a kuk ngarbab er a Jesus?

¹³ Ngkmal ungil a dousbech a beot el okesiu. El ua tiang, a lsekum e ngsoad el olisechakl el kmo a Dios a kuk ngarbab er a Jesus, e ngsebeched el mesaod el mo er a chad el kmo, a Dios me a Jesus a di dul ulemekesiu er a deleuill er tir el mo er a deleuill er a Chedam me a Ngalek. (Lk. 3:21, 22; Jn. 14:28) Me ngsebeched el oker el kmo: “A lsoam el mesaod el kmo a reteru el chad a di osisiu, e ngera el deleuill er a chelsel a telungalek a sebechem el ousbech er ngii el omekesiu er tia el tekoi?” Nglocha mo dmu el kmo rudam me a lechub e te kebtot. Me ngsebeched el melekoi el kmo: “Tilechang a kmal ungil el okesiu. Me a lsekum e ngbeot er kid el lotkii tia el okesiu, e ngera uchul me a Jesus el ngii a Klou el Sensei a dimlak lousbech er tia el osisiu el okesiu? Ngbai dilu el kmo a Dios a Demal. Me a omesodel a Jesus a ngosukid el mo medengei el kmo a Dios a lmuut el klou e ngarbab a deruchellel er ngii.”

14. Ngera el okesiu a meketeklii el kmo a Dios a diak lousbech er a Diabelong el omekcharm er a rechad er a beluu er a ngau?

¹⁴ Me bo dosaod er a lmuut el ta er a olechotel. A rebebil a oumerang el kmo a Dios a mla tutkii a Satan el mo oungerachel er a beluu er a ngau. Me ngmekerang a dengesuir a oungalek el chad el mo mesang el kmo a Dios a diak lousbech er a Diabelong el omekcharm er a rechad er a beluu er a ngau? Ngsebeched el oker el kmo, “Ke mo mekerang a lsekum a ngelekem a mo omtok e meruul a betok el mekngit el tekoi?” Nglocha mo dmu el kmo ngmo mesmechokl er a ngelekel. Me ngsebechel el mo betok el taem el losmechokl er ngii me bo lak loruul a mekngit el tekoi. (Osi. 22:15) Ngsebechem el oker el kmo, “Ke mo mekerang a lsekum a ngelekem a chetil el melodech a blekerdelel?” A ruumesingd er a ruungalek a mo dmu  el kmo ngmo kirir el mengelebus er a ngelekir. Misei e ngsebeched el oker el kmo, “Ngmo ua ngera uldesuem a lsekum ke mo medengei el kmo a mekngit el chad a mengesuseu er a ngelekem el mo meruul a mekngit?” Ngulterekokl a oungalek el chad el kmal mo kesib a rengul er ngike el mekngit el chad. E chelechang e ngmo sebechem el meketeklii a tekoi el mosaod er ngii sel moker er ngii el kmo, “Me sel bo modengei el kmo ngika el mekngit el chad a mengesuseu er a ngelekem el mo meruul a mekngit e ke mo olengit er ngii el chad me ngmo mengelebus er a ngelekem?” Ngulterekokl el mo dmu el kmo ngdiak. Me ngdi osisiu, a Satan a ngike el mengesuseu er a rechad el mo meruul a mekngit, me ngbleketakl el kmo a Dios a diak lekengei el ousbech er a Satan el mo mengelebus er tir.

15, 16. (a) Ngera uchul me ngdiak el kired el omdasu el kmo a rokui el chad a mo kongei er a klumech er a Renged? (b) Kau ngkirem el kmal mo ungil el sensei me bo el sebechem el ungil el olisechakl? Mosaod. (Dirrek el momes er a baks el “ A Suobel el Ngosukid el Mo Ungil el Onger.”)

¹⁵ Me alta kede oker a ungil ker, e mesaod a tekoi el ngar sel kot el ungil el rolel, e ousbech a ungil el okesiu, engdi ngdiak el rokui el chad a mo kongei er a klumech er a Renged. (Mt. 10:11-14) Te di mle kesai el chad a kilengei a osisecheklel a Jesus alta e ngmle kot el ungil el Sensei el mla ngar tia el chutem!​—Jn. 6:66; 7:45-48.

¹⁶ E kuk mekerang a lsekum e kede omdasu el kmo kede metitur el sensei? Alta kede metitur, engdi ngdirk sebeched el mo ungil el olisechakl. (Monguiu er a Rellir 4:13.) A Biblia a melisiich er kid el kmo tirke el rokui el “kirir el mo nguu a diak a ullebengelel klengar” a mo kongei er a ungil chais. (Rel. 13:48, BT) Me bo doba tabesul el uldasu. Ngkired el melasem el lmuut el mo meduch el olisechakl e diak bo el mechitechut a rengud er sel taem el chad a oltngakl er a ungil chais. Me a lsekum e kede mo ultuil er a Jehovah me a rolel a osisechakl el lomeskid, e kede mo ungil el sensei, e tiang a mo uchul a klungioled kid me tirke el orrenges er kid. (1 Ti. 4:16) A Jehovah a sebechel el ngosukid el mo ungil el “onger er a re bek el chad.” Ngar er a ongingil el suobel, e kede mo mesuub er a rolel e a doltirakl er a ta er a klou a ultutelel el uleklatk er a Jesus e ngmo sebeched el ungil el churrengelii a omesiunged.