1. A omerelled el mo er a rechad ngsebechel el ngar er ngii a lerellii er tir er sel taem el dongedecheduch er tir? Mosaod. (Momes er a siasing er a uchelel a suobel.)

 A TA el obekel a uleldingel er a beluu er a Fiji el mengemedaol er a rechad el mo er a Chedaol Blsoil er a kodellel a Kristus. Te milengedecheduch er a redil er a ikrel a blil e ngmo chull me ngika el odam me a bechil a ngiluu a ta er a bailengir el nguu el msang me ngomdor er ngii. Me ngika el redil a kmal mlo mechas a rengul er a ungil el omerellir me ngkilengei el mo er a Chedaol Blsoil. A uriul e ngdilu el kmo ngdiak el sebechel el lmatk a rokui el tekoi el lulsaod, engdi ngkmal diak el sebechel el obes er a ungil el omerellir el bedulngii. Me tirka el obekel a mera el uleltirakl er a ta er a klou a ultutelel el uleklatk er a Jesus.

2. Ngerang a ta er a klou a ultutelel el uleklatk er a Jesus, e mekerang a doltirakl er ngii?

² Me ngera tia el uleklatk er a Jesus? Ngtekoi el ledillii el kmo: “Moruul el mor a re chad a ikel somiu a loruul el ekor kemiu.” (Mt. 7:12) Me ngmekerang a doruul er tiang? A kot, e ngungil a di lekid el oker el kmo, ‘Oleko ak mle ngike el ta er a chad e ngsoak a rechad a bo el ua ngera omerellir el bedul ngak?’ Ongerung, e moruul el uaisei el mo er a chad.​—1 Ko. 10:24.

3, 4. (a) Mosaod er a uchul me a uleklatk er a Jesus a diak di losaod el kirel a omerelled el bedul a rechad er a ongdibel e lemerekong. (b) Ngera kede mo mesaod er tia el suobel?

³ Me a uleklatk er a Jesus, ngbelkul a kmo ngkired el di meruul er  ngii el mo er tirke el dedak el ngar er a ongdibel? Ngdiak, e le sera ledelii tia el uleklatk e ngmilsaod el kirel a omerelled el mo er a rokui el uldimukl er tirke el ouketui er kid. (Monguiu er a Lukas 6:27, 28, 31, 35.) Me ngkmal klou a ultutelel el kired el oltirakl er tia el uleklatk sel doldingel er a rechad e le ngklou a techellir tirke el rokui el “kirir el mo nguu a diak a ullebengelel klengar” el mo oumerang!​—Rel. 13:48, BT.

⁴ Me chelechang e kede mo mesaod a eua el ker el kired el melatk sel doldingel a obliil: Ngak ak mengedecheduch er techang? Ak ngar er ker e mengedecheduch er tir? Ngoingerang a kot el ungil el taem el kungedecheduch er a rechad? Ngua ngera rolel a kungedecheduch er tir? Ngar tia el suobel e kede mo mesang el kmo aika el ker a sebechel el ngosukid el mo medengei el kmo ngkirel el mo ua ngerang a omerelled el mo er a rechad. Seikid e ngmo sebeched el medengelii a ungil el rolel a dongedecheduch er a derta el chad.​—1 Ko. 9:19-23.

5. Ngera el ker a kired el melatk?

⁵ A rebek el chad el debetik er tir sel doldingel a kakerous a blekerdelel a klengar er tir me a mondai er tir. (2 Kr. 6:29) Me sel mongedecheduch er a chad e molatk el kmo: ‘Oleko ak ngika el chad ngsoak a bo el ua ngera omerellir a rechad el bedul ngak? Ngsoak a di lemereched el mo omdasu a mekngit el kirek e loukerrekeriil er ngak er a uchei er a bo lodengelkak? Me a lechub e ngsoak a bai lomuchel el mo ungil el medengelkak?’ Aika el ker a sebechel el ngosukid el mo oltirakl er a uleklatk er a Jesus e mo ungil a omerelled el mo er a rederta el chad.

6, 7. Kede mo mekerang a lsekum kede metik er a chad el kesib a rengul me a lechub e ngmekngit a tekingel el bedulkid?

⁶ El ua tiang, a Rekristiano a melasem er a tkurrebab el sebechir el oltaut er a uleklatk er a Biblia el mo blechoel el ungil el mengedecheduch er a rechad. (Kol. 4:6) Engdi kid a diak demecherrungel. Alta e ngdiak el lungil a rengud er chelechang e mo dmung a tekoi el bo douuchel a rengud er ngii er a uriul. (Jak. 3:2) Me sel bo deuaisei, e kede oureng el kmo a rechad a ungil el medengei el kmo ngdiak leblechoel el uaisei a omerelled. Ngkmal diak el soad a bo lomdasu el kmo kede mekngit el chad. Me a klemedengei er kid el kirel tia el tekoi a ngosukid el mo melechesuar el kmo a rechad el mekngit a omerellir el bedulkid a locha dirrek el mo ouuchel a rengrir er a uriul el kirel a tekingir el mei er kid.

⁷ Me a lsekum ke mo metik er a chad el kesib a rengul me a lechub e ngmekngit a tekingel el bedul kau, e ngsebechem el mo medengelii a uchul me nguaisei a omerellel? Ngikang nglocha chelebangel a orimel er a urerel me a lechub e ngskuul? Nglocha ngar er ngii a meringel el secherel? A rebetok el chad el mle kesib a rengrir er a lekot el lomuchel a Resioning el mengedecheduch er tir a mlo ungil a rengrir er a uriul er a lomes er a Resioning el melemolem el olecholt a delemedemek me a omengull el bedultir.​—Osi. 15:1; 1 Pe. 3:15, 16.

8. Ngera uchul me ngkired el omerk er a klumech er a Renged el mo er a rekakerous el chad?

⁸ Kid a omerk er a klumech el mo er a rekakerous el chad. Ngar er aika el mereko el sesei el rak e a betok er a 60 el chais el kirir a rechad a mla motobed er a suobel el “A Biblia a Melodech er a Klengar er a Rechad” el ngar er a Watchtower. * Aika el suobel a mesaod el kirir a rechad el mle merechorech, di cheltelaol, chedal a gang, me a lechub e te millai a mekngit el kar. A rebebil a mle chad er a balatiks, mengeteklel a klechelid me a lechub e te kuk di mle mechesang el mengereker. E a rekuk bebil a kmal mle mesisiich el meruul a deleboes. Engdi tir el rokui a rirengesii a klumech er a ungil chais, e kilengei el mesuub er a Biblia, e millodech a rolel a klengar er tir e mle soiseb er a klemerang. Me tiang a belkul a kmo ngkmal diak el kired el mo omdasu el  kmo a rebebil er a rechad a diak el sebechir el kongei er tia el klumech er a Renged. (Monguiu er a 1 Korinth 6:9-11.) Kede medengei el kmo ngsebechir a rekakerous el chad el kongei er a klemerang.​—1 Ko. 9:22.

9. Ngera uchul me ngkired el olecholt a omengull sel debo er a blirir a rechad?

⁹ Kede blechoel el mengedecheduch er a rechad el ngar er a blirir. (Mt. 10:11-13) A blid a klou a ultutelel er kid, me ngsoad el mesterir a rechad el olecholt a omengull sel lemei er a blid. Ngdirrek el soad el rullii a blid el mo blil a ulekerreu me a ulengull. Me sel dongedecheduch er a rechad e ngkired el mo olecholt a osisiu el omeruul el mo er tir me a blirir.​—Rel. 5:42.

10. Kede mekerang e diak dongasech a rengrir a rechad el doldingel er tir?

¹⁰ Kid a kiei er a beluulechad el mui er a delengerenger me a rechad a mereched el mo ngodech a uldesuir el kirir a rengodech el chad el mei er a blirir. (2 Ti. 3:1-5) Me ngkmal diak el kired el meruul a tekoi el mo uchul e a rechad a mo ngodech a uldesuir el bedulkid. Ka di molatk er tiang: Ke melngod er a chesimer er a blai, e a lak a chad el mei e ngmo soam el mo omdidm er a mado me a lechub e ke meliuekl el mo er a rebai el osiik er a rechad. Ke meruul er tiang e le ngsoam el osiik er a rechad e mengedecheduch er tir. (Rel. 10:42) Ngkmal soam el olengeseu er a rechad el mo medengelii a klemerang el kirel a Dios. (Rom 1:14, 15) Engdi tia el basio el moldingel er ngii, ngsebechel a omerellem el mo uchul a ngesechel a rengul a chad er a blai? Ngmo ua ngerang a uldesuir a retonari er ngii? Ngkmal kired el mo ungil el omdasu a tekoi me lak dongasech a rengrir a rechad el ngar er aika el basio. A apostol el Paulus a milluches el kmo: “Ng diak kimoruul olibesongel el mor a ngii di le chad, me ng diak a mo oltelechakl er kemam er a ngera er omesiungam.” (2 Ko. 6:3) Me a rechad el doldingel er tir a sebechir el mo kongei er a klemerang a lsekum kede olecholt a omengull el mo er tir me a dirrek el blirir.​—Monguiu er a 1 Petrus 2:12.

11. Ngera uchul me ngungil a rengud sel sekum a rechad a medengei el kmo kede mechesang?

¹¹ A ruumesingd er kid a kmal mechesang me kede blechoel el melatk e meruul a temed er a uchei me bo el sebeched el remuul aike el tekoi el soad el meruul. (Efe. 5:16; Fil. 1:10) Ngsebechel el mo seselk a rengud a lsekum ngduubech a bkaischemrungel el tekoi. Me ngungil a rengud a lsekum a rechad a medengei el kmo kede mechesang me ngdiak longesang er kid el uchul me kede mo mengoit a temed el mengedecheduch er tir. Me a leuaisei, e ngmekerang a uleklatk er a Jesus e ngosukid el mo meduch el olecholt a omengull el mo er a rechad el tir a mechesang?

12. Kede mekerang e tiriter a ungil el taem el bo dongedecheduch er a rechad el ngar er aike el basio el doldingel er ngii?

¹² Ngoingerang e ngungil el dongedecheduch er a rechad? Di lekau el oker el kmo: ‘Ngar tia el basio el kuldingel er ngii e ngoingerang e a rechad a ngar er a blirir? E oingerang e ngar er ngii a temir el orrenges er kid?’ Ngungil a deruul a temed me bo el sebeched el mengedecheduch er tir er aika el taem. Ngar er a bebil el beluu er a beluulechad e ngungil a bo doldingel a obliil er a telia el sils me a lechub e ngkebesesengei. A lsekum a beluam a uaisei, e ngdiak el soam el melodech a temem me bo el sebechem el mengedecheduch er a rechad er tiaikid el taem? (Monguiu er a 1 Korinth 10:24.) A Jehovah a mo omekngeltengat er kid el kirel aike el rokui el doruul me bo el sebeched el mengedecheduch er a rechad er sel ungil el temir.

13. Ngmekerang a dolecholt a omengull el mo er a chad er a blai?

¹³ Ngera lmuut el bebil er a rolel e kede olecholt a omengull el mo er a chad er a blai? Sel debetik er a chad el semeriar e ngkired el mo  ungil mengedecheduch er ngii engdi ngdiak el kirel el mo kemanget a cheldechedechad. E le nglocha ngar er ngii a klou a ultutelel el tekoi el kirel el mo meruul er ngii. Me a lsekum e ngdmu el kmo ngmechesang e ngsebeched el dmu el kmo kede di mereched. Engdi ngkired el otireklii a tekinged el di mo kedeb a cheldechedechad. (Mt. 5:37) Me a rekil a cheldechedechad e ngungil a dekerir er a ungil el temel el mo sebeched el lmuut el mo oldingel er ngii. A rebebil el oldingel a dmu el kmo: “Ngkmal soak el lmuut el me oldingel er kau. Ngdi ungil a kuudengua me a lechub ak text er kau er a uchei er a kmei?” Me sel dodengei el kmo a rechad a mechesang, e dolecholt a omengull el kirel a usbechel a temir e kede oltirakl er a kerebil a Paulus. Ngdimlak di loruul a soal e ngbai millatk a “ungil er a re bek el chad, me ng mo sebechir el mo suobel.”​—1 Ko. 10:33.

14-16. (a) Ngera me ngkired el bleketakl el subedii a chad er a uchul me kede mo oldingel er ngii? Mosaod. (b) Ngera ngmeruul er ngii a ta el odam el oldingel a ongdibel?

¹⁴ Ka di molatk, oleko a ngodech el chad a oudengua el mei er kau el oker er kau el kmo ngera soam el kall. Me ke melangch el kmo ngika ngtecha el chad, e ngera soal. Ngdiak el soam el mo mekngit a tekingem el mo er ngii me ke mengedecheduch er ngii el telkib e melmesumech er ngii. E chelechang e molatk er tiang, ngika el osisiu el chad a omekedong er kau e ochotii a ngklel e dirrek el subedau el kmo ngoureor er a kombalii el olengeseu er a rechad el mo menga ungil er a bedenged el kall. Ngdmu el kmo ngar er ngii a ungil el tekoi el soal el ouchais er kau. Me nglocha mo soam el orrenges er ngii, e le ngsoad a  rechad a louchais er kid el kmo te rua techang er sel taem el longedecheduch er kid. Me kede mekerang e ochotii a osisiu el omengull el mo er a rechad el debetik er tir?

¹⁵ Ngar er a chelsel a betok el basio el doldingel er ngii e ngkired el bleketakl el subedii a chad er a uchul me kede mo oldingel er ngii. Ngar er ngii a meklou a belkul el tekoi el kirel ngii el chad el mo medengei. Engdi ka di molatk, oleko ngdiak douchais er ngii el kmo kid kede rua techang e ngera uchul me kede ngar er a blil e bai omuchel el oker er ngii el kmo: “Oleko ngsebechem el mesmechokl a mondai er tia el beluulechad, e ngera el mondai a soam el sumecheklii?” Kede uleker er a ker me bo el sebeched el mo medengelii a uldesuel e dousbech er a Biblia el mengedecheduch er ngii. Me nguaisei, engdi a chad er a blai a sebechel el mo rrau a rengul e melatk el kmo, ‘Ngika ngtechang, e ngera me ngoker er ngak er tia el ker? Ngera chised?’ Kid a soad a chad er a blai a lungil a rengul el mengedecheduch er kid. (Fil. 2:3, 4) Me ngmekerang a doruul er tia el tekoi?

¹⁶ A ta el odam el oldingel a ongdibel a meruul er tia el tekoi: A uriul er a lomuchel er a cheldechedechal el mo er a chad er a blai, e nguu a ta er a tract el Kau Ngsoam el Mo Medengelii a Klemerang? el msang e dmu el kmo: “Aki merous er tia el babier el mo er a rokui el chad er chelechang. Tiang a mesaod a elolem el ker el lolatk a rebetok el chad. Me tiang a babilengem.” Ngika el odam a melekoi el kmo a lsekum a rechad a mo medengelii a uchul e kede mo oldingel er tir e a rebetok er tir a mo kongei me kede mengedecheduch er tir. E sola e ngii el odam a oker er a chad el kmo: “Ngmla ta el momdasu er a ngii di el ta er aika el ker?” Me a lsekum a chad a ngiltii a ta er ngii e ngika el odam a mekengii tia el tract e mesaod aike el ledung a Biblia el kirel tia el ker. Engdi lsekum ngdimlak lengiltii a soal e a odam a di ngii el ngiltii a ta er aike el ker e melemolem er a cheldechedechal me lak lerellii a chad el mo merur. Kede medengei el kmo ngbetok a rolel a domuchel er a cheldechedechad. Ngar er a bebil el beluu e ngar er ngii a ileakl el rolel a douetkeu er a rechad er a uchei er a domuchel el mesaod er a uchul me kede oldingel er tir. Me ngklou a ultutelel el kired el kltmokl el ngodechii a cheldechedechad me bo el semeriar a rechad el orrenges er a klumech el domerk er ngii.

17. Ngera bebil er a rolel e kede otireklii a uleklatk er a Jesus sel doldingel?

¹⁷ Me ngera kede mla suub el ngosukid el mo oltirakl er a uleklatk er a Jesus sel doldingel? Kede mla suubii el kmo a rebek el chad a kakerous a blekerdelir. Ngdirrek el kired el olecholt a omengull el mo er a rechad me a blirir. Ngblak a rengud el omerk er a klumech el mo er a rechad er sel taem el lengar er a blirir e ngar er ngii a temir el orrenges er kid. Me a rolel a domerk er tia el klumech a kirel el mo rulleterir a rechad er aike el basio el doldingel er ngii el mo kongei el orrenges er kid.

18. Me sel doldingel a obliil, e ngera uchul me ngungil a doruul el mo er a rechad aike el soad a loruul el mei er kid?

¹⁸ Sel dolatk a uldesuir a rechad er a basio el doldingel er ngii e bo lungil a omerelled el bedultir e kede meketeklii el kmo kede oltirakl a omellach er a Biblia el uchul a klebkall el mo er a Demad el ngar er a eanged. (Mt. 5:16) A rebetok el chad a locha mo kongei el mesuub er a klemerang sel dolecholt a omengull el mo er tir. (1 Ti. 4:16) Me alta rechad a mo kongei er a klumech er a Renged me a lechub e ngdiak, engdi kid a ungil a rengud e le kede medengei el kmo kede mlo er a tkurrebab el sebeched el meruul er a omesiunged. (2 Ti. 4:5) Me bo doukerebai er a apostol el Paulus el milluches el kmo: “Mak ua isei el meruul er ngak el ngar a rokui el bedengel a tekoi el kirir a rokui el chad, me ng mo sebechek el mor a bek el bedengel a ongedechuul el osebelterir a re bebil er tir.” (1 Ko. 9:22) Me bo dotireklii a uleklatk er a Jesus el meruul aike el tekoi el soad a rechad a loruul el mei er kid.