1. Ngera el tekoi a klou a ultutelel el kirel a omengull er kid?

 NGAR er a betok el beluu, e ngsebeched el mesang a ngklel a Dios el Jehovah el llechukl er a betok el meklou el blai me a klalo el ngar er a museum. Me a lsekum ke mla mesa tia el ngakl el ngar er aika el basio e ngulterekokl el mlo ungil a rengum. Me kid el Sioning er a Jehovah a omes er a ngklel el klou a ultutelel el kirel a omengull er kid. Ngdiak a ngii di el cheldebechel el uai kid el blechoel el ousbech er tia el ngakl. Engdi a usbeched er a ngklel a diak di el seikid e lungiang. Kid el Sioning er Ngii a uchul me ngkirel a omerelled el mo mengebkall er Ngii.

2. Ngera el ngerachel a dobang e le kid el olecholt er a ngklel a Dios?

² A lsekum ngsoad el nguu a kengei er a Dios, e ngdiak di el usbeched er a ngklel a kired el meruul er ngii e lemerekong. Ngdirrek el kired el ‘obult el mo cheroid er a mekngit.’ (Psa. 34:14) A Paulus a liluut el meketeklii tia el tekoi er a ledu el kmo: “Tirkel rokui el omekedong er a ngklel a Rubak bo longeroid er tir er a klengit.” (Monguiu er a 2 Timothy 2:19.) Me kid el chedal a Jehovah, kede mekerang e ‘mengeroid er kid er a klengit’?

3, 4. Ngmeringel er a rebebil el mo medengei a belkul a ngera el tekoi, e ngera uchul?

³ Ngar er a 2 Timothy 2:19, e a Paulus a milsaod el kirel a “mesisiich el omekedecheraol el bla luchetemii a Dios.” E ngar er ngii a eru el tekoi el llechukl er tia el omekedecheraol. A kot el tekoi el kmo, “A Rubak a medengelterir a re chedal,” a mengai er a bades er a Ulecherangel 16:⁠5. (Momes er sel uleakuchei el suobel.) Engdi ngkuk mekerang sel ongeru el tekoi el kmo, “Tirkel rokui el omekedong er a ngklel a Rubak bo longeroid er tir er a klengit”? A rebebil a meringel er tir el mo medengei a belkul aika el tekoi. E ngera uchul?

⁴ E le tekingel a Paulus a ua lomelekl a tekoi el medung er a ta er aike el Bades el tekoi er a Hebru. Engdi ngkora diak a ta er aika el bades el melekoi a osisiu el tekoi el ledillii a Paulus. Me sera ledu el kmo: “Tirkel rokui el omekedong er a ngklel a Rubak bo longeroid er tir er a klengit,” e ngerang milsaod er ngii? Sel kot el tekingel a milengai er a 16 el bliongel er a Ulecherangel, el milsaod el kirel a ultekengel a Kora. Me a ongeru el tekingel, ngdirrek el mesaod er a osisiu el tekoi?

5-7. Ngera el tekoi el dilubech er a taem er a Moses a lulsaod a Paulus el ngar er a 2 Timothy 2:19? (Momes er a siasing er a uchelel a suobel.)

⁵ A Dathan me a Abiram a mlo obengkel a Kora el ua lemengeteklir tirke el omtok er a Moses me a Aron. (Ule. 16:1-5) Ngdimlak lolecholt a omengull er tir el mo er a Moses e dimlak lomekerreu er sel ngerachel el Dios a mla oterekeklii er ngii. Te mlo uchul a kdekudel el tekoi e le tir el dirk kiliei el teloi er a rechad er a Israel. Me a Jehovah er a uchei er a lomeketakl el kmo te rua techang a chedal, e ngdillii a ta el tekoi.

⁶ A Biblia a kmo: “Ma RUBAK a dilu er a Moses el kmo, ‘Mdu er a re bek el chad me bo le cheroid er sel le ngar ngii a Kora, ma Dathan, ma Abiram.’ E sola ma Moses a mlor a Dathan, ma Abiram, ma re mechuodel er a Israel a ulekiuellel. Me ng dilu er a re chad el kmo, ‘Ak ulengit er kemiu me bo mcheroid er a tento er tirkal dengerenger el chad, e kele morutech a kloklir, e kom mol mo obengterir el obals el kirel a kngterir.’ Me te mlo cheroid er a tento er a Kora, ma tento er a Dathan, ma tento er a Abiram.” (Ule. 16:23-27) E sola e a Jehovah a ulekngemedeterir tirke el rokui el ulemtok. Engdi tirke el mle blak a rengrir el mo er a Dios a silobel. E ngera uchul? E le te ‘milengeroid er tir er a klengit’ el okiu sera lengeseklterir el mo cheroid er tirke el ulemtok.

⁷ Ngar er a 2 Timothy 2:19, e a tekingel a Paulus el kmo: “A Rubak a medengelterir a re chedal,” a mlengai er a bades er a Ulecherangel 16:5. E sera ledu el kmo, “Tirkel rokui el omekedong er a ngklel a Rubak bo longeroid er tir er a klengit,” e nglocha milsaod el kirel aike el tekoi el dilubech el llechukl er a Ulecherangel 16:5, 23-27. Me ngsebeched el oumerang el kmo, aika el eru el tekingel a dul mesaod er a osisiu el tekoi el dilubech. E ngera kede suubii er aika el tekoi? A Jehovah a sebechel el menguiu a reng. Me ngungil el medengei el kmo te rua techang a blak a rengrir el chedal e mengerechir er tir el mo mengeroid er tir er a remekngit.

8. Me alta ngkired el ousbech er a ngklel a Dios e mo chedal a ongdibel, engdi ngerang a dirrek el kired el meruul er ngii?

⁸ A Paulus a uluusbech a tekoi el dilubech er a taem er a Moses el omeklatk er a Timothy el kmo ngkirel el omekerreu er a deleuill er ngii me a Jehovah. A Rekristiano a mle kirir el meruul a betok el diak di el sel bo el chedal a ongdibel e lemerekong, el di ua reblak a rengrir el mesiungel a Dios er a taem er a Moses el dimlak el sebechir el di ousbech er a ngklel a Jehovah e lungiang. A rokui el blak a rengrir el mesiungel a Dios a kirir el mengeroid er tir er a klengit. Me ngmle kirel a Timothy el mekerang?  E ngera kede suubii er a uleklatk el ledillii a Paulus?

9. A “chelsengsang el diak a belkul el klaititekangel” ngmlo uchul a ngerang er a chelsel a ongdibel er a rekot el Kristiano?

⁹ Ngar er a babilengel a Paulus el mo er a Timothy, e ngmilsang a kmal ungil el ulekrael el kirel a rolel e ngmo sebechel el mengeroid er ngii er a klengit. El ua tiang, ngdilu er ngii el kmo, “lak mongaititekangel a tekoi,” e “mongeroid er kau er a chelsengsang el omengaititekangel.” (Monguiu er a 2 Timothy 2:14, 16, 23.) Me aika el tekoi ngera belkul? A rebebil el mla er a chelsel a ongdibel a ulemerk a klsuul el osisechakl. Me a rekuk bebil a ulsisechakl a tekoi el mlo uchul a klaititekangel. Me alta e a bebil er aika el tekoi el lulsaod a dimlak lomtok a osisecheklel a Biblia, engdi ngmle sebechel el tomellii a kltarreng er a chelsel a ongdibel. Sei a uchul me a Paulus a dilu er a Timothy el kmo: “Lak mongesechusem er kau er a chelsengsang el diak a belkul el klaititekangel.”

10. Ngkired el mo mekerang sel derenges a uldesuir tirke el omtok a mera el osisechakl?

¹⁰ Chelecha el taem e ngdiak leblechoel el mo er ngii a rechad el ngar er a chelsel a ongdibel el omtok a mera el osisechakl. Me nguaisei, engdi kede locha dirk mo remenges a uldasu el omtok a osisecheklel a Biblia. Me a ngii di el rolel e kede remenges aika el klsuul el osisechakl me kid a di kired el mo mesisiich el oltngakl el rokui. Ngdiak luchul a llomeserreng el bo dongedecheduch er tirke el omtok a mera el osisechakl me a lechub e dongedecheduch er tir el okiu a Internet me a lmuut el bebil er a rolel. Me alta ngsoad el olengeseu er tir, engdi a bo dongedecheduch er tir me kid a di mo omtok a llechul a Dios, el Ngii a kmal mengelechel er kid el mo oltngakl e mengeroid er kid er tirke el omtok a mera el osisechakl.

11. Ngera sebechel el mo uchul a klekakeakl er a chelsel a ongdibel, e te mekerang a remechuodel e mo ungil el ocholt?

¹¹ Ngdirrek el ngar er ngii a lmuut el bebil er a tekoi el sebechel el tomellii a budech er a chelsel a ongdibel, el diak di el uldesuir tirke el omtok a mera el osisechakl. El ua tiang, ngkakerous a uldesuir a Rekristiano el kirel a tekoi er a ongelaod el sebechir el meruul me a lechub e ngdiak. Me a lsekum kede mo orrimel er a rechad el mo kongei er a uldesued e ngsebechel el mo uchul a “chelsengsang el diak a belkul el klaititekangel.” Engdi ngkuk ua ngerang a lsekum a chedal a ongdibel a melisiich a tekoi er a ongelaod el omtok a llechul a Jehovah? Sel bo leuaisei, e ngdiak lebelkul a kmo a remechuodel a omechei er tia el tekoi me ngmelemolem e le tir el chetirir el omuchel a mondai. (Osi. 6:16-19; Efe. 5:3-5) Engdi a remechuodel a kerekikl me lak lolisiich a di uldesuir. Te bai oltirakl er a uleklatk er a Biblia el kmo: “Momekerreu er a delebechel el sib er a Dios el mla moterekokl er kemiu, . . . Lak molasem el oumerreder er kemiu er tirkel mla moterekokl er kemiu el kiriu el omekerreu er tir, e bai bo mungil el ocholt el mor a delebechel el sib.”​—1 Pe. 5:2, 3; monguiu er a 2 Korinth 1:24.

12, 13. (a) Te mekerang a Resioning er a Jehovah e melilt a tekoi er a ongelaod el loruul? E ngera el omellach er a Biblia a mesaod el kirel tia el tekoi? (b) Kede mekerang e ousbech a omellach er a Biblia el losaod a parakurab 12 er sel taem el dolilt el kirel a kuk bebil er a tekoi?

¹² A cheldebecheled a diak lorriter a mubi, me a video game, me a babier me a chelitakl, e losubed el kmo ngera er ngii a mekngit. E ngera uchul? E le Biblia a mengelechel er a rederta er kid el mo omeksau a ukltked me bo el sebeched el “tiriter a ungil ma mekngit.” (Heb. 5:14) Me a omellach er a Biblia a sebechel el ngosukid el mo ungil el melilt a tekoi er a ongelaod. E sel dolilt a tekoi, e ngkired el mo blechoel el melatk el kmo “ngeral tekoi odeuir a rengul a Rubak.” (Efe. 5:10) A Biblia a dirrek el oterekeklii el kmo a bdelul a delengchokl a ngar er ngii a llemeltel el melilt a tekoi er a ongelaod el me soiseb er a chelsel a blil.​—1 Ko. 11:3; Efe. 6:1-4.

¹³ A omellach er a Biblia el dirk dulsaod a dirrek el sebechel el ngosukid sel doruul a omelilt  er kid el kirel a kuk bebil er a tekoi. El ua tiang, ngkakerous a uldesued el kirel a rolel a doubail, omengetmekled, kall me a klisichel a bedenged, me a lmuut el bebil. Me a lsekum a chad a mo orrimel er a rebebil el mo oltirakl a uldesuel el kirel aika el tekoi, e ngsebechel el mo uchul a klaititekangel. Engdi a lsekum a omelilt er a chad a diak lolemall a omellach er a Biblia, e ngdiak a belkul a dongaititekangel el kirel ngii el tekoi. A Biblia a kmo: “A mesiungel a Rubak a diak le kirel toketok. Ng bai ungil er a re bek el chad.”​—2 Ti. 2:24.

14. Ngera el okesiu a luluusbech er ngii a Paulus er a losaod el kirel a mekngit el klausechelei?

¹⁴ Me kid el mesiungel a Dios, ngera lmuut el ta er a rolel e ngsebeched el ‘mengeroid er kid er a klengit’? Ngkired el mengeroid er kid er a mekngit el klausechelei. Ngera el okesiu a luluusbech er ngii a Paulus er a losaod el kirel tia el tekoi? Uriul er a losaod er a “mesisiich el omekedecheraol el bla luchetemii a Dios,” e ngmilluches el kirel a “klou el blai.” Me ngar er a chelsel tia el blai e ngdiak di le ngar ngii er ngii a buk me a lechub e ng “blil a klalo el rruul er a kolt ma lechub a silber e le merekong, ng dirrek el ngar ngii er ngii a rruul er a kerrekar ma rruul er a chutem, e a bebil a kirel a ileakl el mechesang e a bebil a kirel a tekoi er a bek el sils.” (2 Ti. 2:20, 21) E sola e a Paulus a milengelechel er a Rekristiano el mo omekiai er tir er aike el “blil a klalo” el sebechel el mengidokel er tir.

15, 16. Ngera kede suubii er a okesiu el kirel a “klou el blai”?

¹⁵ Me ngera belkul tia el okesiu er a Paulus? A “klou el blai” a omtechei er a ongdibel er a Rekristiano. Me aike el “blil a klalo” el ngar er tia el blai a omtechei er a rederta el chedal a ongdibel. Me a lsekum a blil a klalo a mo kikiongel e ngsebechel el mo uchul a telemellir a rebebil. Me seikid e a chad el oublai er a blai a mo kirel el imakl aika el dechudech el klalo er aike el beches, el ileakl el ua aike el klalo el lousbech el meruul a kall.

¹⁶ Me ngdi osisiu el kirir a remesiungel a Dios er chelechang. A lsoad a bo leklikiid a klengar er kid, e ngkired el mengeroid er kid er a rechad  el ngar er a chelsel a ongdibel el tir a di melemolem el melemall a omellach er a Biblia. (Monguiu er a 1 Korinth 15:33.) Me a lsekum ngkired el mengeroid er kid er a mekngit el klausechelei er a chelsel a ongdibel, e ngbleketakl el kmo ngdiak el kired el omak a kmes el deleuill er kid el obengterir a rechad er a ikrel a ongdibel. Nguaisei, e le rebetok er tir a di sorir a udoud, e diak lorrenges a tekingir a redemerir me a rederrir, e mekngit a omerellir el mo er a rechad, e oltuub, e sorir el omekcharm er a rechad, e ouketui a ungil tekoi, e cheblad, e kuk sorir a tametereng el ngar uchei er a Dios.​—2 Ti. 3:1-5.

17. Te milekerang a reblak a rengrir el chad er a Israel e ochotii el kmo te ‘milengeroid er tir er a klengit’?

¹⁷ Me a Jehovah er sera ledu er a rechad “me bo le cheroid er sel le ngar ngii a Kora, ma Dathan, ma Abiram,” e tirke el blak a rengrir el chad er a Israel a “di mle mereched el mo cheroid er a tento” er tir. (Ule. 16:24, 27, NW) Ngdimlak lomekioud er tir me a lechub e te ulemai er a rengrir el mo meruul er tia el tekoi. Te bai mle sorir el olengesenges er a Jehovah el oba rengrir el rokir. Me a omerellir a ulechotii el kmo te ullab el mo er a Jehovah e milengeroid er tir er a klengit. Me ngera kede suubii er a omerellir?

18. Ngera belkul a tekingel a Paulus el mo er a Timothy el kmo, “mongeroid er kau er a ngibeserreng er a klengeasek”?

¹⁸ Kede omes er a deleuill er kid me a Jehovah el kmal mekreos. Me ngkired el blechoel el mereched el omekerreu er ngii. Tiaikid a belkul a tekingel a Paulus el mo er a Timothy el kmo, “mongeroid er kau er a ngibeserreng er a klengeasek.” (2 Ti. 2:22) Sel taem e a Timothy a locha mle 30 me a derengel a rekil. Engdi a remeklou el chad me ngdirrek el sebechir el mekesuseu er a “ngibeserreng er a klengeasek.” Me sera bo lechelebangel a chouaika el tekoi ngmle kirel a Timothy el ‘mengeroid er ngii’ er a klengit. A Jesus a dillii a kmeed el osisiu el tekoi el kmo: “Ma lsekum a medam a rullau el mo ruebet er a klengit, e bechetir el choitii!” (Mt. 18:9) Me a Rekristiano el sorir el olengesenges aika el ulekrael a kirir el mo ulterekokl a rengrir e di mereched el mengeroid er tir er a ngii di el tekoi el sebechel el tomellii a deleuill er tir me a Dios.

19. Te mekerang a rebebil el Kristiano e omekerreu er a deleuill er tir me a Jehovah?

¹⁹ Te mekerang a rebebil el Kristiano e omekerreu er a deleuill er tir me a Jehovah? A rebebil el mle mesisiich el melim a rrom er a uchei a mla tibir er a rengrir el diak el lluut el mo melim a rrom. Me a rekuk bebil el ngar er ngii a ileakl el chelitecheterir a mengeroid er tir er a tekoi er a ongelaod el sebechel el mengesuseu er tir. (Psa. 101:3) El ua tiang, a ta el chad er a uchei er a bo el Sioning e ngkmal mle soal el teloi a omilil el ngar er ngii a omeloik el di melisiich a tekoi er a deleboes. Me sera bo lodengelii a klemerang e ngtilbir el diak el lluut el mo meloik, el mo lmuut er sel leteloi er aike el omililir a Resioning. Ngkmal chetil el lmuut el mo mekngit a uldesuel. Me tiang a diak lebelkul a kmo a rokui el Kristiano a kirir el mengeroid er tir er a omelim el rrom, omeloik me a lmuut el bebil er a tekoi el diak el mekngit. Me nguaisei, engdi kid el rokui a kired el mo kerekikl me lak detemellii a deleuill er kid me a Jehovah.

20. Ngera el tekoi a mengelaod er kid alta ngdiak el beot er kid el ‘mengeroid er kid er a klengit’?

²⁰ Ngkmal ileakl a techall el dobang el mo okedongall el Sioning er a Jehovah. Engdi tia el techall a mei el obengkel a ngerachel. Ngkired el ‘mengeroid er kid er a klengit’ e ‘obult el mo cheroid er a mekngit.’ (Psa. 34:14) E tiang a diak lebeot el tekoi. Engdi ngkmal mechelaod a rengud e le kede medengei el kmo a Jehovah a di blechoel el betik a rengul er a “re chedal” el tir a olengesenges er ngii.​—2 Ti. 2:19; monguiu er a 2 Kronika 16:9a.