1, 2. Ngera uchul me ngmle sebechel a Paulus el melechesuar a chelitecheterir a rechad?

 KID el rokui a mo mechitechut a bedenged a lebebil er a taem. Me a lebebil e ngmo diak a klisiched me ngmo meringel er kid el meruul aike el tekoi el kired el meruul. Me ka di molatk oleko ngmo uaisei a chelitechetul a bedengem el kemanget el taem. Ngsoam a bo leua ngerang a omerellir a rechad el bedul kau? Nglocha soam a bo lolechesuar a blekeradel el mchelebangel er ngii.

² A lebebil er a taem e a apostol el Paulus a mlo mechitechut a rengul el orimel el ngar er a ikrel me a chelsel a ongdibel a uchul. Me ngmle betok el taem el blo lomdasu el kmo ngkmal dikea el sebechel el outekangel. (2 Ko. 1:8; 7:5) Me ngoeak a tekoi el dilubech er a klengar er ngii e ngmlo medengelii a belkul sel lebo lemechitechut a bedenged, me ngdilu el kmo: “Ng techa kmo ng mechitechut, e ngak a diak?” (2 Ko. 11:29) Sel taem er a lomekesiu er a Rekristiano er a ongdibel el mo er a kakerous el klekedellel a bedenged e ngdilu el kmo, “kid a kmal ousbech a ikel klekedellel a bedenged el kor a kmal mechitechut.” (1 Ko. 12:22) Me ngera mle belkul a tekingel? Ngua ngera uldesuel a Jehovah el bedul tirke el ua lemechitechut? Kede mekerang e mo  oba osengel a Jehovah el bedul a rudam er kid? E tia ngmekerang e mo uchul a klungioled?

3. Ngmekerang e sebechel el mo mekngit a uldesued el bedul a rudam er kid?

³ Ngar er a beluulechad er chelechang, e a rebetok el chad a ousbech a bderrir er tirke el kora ua lemechitechut me bo el sebechir el di melai a sorir er tir. Te oumerang el kmo a chad a mo ungil a klengar er ngii a lsekum ngdirk kekerei el chad e mesisiich a bedengel. Me tia el uldasu er a beluulechad a sebechel el mengesuseu a uldesued. Me ngsebeched el omuchel el mo mekngit a uldesued el bedul a rudam er kid el tir a blechoel el ousbech a ngeso. Me kede mekerang e mo ua uldesuel a Jehovah el bedul a rudam er kid?

4, 5. (a) A okesiu er a Paulus ngera ngochotii el kirel a osengel a Jehovah el bedul kid? (b) Ngmo uchul a ngera el klungioled sel dengesuterir a remechitechut?

⁴ A Jehovah a omes er a derta el chad er a chelsel a ongdibel el meklou a ultutelir. Me ngar er a 12 el bliongel er a kot el babilengel a Paulus el mo er a ongdibel er a Korinth, e ngomeklatk er kid el kmo ngmo lmuut er a kot el kekerei el klekedellel a bedengel a chad me ngklou a ultutelel. (Monguiu er a 1 Korinth 12:12, 18, 21-23.) A rebebil el oumerang el kmo kede mla er a mongkii el mei a millekoi el kmo a bebil el klekedellel a bedenged a diak a ultutelel. * El ua tiang, te ulemes er sel kekerei el cheldngelel a ochid el diak a ultutelel. Engdi a re scientist a mla metik el kmo sel kekerei el cheldngelel a ochid a rullii tia el cherrungel el bedengel a chad me ngsebechel el dechor el melemalt el diak lemuukel.

⁵ A okesiu er a Paulus el kirel a klekedellel a bedengel a chad a ochotii el kmo a rebek el chedal a ongdibel a meklou a ultutelir. Me alta e a Satan a kmal soal a bo domdasu el kmo ngdiak a ultuteled, engdi a Jehovah a “kmal ousbech” er a rokui el mesiungel el mo lmuut er tirke el mechitechut. (Job 4:18, 19) Me tiang a rullid el mo dmeu a rengud e le kede mo medengei el kmo kede dirrek el usbechall er a chelsel a ongdibel er kid me a cheldebechelel a Dios er a beluulechad el rokir. El ua tiang, ke locha mla ta el mngesuir a chudelang el chad. Me ngmlo ungil a rengul, engdi kau ngmlo ungil a rengum el dirrek? Ochoi. Sel dolengeseu er a rebebil e ngmo dmeu a rengud, e mekurulii a kllourreng er kid, e mengal mo betik a rengud er a rudam er kid, e dirrek el lmuut el mo ungil el Kristiano. (Efe. 4:15, 16) A Jehovah a kmal soal a bo domes er a rudam me a rudos er kid el meklou a ultutelir alta e te kora ua lemechitechut. Sel bo leuaisei a osenged el bedul tir e ngmo diak dongerechir er tir er a diak el sebechir el meruul, e a ongdibel a mukeroul a bltikerreng er a chelsel.

6. Ngmilekerang a Paulus er a lousbech a tekoi el “chelitechut” me a “mechitechut”?

⁶ A Paulus a uluusbech a tekoi el “chelitechut” me a “mechitechut” er sera losaod el kirir a rebebil el mla er a chelsel a ongdibel, e le rebebil el dimlak loumerang a ulemes er a Rekristiano el ua lemechitechut. Engdi a tekingel a Paulus a dimlak lebelkul a kmo a rebebil el Kristiano a kuk ungil er a rebebil. A lebebil er a taem e ngdi ngii el omekedong er ngii el kmo ngmechitechut. (1 Ko. 1:26, 27; 2:3) Me sel taem er a lousbech er a tekoi el “mesisiich” el mesaod er a rebebil el Kristiano, e a belkul a tekingel a dimlak lolekoi el kmo te kuk mle ungil er a rebebil. (Rom 15:1) Ngbai milsaod el kmo tirke el mla chobangel a betok el tekoi a kirir el mo oba kllourreng el bedul tirke el dirk kesai a klemedengei er tir.

7. Ngera uchul me ngdiak lebeot el tekoi a dolengeseu er tirke el ousbech a ngeso?

⁷ A Jehovah a olengeseu er a remechitechut e dirrek el kmal dmeu a rengul sel doruul er a osisiu el tekoi. (Psa. 41:1; Efe. 5:1) Engdi tiang a diak lebeot el tekoi. E ngera uchul? Alta e kede omdasu  el kmo a chad a ngerechelel el di ngii el mesmechokl a mondai er ngii. Me a lechub e kede mengeroid er kid er ngii e le ngdiak dodengei el kmo kede dmu kmo ngerang. El ua tiang, ka molatk er a tekoi el dilubech el mo er a odos er kid el Cynthia. * Ngkmal mlo ousbech a ngeso er sel taem el bechil a chilitii e merael. Ngdilu el kmo: “Ngkmal mo meringel a lsekum a rudam er kau a mengeroid er tir er kau me a lechub e ngdiak lengesukau el ua kmeed el sechelim. Sel bo mchelebangel a ringel e ngmo soam a resechelim a lekeed er kau.” A King el David a kmal mlo chuarm er sel taem el resechelil a milengeroid er tir er ngii.​—Psa. 31:12.

8. Ngera sebechel el ngosukid el mo oba klemedengei el bedul a rudam er kid?

⁸ Ngera sebechel el ngosukid el mo oba klemedengei el bedul a rudam er kid el ousbech a ngeso? Lak mobes el kmo a rebetok er tir a chuarm el kirel a secherir me a lechub e ngringelel a uldasu me a lechub e te kiei el teloi er a rediak loumerang el chederir. Oleko kede chelebangel a osisiu el tekoi e ngulterekokl el soad a rechad a bo lolechesuar a blekeradel el dechelebangel er ngii. Ka molatk er a rechad er a Israel. Te kmal chilarm er a betok el ringel er a beluu er a Ekipten, engdi uchei er a bo lesiseb er a Beluu er a Nglat e a Jehovah a ulemeklatk er tir el kmo ngkirir el kerekikl me lak bo lolechib a mederir er tirke el ousbech a ngeso. Ngmilengerechir er a rechad er a Israel el mo olengeseu er tirke el mechitechut me a remechebuul.​—Lev. 25:35-38; Dut. 15:7, 11.

9. Ngera ngousbech er ngii a odam er kid el mechitechetong a rengul? Momekesiu.

⁹ Ngdiak el kired el mereched el mo oltelechakl er a rudam er kid el kirel a mondai er tir me a lechub e bo domdasu el kmo kede kuk ungil er tir. Ngbai soad el olengeseu er a rudam er kid sel lousbech a ngeso. (Job 33:6, 7; Mt. 7:1) El ua tiang, oleko a chad a ngar er a chotobai e accident el metemall me te nguu el mo er a osbitar, e a re nurs me a re toktang te mo mechesang el oker el kmo ngtecha ngike el uchul a accident? Ngdiak, te bai omuchel el omkar er ngika el telemall el chad. Me tiang a di osisiu el blekeradel el kired. Sel taem el odam er kid a mo mechitechut a rengul e ngkmal kired el mereched el mo melisiich er ngii.​—Monguiu er a 1 Thesalonika 5:14.

10. Ngoeak a ngera el rolel e a rebebil a “mesisiich el oumerang” alta e kede omdasu el kmo te mechitechut?

¹⁰ Te ngar er ngii a rebebil el rudam me a rudos er kid el domes er tir e ngua lekora mechitechut. Engdi sel bo dekerekikl el omtab a blekerdelel a klengar er tir e kede locha mo medengei el kmo ngkmal diak lemechitechut. Ka di molatk er a ringelel a klengar er a odos el bechil a diak losiou er a Jehovah. E kuk mekerang a chedil el di mesobil e kmal blak a rengul el omekeroul er a rengelekel e dirk melemolem el blak a rengul el mei er a miting? Me a lechub a rengeasek el tir a bek el sils el oltngakl a orimel er a skuul el sebechel el mo uchul e te mo cheroid er a klemerang. Tirka el rokui a mera el betik a rengrir er a Jehovah e mla tibir el mo melemolem el blak a rengrir el mo er ngii. Me sel dolatk aika el tekoi el lechelebangel, e tiang a ngosukid el mo omes er tir el “mesisiich el oumerang” alta e kede omdasu el kmo te mechitechut.​—Jak. 2:5.

11, 12. (a) Ngera sebechel el ngosukid el mo omes a tekoi el ua Jehovah er sel taem el leruul a cheleuid a rudam er kid? (b) Ngera uchul me a Jehovah a uluusubes er a Aron? E ngera kede suubii er tia el tekoi?

¹¹ Ngkired el mo omes er a rudam er kid el ua osengel a Jehovah el mo lmuut er aike el taem el lebo leruul a cheleuid. Ngar er ngii a kerebai er a Biblia el sebechel el ngosukid el mo omes a tekoi el ua Jehovah. (Monguiu er a Psalm 130:3.) El ua tiang, nglocha mo ua ngerang a uldesuem el bedul a Aron oleko ke ulebengkel a Moses er sel taem er a lorrenges er ngii el di mesosaod a betok el leko nguchul me ngmlo meruul er a kolt el ngelekel a kerbou? (Exo. 32:21-24) E kuk mo ua ngerang a uldesuem er sel taem el Aron a mlo orrenges a tekingel a Miriam e mlo melaes er a Moses e le ngii el mlo bechil a redil er a ngodech el beluu? (Ule. 12:1, 2) E mo ua ngerang a uldesuem er  sel taem el Aron me a Moses a dimlak lekebkellii a Jehovah er sera lotobed a ralm er a risois?​—Ule. 20:10-13.

¹² A Jehovah a mle sebechel el mereched el melsii a Aron el kirel aike el cheleuid el tekoi el leriruul. Engdi ngmle medengei el kmo alta e a Aron a mlo mechitechut a lebebil er a taem, engdi ngdimlak lemekngit el chad. Ngriruul a cheleuid e le ngii el mle chelebangel er a meringel el blekeradel e dirrek el mlo orrenges a tekingir a remekngit a omerellir el chad. Engdi ngii el Aron a mlo melechesuar a cheleuid el omerellel e kilengei el nguu a uleklatk er a Jehovah. (Exo. 32:26; Ule. 12:11; 20:23-27) A Aron a kmal mle betik a rengul er a Jehovah e dirrek el uluuchel er a rengul er a kngtil e ulebult, me a Jehovah a uluusubes er ngii. Sei a uchul me a betok el rak er a uriul e a rechad a dirk melatk el kmo a Aron me a telungalek er ngii a mle blak a rengrir el mesiou er a Jehovah.​—Psa. 115:10-12; 135:19, 20. *

13. Kede mekerang e mo sebeched el ngodechii a rolel a domdasu a tekoi? Ka mosaod.

¹³ A odam er kau a di ua Aron el mo remuul a cheleuid el tekoi. Me ngmo ua ngerang a uldesuem el bedul ngii sel bo leuaisei? Ngkirem el mo ngodechii a uldesuem? (1 Sa. 16:7) El ua tiang, ka molatk er a ngeasek el kora mekngit a blekerdelel. Nglocha diak lungil melilt a tekoi er a ongelaod el loruul. Lak di mereched el mo omdasu el kmo ngmekngit a omerellel el ngalek, e bai molatk el kmo ngmekerang e mo sebechem el ngosuir. Mchoit a temem el olisechakl er ngii el mo oba llomeserreng sel lolilt a tekoi el loruul. Sel molengeseu er a rudam er kau el okiu tiaikid el rolel e ngmekurulii a kllourreng er kau el bedul tir e mengal mukeroul a bltkil a rengum el mo er tir.

14, 15. (a) Ngmle ua ngerang a uldesuel a Jehovah el bedul a Elias er sera bo lemedakt? (b) Ngera kede suubii er sel rolel a Jehovah er a lolengeseu er a Elias?

¹⁴ Ngua ngerang a uldesuel a Jehovah el bedul tirke el chormang a uldesuir? Me bo dosaod er a  rolel e ngilsuir a ta er a remesiungel el mle chuarm a rengul. A Elias a ngike el profet er a Jehovah el mle bekeu el omtok er tirke el 450 el profet er a Baal. Engdi sel taem er a bo lodengei el kmo a Kuin el Jesebel a mle soal el omekoad er ngii, e ngkmal mlo medakt me ngchiliis el 95 el mael el mo er a Beerseba e liluut el mo cheroid el mlo er a belngel a ked. Ngkmal mlo mechitechut a bedengel e chuarm a uldesuel me ngmlo oureng el mad.​—1 Ki. 18:19; 19:1-4.

¹⁵ Ngmilekerang a Jehovah er sera lesang a Elias el kmal medektang e chormang a uldesuel? Ngultngeklii a Elias? Ngdimlak, ngbai ulderchii a anghel el mo olengeseu er ngii. Me ngmle eru el taem el lomsang a kelel a Elias me bo lemesisiich a bedengel e lolemolem er a omerollel. (Monguiu er a 1 King 19:5-8.) Me a Jehovah er a uchei er a lomsang a Elias a ulekrael e ngulemuchel el rongesii e sola e milsang a ngeso el lousbech.

16, 17. Kede mekerang e mo ua omerellel a Jehovah sel dolengeseu er a rudam er kid?

¹⁶ Kede mekerang e ngosuir a odam er kid el ua omerellel a Jehovah er a lolengeseu er a Elias? Lak di mereched el mesaod er a tekoi el kirel el meruul er ngii. (Osi. 18:13) E le sel taem el lecharm a uldesuel e lomdasu el kmo ngdiak a ultutelel el chad e ngungil a domuchel el orrenges er ngii e dochotii el kmo ngbetik a rengud er ngii. (1 Ko. 12:23) Seikid e ngsebeched el mo medengei el kmo ngera ngousbech er ngii me ngmo sebeched el ngosuir.

¹⁷ Ka di molatk er a tekoi el dilubech el mo er a Cynthia. A bechil a chilitii e merael me ngii me a rengelekel a mlo cheloit el ua lak a chad el omekerreu er tir. Me te milekerang a rebebil el mla er a ongdibel a lolengeseu er tir? A Cynthia a dmu el kmo: “Ngdi mle chelsel a 45 el bung e te ngar er a blimam. Te di lilangel, e ulebengkemam er a chelsel aike el eru el mo er a edei el klebesei.” Ngii me a rengelekel a dul kmal mle mekngit a rengrir e mesaul a bedengir. Me a rebebil er a rechad er a ongdibel a milengemedaol er tir el mo kiei el obengterir el telkib el taem e ulemeka er tir. Tia el tekoi el dilubech a omeklatk er kid er a tekoi el losaod a Biblia el ngar er a babier er a Jakobus el kmo: “Chomko ng ngar ngii a re bebil er kid el ousbech a bail e diak a kelir, e ng ngera ng mo rullii er tir cho mdu el kmo, ‘A Dios lomekngeltengat er kemiu! Bo lak mekerasem e bo mungil el omengur!’, a lak besterir a ikel lesal ousbech? Ma doumerang er a Dios me ng ua isei; a di doumerang e lak omeruul el obengkel, e ng di ua lak doumerang.” (Jak. 2:15-17) Me a rolel a ngeso el lurruul a rudam me a rudos el mo er a Cynthia me a rengelekel a kmal luluusbech er ngii. Me ngdi mle chelsel a elolem el buil e te mlo sebechir el mo auxiliary pioneer.​—2 Ko. 12:10.

18, 19. (a) Kede mekerang a dolengeseu er tirke el mechitechut? (b) Ngmo klungiolel techang sel dengesuterir tirke el mechitechut?

¹⁸ Sel bo desecher er a meringel el rakt e kede ousbech er a klou el taem el mo mesisiich a bedenged. Me a lsekum a odam er kid a rullii a cheleuid me a lechub e ngmo mechitechut a rengul e le ngchelebangel a meringel el tekoi, e ngdirrek el ousbech er a klou el taem el mo mesmechokl er a uldesuel. Ngkirel el mesuub er a Tekingel a Dios, e meluluuch el mo er a Jehovah, e dirrek el kirel el ngar er a miting me bo el sebechel el melisiich er ngii. Engdi ngdirrek el ousbech a ngeso er kid. Me ngar tiaikid el taem el lolasem el mo mesisiich e ngkired el mo oba kllourreng el bedul ngii. Ngerecheled el ochotii el mo er ngii el kmo ngbetik a rengud er ngii, e ngii a dirrek el klou a ultutelel el chedal a ongdibel.​—2 Ko. 8:8.

¹⁹ Sel dolengeseu er a rechad e ngmo dmeu a rengud. Ngdirrek el lmuut el mo klou a rengud e mo sebeched el melechesuar a blekeradel el lechelebangel er ngii a rechad. Engdi ngdiak di bo luchul a klungioled el di kid el tang. A ongdibel el rokir a lmuut el mo klou a bltikerreng er a chelsel. E a ngaruchei, sel ‘dolengeseu er a re mechitechut’ e kede ochotii el kmo ngsoad el meruul a tekoi el ua Jehovah. Ngika el betik a rengul el Demad a omes er a rokui el chad el mekreos.​—Rel. 20:35.