A KATHERINE a mlukeroul er a beluu er a Merikel, e sera bo el 16 a rekil e ngmiltecholb el ta er a Resioning er a Jehovah. Ngkmal mle blak a rengul er a omesiungel engdi ngdimlak lebetik er a chad el semeriar er a klumech er a Renged er a belual. Ngdmu el kmo: “Ak milenguiu a tekoi el dilubech el mo er a rechad el milluluuch el mo er a Dios me lodureklii a chad el mo ngosuterir el mo medengelii. Me ak mle blechoel el oureng el ulekum e ak metik er a chad el uaisei, engdi ngdimlak kbetik er ngii.”

Me a uriul er a lomerk er a klumech el betok el rak er a osisiu el basio, e a Katherine a mlo melatk el melukl el mo er a ta er a basio el rechad er ngii a semeriar el orrenges er a klumech er a Renged. Engdi ngmillatk el kmo kele letelkib el mo meringel er ngii el meruul er tia el tekoi. E le ngmla er ngii a di ta el taem er a chelsel a klengar er ngii el blo lecheroid er a rechad er a blil, e a chelsel aike el eru el sandei el lecheroid er a rechad er a blil e ngkmal di uluureng er tir. Engdi sel urungulel el mle soal el mo melechesuar a deurreng el olengeseu er tirke el osiik er a Jehovah a kmal mlo mesisiich me ngmlo merriter a bebil el basio el mle sebechel el melukl el mo er ngii. Me ngmilluches el mo er a branch er a Guam e ngilai a ulekrael el luluusbech. Me ngar er a July 2007, e a 26 a rekil el Katherine a millukl el mo er a Saibal, el ta er a iungs el ngar er a Pacific Ocean, el ngii a bekord el 6,000 el mael a cherridel er a belual. Me ngmlo ua ngerang tia el omelukl er ngii?

Telkib el taem er a lemei er tia el beches el ongdibel er ngii e a Katherine a miltik er a Doris el 40 me a derengel a rekil el kilengei el mo mesuub er a Biblia el obengkel. A uriul er a lesuub aike el kot el edei el bliongel er a Biblia Olisechakl el babier e ngtelkib el mlo suebek a rengul a Katherine. Ngdilu el kmo: “A Doris a kmal mle ungil el mesuub me ngdimlak el soak el rullii el mo diak el soal el mesuub. Ngak a dirkak a ta el kusuub el obengkel a chad el meketeket, me ak ulemdasu el kmo a Doris a kirel el mesuub el obengkel a odos el klou a klemedengei er ngii. Nglocha ousbech er a chad el ua rekil.” Me ngmilluluuch el olengit er a Jehovah me lesikii a odos el sebechel el mo mesuub el obengkel a Doris. Me ngmillatk el mo ouchais er a Doris el kmo ngmo ngodech a chad el mesuub el obengkel.

A Katherine a dmu el kmo: “Me a uchei er a kumuchel el ouchais er ngii er tia el tekoi, e a Doris a uluuchais er ngak el kmo ngsoal el mengedecheduch er ngak el kirel a mondai el lechelebangel er ngii. Me ak ulerrenges er ngii el mlo merek e uluuchais er ngii er a rolel e a Jehovah a ngilsukak er sera kchelebangel er a osisiu el mondai. Me nguluureng a sulek.” E sola e a Doris a uluuchais er a Katherine el kmo: “A Jehovah a mera el ousbech er kau el olengeseu er ngak. E le sel taem er a omkot el me duum er a blik e ngmla mo betok el sikang el kunguiu er a Biblia er ngak. Ak lilangel el olengit er a Dios me lodureklii a  chad el me ngosukak el mo ungil el medengelii a Biblia. E sola e kau a me melngod er a chesmerel a blik. Me a Jehovah a ulenger er a nglunguchek!” Ngmo delelualu a chiuosech er a medal a Katherine sel louchais er tia el tekoi. Ngdmu el kmo: “A tekingel a Doris a mera el ulenger er a nglunguchek. Me a Jehovah a ulechotii el kmo ngdirk sebechek el mesuub el obengkel.”

A Doris a mlo metecholb er a rak er a 2010, e chelechang e ngmesuub a Biblia el obengterir a rebebil. A Katherine a dmu el kmo: “Ngkmal imis el ungil a renguk e le tia el urungulek er a kemanget el taem el soak el ngosuir a melemalt a rengul el chad el mo mesiungel a Jehovah a mlo tekoi!” Me chelecha el taem e a Katherine a dmeu a rengul el mesiou el special pioneer er a beluu er a Kosrae el iungs er a Pacific.

Te betok er a dart el rudam me a rudos er kid er a ngodech el beluu el ngar er a 19 el mo er a 79 a rekrir a mlei el me olengeseu aike el beluu er a Micronesia. A Erica el mle 19 a rekil e millukl el mo er a Guam er a rak er a 2006, a kmal ungil el smodii a uldesuel el di ua uldesuir tirka el blak a rengrir el chad. Ngdmu el kmo: “Ngkmal ungil el tekoi sel de pioneer er a chelsel a beluu el rechad er ngii a semeriar er a klemerang. Ak kmal mereng a sulel a Jehovah el ngilsukak el mo teloi er tia el rolel a omesiou, e le tiang a kot el ungil el rolel a klengar!” Me chelecha el taem e a Erica a dmeu a rengul el mesiou el special pioneer er a Ebeye el ngar er a beluu er a Marshall. Me nguaisei, engdi ngdiak lebeot el tekoi a dosiou er a chelsel a beluu el ngii a diak el beluad. Me bo dosaod a edei el meringel el tekoi e desa sel rolel e ngmle sebechir a rebebil el millukl el mo er a Micronesia el outekangel.

Rolel a klengar. A Simon a mle 22 a rekil er a lolukl el mo kiei er a iungs er a Belau er a rak er a 2007, e mlo metik er ngii el kmo a udoud el sebechel el korekerengii a kmal kekerei er sel udoud el lulengereker er ngii er a belual er a England. Ngdilu el kmo: “Ngmle kirek el mesuub el mo diak di kungoit a udoud el omechar a soak el klalo. Me ak kerekikl el melilt a kall el kumechar e osiik er a stoang el beot a cheral a klalo er ngii. Sel lemetemall a kloklek e a kusiik a beot a cheral el klekedall e melasem el osiik er a chad el sebechel el ngosukak el rullii a kloklek.” Me a beot el rolel a klengar, ngera ngrirellii er ngii? Ngdmu el kmo: “Ngkmal mla ngosukak el mo medengei aike el meklou a ultutelel el tekoi er a klengar me sel rolel e ngsebechek el kiei el ousbech a mekesai el udoud me a klalo. Ngbetok el taem el mle sebechek el mesang a ulekerreuil a Jehovah el olengeseu er ngak er aike el kuusbech. Me ngar er a chelsel aike el euid el rak el kusiou el ngar er tia el beluu e ngdi blechoel el ngar er ngii a kelek me a blik.” Me ngklemerang el tekoi, a Jehovah a olengeseu er tirke el kiei el di beot a rolel a klengar er tir e le ngsorir el nguu a Renged el mo kot.​—Mt. 6:32, 33.

Oureng er a rechad er a blil. A Erica a dmu el kmo: “Ngkmal kmes a deleuill er ngak me a rechad er a blik me ak mle bekikl el kmo ak locha mo mekngit er a omesiungek e le ak kmal mo oureng er tir.” Me ngmilekerang? Ngdmu el kmo: “Uchei er a kulukl, e ak milenguiu aike el suobel er a Ongkerongel el mesaod el kirel sel bo doureng er a rechad er a blid. E tiang a kmal silsichii a renguk. Ngar er a ta er aika el suobel e a ta el chedil a ouchais el kirel a ulekerreuil a Jehovah el mo er a ngelekel el redil el kmo, ‘A Jehovah a lmuut el ungil el omekerreu er kau er ngak.’ Me tiang a kmal millisiich er ngak.” A Hannah me a Patrick a mesiou el ngar er a Majuro er a beluu er a Marshall. Sel taem el lebo el oureng er a rechad er a blil  a Hannah e ngmelasem el mo olengeseu er a rudam me a rudos er ngii er a chelsel a ongdibel e tiang a ngosuir el mo outekangel. Ngdmu el kmo: “Ak blechoel el mereng a sulel a Jehovah el kirel tia el klodam er kid e le tirkang a dirrek el telungalek er ngak. Oleko ngdiak lolengeseu er ngak e ngkmal diak el sebechek el mesiou el ngar er a beluu el ousbech a ngeso.”

A deleuill el obengterir a rechad. A Simon a dmu el kmo: “Sel bo mkiei er a ta er a beluu e ke omdasu el kmo a rokui el tekoi a di ngodech. A lebebil e ngmo mekngit a renguk e le ngmo diak el sebechek el oungelakel e le rechad a diak lodengelii a belkul a ngellekelek.” A Erica a kmo: “A uchelel e ak blechoel el mo melechesukak el ua lak a chad el soal el obengkek, engdi tiang a rirellak el mo omdasu er sel mera el uchul me ak mlei er tia el beluu. Ak millukl el diak el kirel a klungiolek e ngbai mo uchul e ak meruul a lmuut el betok el mo er a Jehovah. Me a cherengel a taem e ak ulemak a mekreos el deleuill er ngak el obengterir a rebebil.” A Simon a mle blak a rengul el mesuub a tekoi er a Belau, me ngmlo klou a techellel el oubltikerreng el mo er a rudam me a rudos er ngii er tia el beluu. (2 Ko. 6:13) Me a blakerreng er ngii el mesuub a tekingir a mlo uchul e a rudam a liluut el mo betik a rengrir er ngii. Ngmera el tekoi, a lsekum a chad el melukl me tirke el chad er sel beluu a mo ta rengrir el oureor e te rokui el mo ngmai a klengeltengat er a kmes el deleuill er tir er a chelsel a ongdibel. Me ngerang a bebil er a klengeltengat el sebechir el ngmai tirke el kongei el mo mesiou er aike el beluu el ousbech a ngeso?

A apostol el Paulus a kmo: “Ngikel betok a lolalem, a mo betok a loridm.” (2 Ko. 9:6) E tia el tekoi a klemerang el kirir tirke el menglou er a omesiungir. Me ngera el klengeltengat a “loridm” er a Micronesia?

Ngar er a Micronesia e ngkmal betok a techall el domuchel a omesubel a Biblia, e mesterir a rechad el olengeriakl er a omesiungir e le te mesuub e oltaut a Tekingel a Dios er a klengar er tir. A Patrick me a Hannah a dirrek el ulemerk er a klumech er a Ngeaur, el ngii a kekerei el beluu el di 320 a rechad er ngii. A uriul er a lomerk er a klumech er tia el beluu el eru el buil e te miltik er a ta el mesobil el chedil. Ngdi mle mereched el mo mesuub a Biblia, e kilengei er a klemerang e ngildechii a klengar er ngii. Me a Hannah a dilu el kmo: “Bek el taem el ki bo merek el mesuub e ki mngar er a rrat er kemam el merael el mo remei, e aki mo kasoues el terung e dmu el kmo: ‘Jehovah ke kmal mesaul!’ ” Ngdirrek a Hannah el dilechelii el kmo: “Ak medengei el kmo a Jehovah a sebechel el kursii ngika el redil el mo kmeed er ngii el okiu a kuk ta er a rolel, engdi kemam el mlo mesiou er a basio el ousbech a ngeso a uchul me ngmlo sebecham el metik er ngika el ua sib e ngosuir el mo medengelii a Jehovah. Me tiang a ta er a kot el ungil el tekoi el dilubech er a chelsel a klengar er kemam!” Me ngua lolekoi a Erica el kmo: “Ngkmal diak a deurreng el mo mekesiur sel deurreng er kau el mlo sebechem el ngosuir a chad el mo medengelii a Jehovah!”

Ngar er a betok el beluu e te dirk usbechall a rebetok el mo olengeseu er a ureor er a berkel a klumech er a Renged. Me kau ngsebechem el mo teloi er tirke el mo olengeseu aika el beluu? Moluluuch el olengit er a Jehovah me lluut el smisichii tia el urungulem el soam el menglou er a omesiungem. Mosaod er tia el tekoi el obengterir a remechuodel er a ongdibel, me ngike el odam el oldingel a ongdibel, me tirke el mla er ngii a techellir el mo mesiou aike el beluu el ousbech a ngeso. Me sel bocha lulterekokl a uldesuem el kmo ngsoam el melukl, e moluches el mo er a branch office el oungerachel er sel beluu el soam el mo mesiou er ngii e moker a lmuut el betok el tekoi el kirel. * Seikid e nglocha mo sebechem el teloi er a rebetok el telael el rudam me a rudos, el mekekerei me a remeklou, rebechiil me a remesobil, el tir a millilt el mo teloi er tia el rolel a omesiou el mo uchul me te ‘meridm a betok’ el klengeltengat.